Salvu Mallia f’pajjiż tal-Mickey Mouse

 

Salvu Mallia ħadha bi kbira li l-programm tiegħu Madwarna mhux ser ikun parti mill-iskeda tal-ħarifa ta’ TVM. Ma ntagħżilx għall-iskeda li jmiss, bħal Times Talk. Ta’ Times Talk min-naħa l-oħra kienu qed jistennewha! Għax rifsu l-kallijiet.

Salvu Mallia kellu l-istil tiegħu li, għalkemm mhux bilfors jogħġob lil kulħadd kien kapaċi jwassal messaġġ ta’ apprezzament dwar dak kollu li hawn madwarna. Messaġġ li kien jinftiehem minn uħud li soltu ma jagħtux każ. U għalhekk laħaq uħud li forsi ma ntlaħqux qabel.

Jiena ma naħsibx li Salvu Mallia u Times Talk jippretendu li jkollhom ċens perpetwu fuq TVM. Kif inhu xieraq, iċ-ċens perpetwu hu riżervat għal programmi ta’ kwalità għolja ħafna. Probabbilment li ġie meqjus illi Times Talk u l-programm ta’ Salvu Mallia għalkemm kienu tajbin ma laħqux il-livell għoli ħafna ta’ programmi bħal Realtà.

Għax ngħiduha kif inhi, biex iżżomm fuq l-iskeda programm bħal Realtà, bilfors li tkun tikkunsidrah bħala programm ta’ kwalità għolja ħafna.

Ovvjament dan ifisser li ma nifhmux l-istess ħaġa meta ngħidu “kwalità għolja”. Imma dawn huma l-konsegwenzi li ngħixu f’pajjiż tal-Mickey Mouse.

L-intenzjonijiet tajba ta’ Konrad

Konrad Mizzi, l-bieraħ waqt Timestalk għamel pass żgħir il-quddiem: aċċetta li d-deċiżjoni tiegħu (anke jekk fuq parir tal-konsulenti Nexia BT) li jiftaħ kumpanija fil-Panama kienet deċiżjoni ħażina. An error of judgement.

Din id-deċiżjoni ħażina imma, ma tistax tħares lejha b’mod iżolat. Trid inevitabilment taraha f’kuntest iktar wiesgħa li jinkludi taħdidiet dwar negożju mal-iktar Gvern korrott tad-dinja (l-Azerbaijan) minn delegazzjoni tal-Gvern Malti magħmula biss minn politiċi u l-assistenti tagħhom maħtura fuq bażi ta’ fiduċja (position of trust).

Huwa minħabba dan li l-eżistenza tal-kumpaniji ta’ Konrad Mizzi u Keith Schembri qanqlu r-reazzjoni li żviluppat f’dawn il-ġimgħatejn.

Konrad isostni li għamel kollox b’intenzjoni tajba. Imma sfortunatament, anke kieku dan kien minnu, l-ammissjoni ta’ deċiżjoni żbaljat (error of judgement) tfisser li Konrad ma għarafx il-konsegwenzi gravi ta’ din id-deċiżjoni.

Din id-deċiżjoni effettwat il-kredibilità tiegħu, għax diffiċli biex temmen dak li qed jgħid. Għandha effett ukoll fuq il-kredibilità tal-Gvern li tiegħu Konrad hu Ministru ewlieni.

Huwa għalhekk li jiena għidt li l-unika triq li kellu Konrad kienet li minn jeddu jirriżenja. Dan ikun pass kemm fl-interess ta’ Konrad innifsu kif ukoll fl-interess tal-Gvern stess.

Huwa fuq passi bħal dan li tinbena t-tmexxija tajba (good governance). Għax jekk il-politiku mhux kapaċi jerfa’ l-konsegwenzi tad-deċizjonijiet tiegħu, ikun inutli li joqgħod jlablab dwar good governance.