L-iskandlu tal-Leisure Clothing: meta l-Gvern ta’ Lawrence Gonzi raqad.

 

Norman Vella, fil-blog tiegħu Mill-Venda, kiteb artiklu intitolat : L-iskandlu Leisure Clothing: Fil-GWU kien hemm min ilu jaf (30 t’Ottubru). Skond Norman Vella “xi snin ilu ġurnalist tal-gazzetta L-Orizzont kien beda jinvestiga l-abbuż tal-ħaddiema Ażjatiċi fil-fabbrika tal-Leisure Clothing. Dak iż-żmien fil-Gvern kien hemm il-Partit Nazzjonalista.”

L-emfasi ta’ Norman Vella fl-artiklu tiegħu hi li Tony Zarb tal-GWU jekk irid jista’ jkollu l-informazzjoni kollha mingħand il-ġurnalisti tal-Union Press. Hemm ukoll l-issue taċ-ċensura tal-ġurnalisti tal-Union Press mit-tmexxija tal-GWU.

Norman Vella fl-artiklu dwar l-abbużi fil-Leisure Clothing imkien ma jgħidilna għalfejn raqad il-Gvern tal-Lawrence Gonzi.

Kif inhu possibli li dakinnhar, ħlief il-ġurnalisti tal-GWU (li ġew iċċensurati) ħadd ma nduna b’xejn? Il-Gvern ta’ Lawrence Gonzi : kien rieqed u ma nduna b’xejn jew għalaq għajnejh? Liema minnhom?

Forsi l-ġurnaliżmu investigattiv ta’ Joe Mikallef tan-Nazzjon ikun jista’ jagħtina risposta. Jista’ jintervista lill-Ministri tax-Xogħol kollha li kellna tul is-snin li l-Leisure Clothing ilha topera f’Malta (mis-snin 80). Għaliex ħadd ma induna b’xejn tul dawn is-snin kollha?

F’wieħed mill-artikli ippubblikati fin-Nazzjon, Joe Mikallef qalilna li fl-2007 kien hemm investigazzjoni dwar il-Leisure Clothing liema investigazzjoni ma sabet xejn. Ikun interessanti li jkun eżaminat jekk dik l-investigazzjoni kienitx waħda li saret bis-serjeta’.  Jew forsi l-abbużi żviluppaw wara l-2007?

Issa naraw ftit jekk il-ġurnaliżmu investigattiv ta’ Joe Mikallef tan-Nazzjon hux ser jgħidilna ftit dwar dan ukoll.

Kummissarju għal Malta fi Brussels: raġel jew mara?

 

Il-ġimgħa l-oħra fl-Orizzont ġie miċħud li kien hemm xi ħsieb li l-Gvern Malti jibdel in-nomina ta’ Karmenu Vella għal Kummissarju Ewropew billi jinnomina mara għall-ħatra floku. L-Orizzont f’artiklu ippubblikat nhar is-Sibt 30 t’Awwissu 2014 iffirmat minn Jake Azzopardi w intitolat Miċħud rapport li ser tiġi nominata mara flok Karmenu Vella jirraporta dak li qal ġurnal fil-Croatia u jiċħad l-istess rapport.

It-Times tal-bieraħ it-Tlieta 2 ta’ Settembru 2014 iġġib il-boċċa ftit iktar qrib il-likk. Tgħidilna li qed issir pressjoni fuq il-Gvern Malti biex flok Karmenu Vella jinnomina mara bħala Kummissarju Ewropew. Din il-pressjoni qed issir mhux biss fuq il-Gvern Malti imma ukoll fuq diversi Gvernijiet oħra. Jean-Claude Junker irid ta’ l-inqas 9 Kummissarji nisa minn fost is-27 Kummissarju li flimkien miegħu ser jiffurmaw il-Kummissjoni Ewropeja l-ġdida. S’issa għad m’għandux 9 Kummissarji nisa. Għandu 6 biss  u ċjoe l-Kummissarji nominati mid-Danimarka, mill-Iżvezja, ir-Repubblika Ċeka, l-Italja, Ċipru u l-Bulgarija. Jonqsu ta’ l-inqas tlett Kummissarji nisa oħra u għalhekk qed issir pressjoni “diplomatika” mit-team ta’ madwar Junker fuq diversi pajjiżi, fosthom fuq Malta biex tinbidel in-nomina ta’ Karmenu Vella. Għax Malta hu wieħed minn dawk il-pajjiżi li sal-lum qatt ma nnominaw mara ghall-post ta’ Kummissarju Ewropew.

Waqt il-kampanja għall-Presidenza tal-Kummissjoni Ewropeja Jean-Claude Junker wiegħed lill-Membri tal-Parlament Ewropew li fil-Kummissjoni mmexxija minnu mhux ser ikun hemm inqas nisa milli kien hemm fil-Kummissjoni Barroso II. Issa din il-wegħda qatt ma seta jkun f’posizzjoni li jwettaqha għax in-nomini ma jsirux minnu, iżda mill-Gvernijiet. Imma din id-dikjarazzjoni kienet “commitment” politiku ta’ Junker li issa jidher li qed  tinkwetah.

Fil-Parlament Ewropew il-Ħodor u s-Soċjalisti diġa iddikjaraw li jekk ma jkunx hemm biżżejjed nisa maħtura fuq il-Kummissjoni Ewropeja ma kiexux lesti biex jivvutaw favur il-Kummissjoni. Il-Liberali għal raġunijiet oħra ukoll iddikjaraw vot kuntrarju. Bil-konservattivi, il-lemin estrem, l-ewroxettiċi u oħrajn ukoll jivvutaw kontra l-approvazzjoni tal-Kummissjoni, Jean-Claude Junker jista’ jkun li qiegħed f’diffikulta li jkollu l-Kummissjoni approvata u għaldaqstant qed jipprova jsalva dak li jista’. Għalhekk il-pressjoni fuq il-Gvern Malti biex flok Karmenu Vella tkun innominata mara. Għax mingħajr ta’ l-inqas 9 Kummissarji nisa, jista’ jkun hemm il-periklu li l-Kummissjoni ma tkunx approvata mill-Parlament Ewropew.

Id-diffikulta’ li għandu Joseph Muscat hi li hu għaġġel wisq biex ħatar lil Karmenu Vella. Hu ovvju li l-ħatra ta’ Karmenu Vella saret minħabba l-ħtiġijiet taċ-ċess politiku lokali. Kif wara kollox isir f’pajjiżi oħra ukoll.

Seta, kieku ried, Joseph Muscat ħalla d-deċiżjoni għal iktar tard biex ikollu stampa iktar kompleta ta’ x’jaqbel mhux biss għalih u għall-Partit Laburista, imma ukoll x’jaqbel għall-pajjiż. Hemm xi pajjiżi li għamlu eżattament hekk u ppreżentaw in-nomina tagħhom f’dawn l-aħħar jiem.

Matul il-ġimgħa d-dieħla inkunu nafu liema huma dawk il-pajjiżi li reġgħu ħasbuha u bagħtu mara flok raġel fil-Kummissjoni Ewropeja. Minkejja ċ-ċaħdiet kollha li saru hu possibli li wara kollox Karmenu jibqa’ Birżebbuġa u Brussels imur xi ħaddieħor floku. Jiddependi minn ħafna affarijiet. Fi Brussels għandhom ħabta kif dak li jidher impossibli jsir ftehim dwaru f’ħakka t’għajn, minkejja dak kollu li jkun ilu jingħad!

Imma dwar x’ser jiġri eżatt irridu nistennew ftit ieħor. Wara kollox anke Joseph jista’ jibdel l-opinjoni tiegħu jekk jidhirlu li jkun hemm raġuni valida biex jagħmel dan.

Meta s-Servizz tas-Sigurta mar Ħal-Għaxaq: 14 ta’ Diċembru 2009

 

Rapport ippubblikat fl-Orizzont ta’ nhar il-Ġimgħa 18 ta’ Diċembru 2009 kien jgħid hekk:

ESKLUSSIV: Intuża apparat tas-Servizz Sigriet biex instab Franco Debono

MISSJONI POSSIBBLI!

miktub minn John Pisani

 

Il-paniku li ħakem in-naħa tal-Gvern nhar it-Tnejn li għadda fil-Parlament meta ma setax jinstab id-Deputat Franco Debono wassal biex tintalab l-għajnuna urġenti tas-Servizz Sigriet Malti (MSS) ħalli seta’ jiġi lokalizzat. Il-każ kompla jin­kwieta lill-Partit Naz­zjonalista l-aktar wara r-rapporti tal-bieraħ fil-midja, fosthom l-orizzont, fejn ġie żvelat li l-Prim Ministru Lawrence Gonzi u martu Kate marru personalment fir-residenza tal-Avukat Debono f’Ħal Għaxaq. Sorsi li tkellmu magħna qalu li meta t-Tnejn kien se jittie­ħed il-vot fil-Parlament u d-Deputat Nazzjo­nalista deher ħiereġ mill-bini tal-Parlament, il-paniku kien ċar min­ħab­ba li l-Gvern ma kellux maġġoranza. Wara għadd ta’ ten­tattivi biex jinstab, par­ti­ko­lar­ment mill-Whip David Agius, li rriżultaw kollha fin-negattiv u bil-ħin għaddej, xi ħadd iddeċieda li tintalab l-assistenza tas-Serivzz Sigriet biex permezz ta’ apparat sofistikat jiġi lokalizzat l-Avukat Debono. Is-sorsi qalulna li dan l-apparat li għandhom l-MSS kapaċi jintraċċa l-post eżatt tal-mowbajl tal-individwu u jkunu jafu, jekk is-sett tal-mowbajl ikun fuqu, fejn ikun dak il-ħin. Kif Franco Debono kien interċettat marru għalih l-istess Pulizija tas-Servizz Sigriet.

X’aktarx li Debono jew ma kienx jaf li jeżisti dan l-apparat jew qatt ma stenna li l-Partit Nazzjonalista kien daqshekk iddisprat li kellu jirrikori għas-Servizz Sigriet biex jittieħed lura lejn il-Parlament. Dan jiġġustifika għaliex Franco Debono deher fiżakment jirtogħod u palidu waqt li kien dieħel fil-Parlament. Kif twassal fil-Palazz tal-President deher jitkellem mad-Deputati Nazzjonalisti Jesmond Mugliett, Robert Arrigo u Jeffrey Pullicino Orlando u wara resaq lejhom David Agius. Wieħed mill-membri tas-Servizz Sigriet baqa’ jistenna isfel filwaqt li ieħor deher għal xi ħin qrib it-taraġ li jagħti għall-Kamra tar-Rappreżentanti imma telaq minn hemm wara li kien hemm diversi persuni jħarsu lejh u ħassu skomdu. Is-sorsi qalulna li dawn iż-żewġ Pulizija baqgħu hemm sakemm intemmet is-seduta kollha tal-Parlament u sakemm ittieħed l-aħħar vot bi Franco Debono fil-Kamra li vvota favur il-Gvern u ma kienx hemm bżonn il-vot tal-Ispeaker Louis Galea biex salva wiċċ il-Gvern.

 

Meta jfittxu l-passi tagħna

Kellu jkun rapport tal-Vodafone dwar l-operazzjonijiet tagħha globali li nissel interess tal-istampa lokali dwar il-fatt li s-servizzi tas-sigurta’ f’Malta għandhom jew jista’ jkollhom aċċess għat-telefonati tagħna u/jew għal informazzjoni relatata għal dawn it-telefonati.

Dan l-aċċess hu permess mil-liġi kemm fil-ġlieda kontra l-kriminalita’ kif ukoll biex tiġi difiża s-sigurta’ tal-istat.

Ħadd m’hu jikkontesta li s-servizzi tas-sigurta’ għandu jkollhom dan id-dmir.

Id-diffikulta hi dwar x’kontrolli u x’verifika issir biex ikun assigurat illi jkun ġustifikat li jkun hemm dan l-aċċess. Il-liġi Maltija tagħti din l-awtorita’ lill-Ministru responsabbli mis-Servizz tas-Sigurta. Li qed jiġi propost fid-dibattitu pubbliku li qed jiżviluppa hu li m’għandux jibqa’ jkollu l-awtorita’ li jiddeċiedi jekk is-servizzi tas-sigurta’ għandux ikollhom dan l-aċċess, iżda li din l-awtorita’ għandha tgħaddi f’idejn il-Qrati. Għandhom ikunu l-Qrati ta’ Malta li jirċievu talba għal aċċess għal informazzjoni konnessa mat-telefonati u għandhom ikunu huma li jgħarblu jekk dan l-aċċess huwiex meħtieġ u neċessarju.

Dan id-dibattitu jinkwadra fid-dibattitu usa dwar id-dritt li għandu kull ċittadin għal privatezza tad-data diġitali privata dwaru, liema argument Alternattiva Demokratika żviluppat waqt il-kampanja elettorali għall-Parlament Ewropew. Sfortunatament, dakinnhar, kemm il-partiti politiċi l-oħra kif ukoll il-gazzetti u mezzi tax-xandir baqgħu siekta. Ftit ġimgħat ilu dan is-suġġett ma kien jinteressa lil ħadd!

Tajjeb li niftakru li l-Qorti Ewropeja tal-Ġustizzja fil-bidu t’April 2014 ħassret Direttiva Ewropeja dwar għal kemm żmien il-kumpaniji tat-telekomunikazzjoni għandhom iżommu data diġitali kif ukoll dwar min u kif għandu jkollu aċċess għal din id-data [Data Retention Directive]. Il-Qorti Ewropeja fil-waqt li fehmet il-ħtieġa li fl-interess tal-ġlieda kontra l-kriminalita jkun hemm aċċess mill-forzi tal-ordni ma qablitx li kien hemm biżżejjed garanziji għall-privatezza taċ-ċittadin.

Tajjeb li niftakru li minn żmien għal żmien ikun hemm allegazzjonijiet li l-forzi tas-sigurta’ jkunu abbużaw minn dan id-dritt ta’ aċċess. Per eżempju dan l-aħħar ġejna mfakkra li kien hemm dan is-suspett waqt il-kampanja referendarja dwar id-divorzju in konnessjoni mat-telfon ċellulari ta’ Varist Bartolo kif ukoll dak ta’ Jeffrey Pullicino Orlando.

Kien hemm każ ieħor li s’issa għadu ma ngħatx spjegazzjoni sodisfaċenti dwaru. Ma nafx kemm tiftakru x’ġara nhar it-Tnejn 14 ta’ Diċembru 2009, dakinnhar li Franco Debono ma kienx mar għal votazzjoni l-Parlament imbagħad f’daqqa waħda tfaċċa fil-Parlament skortat.

L-Orizzont ta’ nhar il-Ġimgħa 18 ta’ Diċembru 2009 kienet ippubblikat  artiklu investigattiv ta’ John Pisani intitolat : “Intuża apparat tas-Servizz Sigriet biex instab Franco Debono nhar it-Tnejn. MISSJONI IMPOSSIBLI.”

Il-Gvern, dakinnhar kien ċaħad, imma din iċ-ċaħda ma kienet ikkonvinċiet lil ħadd.

Nistgħu nissugraw li jkun possibli li l-istat jispjuna fuqna b’dan il-mod?

 ippubblikat fuq iNews nhar it-Tlieta 24 ta’ Ġunju 2014

Mhux biss l-imħallfin ……………..

L-ewwel aħbar interessanti ippubblikata din is-sena hi ta’ investigazzjoni fl-Italja dwar ħasil ta’ flus. Ir-rapporti ġew ippubblikati fil-media tal-GWU, fl-Orizzont u f’iNews u jirrigwardaw żewg persuni afdati sewwa mill-Gvern ta’ Lawrence Gonzi. Żewġ persuni li kienu għodda li intużaw fid-diversi postijiet fejn inħatru matul dawn l-aħħar snin.

Il-posizzjoni li għadhom qed jokkupaw dawn iż-żewġ persuni fil-Malta Enterprise u Transport Malta jirrikjedu azzjoni immedjata min-naħa tal-Gvern.

Mhux biss l-imħallfin jixħtu d-dellijiet meta jkunu taħt investigazzjoni!

Dalgħodu fuq l-Orizzont

L-Orizzont illum għoġobhom jippubblikaw kummentarju dwar il-każ tal-isptar St Philip ibbażata fuq dak li nikteb fuq il-blog tiegħi.  Dik hi għażla tagħhom u għandhom kull dritt li jagħmlu hekk għax l-informazzjoni hi aċċessibli b’mod liberu.

L-Orizzont jippreferu jirreferu għalija bħala ex-President tal-PN (kont fil-fatt President tal-Kunsill Amministrattiv tal-PN fis-snin 90) imma jinsew li illum jiena Viċi Chairman ta’ Alternattiva Demokratika. Dan ma jagħmluħx bi svista iżda b’intenzjoni politika li jnaqqsu referenzi kemm jistgħu għal Alternattiva Demokratika.

Qaluli ukoll li fuq Tvam dal-għodu b’intervista fuq it-telefon Frank Portelli kullma qal kien li jiena qed jikkritikah għax ma’ għamiltx ix-xogħol jien dwar valutazzjoni ta’ propjeta konnessa mal-isptar. It-tweġiba tiegħi lil Frank hi waħda sempliċi. Kont nagħmlu iktar serju minn hekk.  Jiena f’dak li għidt illimitajt ruħi għall-fatti li bil-gżuż ta’ ġurnalisti investigattivi jiġru mas-saqajn qiesu ħadd ma nduna bihom! Jew jekk indunaw għamlu ta’ bir-ruħhom li ma ndunawx.

Dak li qed jiġri in konnessjoni mal-Isptar St Philip’s hu tal-mistħija u kont nistenna li persuna li kontinwament titkellem fuq il-ħtieġa ta’ tmexxija sewwa (good governanace) tkun konsistenti.

Dak li ktibt dwaru jiena, sfortunatament il-ġurnalisti stabiliti injorawh għal ġimgħat sħaħ. Ikun tajjeb kieku jwieġbu ftit u jispjegaw għaliex qadu jistennew lili u l-blog tiegħi!

Verament ġurnaliżmu fuq kollox!

Il-Parlament u l-MEPA

24 ta’ Frar 2010

________________________________________________________

Matul il-ġranet li ġejjin fil-Parlament se tibda d-diskus­sjoni dwar ir-riforma tal-MEPA.

Meta teżamina l-proposti li l-Gvern qiegħed jippreżenta biex jemenda l-liġi biex jagħti bidu għar-riforma tal-MEPA ssib li l-iktar affarijiet essenzjali huma neqsin. Dan ta’ bilfors iwassal għal mistoqsija, allura din x’riforma se tkun?

Jien dejjem sostnejt li għalkemm dejjem se jkun hemm x’tirranġa fil-MEPA, il-problema fundamentali mhumiex il-‘policies’ iżda min jinterpretahom. Jiġifieri kemm ikunu kapaċi jaqdu dmirhom il-membri li jinħatru fuq il-Bord u l-Kummissjonijiet tal-MEPA.

Għaġina

Mhux waħdi li smajt l-istejjer dwar x’ġara fil-passat, kemm riċenti kif ukoll imbiegħed. Ħafna minnhom huma pubbliċi. Uħud minnhom huma pruvabbli, oħrajn diffiċli ħafna li ssib il-provi dwarhom għax il-kobba mħabbla sew.

Il-punt dejjem hu jekk min jinħatar huwiex ta’ fibra. Sfortunatament dan mhux dejjem kien il-każ u għalhekk il-MEPA hi fl-istat li hi llum. Għax filwaqt li min inħatar mhux dejjem għaraf jirreżisti għall-pressjoni, sfortunatament kien hemm min inħatar apposta biex iservi ta’ ‘remote control’ għal ħaddieħor. F’dan il-każ il-kwalifika prinċipali tiegħu kienet li kien kapaċi jkun għaġina f’idejn ħadd­ieħor.

Il-funzjoni

X’inhi l-funzjoni tal-MEPA? Fil-fehma tiegħi l-MEPA għandha tkun il-garanti tal-komunità kollha li l-oqsma li għalihom hi responsabbli jitmexxew sew. Sfortunatament bosta drabi l-MEPA dehret kompliċi biex ikun hemm min tgħaddi tiegħu minkejja kollox. Il-messaġġ li ħareġ kien wieħed ċar ħafna, li minkejja l-formalitajiet u r-regoli kollha, id-deċiżjonijiet il-kbar u l-iktar iebsin, diversi drabi kellhom tiċpisa partiġ­ġjana. Jiġifieri iktar minn deċiżjonijiet li dwarhom kien hemm ġustifikazzjoni teknika ambjentali u ta’ ppjanar fl-użu tal-art, fejn kien hemm ġbid lejn il-politika tal-Gvern tal-ġurnata.

Hu dan li r-riforma teħtieġ li tindirizza u dan fil-fatt qiegħed jiġi injorat apposta, bi ħsieb.

Rieda tajba

Il-ħatra tal-membri tal-Bord tal-MEPA hi ta’ importanza fundamentali fl-eżerċizzju kollu li qiegħed isir.

Għax anke jekk nikkonċedi rieda tajba fil-proċess kollu tar-riforma, jekk din ir-rieda tajba tissarrafx jew le, se jiddependi minn bnedmin tad-demm u l-laħam li ma jkunux lesti li jitgħawġu. Kif se jsir dan?

Il-Parlament

Il-Bord tal-MEPA ma jistax jaħtar lilu nnifsu! Alternattiva Demokratika sa minn qabel l-elezzjoni tal-2008, kienet ipproponiet li l-Parlament għandu jkollu rwol ikbar fil-mod kif jintgħażlu n-nies li jmexxu l-MEPA. Il-Parlament għandu jiżviluppa rwol bħal dak tas-Senat Amerikan li jagħrbel u japprova ħatriet ta’ importanza nazzjonali, anke jekk in-nomini jibqgħu jsiru mill-Gvern tal-ġurnata. Naħsbu li l-Gvern m’għandux jaħtar bħala membri tal-Bord tal-MEPA persuni li dwarhom, il-Kumitat Magħżul tal-Parlament dwar l-Ambjent u l-Ippjanar ikollu diffikultà.

Id-diffikultà tista’ tkun kemm dwar kompetenza kif ukoll dwar sebgħa dritt.

Għandu jkun possibli li l-Parlament permezz tal-Kumitat Magħżul dwar l-Ambjent u l-Ippjanar jgħarbel fil-pubbliku lil dawk li jkunu se jinħatru. Hekk pereżempju jintgħażlu l-Ambax­xaturi kollha li taħtar l-Istati Uniti tal-Amerika, jinnominahom kollha l-President u jikkonfermahom is-Senat permezz ta’ wieħed mill-Kumitati tiegħu. Fl-Istati Uniti dan isir għall-ambaxxaturi kollha, anke għall-membri tal-Kabinett u għal uħud mill-organizzazzjonijiet tal-Istat Federali.

Jekk għandna nikkopjaw għandna nibdew nikkopjaw sistemi li ġew imfasslin apposta biex l-eżerċizzju tal-poter tal-ħatriet ikun imrażżan. Jekk min jaħtar jagħraf li ħatra importanti trid qabel ma sseħħ tgħaddi mill-passatur tal-opinjoni pubblika, jaħsibha darbtejn dwar min iressaq ’il quddiem. B’hekk forsi jkollna nies fit-tmexxija li jkunu aċċettabbli għal firxa iktar wiesa’ mill-popolazzjoni.

Dan hu rwol importanti li fil-fehma tal-Alternattiva Demokratika għandu jkollu l-Parlament ta’ Malta. Hu aktar importanti milli jibqa’ jaħtar żewġ membri minn tiegħu (kif jagħmel sal-lum) bħala membri tal-Bord tal-MEPA.

Naħseb li l-Membru Parlamentari m’għandux jinvolvi ruħu f’deċiżjoni dwar liema permess għandu joħroġ u liema għandu jinżamm. Iktar importanti li l-Membru Parlamentari jara li dawk li jinħatru jkunu kapaċi jimxu sew. Sfortunatament dan s’issa la sar u lanqas m’hemm il-ħsieb li jsir.

Iżda jekk dan isir, ir-riforma tkun tista’ tagħti l-frott. Jekk le, naħseb li se nibqgħu fejn aħna.

Il-MEPA

Id-Dipartiment tal-Informazzjoni ħareġ dan l-avviż.  

AVVIŻ LILL-PUBBLIKU DWAR APPLIKAZZJONIJIET GĦAL ŻVILUPP  

Il-pubbliku huwa mgħarraf li l-laqgħat fil-pubbliku tal-Bord ta’ l-Awtorita’ ta’ Malta dwar l-Ambjent u l-Ippjanar, u tal-Kummissjonijiet għall-Kontroll ta’ l-Iżvilupp huma kollha sospiżi sakemm joħroġ avviż ieħor. Dan jgħodd ukoll għas-seduti tal-Bord dwar l-Appelli dwar l-Ippjanar. Dan ifisser li, sakemm jinħareġ avviż ieħor, ma huma se jittieħdu l-ebda deċiżjonijiet dwar applikazzjonijiet għal żvilupp.   

Dr Godwin Grima

Segretarju Permanenti Ewlieni

DOI – 12.03.2008  

Dan l-avviż ma jispjegax għaliex.

Il-pubbliku kien jixraqlu ftit iktar informazzjoni minn hekk.

Fil-fatt L-Orizzont tal-lum ħasbet hekk ukoll.  Il-gażżetti l-oħra ma ġiethomx il-kurżita’ dwar x’ġara. L-Orizzont f’artiklu ta’ Charmaine Craus intitolat Sospiżi l-Bordijiet kollha tal-MEPA tirrapporta li skond il-prattika normali dawn il-Bordijiet kollha issottomettew ir-riżenja tagħhom. Jidher li r-riżenja ġiet aċċettata.

George Pullicino biss ?

                                 

Huwa korrett l-editorjal tal-Orizzont illum meta jistaqsi : Pullicino biss huwa responsabbli ?  Dak li ilu jingħad żmien twil suppost li semgħu kulħadd. L-Uffiċċju tal-Verifika tal-MEPA (Audit Office) fiż-żmien li kont naħdem fih jiena ħejja madwar 300 rapport dwar diversi aspetti tal-operat tal-MEPA. Uħud fuq affarijiet żgħar, iżda oħrajn fuq materji ta’ prinċpju.L-Uffiċċju tal-Verifika poġġa l-ħidma tal-MEPA taħt il-lenti u għamel bosta rakkomandazzjonijiet dwar kif il-ħidma tal-Awtorita’ tista’ titjieb b’mod sostanzjali. Iżda fuq ħafna affarijiet qiesna konna qed nitkellmu mal-ħajt. Għalhekk ġejt imwarrab mill-ħidma li kont qiegħed nagħmel. Għax l-investigazzjonijiet li mexxejt identifikaw id-difetti u f’xi każi min kien responsabbli għalihom. F’dawn iċ-ċirkustanzi, Lawrence Gonzi (li kif jaf għandi rispett kbir lejh fuq livell personali) kull ma jista’ jagħmel hu li jdur fuq il-mera, iħares sew jipponta sebgħu u jgħid : ħtija tiegħek. George Pullicino għandu responsabbilta’ kbira għall-qagħda attwali tal-MEPA għax ilu politikament responsabbli għaliha b’mod dirett sa minn Settembru 1998 meta kien għadu Segretarju Parlamentari taħt Tonio Borg. Gonzi iżda wieżnu u huwa responsabbli daqsu għal dak li ġara. Il-piż iridu jġorruh it-tnejn. M’hemmx dubju li nhar it-8 ta’Marzu 2008 ser jifhmu sew x’inhuma jħossu n-nies. 

Le Ghall-Korruzzjoni

L-editorjal tal-Orizzont illum apprezzajtu ghax jassocja ruhu mal-glieda politika li qieghed naghmel permezz tal-impenn tieghi fl-Alternattiva Demokratika. L-unika haga li kien jonqsu jghid kien li jiena ghazilt l-AD bhala l-mezz tal-impenn tieghi.

Hija biss l-AD fil-Parlament bhala t-tielet Partit li tista’ toffri garanzija lil dan il-pajjiz kontra l-arroganza tal-poter kif gestit sal-lum.

L-azzjoni li ttiehdet kontra tieghi f’April 2007 meta ma ggeddidx il-kuntratt tieghi bhala ufficjal investigattiv fl-Ufficcju tal-Verifika tal-MEPA kienet manuvra ikkalkulata biex taghlaq halq l-Ufficjal tal-Verifika (Audit Officer) tal-MEPA billi taqta’ barra l-id il-leminija tieghu.

L-istorja kollha ghad ma nkitbitx. Fosthom ghad trid tinkiteb pagna dwar ir-rwol tal-Ombudsman fil-materja li b’mod fin hafna indahal fl-istorja. Bhala konsegwenza jiena infurmat li gie imblukkat kompletament id-dhul tieghi lura fl-Ufficcju tal-Verifika.

L-Ombudsman kellu fil-fehma tieghi jassumi rwol li bih jiggarantixxi l-indipendenza tal-Ufficcju tal-Verifika. Minflok il-passi li ha ghandhom effett ferm differenti.