Għamlet tajjeb il-Kummissjoni Elettorali li waqqfet Bord biex jinvestiga l-allegazzjonijiet dwar nuqqas ta’ osservanza tal-liġi dwar il-finanzjament tal-partiti politiċi.
Bla dubju, l-kummissjoni innifisha għandha diffikultá biex taġixxi u dan minħabba l-mod kif inhi komposta.
Il-Kummissjoni għandha quddiemha tlett każi x’tinvestiga.
L-ewwel kaz hu dak li ressqet l-Alternattiva Demokratika dwar l-użu mill-Grupp Parlamentari Laburista ta’ propjetá pubblika għal-laqgħat tiegħu. B’mod partikolari dwar l-użu riċenti tal-Palazz tal-Girgenti għal laqgħa tal-grupp.
It-tieni kaz imressaq mill-Partit Laburista hu dak dwar id-donazzjonijiet mill-kumpaniji ta’ Silvio Debono li qed jingħad li ġew moħbija taħt invoice jew invoices foloz u li għaddew għand il-kumpanija Media Link Communications tal-Partit Nazzjonalista.
It-tielet kaz hu dak li ressaq il-PN li hu huwa dwar kif numru mdaqqas ta’ persuni li jagħtu kontribut sostanzjali fil-media tal-Partit Laburista huma impjegati mal-Gvern jew korpi governattivi b’mod li jidher li dawn qed jitħallsu mill-Gvern waqt li qed jagħmlu xogħol għall-partit!
Bejniethom dawn it-tlett kazi li għandhom ikunu investigati jmissu firxa wiesgħa tal-ħajja pubblika u kull konklużjoni li l-investigazzjoni tista’ tasal għaliha ser ikollha konsegwenzi gravi.
Nistennew li kulħadd jagħmel dmiru.
Blog ta' Carmel Cacopardo 