Wara r-riżenja ta’ Justyne

Issa Justyne irriżenjat għat-tieni darba mill-Kabinett ta’ Robert Abela. Il-Kabinett ta’ Abela, l-ikbar wieħed fl-istorja, naqas bi tnejn, Justyne u Rosianne.

Meta irriżenjat Rosianne ma kien daħal ħadd ġdid fil-Kabinett.

Kif diġa għidt, il-każ ta’ Justyne għadu miftuħ, mhux biss għax il-Kumitat Permanenti tal-Parlament dwar l-Istandards fil-Ħajja Pubblika għad irid jiddiskuti r-rapport (m’għandux għaġġla) imma ukoll għax hemm riżenji oħra li jeħtieġ li jsiru.

Frank Fabri u Paul Debattista huma mistennija li jwarrbu ma jdumux. Tal-ewwel għax iffirma l-kuntratt abbużiv u illegali u tat-tieni għax kien hu li iffaċilita dan il-qerq kollu billi kiteb ir-rapport li għal xi żmien kien qed jingħad li taparsi kitbu Daniel Bogdanovic u b’hekk ikun jista’ jsir il-ħlas ta’ ħmistax-il elf euro.

Minn kif tkellem Robert Abela jidher li m’għandux għaġġla biex jaħtar Ministru flok Justyne. Dan isaħħaħ ix-xniegħa, li issa ilha ftit ġranet għaddejja, li mhux biss ġejja reshuffle tal-Kabinett dalwaqt, imma li hu ippjanat ukoll li jinbidlu diversi f’karigi mlaħħqin.

Ma ninsewx ukoll li f’Jannar, xahar ieħor, għandu jibda jinstema l-ġuri dwar il-hold-up li falla fuq l-HSBC. Intqal diġa li f’dan il-ġuri jistgħu jsiru rivelazzjonijiet dwar membru ieħor tal-Kabinett ta’ Robert Abela. Din tista’ twassal għal riżenja oħra!

Nistennew u naraw.

Il-Milied it-Tajjeb

Wara 60 jum jaħsibha, ddeċieda …………. li ma jiddeċiedi xejn

 

Mela Joseph Muscat iddeċieda wara 60 jum jaħsibha.

Iddeċieda li jħalli kollox kif inhu.

Keith il-Kasco Schembri għadu hemm!

Konrad Mizzi ma baqax Ministru għall-Enerġija u s-Saħħa. Sar Ministru bla portafoll ibbażat f’Kastilja. Huwa jwettaq il-proġetti li jassenjalu l-Prim Ministru. L-ewwel proġett : il-power station. X’inbidel? Mhux dak li kien qed jagħmel?

Joseph iddeċieda li ma jiddeċiedi xejn. Imma iddeċieda!

Joseph Muscat jirriċikla lil Konrad Mizzi u lil Manwel Mallia

 

Bir-reshuffle tal-Kabinett imħabbra illum Joseph Muscat qed jirriċikla lil Manwel Mallia u lil Konrad Mizzi.

Konrad Mizzi taparsi ittieħidlu d-dikasteru u baqa’ Ministru bla portafoll fl-uffiċċju tal-Prim Ministr fejn ser jibqa’ respnsabbli mill-proġetti tal-Enerġija.

Manwel Mallia li qatt ma kellu l-kuraġġ li jirriżenja u jerfa’ r-responsabbiltà politika reġa’ daħal fil-Kabinett bħala Minsitru tal-Kompetittività. Fil-fatt Mallia kien tkeċċa minn Ministru għax minkejja li ngħata ċans baqa’ jirrifjuta li jirreżenja.

Il-Kasco jibqa’ hemm.

Dak li għamel Joseph mhux biżżejjed. Konrad Mizzi u Keith Schembri għandhom jirreżenjaw.

 

Louis Galea u r-Reshuffle fil-Kabinett ta’ Joseph Muscat

 

Diversi, fosthom il-maltarightnow.com  qed jispekulaw li ser issir reshuffle fil-Kabinett dal-waqt biex jinħoloq post ħalli jerġa’ jinħatar Manwel Mallia bħala Ministru.

Dan hu possibli li jsir. Imma waħda mir-raġunijiet li qed tissemma biex tiġġustifika għaliex ser ikun hemm reshuffle hi l-post Malti fil-Qorti tal-Awdituri tal-Unjoni Ewropeja fil-Lussemburgu.

Preżentement hemm Louis Galea, li kien inħatar f’Mejju 2010. Qablu kien hemm Josef Bonnici li dam fil-ħatra bejn Mejju 2004 u Mejju 2010, jiġifieri sitt snin. Dan ifisser li l-ħatra tal-Louis Galea hi għal sitt snin. Allura l-ħatra mill-Gvern Malti tas-suċċessur ta’ Louis Galea ma tidħolx fis-seħħ f’Mejju 2015, iżda f’Mejju 2016.

Ovvjament jekk ser issir reshuffle dal-waqt mhiex ser issir minħabba s-suċċessur ta’ Louis Galea!

L-ewwel reshuffle ta’ Joseph

 

 

Tħabbar iċ-ċaqlieq u t-tibdil fil-Kabinett.

Fost dawk effettwati miċ-ċaqlieq hemm min matul l-aħħar sena, min għal ftit żmien u min għal ħafna, kellu diffikulta u konflitt bejn il-prattika professjonali u r-responsabbiltajiet pubbliċi tiegħu. Fuq quddiem nett kien hemm il-każ ta’ Franco Mercieca li kif stqarr huwa stess jippreferi l-prattika professjonali tiegħu. Il-kwistjoni issa ser tiġi fi tmiemha. Imma jonqos li naraw ukoll x’tibdil ser ikun hemm fil-kodiċi tal-etika tal-Ministri w is-Segretarji Parlamentari.

Hemm ukoll issues serji konnessi mal-ħatra ta’ Marie Louise Coleiro Preca bħala President tar-Repubblika. Hu żball oħxon li l-President iżżomm responsabbiltajiet diretti għal oqsma ta’ politika soċjali. Il-President għandha tkun distakkata minn dawn l-affarijiet. Bla dubju ser ikun hemm konflitt bejn kif tara l-affarijiet hi u kif jarahom il-Ministru l-ġdid għall-politika soċjali, Michael Farrugia.

Il-ħatra ta’ Karmenu Vella bħala Kummissarju Ewropew hi ukoll sorpriża. Karmenu Vella qatt ma kien interessat u qatt ma wera xi inklinazzjoni lejn politika Ewropeja. Għallinqas pubblikament dan m’huwiex magħruf. Huwa kmieni biex wieħed jgħid jekk hiex għażla tajba. Ser jiddependi ukoll mir-responsabbiltajiet li l-President il-ġdid tal-Kummissjoni jassenjalu. Dan il-President jista’ jkun Martin Schultz imma jista’ jkun ħaddieħor ukoll! Iċ-ċaqlieq fil-previżjoni tan-numru tas-siġġijiet li jistgħu jirbħu s-Soċjalisti fil-Parlament Ewropew jindika li Muscat għaġġel fin-nomina ta’ Karmenu Vella. Kien ikun iktar għaqli li stenna madwar xahrejn oħra qabel ma ħa din id-deċiżjoni.

Ir-reshuffle ta’ Joseph Muscat

Probabbilment li jkun hemm bżonn illi ssir reshuffle dalwaqt u dan minħabba illi jridu jsiru numru ta’ ħatriet.

Jrid jinħatar President tar-Repubblika ġdid minn nhar l-4 t’April flok George Abela. Fil-ġimgħat ta’ wara jkun meħtieġ ukoll li jiġi nominat (jew nominata) Kummissarju għall-Unjoni Ewropeja flok Tonio Borg.

Il-ħatriet kif jaf kulħadd qatt ma jsiru biss fuq mertu jew kapaċita. Il-ħatriet huma ukoll parti mil-logħba ċess tal-politika. Huwa naive min jaħseb mod ieħor.

Il-ħatriet il-ġodda ta’ President u Kummissarju huma opportunita biex Joseph jagħmel fine tuning tal-għażliet tiegħu ta’ Marzu li għadda u fix-xhur sussegwenti.

Ix-xniegħat dwar x’tibdil jista’ jsir beda.

Interessanti li aħna u nisimgħu x’inhu jingħad naħsbu ftit dwar min għandu interess f’dawn ix-xniegħat.

L-ewwel interess huwa tal-Prim Ministru innifsu li min jaf kemm ilu jisma’ dwar x’għandu jagħmel u xi jmissu għamel. Joseph Muscat għandu kull interess li jipprova jiżen x’reazzjoni jkollu għaċ-ċaqlieq li għandu f’moħħu.

It-tieni interess huwa ta’ dawk li jew tħallew barra inkella li jixtiequ javvanzaw. Dawn ovvjament jinkludu xniegħat kontra dawk li jixtiequhom li jkunu mwarrba. Nismimgħu kliem bħal: mhux tajjeb/mhux tajba. Dak minn fejn inqala’?  Għadu ġej u jafdah daqshekk?

Il-kapaċita kif nafu, m’hiex l-unika kriterju. L-anqas neċessarjament m’hi l-kriterju ewlieni. Waħda mill-karatteristiċi ta’ Muscat hi li jfittex li jakkomoda bl-iskop li jagħlaq ħalq dak li jkun. Jiġifieri l-kriterji u l-ħsieb wara movimenti partikolari mhux neċessarjament li huma posittivi. M’hu xejn ġdid dan.

Ismijiet qed nisma’. Pero’ ma rridx nirrepetihom għax ma rridx inkun parti mil-logħba li għaddejja. Nippreferi l-lussu li nosserva.