Il-parker ta’ Chris Peregin

Chris Peregin illum, fit-Times, qalilna kif parker umli u bla pretenzjonijiet fetaħlu għajnejh. Marritlu r-rabja ta’ 13-il sena kontra l-PN. Tnisslitlu biża’ kbira li minħabba fiha ser jibda “jgħin” lill-Partit Nazzjonalista.

L-għajnuna mhiex b’xejn. Bi ħlas mhux żgħir li min jaf kemm iridu jinħarġu ċedoli biex jagħmlu tajjeb għalih!

F’kummenti li Chris Peregin għamel fuq il-media soċjali emfasizza fuq il-ħtieġa li l-PN jagħraf it-tajjeb ta’ ġo fih u jwarrab fil-ġemb il-bqija.

Anke il-Labour jargumenta l-istess. Smajt numru ta’ votanti Laburisti mill-iktar umli u ta’ bla pretensjonijiet, bħall-parker ta’ Peregin, ifaħħru t-tajjeb tal-Labour u jiġu jaqgħu u jqumu mill-bqija, mill-korruzzjoni u l-abbużi. Għax għal uħud sakemm “nirċievi l-pensjoni” ABŻ mill-kumplament!

X’hemm ġdid f’dan?

Tajjeb li nagħrfu l-pożittiv fil-partiti kollha, imma dan ma jfissirx li l-bqija ser jisparixxi jew jintesa.

F’Lovin Malta, Peregin waqt il-kampanja riċenti tat-tmexxija tal-PN kien jemfasizza li hu jistenna li l-PN ikollu Kap li jħallas it-taxxa (kollha) fil-ħin. Jidher li reġa’ bdielu Peregin: ser jispiċċa jgħin Kap li għamel kullma seta biex ma jħallasx taxxa.

Il-politika tinbena fuq il-kredibilità. Il-PN nieqes minnha sewwa. Peregin ma tantx jidher li ser jgħin f’dan il-qasam.

Il-parker ta’ l-inqas jidher umli u leali. Mhux merċinarju.