Al Jazeera dwar il-problema tal-ilma f’Malta

Advertisements

Ġirien Nukleari

minn Carmel Cacopardo

ipubblikat 27 ta’ Lulju 2008

__________________________________________________________________________________________________

Fi Franza fi spazju ta’ 16-il jum seħħew tliet inċidenti nukleari.

L-ewwel inċident seħħ fil-lejl bejn is-6 u s-7 ta’ Lulju fis-sit nukleari ta’ Tricastin. Skart likwidu, madwar 30,000 litru li kien fih l-uranju, b’mod aċċidentali waqa’ f’żewġ xmajjar. L-awtoritajiet Franċiżi ħarġu struzzjonijiet lir-residenti biex ħadd ma jistad, ħadd ma jixrob ilma mill-bjar, kif ukoll biex ħadd ma jgħum fix-xmajjar jew jieħu sehem fi sports fl-ilma. Lanqas ma kien possibbli li jintuża ilma mix-xmajjar għat-tisqija.

It-tieni inċident seħħ fl-impjant nukleari ta’ Romans-sur Isere meta nhar it-18 ta’ Lulju spetturi tas-sit indunaw b’pajp mifqugħ li minnu ħareġ likwidu radjuattiv. It-tielet inċident seħħ mill-ġdid fi Tricastin nhar it-23 ta’ Lulju. L-impjant kien magħluq imma partiċelli radjuattivi ħarġu minn pajp li nqasam fl-impjant nukleari u 97 impjegat spiċċaw l-isptar fejn instab li kienu esposti għal doża baxxa ta’ radjuattività.
Franza tipproduċi 80 fil-mija ta’ l-elettriku tagħha permezz ta’ enerġija nukleari f’59 impjant imxerrda mal-pajjiż kollu. Bħala riżultat ta’ din id-dipendenza fuq l-enerġija nukleari Franza għandha industrija organizzata u b’saħħitha. Il-Gvern Franċiż jgħinha biex tistabbilixxi swieq ġodda billi tesporta t-teknoloġija nukleari.

Fost l-aħħar swieq li qed ifittxu li jippenetraw hemm dak fl-Afrika ta’ Fuq. Franza iffirmat ftehim ta’ kooperazzjoni mal-Marokk, ma’ l-Alġerija u mal-Libja biex tgħinhom jiżviluppaw impjanti nukleari għal skopijiet ċivili. L-iktar li jinteressana hu l-ftehim mal-Libja li se jwasssal biex jinbena impjant nukleari li permezz tiegħu jkun prodott ilma tajjeb għax-xorb minn ilma baħar. Ovvjament, dan l-impjant se jinbena viċin il-kosta.

Inċident f’impjant nukleari jista’ jseħħ bħala riżultat ta’ waħda minn tliet affarijiet: żball uman, ħsara li tiżviluppa fil-makkinarju inkella bħala riżultat ta’ attività naturali bħal terremot.

Hemm żewġ konsiderazzjonijiet li rridu nagħmlu. L-ewwel li l-Libja għandha xemx kemm trid. Teżisti t-teknoloġija biex tipproduċi ilma tajjeb għax-xorb mill-baħar permezz ta’ enerġija solari. Din qed titħaddem f’pajjiżi bħall-Kuwajt. Qed isiru ukoll esperimenti għal titjib sostanzjali f’din it-teknoloġija fl-Iżrael u f’Kalifornja.

Xi ħtieġa hemm ta’ impjant nukleari meta hemm enerġija mix-xemx b’xejn?

It-tieni konsiderazzjoni hi dwar kif niġu affettwati aħna bħala Malta jekk ikun hemm inċident nukleari fl-impjant Libjan. L-effetti jkunu jiddependu mill-gravità ta’ l-inċident. Inċident li jikkontamina l-baħar jaffettwa kemm l-industrija tas-sajd kif ukoll il-produzzjoni ta’ l-ilma f’pajjiżna. Irridu niftakru li 60 fil-mija ta’ l-ilma li nużaw jiġi mill-baħar. Inċident f’impjant nukleari mal-kosta Libjana li jniġġes il-baħar jista’ jaffettwa dan l-ilma li f’Malta s’issa m’għandniex alternattiva għalih għax l-ilma tal-pjan qed jispiċċa wkoll. L-effetti fuq Malta jistgħu jkunu ta’ gravità kbira għax l-uniku sors ta’ l-ilma mbagħad ikun dak impurtat fit-tankers minn Sqallija jew minn x’imkien ieħor.

Il-makkinarju fl-impjanti għat-tisfija tad-drenaġġ li qed jinbnew bħalissa ma jistgħux iservu alternattiva minħabba li l-ilma wara li jsaffuh jitfgħuh il-baħar flok ma jipproduċu ilma tajjeb għax-xorb kif jagħmlu per eżempju f’Singapore.

Apparti dan imbagħad hemm l-effetti fuq l-industrija tat-turiżmu. Kull aħbar ta’ allarm ikollha effett negattiv u t-turiżmu jieħu daqqa kbira b’inċident nukleari daqstant qrib tagħna.

Fid-dawl ta’ dan kollu l-Gvern Malti ma lissen l-ebda kelma. L-anqas l-Oppożizzjoni.
Dan mhux kollox. Il-periklu mhux ġej biss min-nofsinhar għax fit-tramuntana fl-Italja, beda jinħema periklu ieħor.

Il-Gvern ta’ Berlusconi ddikjara li fi ħsiebu jibda l-proċess biex jibni numru ta’ impjanti nukleari. Il-periklu għalina mill-Italja hu l-istess għall-periklu mil-Libja. Bid-differenza li l-iktar li jaffettwawna jkunu dawk l-impjanti li jinbew fin-naħa t’isfel ta’ l-Italja jew fi Sqallija.

Fil-konfront ta’ l-Italja hemm fattur wieħed li jista’ jkun ta’ għajnuna. Bħala riżultat tat-tisħib ta’ Malta fl-Unjoni Ewropea tapplika għalina l-Konvenzjoni ta’ Espoo, iffirmata fil-Finlandja fl-1991. Din hi inkorporata fid-Direttiva tal-UE dwar l-EIA (assessjar tal-impatt ambjentali) u tipprovdi li fejn ikun hemm possibbiltà ta’ impatt ambjentali li jmur lil hinn mill-fruntieri ta’ pajjiż terz (transboundary impact) hemm l-obbligu li l-pajjiż affettwat ikun notifikat kif ukoll li jkollu l-possibbiltà li jinvolvi ruħu biex ikun assigurat li l-EIA jsir sew.

X’miżuri ħa l-Ministeru ta’ l-Affarijiet Barranin f’dan ir-rigward? Ħadd għadu ma qal xejn minkejja d-dikjarazzjoni ta’ Claudio Scajola, Ministru Taljan għall-Iżvilupp Ekonomiku favur l-enerġija nukleari.
Fid-dawl ta’ dan kollu u fid-dell ta’ theddid li jista’ jkun daqshekk kbir il-Gvern għandu l-obbligu li jinforma dwar x’qiegħed jagħmel. L-Oppożizzjoni wkoll għandha l-obbligu li tispjega għaliex baqgħet ħalqha magħluq.

 

ara ukoll : http://www.illum.com.mt/2008/07/27/t2.html

L-ilma mormi l-baħar

 

 

 

 
 

 

 

Il-Korporazzjoni għas-Servizzi tal-Ilma (KSI) taħseb li d-drenaġġ ippurifikat m’għandux valur ekonomiku. Ħadd ma jrid iħallas għalih. Jidher li għalhekk hemm l-arranġament li l-ilma msoffi jispiċċa l-baħar.

 

Dan huwa riżultat tal-inkompetenza tal-awtoritajiet li ħallew aċċess inkontrollat għall-ilma tal-pjan permezz ta’ boreholes illegali mifruxin ma’ Malta kollha. Din hi responsabbilta tal-Awtorita Maltija tar-Riżorsi iżda għal snin twal kienet ukoll responsabbilta tal-KSI.

 

Jekk l-awtoritajiet tul is-snin ippermettew it-teħid tal-ilma tal-pjan b’xejn permezz ta’ boreholes illegali, m’huwiex ovvju illi ħadd m’hu lest li jħallas biex juża l-ilma irriċiklat ? Jekk tista’ liberament tinqeda b’xejn tkun baħnan jekk tħallas !

 

Il-KSI tidher li assumiet li m’huwiex ser ikun hemm bdil fis-sitwazzjoni u għalhekk għażlet speċifikament is-siti għall-impjanti tad-drenaġġ fit-truf ta’ Malta fejn huwa iktar possibli li l-ilma msoffi jintrema l-baħar mil-ewwel. Dawn huma l-istess postijiet li minnhom kien (u għadu s’issa) jintefa d-drenaġġ fil-baħar. Li kieku taw każ li l-ilma seta jintuża kienu jintagħżlu siti iktar viċin iċ-ċentru tal-pajjiż biex dan ikun aċċessibli bla diffikulta fiż-żoni agrikoli kollha mingħajr il-ħtieġa ta’ ħafna spejjes addizzjonali.

 

Id-Direttiva tal-EU dwar id-drenaġġ [EU Wastewater Directive] tistabilixxi biss il-kwalita li l-ilma jrid ikollu qabel ma jintefa’ l-baħar. Ma toffri l-ebda gwida dwar x’jista’ jsir mill-ilma. Dak sta għalina f’Malta biex niddeterminawh. Meta tqies li madwar 60% tal-ilma tax-xorb f’Malta huwa prodott b’mod artifiċjali u bi spiża sostanzjali permezz tal-impjanti ta’ disalinazzjoni, huwa irresponsabbli li l-ilma prodott mill-impjant ta’ purifikazzjoni tad-drenaġġ jitqies bħala xi ħaġa ta’ bla valur. Qed nitkellmu dwar xi ħaġa (l-ilma) li f’pajjiżna dejjem kienet skarsa.

 

Mhux il-bogħod il-jum meta bħala riżultat ta’ iktar tnaqqis fl-ilma tal-pjan, kif ukoll bħala riżultat tal-miżuri li Malta trid tieħu biex timxi mal-EU Water Framework Directive ser ikun neċessarju li jkun ikkunsidrat li l-ilma prodott mill-impjanti tal-purifikazzjoni tad-drenaġġ fix-Xgħajra u ċ-Ċumnija tal-Mellieħa ikun użat. Imbagħad ser ikun hemm min jirrealizza illi l-impjanti tar-riċiklaġġ tad-drenaġġ qegħdin il-bogħod wisq. Imbagħad ser ikun hemm min jargumenta li l-ispiża biex ikun trasportat l-ilma hi għolja wisq.

 

Din hi inkompetenza amministrattiva. Min ser jassumi r-responsabbilta’ ?