Il-PN u l-governanza tajba

Bħalissa fil-PN kulħadd qiegħed jgħid tiegħu dwar l-għażliet politiċi li għamel il-PN meta kien immexxi minn Simon Busuttil. Busuttil issa ilu ftit li telaq it-tmexxija, meta warrab biex refa’ r-responsabbiltá politika għat-telfa elettorali massiċċa ta’ Ġunju 2017.

Ir-riżultat tal-inkjesta maġisterjali dwar Egrant, li ma sabet l-ebda prova tal-involviment tal-familja Muscat f’din il-kumpanija, hi parti minn dan ix-xenarju. Għax ma tistax titkellem dwar il-korruzzjoni mingħajr ma jkollok f’idejk il-minimu ta’ provi.

Niftakru ftit dwar it-tlett kumpaniji li kienu nħolqu fil-Panama. Tnejn minnhom kienu identifikati ta’ min kienu: ta’ Keith Schembri u Konrad Mizzi. Dwar it-tielet waħda kien hawn ħafna għidut sakemm f’April tal-2017 fuq il-blog ta’ Daphne Caruana Galizia kienet ħarġet l-allegazzjoni miktuba għall-ewwel darba li tassoċja lil Michelle Muscat mat-tielet kumpanija, l-Egrant.

Il-PN kien għamilha fatta – mhux biss Simon Busuttil – u kważi b’vuċi waħda kien hemm ripetizzjoni ta’ din l-allegazzjoni daqs li kieku kienet skoperta tagħhom. Dakinnhar ma smajt lil ħadd mill-PN jgħid fil-pubbliku kliem differenti. Fi ftit kliem ir-responsabbiltá politika kienet waħda kollettiva.

Kienet Alternattiva Demokratika biss li applikat il-brejkijiet. Fil-fatt f’artiklu ippubblikat f’Illum nhar l-24 t’April 2017, intitolat Pilatu fid-dawl tax-xemx jiena għidt hekk : “li tkun moralment konvint li l-istorja hi korretta mhux biżżejjed. Din l-istorja teħtieġ il-konferma li tiġi mill-provi tad-dokumenti u mhux mid-dimostrazzjonijiet. Għax fuq id-dokumenti hi mibnija. Allura hemm obbligu li dawn id-dokumenti tant bażiċi jaraw id-dawl tax-xemx.

Id-dokumenti qatt ma rajnihom sakemm sabu ruħhom għand il-Maġistrat li ikkonkluda li huma foloz.

Ovvjament hemm ħafna spjegazzjonijiet li jeħtieġ li jsiru. Fosthom hemm bżonn ikun magħruf is-sors tad-dokumenti foloz. Minn fejn ġew. Imma probabbilment qatt ma nkunu nafu għax is-sors tal-ġurnaliżmu hu protett. Dejjem sakemm Pierre Portelli ma tmissux il-kuxjenza u jikxef lil min daħħlu fi sqaq.

Il-ġlieda tal-PN favur il-governanza tajba dejjem kienet waħda difettuża.

Niftakar ċar qiesu l-bieraħ waqt l-unika laqgħa li Alternattiva Demokratika kellha mat-tmexxija tal-PN dwar il-possibilitá ta’ alleanza pre-elettorali konna iddiskutejna l-kredibilitá tal-PN dwar dan. Min-naħa ta’ Alternattiva Demokratika konna tlabna spjegazzjoni mill-PN għal numru ta’ issues li kienu jitfgħu dell sostanzjali fuq dak kollu li l-Partit Nazzjonalista kien qed jgħid dwar il-ħtieġa ta’ governanza tajba.

Tlabna spjegazzjoni dwar ħames każi li dwarhom diġa ktibt diversi drabi u ċjoe : Beppe Fenech Adami u r-rwol tiegħu fuq kumpanija Capital One Investment Group/Baltimore Fiduciary Services, Claudio Grech u l-iskandlu taż-żejt u l-fatt li ma kienx jiftakar jekk qatt iltaqax ma George Farrugia, il-każ tal-invoices foloz bejn il-Grupp dB u l-PN, il-kunflitt ta’ interess ta’ Mario de Marco bejn l-obbligi parlamentari tiegħu u l-fatt li kien konsulent legali ewlieni tal-grupp dB, u l-applikazzjoni ta’ Toni Bezzina għal villa ODZ għalih meta l-PN kien qed imexxi l-quddiem politika ambjentali differenti.

L-ispjegazzjoni li tlabna ma ingħatax għax weħilna fuq affarijiet oħra. Imma dan hu it-track record tal-PN dwar il-governanza tajba. Li l-Partit Laburista hu agħar minn hekk ma hi tal-ebda konsolazzjoni!

Advertisements

Parlament li jġiegħlek tirremetti

vomit

Smajt partijiet mid-dibattitu Parlamentari tal-lum dwar Keith Schembri l-Kasco. Nistqarr li qlajt l-istonku nisma’ lil Simon Busuttil u lil Joseph Muscat jitkellmu. Jekk ngħid li rriduċew lil Parlament għat-tejatrin tar-raħal inkun qed ninsulenta lit-tejatrin tar-raħal!

Bil-lingwaġġ li kontinwament juża’ Simon Busuttil (u oħrajn) iwassal mesaġġ li qed jitkellem dwar korruzzjoni ppruvata meta jaf li dan hu ferm il-bogħod mir-realtà. Ir-realtà hi ftit differenti: li hemm attività ta’ diversi persuni li qed jagħmlu użu mis-segretezza tal-qasam finanzjarju f’pajjiżi oħra (Panama u British Virgin Islands, per eżempju). Li dawn is-servizzi jintużaw minn persuni fil-politika (Konrad Mizzi) u minn persuni madwar il-politiċi (bħal Keith Schembri) jqanqal suspetti gravi dwar korruzzjoni. Suspetti jibqgħu suspetti. Imma l-politiku serju jaġixxi minnufih fuq suspetti ta’ din il-gravità. Il-fatt li Joseph Muscat ma aġixxiex turi li bla l-iċken dubju m’huwiex bniedem serju u ma jixraqlux li jmexxi dan il-pajjiż.

Dan hu l-argument kollu li jiġġustifika l-mozzjoni ta’ Marlene Farrugia.

Il-bqija, fl-opinjoni tiegħi kien kollu ħela ta’ ħin.

Imma sfortunatament il-Parlament Malti mhuwiex interessat f’diskussjoni serja. La l-Gvern u l-anqas l-Opposizzjoni.

Il-mozzjoni ta’ Marlene fuq Keith il-Kasco

marlene-farrugia

Il-mozzjoni ta’ Marlene Farrugia li pprezentat il-bieraħ fil-Parlament dwar Keith Schembri l-Kasco tindirizza n-nuqqas ta’ Joseph Muscat li  għal dawn l-aħħar għaxar ġimgħat (ta’ l-inqas), injora l-imġieba ta’ dawk ta’ madwaru.

Għax anke kieku ma issemmewx l-allegazzjonijiet dwar dak li qed jingħad li ġara bejn Keith Schembri u Adrian Hillman tat-Times, ix-xibka ta’ kumpaniji fil-Panama, l-British Virgin Islands, Ċipru u Ġibiltar minnha innifisha toħloq ħafna suspetti ta’ konflitti [eżistenti u forsi anke immaġinarji] bejn Keith Schembri l-bniedem tan-negozju u Keith Schembri ċ–Ċhief of Staff fl-Uffiċċju tal-Prim Ministru f’ Kastilja.

L-emails li ħarġu mal-Panama Papers jispjegaw ħafna. Imma dan mhux biżżejjed.

Għax avolja Keith Schembri rriżenja minn Direttur tal-kumpaniji tiegħu f’Marzu 2013, hu inevitabbli li l-fatt li hu l-azzjonist maġġoritarju f’dawn l-istess kumpaniji minn innifsu jagħtiħ influwenza kontinwa dwar kif isiru l-affarijiet fl-istess kumpaniji. Dan minkejja li ddistakka ruħu mit-tmexxija ta’ kuljum tagħhom. Tant dan hu hekk li l-Panama Papers jirreferu għal ideat dwar negozju addizzjonali [riċiklaġġ tal-iskart fl-Indja kif ukoll r-remote gaming].

L-iktar ħaġa onorevoli li seta jagħmel Keith Schembri kien li jitlaq bil-kwiet għaxar ġimgħat ilu.

Kieku għamel dan kien jevita li jinbarazza lil sieħbu Joseph Muscat. Kien jevita ukoll ħsara kbira lill-Partit Laburista.

Il-fatt li ddeċieda li jibqa’ hemm ifisser ħaġa waħda biss: li jew m’huwiex jirrealizza l-ħsara kbira li għamel (u għadu qed jagħmel) inkella li jiġi jaqa’ u jqum mill-konsegwenzi. Probabbilment li jiġi jaqa’ u jqum.

Il-mozzjoni ta’ Marlene, għal raġunijiet ta’ aritmetika sempliċi, mhux ser tkun approvata. Peró dan ma jfissirx li Joseph Muscat u l-Kabinett għandhom jibqgħu b’għajnejhom magħluqin. Hu fl-interess tal-pajjiż kollu li jiftħu għajnejhom beraħ u li jnaqqsu l-ħsara li saret u li għad tista’ ssir lill-pajjiż. Huma biss jistgħu jagħmlu dan.

Għalhekk hu importanti li Marlene ressqet il-mozzjoni. Il-ferita jeħtieġ li tidher sewwa ħalli kulħadd ikun jaf biha u ħadd ma jkollu skużi li ma kienx jaf.

Ir-responsabbiltà politika tinġarr bir-riżenja jew tkeċċija

Australian Financial Review 130416 headline

 

Il-kontroversja f’Malta dwar il-kumpaniji tal-Panama hi kbira u ikkumplikata. L-informazzjoni ħierġa ftit ftit u bħala konsegwenza hemm il-periklu kontinwu ta’ misinterpretazzjoni ta’ din l-informazzjoni.

Il-kumpaniji ġew imwaqqfa. Tnejn nafu ta’ min huma. It-tielet waħda ma nafux għax donnu l-isem ta’ sidha kien sensittiv wisq u għalkemm il-kumpanija kienet intenzjonata għal din il-persuna jidher li l-kumpanija baqgħet hemm fuq l-ixkaffa.

Safejn hu magħruf, l-iskop li għalih twaqqfu dawn il-kumpaniji ma kienx hemm ċans li jitwettaq minħabba li bil-ħruġ tal-Panama Papers waqaf kollox. Baqa’ biss il-pjanijiet dwarhom fl-emails li ħerġin ftit ftit. Hemm ukoll l-ispjegazzjonijiet li qed jagħtu jew taw Keith Schembri l-Kasco u Konrad Mizzi.

Keith Schembri għandu “cover” tajjeb wara xiex jistaħba minħabba l-business tiegħu. Konrad Mizzi m’għandux ħajt ta’ kenn, l-ispjegazzjoni tiegħu diffiċli biex titwemmen.

L-artiklu tal-bieraħ 13 t’April 2016 fl-Australian Financial Review intitolat : The Panama Papers: Maltese leaders told Mossack Fonseca of secret gaming plan jikkwota minn emails ta’ rappreżentanti ta’ NexiaBT dwar l-investimenti. Kontinwament issir referenza għal żewġ kumpaniji. Hemm ukoll l-inizzjali tal-persuni involuti (KS għal Keith Schembri u KM għal Konrad Mizzi) biex b’hekk hu ċar li r-referenza hi għat-tnejn.

L-investimenti, jgħidu l-emails ikkwotati, kienu intenzjonati għal remote gaming u għar-riċiklaġġ. Imma l-artiklu Awstraljan , meta jidħol fid-dettall ma jibqax jirreferi għaż-żewġ persuni iżda jaqleb għal persuna waħda u jgħid hekk : “Mr Schembri has an existing recycling business in Malta.” Konrad Mizzi ma jissemmiex iktar. L-artiklu, minkejja t-titlu, ma jgħid xejn dwar l-investiment fir-remote gaming.

Jista’ jkun hemm emails oħra li s’issa għad ma ġewx ippubblikati, imma dwar dawn wieħed ikun jista’ jikkummenta meta dawn l-emails jaraw id-dawl tax-xemx.

Fl-aħħar kullma jibqa’ huma l-fatti. Il-kumpaniji fil-Panama infetħu. Il-ġurisdizzjoni tal-Panama m’għandhiex fama tajba, anzi għandha fama ta’ segretezza liema segretezza hi intenzjonata biex taħbi dak li banda oħra  facilment jinkixef.

Hemm il-korruzzjoni?

S’issa suspetti biss hemm u ħafna spekulazzjoni fuq jigsaw puzzle ta’ biċċiet ta’ informazzjoni. Minħabba l-fatt li dawn iċ-ċirkustanzi ġustament inisslu suspetti ta’ korruzzjoni għandu jkun iktar ċar għaliex Konrad u Keith għamlu ħażin meta aċċettaw il-parir li jmorru l-Panama bil-kumpaniji tagħhom. Esponew lilhom infushom u lill-Gvern li jiffurmaw minnu għal din il-kritika.

Ma kienx ġustifikat li Konrad Mizzi, Keith Schembri u l-persuna l-oħra li s’issa isimha mhux magħruf imorru l-Panama għax b’dan il-fatt biss tefgħu dell tqil fuq Malta u ngħata messaġġ żbaljat. Hu żball oħxon, li, meta jsir minn persuni li qed jamministraw l-poter politiku (bħal Keith Schembri u Konrad Mizzi) ma hemm l-ebda soluzzjoni għalih ħlief riżenja immedjata inkella tkeċċija.

B’hekk biss tista’ tinġarr ir-responsabbiltà politika.

L-ikbar theddida: is-sid inviżibbli tat-tielet kumpanija fil-Panama

 invisible_man

Ilna 7 ġimgħat u fuqhom niddiskutu l-kontroversja tal-kumpaniji mwaqqfa fil-Panama.

Sadanittant ħierġa iżjed informazzjoni. Il-bieraħ il-Ħadd fl-Awstralja, l-Australia Financial Review li għandha aċċess għall-ħdax-il miljun u nofs dokument li ġew ippubblikati mill-International Consortium of Investigative Journalists ibbażata f’Washington D.C. fl-Istati Uniti tal-Amerika tgħid li twaqqfu tlett kumpaniji fuq struzzjonjijiet minn Malta. Waħda bl-isem ta’ Tillgate Incorporation għal Keith Schembri, Chief of Staff fl-Uffiċċju tal-Prim Ministru Joseph Muscat, oħra bl-isem ta’ Hearnville Incorporation għall-Ministru Konrad Mizzi w t-tielet waħda bl-isem ta’ Egrant Incorporation li imkien ma issemma ta’ min hi. Hi ta’ persuna li s’issa għadu mhux magħruf, għax jidher li kien hemm attenzjoni kbira biex ismu ma jissemmiex, biex l-identità tiegħu tkun protetta iktar minn dik tal-persuni l-oħra.

Dawn it-tlett Maltin, tnejn minnhom attivi fil-poltika u t-tielet wieħed (dak li mhux magħruf) x’aktarx ukoll, għażlu li jwaqqfu kumpanija fil-Panama fejn ir-reputazzjoni hi waħda ħażina. Fejn is-segretezza tiffaċilita l-ħabi tal-abbuż. Fejn minħabba din is-segretezza jispiċċaw moħbija flejjes id-dittaturi, kif ukoll flejjes li jirriżultaw min-negozju tad-droga jew mill-korruzzjoni.

Keith Schembri bħala l-id il-leminija tal-Prim Ministru u Konrad Mizzi bħala Membru tal-Parlament kif ukoll bħala Ministru kellhom l-obbligu li jaġixxu b’attenzjoni biex jassiguraw trasparenza u kontabilità f’dak kollu li jagħmlu u dan minħabba li ħtija tal-posizzjoni li jokkupaw dak kollu li jagħmlu għandu impatt fuq il-kredibilità tal-pajjiż. Minflok ma għamlu hekk, Keith Schembri u Konrad Mizzi flimkien mal-persuna l-oħra (li s’issa hu inviżibbli) marru fejn trasparenza ma hemm xejn u allura l-anqas ma hi possibli l-kontabilità tagħhom bħala persuni fil-ħajja pubblika.

Meta twaqqfu dawn it-tlett kumpaniji fil-Panama, Konrad Mizzi, Keith Schembri u t-tielet persuna s’issa inviżibbli għamlu bil-maqlub ta’ dak mistenni minnhom. Bil-maqlub ta’ dak li jipprietkaw. Bil-maqlub ta’ dak li jipprietka l–partit poliitku li fih huma attivi. Allura kif jibqa’ jingħad li m’għamlu xejn ħażin? Għax bil-fors tikkonkludi li jew iridu jgħadduna biż-żmien inkella li m’għandhomx idea ta’ x’inhu tajjeb u x’inhu ħażin.

Għalhekk biss Joseph Muscat kellu jkeċċihom it-tlieta li huma: lil Keith Schembri, lil Konrad Mizzi u anke lit-tielet persuna li s’issa għad mhux magħruf min hu.

Tgħid Joseph Muscat jaf min hu t-tielet persuna li s’issa irnexxielu jżomm l-identità tiegħu mistura? Għalfejn qed iżomm l-identità tiegħu mistura? Nittamaw li ma ddumx ma tkun magħrufa għax dawn l-azzjonijiet huma ta’ theddida għad-demokazija u dan għax bil-ħolqien ta’ dawn il-kumpaniji qed tgħib it-trasparenza u l-kontabilità fejn hemm l-iktar bżonnha: fil-kurituri tal-poter.

Il-Prim Ministru m’għandux għalfejn jistenna l-verifika li qed jagħmlu Konrad Mizzi u Keith Schembri biex jieħu passi u dan għax, irrispettivament minn dak li jista’ jirriżulta diġa hu magħruf biżżejjed biex ikeċċihom għax ikkompromettew l-integrità li nistennew fil-politiċi u dawk ta’ madwarhom. L-ikbar theddida imma hi n-nuqqas ta’ informazzjoni fuq it-tielet persuna li sakemm tkun magħrufa ser jibqa’ dell fuq l-amministrazzjoni kollha.

Din hi siegħa gravi għat-tmexxija ta’ pajjiżna għax qiesu xejn m’hu xejn. Mhux bizzejjed li ngħidu li inkwetati. Jeħtieġ li jittieħdu passi, illum qabel għada. Diġa qegħdin 7 ġimgħat tard.

Standing Ovation għal Konrad

joseph_muscat_konrad_mizzi_ice_bucket_challengeeuropean-court-of-auditors-7-638

 

Jekk Konrad ma għamel xejn ħażin Joseph Muscat jista’ jikkunsidra li jinnominah bħala l-kandidat Malti għall-Qorti Ewropeja tal-Awdituri. Jinnominah flok Toni Abela, issa li ġie imħabbar li n-nomina ta’ Toni Abela ġiet irtirata.

Ikollu l-opportunità li jkun intervistat minn Kumitat tal-Parlament Ewropew u jkun jista’ jispjega lil udjenza ferm ikbar milli għamel s’issa għaliex għamel sewwa meta fetaħ kumpanija sigrieta fil-Panama.

Bla dubju għandu esperjenza ħafna iktar minn Toni Abela.

It-Taljan Gianni Pitella, bla dubju jagħtih l-appoġġ kollu li jista’, tiegħu u tas-Soċjalisti u Progressivi fil-Parlament Ewropew!

Titħajjar?

Ma tafx kif jispiċċa bi standing ovation oħra!  Tlieta fil-fatt: waħda għalih, oħra għal Joseph u oħra għal Malta għax l-aqwa fl-Ewropa.

 

X’għamel ħażin Konrad?

Konrad Mizzi Parlament

Ilna niddiskutu 7 ġimgħat u Konrad Mizzi għadu jgħid li m’għamel xejn ħażin.

Anke kieku l-ispjegazzjonijiet li ta huma korretti xorta jibqa’ l-problemi. Apparti l-fatt li l-ispjegazzjonijiet ma jitwemmnux.

Konrad għażel li jwaqqaf kumpanija fil-Panama fejn ir-reputazzjoni hi ħażina. Fejn is-segretezza tiffaċilita l-ħabi tal-abbuż. Fejn minħabba dan jispiċċaw moħbija flejjes id-dittaturi, flejjes li jirriżultaw mid-droga u mill-korruzzjoni.

Bħala Membru tal-Parlament u bħala Ministru, Konrad għandu l-obbligu li jieħu l-passi meħtieġa biex jassigura iktar trasparenza u kontabilità. Minflok mar fejn trasparenza ma hemm xejn u allura l-kontabilità mhiex possibli.

Meta Konrad iddeċieda li jwaqqaf kumpanija fil-Panama għamel bil-maqlub ta’ dak mistenni minnu. Bil-maqlub ta’ dak li jipprietka. Bil-maqlub ta’ dak li jipprietka l–partit poliitku li tiegħu issa hu deputy leader.

Allura kif jibqa’ jistaqsi x’għamel ħażin? Għax bil-fors tikkonkludi li jew irid jgħaddina biż-żmien inkella m’għandux idea ta’ x’inhu tajjeb u x’inhu ħażin.

Għalhekk biss (u anke jekk ma hemm xejn iktar – avolja mhux kulħadd konvint dwar dan) missu irriżenja 7 ġimgħat ilu.

Il-Grupp Parlamentari Laburista ………..beda jistenbaħ

 muscat_j_signing_election_1st_billboard

Kienet aħbar tajba fl-Independent il-bieraħ li l-laqgħa tal-Grupp Parlamentari Laburista kienet waħda imqanqla. Issemmew diversi ismijiet li insistew għar-riżenja tal-Ministru Konrad Mizzi. Issemmew l-ismijiet ta’ tlett Ministri li qablu li Konrad Mizzi għandu jirriżenja. [Varist Bartolo, Louis Grech u Leo Brincat – dal-għodu l-Malta Today semmew ukoll lil George Vella]

Bla dubju hemm oħrajn li s’issa għad ma kellhomx il-kuraġġ li jsemmgħu leħinhom. Fil-Parlament il-bieraħ beda jiċċaqlaq ukoll Edward Scicluna l-Ministru tal-Finanzi.

Konrad (u miegħu Keith Mizzi) żbalja li mar il-Panama, anke jekk il-kumpanija tiegħu ma laħqitx bdiet topera. Il-fatt biss li mar hemm hu ġustifikazzjoni biex jirriżenja.

Hi issue ta’ imġieba ħażina ta’ Konrad (u Keith).

Qegħdin nitkellmu dwar responsabbiltà politika li Konrad (u Keith) għandu jerfa’ talli fetaħ il-kumpanija fil-Panama.

Fl-aħħar, huwa ta’ inkuraġġiment li anke fil-Grupp Parlamentari Laburista hemm min jaħsibha b’dan il-mod. Fl-aħħar fil-Grupp Parlamentari tal-Partit Laburista hemm min stenbaħ u beda jaħseb b’moħħu. Avolja daqsxejn tard.

Il-ħsara li saret lill-pajjiż hi issa irreparabbli.

 

Bejn il-Panama u l-Għargħur

puke

Il-faqar tal-politika f’Malta hi imfissra b’mod ċar mid-dibattitu kurrenti. Il-logħob bil-kliem m’hu ser isolvi xejn.

Quddiem l-aħbar tal-kumpaniji fil-Panama il-Partit Laburista ma kellux il-kuraġġ morali li jgħid li dak kien żball li fil-partiti politiċi serji jħallsu għalih bir-rizenja, mill-ewwel.

Minflok, ħarġu mill-kexxun ir-residenza ta’ Beppe fil-Għargħur li dwarha qalu ħafna affarijiet li kollha jimmeritaw risposta ċara minn min hu konċernat. Inkluż riżenji jekk jirriżulta l-abbuż. Imma l-Partit Laburista mhux interessat dwar dan kollu. Hu ċar li jinteressah biss il-paragun tal-ħmieġ: min hu inqas jew iktar maħmuġ.

Il-politika f’Malta rriduċewha għal hekk. Bit-tama li l-abbużi jikkanċellaw wieħed lill-ieħor.

Ir-realtà, fortunatament, għall-parti l-kbira tal-Maltin hi differenti: kull storja dwar abbuż hi tat-tqalliegħ tal-istonku.

Trasparenza u kontabilità : pajjiżna jixraqlu aħjar

transparency

L-imġieba korretta tal-persuni fil-ħajja pubblika mhux biss hi essenzjali: hi mera tal-għeruq tal-etika fil-ħajja ta’ kuljum tal-pajjiż.

Dawk li jokkupaw uffiċċju politiku, ta’ kull sena hu mistenni li jippreżentaw dikjarazzjoni dwar dak li jippossjedu. Dan isir mhux biex naqtgħu l-kurżità jew inkella biex ikollna fuq xiex inzekzku. Isir biex ikun jista’ jiġi imkejjel b’dak li jippossjedu, jekk, abbużawx mill-posizzjoni tagħhom. Jekk id-dikjarazzjoni li issir tkun tirrifletti dak li jippossjedu wieħed jista’ jqabbel dikjarazzjoni ta’ sena ma dik ta’ sena oħra u b’dan il-mod ikun jista’ jifforma opinjoni jekk dak li jkunu qed jakkumulaw huwiex ġej mill-ħidma leġittima tagħhom inkella minn x’imkien ieħor.

Huwa għalhekk inkwetanti ħafna meta min jokkupa uffiċċju politiku jagħżel li jinvesti ġidu f’postijiet fejn hemm segretezza sħiħa. Għax min jeħtieġlu li kontinwament jagħti kont ta’ egħmilu ma jistax u m’għandux jaġixxi b’dan il-mod.

Meta l-persuni fil-ħajja pubblika jaħbu ġidhom ikunu qed jagħtu messaġġ żbaljat. Għax ikunu qed jgħidu li jiġu jaqgħu u jqumu mit-trasparenza u l-kontabilità, anke jekk fl-istess ħin ma jieqfux jipprietkaw dwarhom. Għax jekk ġidek ikun moħbi ma tistax tkun kontabbli: ma tistax tagħti kont ta’ egħmilek. Anke jekk kull ma tippossjedi jkun ġie akkwistat bl-iktar mod regolari.

Kif tista’ tagħti kont ta’ egħmilek jekk ġidek taħbieh f’kumpanija sigrieta f’ġurisdizzjoni li ma tagħti sodisfazzjon lil ħadd?

Dan hu l-iżball tal-Ministru Konrad Mizzi u taċ-Chief of Staff f’Kastilja Keith Schembri l-Kasco. Qed jiżbalja ukoll il-Prim Ministru li qiegħed jagħtihom l-appoġġ sħiħ tiegħu dwar il-kumpaniji fil-Panama.

Hu tal-biki li l-Partit Laburista qiegħed jaġixxi qiesu xejn m’hu xejn. Kieku intagħżlet it-triq tal-irġulija u Konrad Mizzi u Keith Schembri irreżenjaw mill-ewwel il-kaz ilu żmien magħluq. Imma billi webbsu rashom qed jagħtu l-messaġġ li għandhom x’jaħbu, anke jekk m’għandhomx. Dan kollu qed ikollu rifless fuq il-kredibilità tal-Gvern, tal-pajjiż u tal-Partit Laburista nnifsu.

Uħud minnkom, bħali, l-ġimgħa l-oħra smajtu lill-Avukat Toni Abela jwieġeb il-mistoqsijiet tal-membri Parlamentari Ewropej. Smajtu bħali l-emfasi fuq il-korruzzjoni f’uħud mill-mistoqsijiet li sarulu. Minħabba l-attitudi tal-Gvern pajjiżna qed jagħti l-messaġġ li l-korruzzjoni hi xi ħaġa aċċettabbli. Għax dak hu li jiġri meta l-Gvern jipprietka t-trasparenza u l-kontabilità imma fl-istess nifs jinkoraġixxi s-segretezza u jagħti appoġġ lill-imġieba ħażina.

Sfortunatament il-Gvern ta’ Joseph Muscat iktar moħħu fid-daqs tas-swimming pool ta’ Beppe Fenech Adami milli fl-imġieba ta’ dawk li qed iħaddmu l-makkinarju tal-istat. Dawn huma l-konsegwenzi ta’ Gvern li hu amorali, jiġifieri Gvern li għalih, xejn m’hu xejn, kollox jgħaddi.

Pajjiżna jixraqlu aħjar. Jixraqlu fuq kollox li l-Gvern ikollu l-prijoritajiet tiegħu f’posthom. Għax it-trasparenza u l-kontabilità jiġu qabel is-swimming pool ta’ Beppe.