Mosta : 38,600 metri kwadri oħra għall-bini

 

ø

 

Iktar kmieni dal-għodu f’konferenza stampa fil-periferija tal-Mosta, ħdejn it-Torri Cumbo, Alternattiva Demokratika reġgħet semmgħet leħinnha dwar żvilupp żejjed u l-qerda tar-raba.

L-art li se tintmiss din id-darba fiha qies ta’ madwar 38,600 metru kwadru. Dwarha l-Awtorità tal-Ippjanar nhar it-Tnejn li ġej se tiddeċiedi dwar x’tip ta’ żvilupp se jkun possibli fuqha.

L-aħħar ċensiment li sar fl-2011 kien żvela li minn 8359 residenza fil-Mosta, 16.2% kienu vakanti u 3.2% oħra kienu użati okkazjonalment. Allura għalfejn l-awtoritiajiet kontinwament jinkoraġġixxu żvilupp massiċċ?

Din hi medda oħra ta’ art li fl-2006 l-Gvern ta’ dakinhar kien iddeċieda li tista’ tinbena. Dakinhar il-Partit Laburista fil-Parlament kien ivvota kontra u l-Partit Nazzjonalista kien ivvota favur din il-qerda.

L-Awtorità tal-Ippjanar se tikkonsidra l-applikazzjoni PC 039/09 li biha f’din iż–żona se jkun permess żvilupp ta’ tliet sulari u semi-basement b’bini ta’ għoli ta’ 17.50 metru minn wiċċ it-triq. L-art hi mqassma fi 93 plot individwali u 8 biċċiet oħra ta’ art li s’issa ma ġewx imqassma fi plots. Din l-art, meta tinbena tista’ iżżid numru konsiderevoli ta’ propjetajiet vojta ma dawk li diġa hemm.

Bħal din l-art hemm medded oħra ta’ art li kemm-il darba tkellimna fuqhom, inkluż fi Triq Dun Mikiel Xerri, fit-tarf ta’ Ħ’Attard.

Alternattiva Demokratika tistieden lill-Partit Laburista li fl-2006 ivvota kontra l-iżvilupp ta’ din l-art u oħrajn bħalha, biex ikun konsistenti u jieħu l-passi neċessarji, dejjem sakemm ma reġax bdielu, issa li qiegħed fil-Gvern.