Il-Cafè Premier u l-Lottu

Qed jgħidulna li l-Gvern kien trasparenti ħafna fil-każ tal-Cafè Premier. Il-Gvern, qalilna l-Prim Ministru, għadda lill-Awditur Ġenerali l-informazzjoni kollha, bla ma ħalla xejn barra.

Ir-rapport tal-Uffċċju Nazzjonali tal-Verifika jgħid li Mario Camilleri ta’ Cities Entertainment Limited kien diġa offra l-Cafè Premier lill-Gvern preċedenti, li ma kienx interessat. Jgħidilna ukoll li wara l-elezzjoni ġenerali ta’ Marzu 2013 kien talab laqgħa mal-Prim Ministru Joseph Muscat. Din il-laqgħa saret nhar is-17 t’April 2013 meta Mario Camilleri ġedded l-offerta lill-Gvern biex jieħu lura l- Cafè Premier. Sussegwentement bdew in-negozjati.

Meta l-Gvern preċedenti informa lil Mario Camilleri li ma kienx interessat illi jakkwista l-Cafè Premier ikun interessanti ħafna x’għamel Camilleri meta kien infurmat bil-posizzjoni tal-Gvern. Ikun interessanti ħafna jekk Camilleri ippruvax jiskopri x’kien jaħseb il-Partit Laburista fl-Opposizzjoni dwar dan.

S’issa aħna infurmati li Camilleri iltaqa’ darbtejn ma Joseph Muscat meta kien għadu Kap tal-Opposizzjoni. Miegħu tkellem dwar is-shareholding li Camilleri kellu fil-kumpanija li għandha l-liċenzja tal-Lottu f’pajjiżna. It-Times online il-bieraħ , fil-fatt qaltilna hekk : “Admitting that he had met Mario Camilleri – one of the owners of Cafè Premier twice before the election, he said that the financial position of the establishment was never mentioned. Instead he said that Mr Camilleri’s shareholding in lotto was discussed.”

Mario Camilleri kien inkwetat u skond Joseph Muscat iddiskuta miegħu x’kien jaħseb il-Partit Laburista dwar it-tiġdid tal-liċenzja tal-Lottu.

Mill-informazzjoni li ngħatajna s’issa, minkejja li l-Gvern preċedenti ma kienx interessat illi jixtri lura l-Cafè Premier, Mario Camilleri ma jidhirx li kien inkwetat. Għaliex fuq l-agenda bejn Muscat u Camilleri filwaqt li kien hemm il-Lottu, ma kienx hemm il-Cafè Premier.

Ma nafx jien, imma daqsxejn diffiċli biex titwemmen din.  Naħseb li hemm hemm ħafna iktar li għadna ma nafux!

Il-kobba tidher li hi imħabbla sewwa!

Il-Cafè Premier: min jgħaġġel u min ikaxkar saqajh

 

Meta tifli sewwa r-rapport tal-Uffiċċju Nazzjonali tal-Verifika dwar il-Cafè Premier joħorġu ċari numru ta’ punti.

Joseph Muscat, issa qed jaċċetta li għaġġel. “Muscat admits Government rushed on €4.2 million Cafè Premier deal” tgħidilna l-Malta Today online tal-bieraħ il-Ħadd 1 ta’ Marzu. Il-mistoqsija li teħtieġ tweġiba hi għaliex għaġġel? Min jew x’kellu jiġri warajh?

Huwa minħabba li ried jgħaġġel illi żamm kontroll fuq it-taħditiet taħt l-uffiċċju tiegħu? Għaliex fl-iktar żmien kruċjali tat-taħditiet ma involviex lid-Dipartiment li jieħu ħsieb l-amministrazzjoni tal-propjetà tal-Gvern? Dan il-fatt waħdu huwa sinifikanti u jagħti indikazzjoni li d-deċiżjoni, tal-inqas fil-prinċipju, kienet ilha lesta ferm qabel il-bidu t’April 2013 meta bdew id-diskussjonijiet madwar 4 ġimgħat wara li nbidel il-Gvern.

Ir-rapport tal-Uffiċċju Nazzjonali tal-Verifika jgħidilna li qabel ma bdew id-diskussjonijiet ma’ Joseph Muscat, Mario Camilleri ta’ Cities Entertainment Limited kien qed jiddiskuti ma’ negozjant ieħor li ukoll kien offrielu €4.2 miljuni. Imma ma ftehmux għax Mario Camilleri dehrlu li Cities Entertainment Limited kien ħaqqha iktar. Fil-fatt huwa kien talab €5.37 miljuni. Mit-Times tas-Sibt sirna nafu illi l-offerta kienet saret mingħand Anġlu Xuereb li ma kienx lest li joffri iktar minn €4.2 miljuni .

Jekk il-problema setgħet issolviet bl-involviment tas-settur privat, il-mistoqsija li toħroġ waħedha hi għaliex intużaw €4.2 miljuni mit-taxxi? Din it-tweġiba ma jista’ jagħtiha ħadd ħlief il-Prim Ministru Joseph Muscat.

Jista’ jkun hemm min jgħid li dan sar biex titneħħa kċina minn taħt il-Biblioteka u b’hekk jitneħħa sors ta’ periklu kbir taħt teżor nazzjonali. Min jgħid hekk forsi ma jafx li l-kuntratt oriġinali ma Cities Entertainment Limited iffirmat fl-1998 kien jipprojibixxi li jintużaw ċilindri tal-gass fuq is-sit. Forsi l-anqas ma jaf li kċina fis-sit li taħdem bl-elettriku hi ta’ periklu ferm inqas mid-diversi ħwienet tal-ħwejjeġ li hemm taħt il-Biblioteka u li b’short circuit fis-sistema tal-elettriku huma ukoll sors kontinwu ta’ periklu daqs jekk mhux iżjed minn kċina li taħdem bl-elettriku.  Għax b’short circuit fis-sistema tal-elettriku il-ħwejjeġ jaqbdu ferm iktar malajr mill-affarijiet li normalment insibu fi kċina! U in-nar li jirriżulta jinfirex iktar malajr.

It-Taqsima tal-Propjetà tal-Gvern, kif inhu ddokumentat fir-rapport tal-Uffiċċju Nazzjonali tal-Verifika, damet ftit ittella’ u tniżżel sakemm fl-aħħar iddeċidiet li tibda proċeduri fil-Qorti biex ikun xolt il-kuntratt. Fl-2004 kien diġa beda jberraq. Fl-4 t’April 2006 ġiet ippreżentata ittra uffiċjali biex titħallas il-kera li kienet b’lura. Wara ħafna tiġbid u xi pagamenti  s-sitwazzjoni irranġat għal ftit, sakemm nhar il-5 ta’ Mejju 2009 reġgħet ġiet ippreżentata ittra uffiċjali oħra dwar il-kera li kienet għad ma tħallsitx. Wara dan baqgħu daqqa jifthemu u wara ftit jerġgħu jaqgħu lura fil-ħlas. Sakemm fl-2012 ittieħdu passi legali mill-Gvern.

Kien ikun ħafna iktar għaqli kieku għaxar snin ilu ittieħdu l-passi biex ikun xolt il-kuntratt. Kieku sal-lum bla dubju l-Cafè Premier ilu li ġie f’idejn il-Gvern mingħajr ma tħallas ċenteżmu wieħed mit-taxxi tagħna.

Għalhekk hi ġustifikata l-konklużjoni tal-Awditur Ġenerali li ma ġewx esplorati biżżejjed possibilitajiet oħra li setgħu solvew il-problema.

Bla dubju għal dan kollu għandu responsabbilta’ kbira Joseph Muscat li kif ammetta illum, għaġġel. Imma għandu responsabbiltà ukoll Jason Azzopardi li sad-9 ta’ Marzu 2013 bħala Ministru kellu responsabbilta politika għat-Taqsima tal-Propjeta tal-Gvern li kaxkret saqajha biex tieħu l-passi li kienu neċessarji.

Wieħed għaġġel u l-ieħor ikaxkar saqajh.