Int tibża’ mill-Kasco?

Keith & Joseph

Int tibża mill-Kasco? Għax il-Partit Nazzjonalista qal li ma jibżax. Tant li għada ser jibgħat Kastilja ċekk ta’ €121,000 wara li l-Kasco bagħat ittra uffiċjali biex jiġbor id-dejn mingħand il-PN.

Hekk tajjeb, bla biża!

Il-PN ma jibżax mill-Kasco. Imma l-anqas il-Kasco ma jibża’ mill-PN.

Imma donnu x’imkien ieħor hemm min qed jibża’ sewwa. Is-Sunday Times tal-lum fil-fatt tirrapporta li hemm battalja għaddejja dwar jekk il-Kap tat-Tax Compliance Unit hux ser jibqa’ fil-ħatra. Jidher li hemm min irid ineħħieh bl-iskuża li l-kuntratt ta’ tlett snin għalaqlu. Il-Professur Edward Scicluna, Ministru tal-Finanzi, qed jirreżisti. Imma tas-Sunday Times jgħidu li minn Kastilja ma jridux jafu!

Ghax la l-Kasco ma jibżax, min qed jibża’?

 

Advertisements

Il-Kasco għandu bżonn mera

 

fil-mera

Fuq is-sit elettroniku tal-One News, Keith Schembri, l-Kasco, hu kkwotat jgħid li l-“Partit Nazzjonalista qabeż kull limitu ta’ diċenza”. Dan qalu wara li aktar kmieni f’konferenza tal-aħbarijiet il-PN għadu jaħleb dak żvelat fil-Panama Papers.

Issa għandu jingħad li minn dak kollu ppubblikat s’issa hemm ħafna informazzjoni suspettuża li titfa’ dellijiet kbar fuq diversi persuni li ħadmu u għadhom qed jaħdmu f’segretezza kbira. In-nuqqas ta’ pubbliċità ta’ kuntratti, l-laqgħat barra l-pajjiż bla membri taċ-ċivil preżenti komplew jitfgħu iktar dell ta’ suspett in partikolari (imma mhux biss) fuq kuntratti konnessi mal-enerġija.

Imma issa jiġi l-Kasco jitkellem dwar id-diċenza.

Filwaqt li ma għandi l-ebda dubju li l-PN m’għandux skrupli f’dak li jgħid u jagħmel biex jakkwista anke l-inqas farka ta’ vantaġġ politiku, l-iżjed bniedem indiċenti fil-mument hu l-istess Keith Schembri l-Kasco. Kieku irriżenja forsi kien ikun jista’ jitkellem dwar id-diċenza!

Qabel ma jitkellem dwar id-diċenza jagħmel tajjeb il-Kasco kieku iħares ftit fil-mera.

Il-mozzjoni ta’ Marlene fuq Keith il-Kasco

marlene-farrugia

Il-mozzjoni ta’ Marlene Farrugia li pprezentat il-bieraħ fil-Parlament dwar Keith Schembri l-Kasco tindirizza n-nuqqas ta’ Joseph Muscat li  għal dawn l-aħħar għaxar ġimgħat (ta’ l-inqas), injora l-imġieba ta’ dawk ta’ madwaru.

Għax anke kieku ma issemmewx l-allegazzjonijiet dwar dak li qed jingħad li ġara bejn Keith Schembri u Adrian Hillman tat-Times, ix-xibka ta’ kumpaniji fil-Panama, l-British Virgin Islands, Ċipru u Ġibiltar minnha innifisha toħloq ħafna suspetti ta’ konflitti [eżistenti u forsi anke immaġinarji] bejn Keith Schembri l-bniedem tan-negozju u Keith Schembri ċ–Ċhief of Staff fl-Uffiċċju tal-Prim Ministru f’ Kastilja.

L-emails li ħarġu mal-Panama Papers jispjegaw ħafna. Imma dan mhux biżżejjed.

Għax avolja Keith Schembri rriżenja minn Direttur tal-kumpaniji tiegħu f’Marzu 2013, hu inevitabbli li l-fatt li hu l-azzjonist maġġoritarju f’dawn l-istess kumpaniji minn innifsu jagħtiħ influwenza kontinwa dwar kif isiru l-affarijiet fl-istess kumpaniji. Dan minkejja li ddistakka ruħu mit-tmexxija ta’ kuljum tagħhom. Tant dan hu hekk li l-Panama Papers jirreferu għal ideat dwar negozju addizzjonali [riċiklaġġ tal-iskart fl-Indja kif ukoll r-remote gaming].

L-iktar ħaġa onorevoli li seta jagħmel Keith Schembri kien li jitlaq bil-kwiet għaxar ġimgħat ilu.

Kieku għamel dan kien jevita li jinbarazza lil sieħbu Joseph Muscat. Kien jevita ukoll ħsara kbira lill-Partit Laburista.

Il-fatt li ddeċieda li jibqa’ hemm ifisser ħaġa waħda biss: li jew m’huwiex jirrealizza l-ħsara kbira li għamel (u għadu qed jagħmel) inkella li jiġi jaqa’ u jqum mill-konsegwenzi. Probabbilment li jiġi jaqa’ u jqum.

Il-mozzjoni ta’ Marlene, għal raġunijiet ta’ aritmetika sempliċi, mhux ser tkun approvata. Peró dan ma jfissirx li Joseph Muscat u l-Kabinett għandhom jibqgħu b’għajnejhom magħluqin. Hu fl-interess tal-pajjiż kollu li jiftħu għajnejhom beraħ u li jnaqqsu l-ħsara li saret u li għad tista’ ssir lill-pajjiż. Huma biss jistgħu jagħmlu dan.

Għalhekk hu importanti li Marlene ressqet il-mozzjoni. Il-ferita jeħtieġ li tidher sewwa ħalli kulħadd ikun jaf biha u ħadd ma jkollu skużi li ma kienx jaf.

Issa x’imiss …………… wara l-apoloġija ta’ Konrad Mizzi

Konrad Mizzi 101

F’Malta, l-iskandlu tal-Panama ilu għaddej minn Frar, madwar għaxar ġimgħat kontinwi. Tul dawn l-għaxar ġimgħat ħarġet l-informazzjoni dwar żewġ kumpaniji fil-Panama li għandhom il-Ministru Konrad Mizzi u c-Chief of Staff fl-Uffiċċju tal-Prim Ministru Keith Schembri magħruf bħala l-Kasco.

L-apoloġija ta’ Konrad nhar l-Erbgħa fil-Parlament kienet l-aħħar pass s’issa. Imma tajjeb li niftakru dak li ntqal matul dawn il-ġimgħat għax hemm kuntrasti interessanti.

Fil-bidu kien qed jingħad b’insistenza li Konrad ma għamel xejn ħażin.

Mument importanti kien fil-bidu tax-xahar t’April meta ħarġet l-aħbar li fil-grupp Parlamentari tal-Partit Laburista kien hemm diskussjoni imqanqla dwar l-iskandlu. Diversi Ministri u membri parlamentari insistew (bejn erba’ ħitan) li Konrad Mizzi u Keith Schembri l-Kasco kellhom jirriżenjaw.

L-aħbar ħarġet fil-pubbliku bħalma ħarġu l-ismijiet ta’ uħud minn dawk li kienu qed jinsistu għar-riżenja. Evarist Bartolo, Godfrey Farrugia u Alfred Sant tkellmu b’mod ċar fil-pubbliku li Konrad Mizzi kellu jerfa’ r-responsabbiltajiet tiegħu u jirriżenja.

Anke Edward Scicluna tkellem fil-Parlament dwar il-ħtieġa li jittieħdu deċiżjonijiet iebsa u malajr. Kulhadd jirrikonoxxi li l-fatt li dawn il-Ministri/Membri tal-Parlament tkellmu b’dan il-mod kien pass kbir il-quddiem. Kienet xi ħaġa mhux tas-soltu.

Bosta ġustament qed jistaqsu għaliex dawk fil-Partit Laburista li tkellmu favur ir-riżenja ma ivvutawx favur il-mozzjoni ta’ sfiduċja imressqa minn Marlene Farrugia. Ma naħsibx li jkun ġust li wieħed jgħid li dawn kellhom nuqqas ta’ kuraġġ. Huwa essenzjalment realiżmu politiku li wara li kellhom il-kuraġġ li jimxu kontra l-kurrent ma rnexxilhomx jaslu t-triq kollha. Irnexxilhom “biss” iwasslu lill-Partit Laburista jimxi biċċa mit-triq.

Jidher li kien hemm kompromess intern fil-Partit Laburista matul ix-xahar t’April. Dan il-kompromess hu wieħed interessanti għax bħala riżultat tiegħu  Konrad Mizzi ma baqax jgħid li ma għamel xejn ħażin, anzi talab skuża (anke jekk din kienet waħda imqanżha). Riżultat ta’ dan il-kompromess intern jidher li hemm qbil fil-partit laburista li “l-ħtija ta’ Konrad hi waħda żgħira” u allura l-kastig għandu jkun wieħed hekk imsejjaħ “proporzjonali”: għalhekk Ministru bla portafoll u riżenja minn Deputy Leader tal-Partit Laburista. Dan l-argument ċar joħroġ min-numru ta’ diskorsi li saru nhar l-Erbgħa fil-Parlament. B’mod partikolari minn Joseph Muscat u Edward Zammit Lewis.

Ċertament li mhux biżżejjed. Imma naħseb li hu pass il-quddiem għal dawk fil-grupp parlamentari laburista li għamlu rebħa żgħira li jistgħu jibnu fuqha fil-futur. Wasslu lill-partit laburista biex jaċċetta li hemm ħtija li trid tintrefa’. Dan hu mertu tal-opinjoni pubblika li ċaqalqet lill-Partit Laburista mill-egħruq.

Kif kelli l-opportunità li ngħid fuq dan il-blog diversi membri tal-grupp parlamentari laburista huma konxji li “s-skiet tal-Partit Laburista quddiem it-taħwid tal-Gvernijiet tas-snin 70 u 80 kienet raġuni ewlenija li kkundannat lill-partit għal 25 sena fl-Opposizzjoni.” Għalhekk Konrad Mizzi ġie mġiegħel jagħmel apoloġija. Għalhekk tneħħa minn Deputy Leader. Għalhekk tneħħewlu r-responsabbiltajiet diretti. Biex ta’ l-inqas il-Partit Laburista jagħti messaġġ simboliku.

Imma l-messaġġ simboliku mhux biżżejjed. Imma xorta hu pass li jikkuntrasta mac-ċaħda totali li kienet il-posizzjoni oriġinali tal-Partit Laburista.

Huwa neċessarju li d-deċiżjonijiet jittieħdu mill-ewwel u b’mod ċar.

L-ewwel pass hu dejjem tajjeb. Imma qatt ma hu biżżejjed.

Sadanittant l-iskandlu tal-Panama jibqa’ miftuħ beraħ sakemm ta’ l-inqas jirriżenjaw għal kollox Konrad Mizzi u Keith il-Kasco Schembri. Il-ħidma trid tibqa’ għaddejja sa ma naslu.

Sakemm għandkom il-flus fil-but ………………

Keith has my trust.010516God Bless Joseph Muscat

Fil-mass meeting ta’ Kastilja l-bieraħ Joseph Muscat sab il-ħin jitkellem fuq kollox ħlief fuq l-iskandlu tal-kumpaniji tal-Panama.

Mhux ser ngħid li għamel ħażin li tkellem fuq ix-xogħol u l-ekonomija. Jew fuq fejn wasal s’issa l-Gvern u x’baqa’ jagħmel, b’mod partikolari dwar il-prekarjat. Kien il-mument opportun li jitkellem dwar dan. Imma l-messaġġ kien wieħed ċar u li jmur lil hinn mill-ekonomija w x-xogħol: sakemm għandkom il-flus fil-but dawn l-iskandli m’huma xejn.

Għalhekk żied jgħid li hu u sħabu ser ipattu għall-iżbalji billi jaħdmu iktar.

Issa sfortunatament, dawn l-iżbalji qed jiżdiedu u huma wieħed agħar mill-ieħor (Cafè Premier, Gaffarena, Panama). Interessanti ukoll li dawn l-iżbalji kbar, f’kull wieħed minnhom hemm imdeffes l-Uffiċċju tal-Prim Ministru.

Tajjeb li niftakru x’qal Michael Falzon Segretarju Parlamentari li spiċċa mill-kariga minħabba wieħed minn dawn l-iskandli: li hu kien qed jerfa’ s-salib ta’ ħaddieħor.

 

Jason Micallef dwar it-toqba

Jason Micallef 0105

 

Jason Micallef li kien Segretarju Ġenerali tal-Partit Laburista, sakemm Joseph Muscat iddeċieda li jabolixxi l-kariga, ma tantx jogħmod kliemu. Il-bieraħ fuq facebook kiteb li f’Jum il-Ħaddiem għandna niftakru f’dawk li jaqilgħu l-għixien tagħhom b’xogħolhom. F’dawk li joħolqu u jkattru x-xogħol.

Imma din is-sena, jgħidilna, hi ħasra li l-1 ta’ Mejju “jinsab imtappan mill-egoiżmu sfrenat ta’ min jinsab bla xaba’ fil-kilba bla qies għall-flus u l-poter li jwassluh f’sitwazzjoni egoċentrika tal-untouchable anke meta  jkun taqqab il-vapur b’detriment għall-kaptan u l-passiġġieri ġenwini li jkun ilhom fuq il-vapur fil-bnazzi u l-maltemp.”

Fi ftit kliem it-toqba fil-vapur hi waħda ikkawżata “mill-kilba bla qies għall-flus u l-poter”.

Dak li jiġri meta wara iktar minn 8 ġimgħat min mexa ħażin ma tneħħiex. Wieħed għadu Ministru (bla portafoll) u l-ieħor baqa’ kap tas-Segretarjat tal-uffiċċju tal-Prim Ministru.

It-toqba tal-kredibilità qed tikber.

Il-mozzjoni Parlamentari numru 322 : kriżi ta’ imġieba

ethical-politics

 

Nhar it-Tnejn li ġej, fil-Parlament, ser jiddiskutu mozzjoni ta’ sfiduċja fil-Gvern. Hi l-mozzjoni numru 322, mressqa mill-Kap tal-Opposizzjoni, dwar il-kriżi attwali kkawżata mid-dokumenti li ħarġu mill-Panama li l-Opposizzjoni issejħilha “kriżi ta’ korruzzjoni”.

Li l-Gvern mexa ħażin ma għandi l-ebda dubju. Kellhom jittieħdu passi tmien ġimgħat ilu dwar il-“kriżi” u ma sar xejn s’issa.

Imma kemm hu korrett li jingħad li din hi “kriżi ta’ korruzzjoni”?

Fil-bidu nett, meta faqqgħet il-kriżi, l-unika informazzjoni pubblika kienet dwar il-ħolqien ta’ kumpaniji fil-Panama għall-Konrad Mizzi, Ministru, u Keith Schembri (il-Kasco) Chief of Staff fl-Uffiċċju tal-Prim Ministru. Iktar tard sirna nafu li kien hemm kumpanija oħra lesta biex titwaqqaf għal persuna oħra li ismu għadu mhux magħruf.

Mill-informazzjoni li ħarġet s’issa sirna nafu li Keith Schembri ried jinvesti fir-riċiklaġġ fl-India u fir-remote gaming. L-informazzjoni dwar x’ried jagħmel Konrad Mizzi mhux ċara għax hemm biss il-kelma tiegħu li l-kumpanija fil-Panama riedha biex tamministra l-ġid tal-familja. Hekk ta’ l-inqas qal li kien il-parir li tawh, u mexa fuqu. Għalkemm dak li qal Konrad Mizzi la jagħmel sens u l-anqas ma jitwemmen, s’issa ma ħarġet l-ebda informazzjoni oħra li tagħti verżjoni differenti jew li tikkuntrasta ma dak li qal hu. Bl-assi li iddikjara li għandu Konrad Mizzi ma jagħmilx sens li tmur il-Panama!

L-aħħar informazzjoni li ħarġet kienet dwar l-attentati biex jinfetaħ kont jew kontijiet bankarji f’wieħed minn diversi banek madwar id-dinja. Dan minnu innifsu m’huwiex indikazzjoni ta’ korruzzjoni. Ovvjament jista’ jintuża għalhekk ukoll! Il-kontijiet bankarji ma nfetħux (s’issa) għax il-banek talbu depożitu minimu sostanzjali!

Dan kollu jfisser li,  l-kriżi li bdiet b’suspetti kbar ta’ korruzzjoni, bl-informazzjoni li nafu sal-lum, għalkemm għad baqa’ kemm dubji kif ukoll suspetti, iktar milli  “kriżi ta’ korruzzjoni” hi “kriżi ta’ imġieba ħażina” bil-Prim Ministru, wara tmien ġimgħat għadu ma ħa l-ebda pass kontra dawk responsabbli. Xejn iżda ma jeskludi li iktar tard toħroġ informazzjoni li issaħħaħ l-argument dwar il-korruzzjoni. Imma s’issa din l-informazzjoni mhux magħruf li teżisti. Suspetti biss.

L-imġieba ħażina ta’ Konrad Mizzi toħroġ mill-fatt li huwa fetaħ il-kumpanija fil-Panama f’ġurisdizzjoni li minna nnifisha tnissel suspetti kbar ta’ korruzzjoni u li bħala riżultat ta’ dan kollu tefa’ dell tqil fuq il-Gvern u fuq il-pajjiż.

L-imġieba ħażina ta’ Keith Schembri l-Kasco toħroġ mill-fatt li filwaqt li ilu għal dawn l-aħħar tlett snin jipprova jagħti l-impressjoni li nqata’ min-negozju tiegħu xorta għadu qed jippjana investimenti ġodda għalih, b’mod li qed joħloq dubju perikoluż dwar fejn jibdew ir-responsabbiltajiet tiegħu lejn il-Gvern bħala l-id il-leminija tal-Prim Minsitru u fejn jispiċċaw l-interessi tiegħu ta’ negozju.

Din hi l-kriżi reali li għandu quddiemu l-pajjiż. Hi kriżi ta’ serjetà kbira, mhux eżatt kif qed jgħid il-Kap tal-Opposizzjoni. Imma xorta hemm ġustifikazzjoni li jirriżenjaw kemm Konrad Mizzi kif ukoll Keith Schembri. Xorta timmerita mozzjoni ta’ sfiduċja fil-Gvern għax wara tmien ġimgħat għadu ma ċċaqlaqx.

Kastilja : faċċata passatur

castille damage

 

Il-faċċata tal-Berġa ta’ Kastilja għamluha passatur biex jgħaddu ruxxmata wires ħalli jdawwluha. Il-ħsara li saret lill-faċċata, wara li intefqgħu flejjes kbar biex ġiet irrestawrata matul dawn l-aħħar snin hi enormi.

Din il-ħsara hi falliment ieħor tal-awtoritajiet regolatorji li m’humiex kapaċi jħarsu l-wirt storiku li għandna. Dak li hu tagħna lkoll iqesuh tagħhom biss.

Kif nippretendu li s-settur privat jieħu ħsieb il-wirt storiku li għandu f’idejh jekk il-Gvern ħlief ħsara ma jagħmilx?

Għax ir-responsabbilta tal-Gvern hi waħda doppja: l-ewwel għax hu l-klijent u t-tieni għax fl-aħħar ir-regolaturi jirrappurtaw lilu.

 

Niskata melħ għal Joseph Muscat

pinch of salt

Id-Diviżjoni tal-Propjeta tal-Gvern (Government Property Division) qegħda taħt il-lenti tal-Awditur Ġenerali. Qiegħed jinvestiga x-xiri da parti tal-Gvern ta’ parti minn propjetà fil-Belt Valletta u l-mod kif minflok ħallas bi flus in parti ħallas bi propjetà oħra. Hemm diffikultà dwar il-valuri kemm tal-propjetà li nxtrat kif ukoll tal-propjetà li ngħatat bi tpartit.

Il-Gvern għamel sewwa li ordna inkjesta interna mill-Internal Audit and Investigations Department dwar il-każ.  Ir-rapport ta’ din l-inkjesta ilu xi ġimgħat lest u l-Prim Ministru ħabbar xi żmien ilu li fil-fehma tiegħu m’huwiex għaqli li jippubblika dak ir-rapport f’dan l-istadju u dan biex ma jippreġudikax l-investigazzjoni tal-Awditur Ġenerali.

Ir-raġunament tal-Prim Ministru huwa korrettissimu. L-Awditur Ġenerali għandu jitħalla fil-libertà kollha fl-investigazzjoni tiegħu u għandu jkun hu li jippubblika l-konklużjonijiet tal-investigazzjoni wara li jara dak kollu ta’ relevanza.

Waqt li qed nistennew il-konklużjonijiet  tal-Awditur Ġenerali  hemm parti mill-media li qed tikkumenta dwar punti li jidhru li huma konsiderazzjonijiet magħżula b’mod selettiv mir-rapport tal-inkjesta li ġiet konkluża mill-Internal Audit and Investigations Department u li suppost għadu kunfidenzjali skond id-deċiżjoni tal-Prim Ministru.

Hi ħasra li d-deċiżjoni tal-Prim Ministru li ma jippubblikax ir-rapport tal-Internal Audit and Investigations Department ma ġietx osservata minn dawk fil-Berġa ta’ Kastilja li kellhom f’idejhom ir-rapport tal-inkjesta interna.

Għandna sitwazzjoni fejn il-Prim Ministru jiddikjara solennement mod u dawk ta’ madwaru jagħmlu mod ieħor. Hemm min jgħid li ħafna drabi d-dikjarazzjonijiet solenni tal-Prim Ministru Joseph Muscat trid teħodhom b’niskata melħ, għax ġeneralment ifissru bil-maqlub ta’ dak li jgħid.

Ovvjament politika ġdida din.

Tonio Fenech, l-ispiji, w ir-responsabbiltà tal-uffiċjali pubbliċi

Directive 5

 

Il-Partit Laburista bhalissa ghaddej b’kampanja dwar l-“ispjuni” ta’ Tonio Fenech.

Teżisti informazzjoni elettronika li tindika illi numru ta’ uffiċjali pubbliċi fi gradi imlaħħqin kienu qed jassistu lil Tonio Fenech, meta kien għadu l-kelliemi tal-PN dwar il-finanzi. Kienu qed jieħdu sehem f’laqgħat ta’ diskussjoni kemm fil-HQ tal-Partit Nazzjonalista kif ukoll b’mod virtwali.

Minbarra dan, qed jingħad li kienu qed jgħaddu informazzjoni kunfidenzjali li saru jafu biha waqt il-qadi ta’ dmirijiethom.

Dawn huma żewġ affarijiet kompletament differenti.

Li uffiċjal pubbliku jgħaddi informazzjoni kunfidenzjali li jsir jaf bħala riżultat waqt il-qadi ta’ dmirijeitu hi materja gravi ħafna. Jekk dan iseħħ u jkun jista’ jiġi ppruvat, bla ebda dubju, jimmerita azzjoni drastika sakemm ma jsirx biex jinkixfu abbużi fl-amministrazzjoni pubblika, f’liema każ fil-fehma tiegħi ikun skużabbli.

Min-naħa l-oħra, l-parteċipazzjoni ta’ uffiċjali pubbliċi fil-politika illum hi possibli għal ħafna. Huma ftit dawk l-impjegati fis-settur pubbliku li ma jistgħux jipparteċipaw. Dawk li ma jistgħux jipparteċipaw (b’xi eċċezzjonijiet) huma ristretti għall-gradi ta’ fuq nett, sa skala Numru 5. Dan huwa xieraq għax huwa neċessarju li l-għola uffiċjali tas-settur pubbliku jkunu distakkati mill-ħidma tal-partiti politiċi.

Xi snin ilu n-numru ta’ l-impjegati fis-settur pubbliku li ma setgħux jinvolvu ruħhom fil-politika kien ħafna ikbar. Iżda tul is-snin sar tibdil kbir u ġie rikonoxxut li n-numru ta’ dawk li ma kellhomx jipparteċipaw kellu jkun l-inqas possibli. Din il-posizzjoni ġiet kristallizzata fid-Direttiva numru 5 li ħarġet fl-2011 taħt il-provedimenti tal-Att dwar l-Amministrazzjoni Pubblika.

Din hi restrizzjoni ġustifikabbli, avolja, bla dubju, min jintlaqat minnha jaħseb mod ieħor. Hi miżura bażika li nsibuha fid-demokraziji kollha. Tajjeb li, for the record, ngħid ukoll li Alternattiva Demokratika ġiet effettwata minn din il-mizura. Dan billi għandna diversi persuni validi li ma setgħux jibqgħu attivi minħabba li ħadu ħatriet fi gradi għoljin fis-settur pubbliku. Dan m’għamluħx biss għax hekk kien xieraq, imma niftakar ċar każ partikolari fejn mill-OPM fl-2008/9 kienu għamlu l-ġimgħat jiġru wara uffiċjal ta’ Alternattiva Demokratika biex jassiguraw ruħhom li kien ser iwaqqaf il-ħidma politika tiegħu. Kienu ukoll għamluha ċara ħafna: li jekk ma jitlaqx il-ħatra politika ma setax ikompli fl-impieg!

Ikun tajjeb li l-PN jifhem dan u jimxi miegħu ukoll.