Malta: Repubblika tal-Banana fil-Mediterran

The Banana Republic of Malta

Bil-mod il-mod qiegħed jidher ċar it-twemmin politiku tal-Partit Laburista ta’ Joseph.

Alfred Sant għaddielu partit li ried jittrasforma lil Malta bħala Svizzera fil-Mediterran. Joseph jidher li hu iffukat biex jittrasforma lil din ir-Repubblika bħala r-Repubblika tal-Banana fil-Mediterran. Anzi, fl-Unjoni Ewropeja.

Ir-Repubblika tal-Banana oriġinali għandha l-oriġini tagħha fl-Amerika Ċentrali u hi deskritta fil-kitba tal-awtur Amerikan O.Henry biex jiddiskrivi r-Repubblika fittizija ta’ Anchuria fil-ktieb tiegħu Cabbages and Kings, ġabra ta’ novelli ispirati mill-perjodu li hu għex fil-Honduras, maħrub mill-ġustizzja Amerikana in konnessjoni ma’ frodi ta’ bank.

Fil-politika d-deskrizzjoni Repubblika tal-Banana tfisser li fit-tmexxija tal-pajjiż l-interessi privati ta’ dawk li jmexxu u ta’ madwarhom jiġu qabel il-ġid komuni. Terminu li intuża spiss dwar diversi pajjiżi fl-Amerika Latina u Ċentrali.

Fir-Repubblika tal-Banana l-Prim Ministru jikri lilu innifsu bħala Prim Ministru l-karozza privata tiegħu stess. Kif qed jagħmel Joseph Muscat.

Fir-Repubblika tal-Banana fl-ewwel jum tas-setgħa jixkupa lil kulħadd mit-tmexxija tad-Dipartimenti tal-Gvern. Qiesu sar kolp ta’ stat. Kif għamel Joseph Muscat. Inkluż fl-Armata ta’ Malta.

Issa għandna l-aħħar waħda.

Fir-Repubblika tal-Banana meta tinqabad tmexxi Lukanda illegali bħal-Lukanda Damiani f’Buġibba qiesu ma ġara xejn. Jekk inti Direttur tal-Awtorita’ tat-Trasport  tista’ tibqa’ hemm bħala Direttur għax l-etika fit-tmexxija tal-korpi pubbliċi hi biss materja ta’ interess akkademiku.

Repubblika tal-Banana  …………….. fil-Mediterran. L-aħjar fl-Ewropa!

Alfred Sant: thriller ġdid dwar il-ħatra tal-President George Abela

Alfred Sant 13

Alfred Sant għandu opinjoni ċara dwar il-President il-ġdid tar-Repubblika ta’ Malta li jrid jinħatar f’April li ġej.

Skond Alfred Sant il-President il-ġdid għandu jkun (jew għandha tkun) dik il-persuna li jiddeċiedi l-Prim Ministru. Skond Alfred Sant il-Prim Ministru jiddeċiedi u dik id-deċiżjoni tkun finali. Ma jgħidilniex Dr Sant dwar ir-rwol taI-Parlament. Ovvjament il-loġika tgħidlek li jekk il-Prim jiddeċiedi, il-Parlament ma jibqax  x’jagħmel ħlief li jittimbra.

Interessanti ħafna kemm Dr Sant jemmen fil-konsultazzjoni. Jagħtina ukoll ir-raġunijiet ghaliex għalih il-konsultazzjoni hi ħela ta’ żmien. Għax Lawrence Gonzi, skond Dr Sant, hekk ukoll kien jagħmel. Jgħidilna:

“Kunsiderazzjonijiet hekk twarrbu meta l-PN għażel il-Presidenti “tiegħu”. Id-diskors kien ikun: hekk se jsir. Naf għax kont hemm meta ntqal.”

Pero’ iktar interessanti minn dan kollu huwa l-kumment ta’ Dr Sant dwar il-ħatra ta’ Dr George Abela bħala President tar-Repubblika fl-2009.

Jgħidilna hekk Dr Sant:

“Gonzi-pn għażel President ftit wara li rebaħ elezzjoni bi żbrixx. Ried jidher ftit ħelu qabel jitlaq għat-triq tal-arroganza bla kantunieri. U kellu raġunijiet oħra okkulti li ma jissemmewx”.

Issa din hi ħaga serja ħafna. Li Dr Sant jgħid li Gonzi ried jidher ħelu qabel jitlaq għat-triq tal-arroganza bla kantunieri, imma kellu “raġunijiet oħra okkulti” li ma jissemmewx.

Issa jiena ma nistax nifhem x’jistgħu ikunu dawn  “ir-raġunijiet oħra okkulti” li ma jissemmewx.

Naħseb li qed jgħid li r-raġunijiet huma sigrieta. Raġunijiet moħbija. Imma Dr Sant jaf x’inhuma dawn ir-raġunijiet “okkulti”? Ma nafx, imma forsi għalhekk Dr Sant kien wieħed miż-żewġ membri tal-Grupp Parlamentari Laburista li meta l-Grupp ġie biex jiddeċiedi jekk jappoġġax il-ħatra ta’ George Abela bħala President tar-Repubblika fl-2009 ivvota kontra.

Jekk niftakar sewwa Dr Alfred Sant l-anqas kien attenda l-Parlament meta tressqet il-mozzjoni għall-approvazzjoni tal-ħatra ta’ Dr George Abela.

Verament ried ikun distakkat kemm jista’ jkun mill-okkult.

Nistennew epiżodju ieħor minn dan it-thriller ġdid ta’ Dr Alfred Sant.

Il-Partit Laburista u Ġorġ Abela

Alfred Sant, George Abela and George Vella

Diversi huma l-persuni li jikkummentaw li meta fl-2004 Lawrence Gonzi għażel li jinnomina lill-Eddie Fenech Adami bħala President tar-Repubblika għamel żball. L-argument dejjem kien li m’huwiex fl-interess nazzjonali li persuna li għal snin twal kienet fuq quddiem nett fit-taqbida politika jkun appuntat f’kariga li tissimbolizza l-għaqda nazzjonali.

Naqbel perfettament ma dan l–argument. Avolja Fenech Adami kien President tajjeb u qeda dmiru b’mod impekkabbli.

Li ma jingħadx imma, ħafna drabi hu, li qabel ma Lawrence Gonzi  innomina lil EFA fl-2004 kien diġa ippropona lil Ġorg Abela.

Dakinnhar il-Partit Laburista ma kienx irreaġixxa għal din in-nomina iżda minflok ippropona numru ta’ persuni oħra.

Ir-raġuni għal dan ovvjament qegħda fil-posizzjoni li ħa Ġorġ Abela (dakinnhar Deputat Mexxej tal-Partit) fil-Konferenza Ġenerali tal-Partit Laburista fis-sajf tal-1998.  Fil-Konferenza Ġenerali Ġorg Abela kien oppona li Alfred Sant ixolji l-Parlament u jsejjaħ elezzjoni.

Filwaqt li posizzjoni ta’ Ġorg  Abela dakinnhar kienet waħda iebsa ħafna tant li ħabbar li jekk il-Labour imur għal elezzjoni bikrija kien fi ħsiebu jirreżenja minn Deputat Mexxej tal-Partit jingħad li fl-istrutturi interni tal-Partit Laburista ftit siegħat qabel il-Konferenza Ġenerali b’mod unanimu d-diriġenti tal-Partit kienu qablu mal-ħtieġa ta’ elezzjoni bikrija.

Ma irnexxilix nikkonferma jekk Ġorġ Abela kienx preżenti għal din il-laqgħa li wasslet għal qbil unanimu. Bosta jsostnu li kien preżenti, li ha sehem f’dik il-laqgħa u għal xi raġuni, wara, bidel il-posizzjoni tiegħu.

Punt interessanti dan li ħadd għadu ma spjega.  Ġara x’ġara jidher li lil Ġorġ Abela hemm min ma ħafirlu qatt. Iż-żmien biss inessi u jfejjaq

Fil-Parlament għada t-Tnejn: mera għal Lawrence Gonzi

mirror

Għada t-Tnejn 10 ta’ Diċembru 2012, Lawrence Gonzi, Prim Ministru, b’diskorsu, jġib fi tmiemu l-ewwel fażi tad-diskussjoni dwar il-budget ghall-2013. L-oratorija m’hiex ser tonqos imma s-sustanza wisq nibża’ li ser terġa’ tkun assenti.

Ser iwieġeb dak li qal il-Kap tal-Opposizzjoni, li l-anqas hu ma qal kull ma kien jeħtieġ li jingħad. Lawrence Gonzi ser jipprova jfissrilna kif inhu meħtieġ li l-inċertezza li hawn fil-pajjiż tinqata’ billi jkun approvat il-budget.

Lawrence Gonzi iwaħħal f’kulħadd talli l-inċertezza mhux biss nibtet imma firxet l-għeruq tagħha fil-fond. Jaħseb li hu biss m’għandu l-ebda ħtija. Kulħadd għandu l-obbligu li jerfa’ r-responsabbiltajiet tiegħu, jgħid. Imma dawk ta’ madwaru huma esklużi.

Din kienet leġislatura ħażina sa minn l-ewwel jum: għandha fuqha s-saħta tal-Mistra. Saħta li titfa d-dell fuq iż-żewġ naħat tal-Parlament.

Is-saħta tal-Mistra qegħda fuq Lawrence Gonzi għax fl-iskandlu tal-Mistra ipprova jgħatti l-iżbalji u ma kellux il-kuraġġ morali li jgħid li JPO kien żbaljat. Ipprova jpinġieh bħala vittma meta l-vittma vera kienet il-komunita’. Konmunita’ li suppost kellha istituzzjoni maħluqa apposta biex tiddefendiha – il-MEPA. Minflok  iżda din il-MEPA kienet kompliċi u għażlet li tiddefendi l-istupru tal-pajjiż.

Is-saħta tal-Mistra qegħda fuq Joseph Muscat ukoll.  Il-predeċessur tiegħu Alfred Sant kien iddeskriva lil JPO bħala morally and politically corrupt.  Imma Muscat ma ħass l-ebda skruplu biex jinqeda bih.

Hekk ġara fil-każ tal-barriera li Gonzi u RCC riedu li titħaffer quddiem il-Kon Katidral ta’ San Ġwann. Hekk ġara ukoll fuq il-mozzjoni biex il-Parlament iddikjara li m’għandux fiduċja f’RCC.

Id-dnub ma jorqodx u jidher li qed joqrob żmien il-kontijiet.

Il-konfront ta’ Gonzi ma Franco Debono hu żejjed għal partit li diġa qiegħed jegħreq. Kien hemm mument partikolari iżda li kien hemm possibilita’ li l-affarijiet ma jikkumplikawx ruħhom. Kienu ippreżentati quddiem il-Parlament żewġ mozzjonijiet.

L-ewwel mozzjoni kienet ippreżentata minn Franco Debono innifsu u kienet kritika tal-politika tal-Gvern ta’ Gonzi dwar il-Ġustizzja u l-Intern. Kritika qawwija u kienet tieqaf hemm.

It-tieni mozzjoni kienet ippreżentata minn Jose’ Herrera u Michael Falzon: barra li kienet tikkritika l-politika tal-Gvern dwar il-Ġustizzja u l-Intern kienet tipproponi ukoll vot ta’ ċensura fil-Ministru Carm Mifsud Bonnici.

Gonzi għażel li jpoġġi fuq l-agenda tal-Parlament il-mozzjoni tal-Opposizzjoni u ħalla fuq l-ixkaffa l-mozzjoni ta’ Franco Debono. Jiġifieri għamel għażla favur mozzjoni b’konsegwenzi negattivi u warrab mozzjoni li kienet tikkritikah u tieqaf hemm.

Nafu fejn wasslet din l-għażla. B’għażla ta’ Gonzi l-Parlament spiċċa sfiduċja lil Mifusd Bonnici. Deċiżjoni li Gonzi seta’ jevita imma ma riedx. Għaliex għamel hekk hu jaf.

Meta Gonzi jħares fil-mera ma jara l-ebda sinifikat fil-każ ta’ korruzzjoni ta’ Noel Borg Hedley (ex-Segretarju Privat tal-Ministru Tonio Fenech) li fil-Qorti ammetta akkużi ta’ korruzzjoni mill-iżviluppaturi JPM Brothers.

Il-fjask tal-Arriva bir-responsabbilta’ politika dwaru li kellu jinġarr minn Austin Gatt l-anqas ma kellu sinifikat għal Gonzi meta jħares fil-mera.

Issa  ħarġet oħra. Fir-rapport tal-Awditur Nazzjonali l-inkompetenza fl-amministrazzjoni finanzjarja tal-kumpanija tal-Gvern Wasteserve hi imfissra fid-dettall. L-iktar li jispikka hu dak il-kuntratt ta’ miljun euro li spiċċa jissarraf f’kuntratt ta’ disgħa u għoxrin miljun euro. Qiesu ma ġara xejn. Is-sejħa biex George Pullicino jerfa’ r-responsabbilta’ politika u jwarrab ma tfisser xejn.

Quddiem dan kollu it-talba ta’ Gonzi biex il-budget ikun approvat tistona. Għax il-vot fuq il-budget mhux biss vot favur budget rigressiv imma hu ukoll vot favur Gvern li hu moralment zopp. Gvern li jrid lil kulħadd jimxi sewwa imma hu mhux kapaċi jagħti l-eżempju. Għax repetutament irrifjuta li jerfa’ r-responsabbilta politika ta’ għemilu.

X’ser jiġri għada jiena ma nafx. Naf iżda ħaga waħda: li l-Gvern wasal sa hawn għax Lawrence Gonzi ma kienx kapaċi japplika għalih il-kejl li bih hu jkejjel lil ħaddieħor.

Il-Partit Nazzjonalista ġustament qed jitlob li l-Imħallef Lino Farrugia Sacco jirreżenja. Jekk il-PN japplika l-istess kejl għall-Kabinett ta’ Lawrence Gonzi m’għandix dubju li jinbidlu l-Ministri kollha, Gonzi innifsu inkluż!

Smart meters and Alfred Sant

Smart meters have been advertised as being required for ARMS Limited to be able to issue bills for our water and electricity consumption in real time.  Differential billing depending on consumption patterns would now be possible. Visits by a meter reader will no longer be necessary.

The smart meters, we were told, is all positive for the consumer.

Through the smart meters ARMS Limited, Enemalta Corporation and the Water Services Corporation collect information on our households and businesses continuously.  They know what we do in the privacy of our homes. They know when we are in, whether we are on holiday or whether we are at work. They know when we switch on our television. When we switch on our air conditioner.

This is a major issue of privacy. We need to be assured that the safeguards protecting access to this massive data is in place and that it functions properly.

Unfortunately there have been a number of instances in the public sector where substantial doubts have arisen on the non-functioning of data protection safeguards. I will give two examples.

Early in 2008 just before the general elections a direct mail shot was sent by the PN Leader Dr Lawrence Gonzi  to employees in key sectors of industry. One such worker who received this mail shot was identified specifically in the letter sent and signed by Dr Gonzi as an employee in the pharmaceutical sector. Now as far as I am aware the information is available in the databases of ETC (Employment and Training Corporation) and the Inland Revenue Department. As it is improbable that the employer made his list of employees available to a political party it is logical to conclude that the PN had access to sensitive information notwithstanding  data protection safeguards.

The second example concerns former Labour Leader Alfred Sant who on the eve of the 2008 elections had detailed information on his state of health splashed on the media. The source of such information could only be the medical file held at Mater Dei Hospital. This information ought to have been protected in terms of data protection legislation as well as medical ethical standards. Yet it was not.

Faced with the above who can ensure that data protection standards are applied as it seems that the Data Protection Commissioner was ineffective.  The Smart meters will track much more then energy and water consumption unless the Data Protection Commissioner is wide awake!

This was first published in di-ve.com on Friday 21st September 2012

L-iskandlu tal-Mistra min kixfu?

Matul dawn l-aħħar jiem intqal ħafna dwar min seta kien jew ma kienx dak li saffar is-suffara (il-whistleblower) dwar l-iskandlu tal-Mistra.

Issa qed jintqal li kien uffiċjal tal-PN li wassal il-kuntratt tal-Mistra lill-Alfred Sant.

Issa jiena ngħid il-verita’ thawwadt ftit għax Alfred Sant dan l-aħħar kien ċar ħafna dwar kif wasal għandu l-kuntratt.  Sant kien ikkwotat li qal hekk :

“Kieku ma kienx għal whistleblower kuraġġuż fis-sistema pubblika li tqażżes jara l-mod kif il-korruzzjoni u l-abbuż tal-poter kienu qed jintużaw lejliet l-elezzjoni bi sfreġju kbir għall-ambjent Malti, kieku l-istorja ma kinitx tasal għandi.”

Kieku jieqaf it-taħwid fit-tixrid tal-informazzjoni jkun ta’ ġid għal kulhadd!

L-aħħar punt. L-iskandlu ma nħoloqx bil-kuntratt. Il-kuntratt u l-qliegħ li kien ser ikun ġġenerat hu biss l-effett. L-abbuż sar fil-MEPA fil-mod kif ġie ipproċessat il-permess. Kif saru laqgħat bil-magħluq. Bi pressjoni u SMSs galore sakemm rakkomandazzjoni għar-rifjut ta’ permess ġiet mibdul biex il-permess inħareg. Ħalliha li wara l-elezzjoni a bażi ta’ rapport tal-Audit Officer tal-istess MEPA dan il-permess ġie irtirat.

Tajjeb li nżommu perspettiva realistika tal-affarijiet.

Is-Saħta tal-Mistra

Qatt daqs f’dawn l-aħħar jiem ma kien ċar li l-PN qed iġorr fuqu s-saħta tal-Mistra.

Il-proposta ta’ JPO biex jitkeċċa RCC mill-PN ma kienitx sostnuta minn provi li jiġġustifikaw tali azzjoni. L-istess tip ta’ provi li kienu meħtieġa fil-Parlament meta minkejja li ma kienux hemm il-mozzjoni ta’ ċensura dwar RCC xorta kienet approvat.

Jidher ċar li kull min miss mal-kaz tal-Mistra ta’ qabel l-elezzjoni ġenerali 2008 ma tistax tiġih waħda tajba.

“X’għamilt ħażin?” qal JPO lil Gordon Pisani f’diskursata bejniethom fil-presenza ta’ avukat meta sar magħruf li kien hemm kuntratt dwar l-art tal-Mistra u d-disco proġettat?

Kien ikun aħjar kieku Pisani wieġbu : “x’għamilt tajjeb?”

Sa dakinhar li faqqa’ l-każ tal-Mistra l-kredenzjali ambjentali ta’ JPO kienu tajba ħafna. Il-kampanja biex iwaqqaf is-simenterija taċ-Ċaqnu kif ukoll il-kampanja kontra l-miżbla (landfill) ħdejn l-Imnajdra kienu fost l-aħjar mumenti tiegħu. Tant li għal xi żmien kien deskritt bħal wieħed mill-politiċi bl-aħjar kredenzjali ambjentali f’Malta. Kien ingħata t-titlu ta’ The green politician of the year.

Issa minn persuna li ħadmet daqstant favur l-ambjent bilfors tistenna li qabel ma jieħu pass iqis sewwa. Jara l-impatti ta’ dak li jkun qiegħed jippjana b’mod iktar metikoluż minn ħaddieħor. Sfortunatament il-kuntratt li JPO kellu dwar il-Mistra u xtaq jaħbi (“mhux aħjar ma tkunx taf” qal lill-Pisani) juri li l-introjtu pekjunjarju kien l-iktar ħaġa importanti għal JPO.  Il-ħarsien dovut lill-Mistra skond dak li tipprovdi d-Direttiva dwar il-Habitats kien xi ħaġa irrelevanti.

F’dan kollu kien mgħejjun minn kultura ta’ irresponsabbilta fl-istrutturi tal-MEPA li qieset li ma kien hemm xejn ħażin filli żviluppatur jew persuna interessata fi żvilupp tiltaqa’ ma’ membri tal-Bord fil-magħluq, minn wara dahar kulħadd.

X’hemm ħażin?

Il-PN għażel li jipprova jgħatti dan kollu. Issa il-PN jeħtieġ li jħallas il-kontijiet talli ma kellux il-kuraġġ morali li jgħid li JPO żbalja. Irid iħallas il-kontijiet talli ipprova jpinġi lil JPO bħala l-vittma, meta l-vera vittma kienet il-komunita’, li suppost kellha MEPA biex tiddefendiha u minnflok kienet kompliċi ma’ JPO.

Kull min iċċappas mal-każ irid jerfa’ l-piż u jġorr fuq spallejħ is-saħta tal-Mistra. Anke RCC flimkien ma’ Gonzi u JPO għandu responsabbilta morali għal dak li ġara minħabba l-pariri li ta. Anke’ jekk kienu biss ta’ damage control.

Il-Partit Laburista li permezz ta’ Alfred Sant kellu l-karti f’idejh qabel l-elezzjoni tal-2008 tilef l-inizzjattiva minn idejh.  Sant iddeskriva lil JPO bħala morally and  politically corrupt. Imma s-suċċessur tiegħu m’għandux skrupli li jindiehes ma JPO u jipprova jinqeda bih. Huwa u jimxi b’dan il-mod Muscat qed juri li anke’ hu m’huwiex interessat f’servizz iżda f’logħba ċess. L-iskop aħħari  li jqarreb il-jum li jkun fil-gvern il-Labour, għal Muscat jiġġustifika kollox. Jiġġustifika kull mezz li jintuża. L-aqwa li jdgħajjef lill-għadu poltiku tiegħu.

Meta Muscat jimxi b’dan il-mod ikun qed juri għal darba oħra li m’hemmx x’tagħżel bejn il-PN u l-PL. Il-politika l-ġdida tagħhom hi nieqsa mill-valuri. Hi nieqsa mill-impenn favur dak li hu sewwa.  Huma interessati fil-maniġġi u fil-mossi: mhux daqstant dawk li jġibu lilhom il-quddiem, daqskemm dawk li jpoġġu lin-naħa l-oħra f’dawl ħażin.

Is-saħta tal-Mistra JPO raxxa ukoll fuq il-Labour.

Il-mozzjoni dwar RCC kien l-ewwel pass li deher.  Biha l-Labour ingħata l-opportunita’ li jidher kif fil-fatt hu: partit bla sinsla.

Il-PN ma jixraqlux ikun iżjed fil-Gvern. Pero’ il-Labour ma joffrix soluzzjoni. Għax minn ġot-taġen nispiċċaw fin-nar!

Issa x’imiss li jiġri ?

Il-bieraħ il-Kumitat Eżekuttiv tal-PN iddeċieda li tlieta mill-Membri Parlamentari tiegħu: JPO, Franco Debono u Jesmond Mugliette ma jkunux kandidati tiegħu u f’ismu fl-elezzjoni ġenerali li jmiss. Fuq tnejn minnhom (JPO u Jesmond) ġja kien hemm dikjarazzjoni mill-kandidati infushom li ma riedux jerġgħu jkunu kandidati.  It-tielet wieħed, Franco, qal lill-media u riedna nemmnu li hekk kien, li Lawrence Gonzi riedu jerġa’ jkun kandidat. Ħalliha li Gonzi ċaħad dan.

Din tal-kandidaturi m’hi xejn. Kulħadd kien jistenniha għax kienet ovvja. Bħalma kienet ovvja li Austin Gatt kien ser ikun wieħed mill-iżjed li ser jopponi l-kandidatura ta’ Franco, kif l-istess Franco informa lill-media! X’tistenna? Wara l-kritika ħarxa lilu u lill-assistent tiegħu Manwel Delia (avolja kienet ġustifikata) fuq il-froġa tal-Arriva dan kien mistenni. Forsi Franco jirrealizza issa li l-astensjoni fil-vot ta’ sfiduċja dwar Austin Gatt kien żball da parti tiegħu. Għax il-konsegwenza loġika tal-argumenti tiegħu kellha tkun li Austin Gatt kellu jwarrab minn Ministru. Imma għal xi raġuni li s’issa għadni ma fhimtx Franco iddeċieda mod ieħor!

Fl-isfond ta’ dan kollu  Lawrence Gonzi irid li jtemm il-leġislatura sħiħa. Jiġifieri li l-Gvern immexxi minnu jibqa’ jiffunzjona sas-sena d-dieħla. Il-Parlament jista’ jibqa’ jiltaqa’ sad-9 ta’ Mejju 2013 u jekk jagħmel hekk l-iktar tard li tissejjah elezzjoni jista’ jkun is-Sibt ta’ qabel id-9 t’Awissu 2013. Dak il-massimu. Probabilment li Gonzi għandu f’moħħu li jġebbed sa Marzu 2013.

Imma l-mistoqsija hi : ser iwassal s’hemm?

L-aġenda parlamentari li hemm imħejjija għal wara l-vaganzi tas-sajf kif ukoll il-proġetti li jimmaturaw lejn l-aħħar tas-sena u l-bidu tad-dieħla jindikaw li Gonzi u l-PN ser jagħmlu sforz biex iġebbdu kif jistgħu. Imma dan ma jiddependix minnhom biss.

L-ewwel punt li jista’ jeffettwa hu x’ser jiġri mill-fattur RCC. Diġa jidher li JPO ser ikollu d-diffikultajiet. Il-Kummissarju tal-Pulizija, ġustament, qal li m’għandux ikollu x’jaqsam f’materja purament politika. Gordon Pisani hu ostili għal JPO u m’hu ser jgħid jew jagħmel xejn li jista’ jkun ta’ l-iċken ħsara għal Gonzi. Karmenu Vella diġa kixef idejh, u dak li qal jiddependi fuq il-kelma tiegħu kontra l-kelma ta’ RCC. Jibqa’ biss ix-xhieda ta’ Joe Mizzi u John Dalli!

Jiena m’hux qed nistenna li l-Kumitat Eżekuttiv tal-PN joħroġ b’xi kundanna għal RCC meta jidher ċar li l-argument prinċipali  ser ikun dwar il-kuntatti bejn RCC u uffiċjali tal-Gvern ta’ Alfred Sant dwar l-iskorta li kellu RCC minħabba l-attentat kważi fatali li kien seħħ fuq ħajtu fl-Imdina. Dan ta’ l-inqas joħrog minn dak li qal Joe Mizzi tal-Labour u f’dan il-kuntest hi relevanti x-xhieda tal-Kummissarju tal-Pulizija.  Il-kuntatti li qed jurtaw lil JPO probabilment żviluppaw minħabba li l-Gvern ta’ Sant irtira l-iskorta u RCC ħass (ġustament) li din kienet meħtieġa.

Fid-dawl ta’ dan jiena nistenna li l-Kumitat Eżekuttiv tal-PN joħroġ b’eloġju għal RCC u kundanna oħra għal JPO. Dan ikun ifisser li tiħrax il-kampanja pubblika ta’ JPO kontra l-PN u magħquda mar-reazzjonijiet ta’ Franco Debono ifisser li l-ewwel seduti tal-Parlament f’Ottubru jistgħu jkunu determinanti.

Fid-dawl ta’ dan Gonzi jista’ jikkunsidra li jxolji immedjatament biex jevita konfront ieħor. Bosta qed jgħidulu biex jagħmel hekk, imma jidher daqstant ieħor ċar li ser jibqa’ jirresisti sakemm ma jkollux triq oħra. Sakemm ikun inevitabbli li jwarrab.

Sakemm jibqa’ imqar l-iċken tama li jista’ jibqa’ għaddej fil-Parlament naħseb li ser jibqa’ mkaħħal mas-siġġu f’Kastilja.

Is-sistema ta’ żewġ partiti bdiet tikkrolla?

Silta mill-intervista li Andrew Azzopardi ghamel lil Carmel Cacopardo.

Jekk trid tara l-intervista kollha :

aghfas hawn ghall-ewwel parti

aghfas hawn ghat-tieni parti.

Mistoqsija : Dak li ġara fil-Parlament taħseb seħħ ghax kien hemm maġġoranza ta’ siġġu wieħed?  Jekk iva, ma taħsibx illi dan kien ifisser li  hija kważi impossibbli biex koalizzjoni tirnexxi?

Tweġiba : Il-mistoqsija tiegħek tixhed preġudizzju kontra anke’ l-idea ta’ koalizzjoni. Dwarha aħna hawn Malta m’għandna l-ebda esperjenza mill-Indipendenza lil hawn. Fl-Ewropa kollha fi kważi kull pajjiż (ħlief l-Italja)  hemm riżultati posittivi li nkisbu tul is-snin bħala riżultat tal-politika tal-kunsens. Anke’ f’San Marino!

Ħares lejn il-Ġermanja, Danimarka, Finlandja, Norveġja, Iżlanda, Awstrija, Olanda, Franza, Portugall, ………….. Riċentment  r-Renju Unit ukoll beda jitgħallem kif iħaddem koalizzjoni.

M’hux l-ewwel darba li partit politiku kellu maġġoranza ta’ siġġu wieħed fil-Parlament Malti. Fl-1971 Mintoff kellu siġġu wieħed u ħlief inċident wieħed li kien jinvolvi lil Pawlu Carachi (meta talab siġġu fin-nofs) ma kienx hemm.

Fl-1987 il-PN ukoll kellu siġġu wieħed maġġoranza. Ma kellu l-ebda diffikulta.

Id-diffikultajiet inqalgħu fil-leġislatura tal-1996 u f’dik tal-lum. F’kull każ mhux id-differenza ta’ siġġu wieħed kienet il-kawża iżda l-instabilita’ tas-sistema taż-żewġ partiti. Kemm fil-leġislatura 1996-98 kif ukoll fil-leġislatura attwali d-diffikultajiet fil-maġġoranża li tappoġġa lill-Gvern inħolqu għax f’kull wieħed miż-żewġ partiti  hemm diverġenza enormi fil- ħsieb u fil-metodu .

Il-kliem li kien intqal li Mintoff per eżempju fl-1996 kellu programm politiku għalih għandu jinftiehm fis-sens illi l-ideat u l-ideali  tiegħu (u ta’ oħrajn) kienet tvarja b’mod sostanzjali minn dik tal-Partit li minnu kien jifforma parti.

L-istess qed jiġri llum fil-PN. Id-diskussjoni u deċiżjoni dwar id-divorzju forsi tillustra s-sitwazzjoni u l-qasma ideologika fi ħdan il-PN. Qasma li kull ma tmur tikber għax il-ġenerazzjonijiet il-ġodda m’humiex ser joqgħdu lura milli jesprimu dak li jaħsbu u dan irrispettivament minn dak li jgħidu u jagħmlu l-mexxejja tal-partiti politiċi.

Fi ftit kliem it-tweġiba għalqstant hi li dak li qed jiġri illum m’huwiex riżultat ta’ maġġoranza ta’ siġġu wieħed. Huwa iżda il-konkluzjoni loġika tal-fraġilita’ tas-sistema ta’ żewġ partiti liema sistema bdiet tikkrolla.

Dom Mintoff fuq in-Net TV

Diġa kelli l-opportunita’ nitkellem dwar l-avvenimenti reċenti fil-Parlament.

Tajjeb li naraw l-istampa kollha u mhux nintilfu fid-dettall.

Ġara dak li jiġri dejjem. L-Opposizzjoni tfittex l-iktar punt debboli tal-Gvern u wara tattakkah fejn iweġġa’ l-iktar. Tagħmel dan biex iddgħajfu tant sakemm, kif ngħidu bil-Malti, ma jkunx jiflaħ iqum għal oħra.

Il-Labour taħt Joseph Muscat hekk qed jagħmel bla rispett lejn xejn u lejn  ħadd.

Hekk ukoll għamel il-PN (b’mod ferm iktar fin!) fil-konfront tal-Gvern ta’ Alfred Sant fil-perjodu 1996-98. Dak inhar il-punt debboli ta’ Alfred Sant kien Dom Mintoff, u Fenech Adami tah il-ħabel. Tah airtime kemm ried fuq in-NET TV. (Tiftakruh lil Pierre Portelli jiġri bil-microphone wara Mintoff?)  Tah ħin minn tiegħu fil-Parlament. U l-Gvern ta’ Sant ftit ftit ikkollassa.

Illum qed jiġri l-istess.

Lawrence Gonzi hu l-punt debboli tal-PN. Wera li mhux kapaċi jmexxi għal darba tnejn.  Minflok imexxi  jipprova jixtri l-kritiċi tiegħu fil-Grupp Parlamentari bil-ħolqien tal-ħatriet ta’ Assistent Parlamentari.

Żewġ Membri Parlamentari tal-PN ma aċċettawx dawn il-ħatriet. Taw ir-raġunijiet għar-rifjut tagħhom. Qalulu li ma riedux jaċċettaw ħatriet li bħala riżultat tagħhom kien ikollhom jaqgħu fil-muta u minflok ma jagħmlu xogħolhom ta’ Membri Parlamentari jkollhom joħorġu biċ-ċensier.

Dan kollu jfisser li hemm nuqqas ta’ dibattitu intern fil-PN li inevitabilment wassal biex il-kritika l-ħarxa toħroġ fil-beraħ. Fuq ġewwa ma hemm ħadd li lest biex jisma’ u jagħti każ. Dan m’hu tort ta’ ħadd għajr ta’ min suppost li qed imexxi u biċ-ċar wera  li ma kienx kapaċi jikseb il-fiduċja reali tal-Partit. Għax il-fiduċja ma tiksibiex meta tirbaħ vot ta’ fiduċja fil-Parlament jew fil-Partit. Tirbaħ il-fiduċja meta ta’ madwarek, in partikolari dawk li tippretendi li tmexxi, jaċċettaw il-ġudizzju tiegħek. Ikunu lesti li jiddiskutu miegħek, u l-opinjoni tiegħek jagħtuha piz kbir mhux biss għax inti l-mexxej iżda fuq kollox għax jirrispettawk.

Lawrence Gonzi m’għandux dawn il-kwalitajiet. Imexxi minn hemm fuq,  m’għandux idea ta’ x’jaħsbu l-egħruq tal-Partit. Minkejja t-teatrin qatt ma kien viċin l-egħruq tal-Partit. Qatt ma kien attiv fl-istrutturi tal-Partit. Ġie fil-Partit minn imkien. U qatt ma kellu x-xewqa li jaħdem viċin l-egħruq tal-PN. Per eżempju, wara l-elezzjoni tal-1987 meta ma telax sparixxa mill-ewwel mill-Partit sakemm EFA offrielu l-post ta’ Speaker! Imma dik storja oħra.

Quddiem dan il-punt debboli, n-nuqqas ta’ mexxej li kapaċi jmexxi,  l-isfidi ma jonqsux. Jidher ċar li l-backbenchers ftit kellhom l-opportunita’ li jsemmgħu leħinhom biex iwasslu l-kritika għall-mod kif inhu immexxi l-pajjiz u l-partit.

Altru milli kapitlu magħluq. Il-kapitlu għadu miftugħ beraħ u probabilment ma jingħalaqx ħlief meta Lawrence Gonzi jwarrab jew jitwarrab mit-tmexxija tal-PN.

Imbagħad il-PN ikun irid jagħmel snin twal fl-Opposizzjoni biex jinbena mill-ġdid. Biex dak li tkisser taħt it-tmexxija ta’ Lawrence Gonzi u dawk ta’ madwaru,  bil-paċenzja jerġa’ jieħu sura.

Sadanittant forsi ma tafx kif Lawrence Gonzi jerġa’ jmur iqatta’ ftit ħin bħala President tal-Azzjoni Kattolika.