Issa li l-Arċisqof irriżenja ……………..

 

L-Independent tal-lum qed jgħidulna li l-Papa taptap fuq spallejn l-Isqof t’Għawdex Mario Grech wara d-diskors li dan ta’ l-aħħar għamel waqt is-sinodu tal-isqfijiet f’Ruma.

L-Isqof Grech kien rappurtat li għamel diskors li fih saħaq fuq il-ħtieġa ta’ kemm il-Knisja trid toqgħod attenta dwar x’lingwaġġ tuża’. Meta tqis li waqt il-kampanja dwar id-divorzju l-Eċċellenza Tiegħu uża kliem iebes ħafna fil-konfront tal-kampanja favur l-introduzzjoni tad-divorzju, jidher li dan hu progress kbir.

L-anqas ma jista’ wieħed jinsa li l-ET l-Isqof t’Għawdex f’pontifikal fil-parroċċa tal-Munxar ftit wara r-referendum tad-divorzju kien rappurtat li ma kellu l-ebda dispjaċir minn dak li qal u li jekk meħtieġ kien lest li jirrepetieh.

 

Logħba Ċess fil-Kurja tal-Arċisqof

 

Mill-kummenti diversi fil-gazzetti jidher ċar li fil-Kurja tal-Arċisqof għaddejja logħba Ċess.

Il-kliem li qed jintuża fil-kitba hu indikattiv ta’ dak li għaddej minn moħħ min qed jgħidu. Ir-Rev. Joe Borg per eżempju jiddeskrivi lill-Knisja Maltija bħala li qegħda fl-istess stat li kien il-Partit Nazzjonalista wara l-elezzjoni ġenerali tal-1976. Jiġifieri, r-Rev  Joe Borg qed jgħid li l-Knisja hi b’Kap iżda bla tmexxija, b’viżjoni imċajpra u bis-segwaċi imgerfxin.

Analiżi iebsa li iżda taqbel mad-deskrizzjoni tal-Knisja Maltija bħala waħda li ġiet imsikkta. Din hi deskrizzjoni ta’ Simon Busuttil u ta’ oħrajn fil-PN xi xhur ilu.

Minbarra din il-kritika hemm oħra bħal dik tar-Rev Rene Camilleri dwar il-prokrastinazzjoni tal-Arċisqof biex jagħmel it-tibdil meħtieġ fil-Kurja kif ukoll il-kummenti validissimi ta’ Fr Joe Inguanez fuq l-istess linja.

It-tmexxija tal-Knisja f’Malta kienet komda għal ħafna snin. Għax minbarra l-Arċisqof fil-Kurja kellha ukoll ieħor jilgħaba tal-Arċisqof, għal ħafna snin, fil-Berġa’ ta’ Kastilja.  Il-protezzjoni li l-“Arċisqof Lawrence Gonzi” , kif ukoll il-predeċessur tiegħu ta lill-Knisja Maltija tul is-snin billi rreżista t-tibdil soċjali spiċċa iktar għamel ħsara mhux biss lill-Knisja imma anke lis-soċjeta’ Maltija. Għax it-tibdil li seta tħalla jseħħ bil-pass tiegħu, minflok qiegħed iseħħ f’daqqa u b’ritmu mgħaġġel. Mhux kulħadd hu ippreparat għal dan it-tibdil.

Il-protezzjoni artifiċjali tagħtik sens falz ta’ sigurta’. Sigurta’ li fil-fatt ma teżistix. Meta l-poplu allura xeba’ u ivvota favur l-introduzzjoni tad-divorzju nhar it-28 ta’ Mejju 2011 il-protezzjoni tal-Arċisqof Lawrence Gonzi spiċċat.

It-tmexxija tal-Knisja li jrid r-Rev Joe Borg tikkuntrasta ma dik tal-Prof Victor Axiaq. Ta’ l-ewwel irid Knisja mhiex siekta fuq materji ta’ interess pubbliku. Tat-tieni jrid Knisja mhedija fl-ispiritwalita. Ikolli ngħid li dawn iż-żewġ veduti m’humiex inkompatibbli. Id-diffikultajiet iżda jmorru lura s-snin sa żmien l-Arċisqof Gonzi l-ieħor.

Għax dan pajjiż li mhux dejjem tista’ tifhmu: kellna Arċisqof li kien politiku u politiku li iktar kien jidher qiesu l-Arċisqof!

Sadanittant għaddejja l-logħba ċess. Uħud iżommu s-skiet bi prudenza jew iktar b’makakkerija. U l-Arċisqof Pawlu Cremona, skond Joe Borg, qiesu George Borg Olivier, jistenna li jew jitlaq inkella itellquh.

Wara kollox anke fiċ-ċess hemm 4 isqfijiet, tnejn fuq kull naħa  !

Ippubblikat fuq iNews, il-Ħamis 21 t’Awwissu 2014

Dom : abjad jew iswed iżda bla griż

Il-funeral statali ta’ Dom Mintoff kif kien mistenni ħareġ fil-pubbliku l-appoġġ u l-approvazzjoni li Dom għadu kapaċi jqanqal, minkejja li hemm min ipprova jpinġih bħala traditur.  Miet imma għex b’viżjoni ċara. Viżjoni li kienet ċara sa mill-ewwel ġranet tal-ħidma politika tiegħu.

Ta’ 23 sena fid-Daily Malta Chronicle ippubblika l-mission statement tiegħu : “Malta għandha bżonn ta’ membri ġodda b’ideat godda li jkunu jistgħu jgħaqqdu l-elementi progressivi kollha u tbiddel is-sistema soċjali medjevali f’sistema li tkun l-għira tal-bqija tad-dinja.” Fl-1939 il-messaġġ ta’ Dom kien ċar għal kulħadd, ħlief għal min ma riedx jisma’. L-impenn tiegħu fil-ħajja pubblika Dom kien jarah bħala l-għodda biex ineħħi l-għanqbut!  Kien mgħaġġel, probabilment għax kien konxju li l-politiku hu għasfur tal-passa. Allura fittex li jagħsar kull opportunita’ li ġiet quddiemu. Ma kellux paċenzja ma min kien kajman.  Min kien jimxi bil-mod iżżejjed kien jarah ta’ xkiel li seta jtellfu l-ħin u per konsegwenza l-opportunita li jwettaq il-viżjoni tiegħu.

Il-viżjoni tiegħu wettaqha. Imma weġġa’ ħafna nies. Weġgħat li faċilment setgħu ġew evitati. Kif għidt diġa f’kitba oħra tiegħi hi sfortuna kbira li dawk ta’ madwaru mhux dejjem kienu kapaċi jagħtuh parir tajjeb. Pariri tajbin kienu bla dubju jnaqqsu l-possibilta’ ta’ ħsara u jagħmlu l-bniedem iktar aċċettabbli – jew inqas inaċċettabbli – milli fil-fatt hu.

Hemm ukoll il-problema kkawżata mid-debbolizzi tiegħu illi kif ilu jingħad fil-widnejn seta kien hemm min uzhom biex jirkattah. Fil-fatt fi blog oħra, dik ta’ Daphne Caruana Galizia, iktar kmieni din il-ġimgħa ġiet ippubblikata storja dwar dan il-punt. Din l-istorja ġiet imneħħja ftit wara għax kien fiha żball. Imma mhux billi tneħħiet minn fuq il-blog, l-istorja xorta għadha teżisti x’imkien fuq l-internet u tista’ tinqara billi wieħed jagħmel użu minn din il-link: għafas hawn. Għax it-teknoloġija, tajjeb jew ħażin, illum tikxef kollox. (Nota: sadanittant ġiet ippubblikata edizzjoni ġdida tal-post li kienet irtirata li tista’ tinqara hawn).

Din hi storja dwar rikatt u sfortunatament hija ibbażata fuq inċidenti li l-gazzetti naqsu serjament illi jinvestigaw u jinfurmaw lill-pubbliku dwarhom. Veru li meta ġraw ma kien hawn  l-ebda tradizzjoni ta’ ġurnaliżmu investigattiv fil-pajjiż. Ġurnalisti kapaċi kien hawn, imma l-klima politika ma kienitx tippermettilhom li jaħdmu. Imma in-nuqqas xorta jibqa’ hemm u kellu konsegwenzi kbar. Kif jixhed l-inċident tar-ritratti li ġew ippreżentati fil-Parlament minn Lorry Sant. Ir-ritratti jixħtu dawl fuq dak li ġara u inżammu mistura. Biex seta’ jseħħ rikatt ħalli tinħeba l-korruzzjoni, li xorta inkixfet ftit wara bir-rapport tal-Kummissjoni dwar il-Korruzzjoni fuq Lorry Sant.

Dawn u ħafna affarijiet oħra għad iridu jinkitbu volumi sħaħ dwarhom. Kif qal l-Arċisqof Pawlu Cremona dalgħodu Dom bena l-ħidma politika tiegħu fuq żewġ pilastri importanti: li jgħin lill-fqir u li jsaħħah l-identitia’ nazzjonali. Hi sfortuna li kellu jirrombla minn fuq ħafna. Li għalaq għajnjeh għal ħafna ħmieġ w irregolaritajiet amministrattivi. Li kien imdawwar minn nies vjolenti li kellhom is-setgħa li jagħmlu li jridu mingħajr ma jiġrilhom xejn, għax il-Pulizija kienu dejjem jipproteġu lilhom.

Għexna fi żminijiet koroh. Żmien fejn l-abbuż kien igglorifikat. Veru li Dom għamel il-ġid imma dan il-ġid m’huwiex gomma li tħassar il-ħsara li saret. Fl-aħħar l-istorja għad tagħti l-ġudizzju tagħha. Nittama li l-abjad jibqa’ abjad imma li l-iswed jibqa’ iswed ukoll. Għax Dom ma kellux griz!

Ir-referendum dwar id-divorzju : Riflessjonijiet (2) għall-kwiet fil-Messiku

llpup iebsin ta’ nagħaġ. Briganti. Hekk qalilna l-Isqof t’Għawdex lilna lkoll, il-Kattoliċi favur id-divorzju. Diskors li impressjona ħafna lill-merħla tiegħu li  68% minnha qablet miegħu. Imma l-bqija tal-pajjiż irvella għal dawn l-insulti. Għax mhux kulħadd nagħġa. Kollha għandna moħħ u l-parti l-kbira minna kapaċi nagħmlu użu minnu.  

X’jiswa li fl-aħħar minuti tal-kampanja referendarja tintalab apoloġija jew biex nuża kliem l-Arċisqof Cremona “infittxu r-rikonċiljazzjoni” jekk hu ċar li m’hemmx l-iċken intenzjoni li wieħed jirrimedja? Għax issa l-Isqof t’Għawdex ġie rappurtat li qal waqt pontifikal fil-Munxar li m’għandu l-ebda dispjaċir, u jekk meħtieġ jirrepeti dak li għamel u qal.  

Sfortunatament l-Isqof t’Għawdex jittratta lill-fidili ta’ nagħaġ mhux ta’ bnedmin li jafu jaħsbu u jixtarru. Nissuġġerilu li joqgħod ftit fis-skiet kif kien tal-parir Dun René Camilleri:  biex forsi fis-skiet u l-ġabra jagħraf ftit dak li s’issa għadu ma indunax bih. Imbagħad forsi jaħsibha xi ftit differenti. Jista’ jkun li  għandu bżonn ftit riflessjoni fil-kwiet bħal dik li ntbagħat jagħmel Patri Mark Montebello ġewwa l-Messiku.

Bejn divorzju u bews ta’ idejn l-Arċisqof

Ir-referendum hu għodda demokratika li iżda jekk tintuża ħażin iktar jagħmel ħsara milli ġid.

Kemm il-Gvern kif ukoll l-Opposizzjoni s’issa kienu ambigwi dwar il-proposta għall-introduzzjoni ta’ divorzju ta’ JPO.

Il-PN permezz ta’ Lawrence Gonzi (u numru ta’ Ministri) qal repetutament li hu ma jaqbilx mad-divorzju, għax dan imur kontra dak li hu jemmen kif ukoll kontra dak li l-PN jirrappreżenta.

Imma ngħid jien jekk hu kontra d-divorzju xi skop għandu r-referendum għall-PN?  Għax jekk ma jaqbilx mad-divorzju u l-konklużjoni tar-referendum tkun favur x’ser jagħmel?  Jibla kliemu għax jippreferi l-poter minn dak li ddefinixxa bħala l-valuri tiegħu u tal-Partit  jew ibaxxi rasu jibqa’ konsistenti u jwarrab? Il-loghob bil-kliem qed inissel ħafna dubji dwar x’jista’ jsir fl-għażla bejn valuri u poter.  Dan hu l-veru kuntrast ippjanat bejn dak li qed jgħidu JPO u Gonzi dwar ir-referendum u d-diskussjoni fil-Parlament.

Il-posizzjoni ta’ Joseph Muscat imbagħad hi gwappa daqs dik ta’ Lawrence Gonzi. Jemmen li d-divorzju hu dritt ċivili. Imma fl-istess ħin qed joqgħod lura milli jwassal lill-Partit tiegħu illi jaddotta posizzjoni favur id-divorzju. Filwaqt li jemmen li hu dritt ċivili lest li jħalli dan id-dritt jiġi mċaħħad permezz ta’ referendum.

Ir-realta’ hi li l-PN u l-PL qed jistaħbew wara r-referendum għax huma inċerti mill-gruppi parlamentari tagħhom.

Il-grupp fil-PN li hu favur id-divorzju qed jara fir-referendum il-possibilta’ li jġib lil Gonzi għarkubtejh. Dan għax b’vot favur id-divorzju il-PN ikollu jagħżel bejn il-poter u li jxellef “il-valuri” tiegħu.

Muscat qiegħed ukoll f’salib it-toroq. Il-bews li Muscat jirriżerva għal idejn l-Arċisqof  jikkuntrasta ma l-mod kif imxew mal-Knisja l-predeċessuri tiegħu. Imma issa bid-divorzju storja oħra: lil hinn mis-sinifikat tal-bews.

Muscat ma jridx deċiżjoni issa iżda wara l-elezzjoni meta jkun laħaq immansa lil dawk li għandu fil-grupp parlamentari li huma kontra d-divorzju. Inkella forsi jkun ħeles minnhom.

X’ser jiġri ma nafx. Bħalma la jaf Muscat u l-anqas Gonzi. L-aqwa li jridu li jiddeċiedi l-poplu biex ikollhom paraventu wara min jistaħbew.

L-aqwa imma li jibqa’ jbus idejn l-Arċisqof .

Lil hinn mir-raġġiera

 

Il-mozzjoni privata ta’ Jeffrey Pullicino Orlando (JPO) fil-Parlament biex ikun introdott  id-divorzju ħsadet lil uħud, fosthom lil Mons Arċisqof. Ħafna iżda ilhom jistennew li xi ħadd jiċċaqlaq.

L-issue fil-fehma tiegħi hi waħda biss : li l-għażla dwar id-divorzju ma ssirx mill-istat għan-nom tagħna, kif isir sal-lum, imma li ssir minn kull wieħed u waħda minnha skond il-kuxjenza tiegħu jew tagħha. Imma biex dan ikun jista’ jsir l-istat irid jipprovdi l-għodda neċessarji.

Illum, huwa u jkun intervistat fuq l-RTK minn Tonio Bonello l-Arċisqof qal waħda tajba: li l-Partiti fil-Parlament m’għandhomx l-awtorita’ morali li jmexxu l–quddiem  leġislazzjoni dwar id-divorzju, għax ħadd minnhom ħlief Alternattiva Demokratika ma ressqu quddiem l-elettorat proposti f’dan is-sens.

Hemm kontradizzjonijiet oħra.

Il-Partit Nazzjonalista li jippreżenta ruħu bir-raġġiera m’huwiex ser jazzarda li jappoġġa d-divorzju, avolja imbagħad ma sab l-ebda diffikulta li jmexxi l-quddiem il-koabitazzjoni w id-drittijiet li jirriżultaw minnha.

Min-naħa l-oħra l-Labour permezz tal-mexxej tiegħu ilu jitkellem favur id-divorzju li ġustament jiddeskrivieh bħala dritt ċivili. Imma ma jemminx biżżejjed f’dan id-dritt ċivili biex iħossu li jista’ jikkonvinċi lill-Partit tiegħu biex jappoġġa l-proposta parlamentari ta’ JPO. Dan qed jagħmlu bi ħsieb : għax b’hekk jista’ jfuh maż-żewġ naħat : kemm ma’ dawk favur kif ukoll ma dawk kontra. Progressiv għal uħud u bir-raġġiera għal oħrajn !

Il-proposta ta’ JPO hi dettaljata. Minn eżami tad-dettalji jidher ċar li hemm diversi persuni li qed jagħtu kontribut biex din tlaħħmet. Li jonqos issa hu li naraw kemm minn dawn huma Membri tal-Parlament.

Alternattiva Demokratika tilqa’ l-mozzjoni u hi sodisfatta li JPO mexa fuq dak li ipproponiet AD lill-Membri Parlamentari f’ittra li iċċirkulatilhom reċentement.