Il-kollass tat-Tieqa tad-Dwejra tagħtina messaġġ wieħed u ċar. Messaġġ li ilu magħna, għalkemm bosta ma jagħtux kasu għax ma jaqblilhomx.
Man-natura ma hemmx ċajt. Din tagħmel ta’ rasha, dejjem.
Ftit li xejn seta sar biex it-tieqa tkun ippriservata għax dak li kien qed iseħħ hu riżultat tal-forzi naturali.
Imma ma jistax jingħad l-istess dwar il-bidla tal-klima. Din hi fil-parti l-kbira tagħha prodott tal-ħidma tagħna l-bnedmin. L-istudji kollha juru li s-sitwazzjoni qegħda tmur dejjem għall-agħar.
L-impatt fuq il-klima nħossuh kuljum. Il-frekwenza tal-estremi ta’ temp qed jiżdiedu: żdiedu l-perjodi ta’ nixfa fix-xitwa u xita fis-sajf.
L-impatti fuq in-natura bl-emmissjonijiet kemm minn impjanti industrijali kif ukoll minn mezzi differenti ta’ transport issa ilhom jakkumulaw is-snin. Qed naraw b’għajnejna l-effetti li kull ma jmur qegħdin jiżdiedu.
L-istudji juru li qed noqorbu lejn sitwazzjoni ta’ irriversabilitá. Jiġifieri sitwazzjoni fejn ma nkunux nistgħu nreġġu lura l-impatti u l-ħsara akkumulata.
Imbagħad ikun inutli neqirdu dwar dak li ġara għax kuntrarjament għal dak li ġara lit-Tieqa tad-Dwejra, inkunu ġibnieh b’idejna. Dan hu l-messaġġ tat-Tieqa tad-Dwejra.
Blog ta' Carmel Cacopardo 