Kellu jkun rapport tal-Vodafone dwar l-operazzjonijiet tagħha globali li nissel interess tal-istampa lokali dwar il-fatt li s-servizzi tas-sigurta’ f’Malta għandhom jew jista’ jkollhom aċċess għat-telefonati tagħna u/jew għal informazzjoni relatata għal dawn it-telefonati.
Dan l-aċċess hu permess mil-liġi kemm fil-ġlieda kontra l-kriminalita’ kif ukoll biex tiġi difiża s-sigurta’ tal-istat.
Ħadd m’hu jikkontesta li s-servizzi tas-sigurta’ għandu jkollhom dan id-dmir.
Id-diffikulta hi dwar x’kontrolli u x’verifika issir biex ikun assigurat illi jkun ġustifikat li jkun hemm dan l-aċċess. Il-liġi Maltija tagħti din l-awtorita’ lill-Ministru responsabbli mis-Servizz tas-Sigurta. Li qed jiġi propost fid-dibattitu pubbliku li qed jiżviluppa hu li m’għandux jibqa’ jkollu l-awtorita’ li jiddeċiedi jekk is-servizzi tas-sigurta’ għandux ikollhom dan l-aċċess, iżda li din l-awtorita’ għandha tgħaddi f’idejn il-Qrati. Għandhom ikunu l-Qrati ta’ Malta li jirċievu talba għal aċċess għal informazzjoni konnessa mat-telefonati u għandhom ikunu huma li jgħarblu jekk dan l-aċċess huwiex meħtieġ u neċessarju.
Dan id-dibattitu jinkwadra fid-dibattitu usa dwar id-dritt li għandu kull ċittadin għal privatezza tad-data diġitali privata dwaru, liema argument Alternattiva Demokratika żviluppat waqt il-kampanja elettorali għall-Parlament Ewropew. Sfortunatament, dakinnhar, kemm il-partiti politiċi l-oħra kif ukoll il-gazzetti u mezzi tax-xandir baqgħu siekta. Ftit ġimgħat ilu dan is-suġġett ma kien jinteressa lil ħadd!
Tajjeb li niftakru li l-Qorti Ewropeja tal-Ġustizzja fil-bidu t’April 2014 ħassret Direttiva Ewropeja dwar għal kemm żmien il-kumpaniji tat-telekomunikazzjoni għandhom iżommu data diġitali kif ukoll dwar min u kif għandu jkollu aċċess għal din id-data [Data Retention Directive]. Il-Qorti Ewropeja fil-waqt li fehmet il-ħtieġa li fl-interess tal-ġlieda kontra l-kriminalita jkun hemm aċċess mill-forzi tal-ordni ma qablitx li kien hemm biżżejjed garanziji għall-privatezza taċ-ċittadin.
Tajjeb li niftakru li minn żmien għal żmien ikun hemm allegazzjonijiet li l-forzi tas-sigurta’ jkunu abbużaw minn dan id-dritt ta’ aċċess. Per eżempju dan l-aħħar ġejna mfakkra li kien hemm dan is-suspett waqt il-kampanja referendarja dwar id-divorzju in konnessjoni mat-telfon ċellulari ta’ Varist Bartolo kif ukoll dak ta’ Jeffrey Pullicino Orlando.
Kien hemm każ ieħor li s’issa għadu ma ngħatx spjegazzjoni sodisfaċenti dwaru. Ma nafx kemm tiftakru x’ġara nhar it-Tnejn 14 ta’ Diċembru 2009, dakinnhar li Franco Debono ma kienx mar għal votazzjoni l-Parlament imbagħad f’daqqa waħda tfaċċa fil-Parlament skortat.
L-Orizzont ta’ nhar il-Ġimgħa 18 ta’ Diċembru 2009 kienet ippubblikat artiklu investigattiv ta’ John Pisani intitolat : “Intuża apparat tas-Servizz Sigriet biex instab Franco Debono nhar it-Tnejn. MISSJONI IMPOSSIBLI.”
Il-Gvern, dakinnhar kien ċaħad, imma din iċ-ċaħda ma kienet ikkonvinċiet lil ħadd.
Nistgħu nissugraw li jkun possibli li l-istat jispjuna fuqna b’dan il-mod?
ippubblikat fuq iNews nhar it-Tlieta 24 ta’ Ġunju 2014
Blog ta' Carmel Cacopardo 
Mela sew! L-ewwel nesiegu li persuni li japplikaw ghal IIP jistghu ikunu kriminali u allura ghandhom jigu kkontrollati, u mbaghad norbtu jdejn il-gvern li ma jkunx jista’ jikkontrolla persuni li jghixu Malta, inkluzi hafna barranin! Allura kif ha jaghmel il-gvern biex ikun jista’ jikkontrolla? Min m’ghandux faham miblul m’ghandux ghalfejn jikkonmfondi!
“jikkontrolla” ? Il-Gvern la ghandu id-dritt u l-anqas id-dmir li jikkontrolla. Hemm il-Korp tal-Pulizija u l-Qrati li jekk jithallew jahdmu jistghu jassiguraw l-ordni pubbliku.
Il-korp tal-pulizija jaghmel parti mill-gvern tal-gurnata elett demokratikament mill-poplu. Ir-risponsabilita tal-pajjiz hija tal-gvern. Ma jistax ikun li fejn jaqblilna nwahhlu fil-gvern, u fejn jaqblilna niggieldu biex innehhu poteri u naghmlu ostakoli lil Gvern li ma jhalluhx jikkumbatti kriminalita, etc. Huwa abbuz ta dan il-poter li huwa hazin!
il possibilita li dan il poter jista’ jigi abbuzat hija hafna akbar mill- possibiltatjiet l-ohra. Il-kontabilita trid tkun imsahha b’mod speciali f’ dawn ic-cirkostanzi. Mhux kollox mistur wara id mohbija…. jekk mhux aktar min id wahda !