Mario de Marco u l-proposti ta’ Alternattiva Demokratika

AD 2013 electoral manifesto     Mario de Marco

Fil-Parlament nhar l-Erbgħa, Mario Demarco qal li forsi jkun għaqli li qabel ma jsiru ħatriet sensittivi (mill-Gvern) jkun hemm konsultazzjoni mal-Parlament.

Din hi proposta li Alternattiva Demokratika diġa għamlet fl-aħħar Manifest Elettorali tagħha meta ipproponiet li diversi ħatriet isiru bil-kunsens tal-Parlament.

Fil-fatt fil-manifest elettorali ta’ AD għall-elezzjoni ġenerali tal-2013, insibu tlett proposti f’dan is-sens.

Fil-Kapitlu 6 tal-Manifest li jitkellem dwar riformi kostituzzjonali u demokratiċi hemm il-proposta ġenerali li l-Bordijiet u l-Kummissjonijiet ta’ importanza nazzjonali għandhom jinħatru mill-President tar-Repubblika bħala l-Kap tal-Istat u dan mingħajr l-involviment dirett tal-Prim Ministru. Il-President għandu jikkonsulta mhux biss mal-politiċi imma ukoll mas-soċjetà ċivili qabel ma jagħmel/tagħmel il-ħatriet.

Fl-istess Kapitlu tal-Manifest Elettorali, Alternattiva Demokratika titkellem ukoll dwar il-ħatra tal-ġudikatura: “L-imħallfin u l-maġistrati m’għandhomx jibqgħu jinħatru mill-Gvern iżda mill-President tar-Repubblika u soġġetti għal konferma mill-Parlament. Dan jiżgura sistema ta’ checks and balances bejn is-setgħa eżekuttiva (eżerċitata f’dan il-każ mill-President tar-Repubblika) u l-leġiżlatura.”

L-iktar proposta dettaljat qegħda fil-Kapitlu ambjentali, l-Kapitlu 14, fejn dan jitkellem dwar il-ħatriet fil-MEPA u jgħid hekk :

“Il-ħidma tkun effettiva daqs kemm ikunu kompetenti u affidabbli dawk li jinħatru biex imexxu. Alternattiva Demokratika għaldaqstant tipproponi illi filwaqt li l-Gvern tal-ġurnata jibqa’ jżomm s-setgħa li jaħtar il-membri ta’ din l-Awtorità kkonsolidata, dan m’għandux jagħmlu sakemm il-Parlament permezz ta’ Kumitat Magħżul ma jagħtihx il-kunsens tiegħu għall-ħatriet proposti. Il-Parliament ikun jista’ jikkunsidra li jagħti l-kunsens tiegħu wara li l-Kumitat Magħżul tiegħu ikun organizza sessjoni pubblika (public hearing) li fiha jgħarbel lil kull persuna proposta. Kull persuna proposta għandha tkun eżaminata fil-pubbliku dwar l-esperjenza u l-kwalifiċi tagħha konnessi mal-ħatra proposta.

Fejn tidħol rappreżentanza mis-socjetà ċivili, in-nominazzjonijiet għandhom isiru direttament mill-korpi effetwati. Għandu jkun hemm inqas uffiċjali pubbliċi bħala membri tal-bord, u rappreżentanza ikbar tas-soċjetà ċivili fl-awtorità kkonsolidata.

B’hekk huwa ittamat li jiżdiedu n-nomini ta’ persuni kompetenti kif ukoll li jonqsu l-ħatriet ta’ persuni li l-iprem kwalifika tagħhom hi l-lealtà politika. B’hekk ukoll il-Parlament ikun qed jieħu lura mingħand il-Gvern rwol importanti biex jassigura li l-ħarsien tal-ambjent jittieħed b’iktar serjetà.

Dan jgħodd għaċ-Chairman u l-membri tal-Bord li jmexxu l-Awtorità kif ukoll l-uffiċjali ewlenija fit-tmexxija tal-Awtorità li jinkludu iċ-Chief Executive Officer, id-Diretturi kif ukoll il-membri tal-Kummissjonijiet jew Tribunali tal-Appell li jiddeċiedu dwar talba għal permessi kemm ta’ żvilupp kif ukoll dwar riżorsi u permessi ambjentali oħra.”

Mario de Marco tkellem ukoll dwar jekk Membru Parlamentari għandux ikun full-time jew le. Huwa ma jaqbilx għax jidhirlu li Membru Parlamentari li għadu jaħdem/jipprattika l-professjoni ikun iktar f’kuntatt man-nies.

Hawnhekk ma naqblux: għax il-kuntatt prinċipali tal-Membru Parlamentari part-time mhux man-nies in ġenerali jkun, iżda mal-klijenti tiegħu li jiddedikalhom il-ħin u l-enerġija tiegħu. Huwa importanti li l-Membru tal-Parlament jiddistakka ruħu mill-klijenti tiegħu, għax issa l-pajjiz kollu huwa l-klijent tiegħu. Il-pajjiz jeżiġi servizz full-time mill-Membru Parlamentari. Sfortunatament dan is-servizz mhux jieħdu.

 

 

 

Advertisements

L-impotenza tal-Parlament u l-Imħallef Lino Farrugia Sacco

Lino Farrugia Sacco 1

Illum l-Imħallef Lino Farrugia Sacco jagħlaq snienu, 65 sena, u jirtira. Il-lum ukoll, billi l-Imħallef Lino Farrugia Sacco kien qed jiffaċċja mozzjoni Parlamentari biex jitneħħa minn Imħallef, din l-istess mozzjoni tispiċċa.

Il-kritika li l-Opposizzjoni qed tagħmel lill-Gvern hi li illum hu Jum Iswed għall-kontabilita u dan minħabba li l-Gvern ta’ Joseph Muscat qagħad jistenna li jiġu fi tmiemhom il-proċeduri legali li kien beda l-Inħallef Farrugia Sacco. Kien ovvju li dawn kien baqa’ ftit mhux ħażin biex jiġu fit-tmiem tagħhom.

L-Opposizzjoni għandha raġun tikkritika lill-Gvern għax kaxkar saqajh biex jaġixxi – għax kien ovvju li ma riedx jaġixxi. Imma bħas-soltu l-Opposizzjoni tgħid biss biċċa mill-istorja. Il-biċċa li jaqblilha.

Kien ikun aħjar kieku l-Opposizzjoni tipprova tispjega għaliex il-Gvern immexxi minn Lawrence Gonzi ħalla għall-aħħar minuta, fi tmiem l-2012, biex iressaq il-mozzjoni għat-tneħħija tal-Imħallef Lino Farrugia Sacco.

L-Imħallef Farrugia Sacco kien ilu s-snin jisfida l-Kodiċi tal-Etika tal-Imħallfin. Il-Gvern immexxi mill-PN, iżda, ma għamel xejn. Kieku l-Gvern immexxi mill-PN kien serju l-mozzjoni ressaqha snin qabel. Kieku ilna b’deċiżjoni.

Imma dan kieku l-Gvern tal-PN kien serju. Hu ovvju għal kulħadd li la Muscat ma jrid is-serjeta’ u l-anqas Gonzi ma riedha qablu ġhax anke Gonzi kaxkar saqajh.

Ma hemmx x’tagħżel bejniethom.

It-tnejn, kemm il-Partit Nazzjonalista  kif ukoll il-Partit Laburista huma responsabbli biex fil-konfront tal-akkużi li għandu l-Imħallef, il-Parlament hu impotenti.

L-Imħallef Wenzu Mintoff: kwalifikat jew mhux?

Wenzu Mintoff gurament

 

Il-ħatra ta’ Wenzu Mintoff bħala Imħallef nisslet ħafna kritika.

Essenzjalment il-kritika kienet dwar żewġ affarijiet.

L-ewwel tip ta’ kritika kienet dwar il-fatt li Wenzu Mintoff kien attiv għal żmien twil fil-politika. Mhux biss, imma li għal dan l-aħħar kien ukoll attiv fil-ġurnaliżmu fejn uża ħafna l-pinna fi kritika politika.

Jiena naħseb li jiena ħafna iktar komdu ma min hu ċar fil-kritika tiegħu milli ma min ma jgħid xejn, imbagħad meta jiftaħ ħalqu tista’ tinduna li hu ferm agħar.

It-tieni kritika fil-konfront tal-ħatra ta’ Wenzu Mintoff hi dwar jekk għandux l-esperjenza meħtieġa. Hu fatt li biex avukat jinħatar Imħallef irid ikun ilu ta’ l-inqas tnax-il sena jipprattika ta’ avukat.  Il-Kostituzzjoni fl-artiklu 96 tgħid li l-Imħallef li jinħatar irid ikun ilu mhux inqas minn tnax-il sena jeżerċita l-professjoni ta’ avukat.

Hemm opinjonijiet differenti dwar din xi tfisser. Dawk li qed jikkritikaw il-ħatra qed jgħidu li l-professjoni ta’ avukat tiġi eżerċitata fil-Qrati u li għaldaqstant avukat li ma jipprattikax il-Qorti ma jissodisfax dan il-kriterju tal-artiklu 96 tal-Kostituzzjoni. Din kienet ukoll il-linja li ħadet il-Kummissjoni għall-Amministrazzjoni tal-Ġustizzja meta ma qablitx mal-ħatra tal-Avukat Andre’ Camilleri bħala Imħallef xi snin ilu.

M’hemm xejn x’iżomm lil dawk li qed jikkritikaw il-ħatra ta’ Wenzu Mintoff u li jidrilhom li m’għandux biżżejjed prattika quddiem il-Qrati mill-jikkontestaw il-validita’ tal-ħatra tegħu. Jiena naħseb li flok id-dikjarazzjonijiet diversi li saru dwar bojkott tal-ewwel seduta jew ta’ avukati li mhux lesti li jindirizzawħ bħala Sur Imħallef jew min mhux lest li jkollu kawża quddiemu jkun ħafna aħjar li min jidhirlu li Wenzu Mintoff mhux kwalifikat jikkontesta l-validita’ tal-ħatra tiegħu.

Dan hu l-uniku mod serju kif isiru l-affarijiet.  Għax jekk  mhux kwalifikat il-ħatra tiegħu hi abbużiva, imma jekk hu kwalifikat hu fl-interess ta’ kulħadd, u l-iktar fl-interess tal-ġustizzja f’pajjiżna, li jkun hemm ftit iktar attenzjoni dwar dak li qed jingħad.

Ikun allura fil-fehma tiegħi għaqli li min jemmen li Wenzu Mintoff  mhux kwalifikat għall-ħatra ta’ Imħallef jikkontesta d-deċiżjoni tal-Gvern li jaħtru u dan billi jiftaħ kawża f’dan is-sens.

Nifhem li trid il-kuraġġ biex tagħmel dan. Kwalita li mhiex komuni ħafna. Imma għas-serjeta’ hi l-unika triq.

L-Imħallef Wenzu Mintoff

w_mintoff

Il-ħatra ta’ Wenzu Mintoff bħala Imħallef inevitabilment terġa’ tiftah il-polemika jekk min kien fil-politika għandux ikun ikkunsidrat għal ħatra fil-ġudikatura.

L-argument fil-fehma tiegħi m’għandux ikun l-impenn politiku, passat jew riċenti, imma jekk il-persuna nominat għandiex il-kompetenza biex taqdi d-doveri ta’ ġudikant.

Kellna diversi ġudikanti Maltin li ġew maħtura fuq il-bank tal-ġudikatura anke direttament mid-dinja politika.

Kellna l-każ tat-tieni Prim Ministru ta’ Malta. Francesco Buhagiar fis-sena 1924 kien ħatar lilu innifsu Imħallef u wara irriżenja minn Prim Ministru. Iċ-ċajta fis-snin għoxrin kienet li dan ħares fil-mera u lix-xbieha ta’ quddiemu qalila “minn għada, int Imħallef” ! Buhagiar kien mill-Unione Politica Maltese, wieħed miż-żewġ partiti li eventwalment ingħaqdu w iffurmaw il-Partit Nazzjonalista fl-1927.

Kien hemm ukoll il-każ ta’ Luigi Camilleri, ukoll fis-snin għoxrin. Kien elett fil-Parlament biex jirrappreżenta lil Għawdex f’isem il-Partit Demokratiku Nazzjonalista immexxi min-Nerik Mizzi. Sussegwentement inħatar Maġistrat ta’ eta żgħira, eventwalment Imħallef u fis-snin 50 temm il-karriera tiegħu bħala Prim Imħallef.

Waqt il-gwerra kien hemm il-każ ta’ George Borg mill-Partit Kostituzzjonali ta’ Gerald Strickland li fl-1941 inħatar Prim Imħallef meta l-Ingliżi warrbu lil Sir Arturo Mercieca minn Prim Imħallef.

Fis-snin 50 kien hemm żewġ Ministri tal-Edukazzjoni fil-Gvernijiet immexxija minn George Borg Olivier, Carmelo Schembri u Fortunato Mizzi li t-tnejn inħatru fil-ġudikatura. Schembri fis-snin 80 kien ukoll Prim Imħallef. It-tnejn kienu eletti f’isem il-PN fil-Parlament.

Fis-snin 50 kellna lil Ġuże’ Flores, wieħed mill-ahjar avukati fil-kriminal li qatt ipproduċa dan il-pajjiż.  Flores kien Speaker nominat mill-Partit Laburista fl-1955 meta nħatar Imħallef. Irtira fil-bidu tas-snin 70 bħala Viċi President tal-Qorti Kostituzzjonali.

Iktar riċenti kellna lill-Imħallef Joseph Filletti u lill-Imħallef Lino Agius, irtirati dan l-aħħar li t-tnejn kienu kandidati mal-Partit Laburista fl-elezzjoni tal-1971. Kellna ukoll lill-Imħallef Philip Sciberras li fis-sena 1977 kien Membru Parlamentari elett flok Ġuże’ Abela f’isem il-Partit Laburista, u lil Peppinu Cassar li kien Segretarju Parlamentari għad-Djar f’isem il-PN li nħatar Maġistrat fl-1998, jew lil Lorraine Schembri Orland li ikkontestat l-elezzjoni ġenerali tal-1987 mal-PN u inħatret Imħallef ricentement.

Il-lista hi twila u ma nafx jekk ħallejtx lil xi ħadd barra.

L-argument m’għandux ikun li persuna għax kienet involuta fil-politika tiskwalifika ruħha. Għandna nfittxu jekk il-persuna nominata għall-ġudikatura hiex kapaċi kif ukoll jekk hiex persuna ta’ integrita.

L-istorja għandha tieqaf hemm u dan għal kull ħatra li issir.

Inkun prużuntuż jekk ngħid iktar.

Ippubblikat ukoll fuq iNews : il-Ħamis 17 ta’ Lulju 2014

Uġiegħ ta’ ras għal Manwel Mallia

Mallia & Scerri

 

Malta mhiex l-uniku pajjiż fejn is-Servizz tas-Sigurta’ hu l-kawża ta’ diskussjoni. Dan joħroġ min-natura tas-Servizz tas-Sigurta’ li hi neċessarjament waħda ta’ segretezza intiza biex tiġġieled kontra l-kriminalita’ organizzata kif ukoll kontra t-theddid għas-sigurta’ tal-istat. Is-Servizz ta’ Sigurta’ għandu ukoll poteri kbar, meħtieġa biex jitwettqu l-obbligi tas-Servizz. Imma tant huma poteri kbar li kullimkien (f’kull pajjiż) jistgħu jwasslu għal abbuż ta’ poter. Abbuż li xi drabi jibqa’ għaddej bla ma ħadd jinduna. Imma hemm drabi meta dawn l-abbużi nindunaw bihom u meta jiġri hekk hemm l-obbligu ta’ diskussjoni pubblika li għandhom iwasslu biex jittieħdu l-passi meħtieġa. Għax ħadd m’għandu jkun il-fuq mil-liġi, l-anqas is-Servizz tas-Sigurta’.

L-abbuż l-iktar komuni illum f’diversi pajjiżi mhux għax ittieħdet azzjoni partikolari flok oħra imma dwar il-mod kif issir sorveljanza għal ġbir ta’ informazzjoni fuq in-nies. Dwar l-informazzjoni li tinġabar u tinħażen u dwar in-nuqqas ta’ sensittivita’ għall-privatezza taċ-ċittadin.

Meta f’Malta ma kellniex Servizz ta’ Sigurta’ din il-funzjoni kienet issir mill-Pulizija: pulizija pajżana li ħafna drabi kienu jiffurmaw parti mid-Dipartiment tal-Investigazzjoni Kriminali fil-Korp tal-Pulizija, is-CID.  Attivita’ li kienet l-iżjed ovvja u dokumentata fir-rigward tal-“rvellijiet” fis-snin 50 u f’perjodi oħra mqanqlin tal-istorja Maltija. Anke’ dakinnhar kien hemm il-kontroversja dwar kemm minn din il-ħidma kienet sorveljanza kontra l-kriminalita’ u kemm minnha kienet sorveljanza politika. Linja fina li f’mumenti partikolari diffiċli ħafna biex issibha. Perjodu sensittiv għal kulħadd, li kien jirrikjedi l-għaqal ta’ min imexxi li ma jħallix l-entużjażmu żejjed ta’ uħud iwassal għal abbuż. Kemm dan sar fil-passat jew kemm qiegħed isir illum, fl-aħħar, hu ġudizzju li għad trid tgħaddih l-istorja.

Issa kulħadd jaqbel li fil-ħidma biex ikunu evitati delitti (kbar u żgħar) il-forzi tal-ordni, inkluż is-Servizz ta’ Sigurta, għandhom rwol importanti ħafna, inkluż li jiġbru l-informazzjoni neċessarja biex jagħmlu xogħolhom sewwa.

M’huwiex dejjem faċli li taqta’ linja bejn dak li hu neċessarju u aċċettabbli u dak li m’huwiex. L-informazzjoni l-anqas m’hi faċli biex tiksibha. Sakemm l-informazzjoni tista’ tiksibha billi tosserva dak li qed jiġri ftit hemm diffikultajiet. Id-diffikultajiet jibdew meta biex tinkiseb l-informazzjoni tkun meħtieġa li tixxellef il-privatezza taċ-ċittadini individwali. Dan jista’ jkun neċessarju, imma min ser jiddeċiedi meta hu neċessarju? Kontra dak li jiġri f’Malta fejn jiddeċiedi l-Ministru, normalment tkun il-Qorti li tiddeċiedi u tagħti l-permess biex issir sorveljanza u dan minħabba l-ħtieġa ta’ l-imparzjalita’ f’deċiżjoniiet bħal dawn. Il-Ministru mhux dejjem l-aħjar garanzija għall-imparzjalita’. Minkejja d-difetti ta’ uħud mill-ġudikanti, is-sistema ġudizzjarja f’Malta tul is-snin uriet li kapaċi f’mumenti ta’ diffikultajiet kbar isservi ta’ tarka għad-drittijiet ta’ kull wieħed u waħda minnha ferm iżjed minn uħud mill-politiċi.

Dan iżda mhux biżżejjed. Minħabba l-poteri enormi li għandhom is-Servizzi tas-Sigurta jeħtieġu li jkollhom min jissorveljhom kontinwament. Is-sorveljanza tas-Servizzi tas-Sigurta’ tirrikjedi enerġija u attenzjoni kbira.  Dan għandu jkun rifless fil-persuna li tintagħżel biex tagħmel din il-ħidma.

Is-soċjeta’ demokratika tirrikonoxxi li hemm ċirkustanzi fejn id-drittijiet individwali jistgħu jkunu imxelfin. Imma dan għandu jsir biss meta jkun meħtieġ għall-ġid komuni. Għalhekk hemm l-awtoritajiet u l-liġijiet biex kulħadd ikun jaf fejn hu.

M’huwiex aċċettabbli li s-Servizzi tas-Sigurta’ jintużaw għal skop ta’ politika partiġġjana bħalma ntużaw f’Ħal-Għaxaq f’Diċembru 2009. L-anqas m’għandhom ikollhom aċċess għal informazzjoni personali mingħajr ħtieġa u mingħajr awtorizzazzjoni. Jekk dan isirx jiddependi minn kemm inkunu viġilanti.

Hu għalhekk li Alternattiva Demokratika ilha tinsisti fuq il-ħtieġa ta’ drittijiet diġitali. Dan kien wieħed mill-punti li sħaqna dwaru waqt il-Kampanja Elettorali għall-Parlament Ewropew. Dakinnhar kemm il-PN kif ukoll il-PL baqgħu b’ħalqhom magħluq.  Anke l-media injorat l-issue dakinnhar. Għalhekk huwa ta’ sodisfazzjoni li issa hemm min beda jistenbaħ.

Qatt m’hu tard.

 

https://carmelcacopardo.wordpress.com/2014/06/25/meta-s-servizz-tas-sigurta-mar-hal-ghaxaq-14-ta-dicembru-2009/

Mill-Manifest Elettorali ta’ AD dwar bidliet fil-Kostituzzjoni: (12) Il-ħatra tal-ġudikatura

Law Courts Malta

 (12) Il-ħatra tal-ġudikatura

L-imħallfin u l-maġistrati m’għandhomx jibqgħu jinħatru mill-gvern iżda mill-President tar-Repubblika u soġġetti għal konferma mill-Parlament. Dan jiżgura sistema ta’ checks and balances bejn is-setgħa eżekuttiva (eżerċitata f’dan il-każ mill-President tar-Repubblika) u l-leġiżlatura.

(silta mill-Kapitlu Numru 6 tal-Programm Elettorali ta’ Alternattiva Demokratika)

Snippets from AD’s electoral manifesto: (26) Appointment of the Judiciary

Law Courts Malta

The following extract is taken verbatim from Chapter 6 of AD’s Electoral Manifesto

Judges and magistrates should no longer be appointed by the Government but by the President of the Republic and subject to confirmation by Parliament. This would ensure checks and balances between the executive power (exercised in this case by the President of the Republic) and the legislature.

L-Estratt segwenti hu meħud kelma b’kelma mill-Kapitlu 6 tal-Manifest Elettorali ta’ Alternattiva Demokratika

L-imħallfin u l-maġistrati m’għandhomx jibqgħu jinħatru mill-gvern iżda mill-President tar-Repubblika u soġġetti għal konferma mill-Parlament. Dan jiżgura sistema ta’ checks and balances bejn is-setgħa eżekuttiva (eżerċitata f’dan il-każ mill-President tar-Repubblika) u l-leġiżlatura.

Mhux biss l-imħallfin ……………..

moneylaundering

L-ewwel aħbar interessanti ippubblikata din is-sena hi ta’ investigazzjoni fl-Italja dwar ħasil ta’ flus. Ir-rapporti ġew ippubblikati fil-media tal-GWU, fl-Orizzont u f’iNews u jirrigwardaw żewg persuni afdati sewwa mill-Gvern ta’ Lawrence Gonzi. Żewġ persuni li kienu għodda li intużaw fid-diversi postijiet fejn inħatru matul dawn l-aħħar snin.

Il-posizzjoni li għadhom qed jokkupaw dawn iż-żewġ persuni fil-Malta Enterprise u Transport Malta jirrikjedu azzjoni immedjata min-naħa tal-Gvern.

Mhux biss l-imħallfin jixħtu d-dellijiet meta jkunu taħt investigazzjoni!

L-Imħallfin fl-aħbarijiet

Scales_of_justice

L-imħallfin fl-aħbarijiet. Għal raġunijiet żbaljati. Raġunijiet li immaterjalment dwar x’ser tkun il-konklużjoni finali dwarhom ikompli jitfa iktar dellijiet fuq l-integrita’ tal-ġudikatura.

Kulħadd hu bniedem u l-possibilta’ tal-iżball uman dejjem tibqa’, ikun hemm kemm ikun hemm kontrolli.

Imma forsi issa hu l-mument addattat li nistaqsu jekk il-mod li bih jinħatru l-imħallfin u l-maġistrati huwiex addattat. S’issa jaħtarhom il-Prim Ministru li jikkonsulta ruħu ma min iħoss il-ħtieġa.

Alternattiva Demokratika hi tal-fehma li wasal iż-żmien li l-ħatriet isiru wara li l-Kummissjoni għall-Amministrazzjoni tal-Ġustizzja tgħarbel in-nomini tal-Gvern għall-Imħallfin u Maġistrati.

Il-Kummissjoni darba waħda biss kienet konsultata u dik id-darba kienet tat parir kontra l-ħatra li kienet ser issir. Minn dakinnhar lil hawn il-Kummissjoni qatt ma kienet ikkonsultata iktar.

Anke’ fil-ħatra tal-Imħallfin u l-Maġistrati hemm bżonn iktar trasparenza u serjeta’.