Anġlu Farrugia qed iħawwad

artiklu 3 Standards in Public Life

Il-Parlament il-lejla ddiskuta d-deċiżjoni li ħa l-Ispeaker Anġlu Farrugia li ma aċċettax bħala valida l-mozzjoni ta’ Marlene Farrugia għax din fittxet li tiċċensura lil Keith Schembri l-Kasco, ċ-Chief of Staff fl-uffiċċju tal-Prim Ministru.

Presentment hemm pendenti fuq l-aġenda tal-Parlament, abbożż ta’ liġi imsejjaħ Att tal-2014 dwar l-Istandards fil-Ħajja Pubblika.

Dan l-abbozz ta’ liġi hu riżultat ta’ diskussjoni dwar l-etika fil-ħajja pubblika li saret f’kumitat magħżul tal-Kamra li fih ħa sehem ukoll l-Ispeaker Anġlu Farrugia. Punt interessanti li joħroġ minn dan l-abbozz hu li skond l-artiklu 3 tal-abbozz l-persuni “in a position of trust” huma ukoll soġġetti għal skrutinju tal-Parlament.

Anġlu Farrugia kien qabel ma dan. Allura issa għaliex bidel il-ħsieb?

Dan x‘taħwid hu Anġ?

Il-mozzjoni ta’ Marlene fuq Keith il-Kasco

marlene-farrugia

Il-mozzjoni ta’ Marlene Farrugia li pprezentat il-bieraħ fil-Parlament dwar Keith Schembri l-Kasco tindirizza n-nuqqas ta’ Joseph Muscat li  għal dawn l-aħħar għaxar ġimgħat (ta’ l-inqas), injora l-imġieba ta’ dawk ta’ madwaru.

Għax anke kieku ma issemmewx l-allegazzjonijiet dwar dak li qed jingħad li ġara bejn Keith Schembri u Adrian Hillman tat-Times, ix-xibka ta’ kumpaniji fil-Panama, l-British Virgin Islands, Ċipru u Ġibiltar minnha innifisha toħloq ħafna suspetti ta’ konflitti [eżistenti u forsi anke immaġinarji] bejn Keith Schembri l-bniedem tan-negozju u Keith Schembri ċ–Ċhief of Staff fl-Uffiċċju tal-Prim Ministru f’ Kastilja.

L-emails li ħarġu mal-Panama Papers jispjegaw ħafna. Imma dan mhux biżżejjed.

Għax avolja Keith Schembri rriżenja minn Direttur tal-kumpaniji tiegħu f’Marzu 2013, hu inevitabbli li l-fatt li hu l-azzjonist maġġoritarju f’dawn l-istess kumpaniji minn innifsu jagħtiħ influwenza kontinwa dwar kif isiru l-affarijiet fl-istess kumpaniji. Dan minkejja li ddistakka ruħu mit-tmexxija ta’ kuljum tagħhom. Tant dan hu hekk li l-Panama Papers jirreferu għal ideat dwar negozju addizzjonali [riċiklaġġ tal-iskart fl-Indja kif ukoll r-remote gaming].

L-iktar ħaġa onorevoli li seta jagħmel Keith Schembri kien li jitlaq bil-kwiet għaxar ġimgħat ilu.

Kieku għamel dan kien jevita li jinbarazza lil sieħbu Joseph Muscat. Kien jevita ukoll ħsara kbira lill-Partit Laburista.

Il-fatt li ddeċieda li jibqa’ hemm ifisser ħaġa waħda biss: li jew m’huwiex jirrealizza l-ħsara kbira li għamel (u għadu qed jagħmel) inkella li jiġi jaqa’ u jqum mill-konsegwenzi. Probabbilment li jiġi jaqa’ u jqum.

Il-mozzjoni ta’ Marlene, għal raġunijiet ta’ aritmetika sempliċi, mhux ser tkun approvata. Peró dan ma jfissirx li Joseph Muscat u l-Kabinett għandhom jibqgħu b’għajnejhom magħluqin. Hu fl-interess tal-pajjiż kollu li jiftħu għajnejhom beraħ u li jnaqqsu l-ħsara li saret u li għad tista’ ssir lill-pajjiż. Huma biss jistgħu jagħmlu dan.

Għalhekk hu importanti li Marlene ressqet il-mozzjoni. Il-ferita jeħtieġ li tidher sewwa ħalli kulħadd ikun jaf biha u ħadd ma jkollu skużi li ma kienx jaf.

Issa x’imiss …………… wara l-apoloġija ta’ Konrad Mizzi

Konrad Mizzi 101

F’Malta, l-iskandlu tal-Panama ilu għaddej minn Frar, madwar għaxar ġimgħat kontinwi. Tul dawn l-għaxar ġimgħat ħarġet l-informazzjoni dwar żewġ kumpaniji fil-Panama li għandhom il-Ministru Konrad Mizzi u c-Chief of Staff fl-Uffiċċju tal-Prim Ministru Keith Schembri magħruf bħala l-Kasco.

L-apoloġija ta’ Konrad nhar l-Erbgħa fil-Parlament kienet l-aħħar pass s’issa. Imma tajjeb li niftakru dak li ntqal matul dawn il-ġimgħat għax hemm kuntrasti interessanti.

Fil-bidu kien qed jingħad b’insistenza li Konrad ma għamel xejn ħażin.

Mument importanti kien fil-bidu tax-xahar t’April meta ħarġet l-aħbar li fil-grupp Parlamentari tal-Partit Laburista kien hemm diskussjoni imqanqla dwar l-iskandlu. Diversi Ministri u membri parlamentari insistew (bejn erba’ ħitan) li Konrad Mizzi u Keith Schembri l-Kasco kellhom jirriżenjaw.

L-aħbar ħarġet fil-pubbliku bħalma ħarġu l-ismijiet ta’ uħud minn dawk li kienu qed jinsistu għar-riżenja. Evarist Bartolo, Godfrey Farrugia u Alfred Sant tkellmu b’mod ċar fil-pubbliku li Konrad Mizzi kellu jerfa’ r-responsabbiltajiet tiegħu u jirriżenja.

Anke Edward Scicluna tkellem fil-Parlament dwar il-ħtieġa li jittieħdu deċiżjonijiet iebsa u malajr. Kulhadd jirrikonoxxi li l-fatt li dawn il-Ministri/Membri tal-Parlament tkellmu b’dan il-mod kien pass kbir il-quddiem. Kienet xi ħaġa mhux tas-soltu.

Bosta ġustament qed jistaqsu għaliex dawk fil-Partit Laburista li tkellmu favur ir-riżenja ma ivvutawx favur il-mozzjoni ta’ sfiduċja imressqa minn Marlene Farrugia. Ma naħsibx li jkun ġust li wieħed jgħid li dawn kellhom nuqqas ta’ kuraġġ. Huwa essenzjalment realiżmu politiku li wara li kellhom il-kuraġġ li jimxu kontra l-kurrent ma rnexxilhomx jaslu t-triq kollha. Irnexxilhom “biss” iwasslu lill-Partit Laburista jimxi biċċa mit-triq.

Jidher li kien hemm kompromess intern fil-Partit Laburista matul ix-xahar t’April. Dan il-kompromess hu wieħed interessanti għax bħala riżultat tiegħu  Konrad Mizzi ma baqax jgħid li ma għamel xejn ħażin, anzi talab skuża (anke jekk din kienet waħda imqanżha). Riżultat ta’ dan il-kompromess intern jidher li hemm qbil fil-partit laburista li “l-ħtija ta’ Konrad hi waħda żgħira” u allura l-kastig għandu jkun wieħed hekk imsejjaħ “proporzjonali”: għalhekk Ministru bla portafoll u riżenja minn Deputy Leader tal-Partit Laburista. Dan l-argument ċar joħroġ min-numru ta’ diskorsi li saru nhar l-Erbgħa fil-Parlament. B’mod partikolari minn Joseph Muscat u Edward Zammit Lewis.

Ċertament li mhux biżżejjed. Imma naħseb li hu pass il-quddiem għal dawk fil-grupp parlamentari laburista li għamlu rebħa żgħira li jistgħu jibnu fuqha fil-futur. Wasslu lill-partit laburista biex jaċċetta li hemm ħtija li trid tintrefa’. Dan hu mertu tal-opinjoni pubblika li ċaqalqet lill-Partit Laburista mill-egħruq.

Kif kelli l-opportunità li ngħid fuq dan il-blog diversi membri tal-grupp parlamentari laburista huma konxji li “s-skiet tal-Partit Laburista quddiem it-taħwid tal-Gvernijiet tas-snin 70 u 80 kienet raġuni ewlenija li kkundannat lill-partit għal 25 sena fl-Opposizzjoni.” Għalhekk Konrad Mizzi ġie mġiegħel jagħmel apoloġija. Għalhekk tneħħa minn Deputy Leader. Għalhekk tneħħewlu r-responsabbiltajiet diretti. Biex ta’ l-inqas il-Partit Laburista jagħti messaġġ simboliku.

Imma l-messaġġ simboliku mhux biżżejjed. Imma xorta hu pass li jikkuntrasta mac-ċaħda totali li kienet il-posizzjoni oriġinali tal-Partit Laburista.

Huwa neċessarju li d-deċiżjonijiet jittieħdu mill-ewwel u b’mod ċar.

L-ewwel pass hu dejjem tajjeb. Imma qatt ma hu biżżejjed.

Sadanittant l-iskandlu tal-Panama jibqa’ miftuħ beraħ sakemm ta’ l-inqas jirriżenjaw għal kollox Konrad Mizzi u Keith il-Kasco Schembri. Il-ħidma trid tibqa’ għaddejja sa ma naslu.

Marlene Farrugia u l-mozzjoni Parlamentari numru 326

Marlene Farrugia.Konrad Motion 326

Huwa tajjeb li Marlene Farrugia qed tinsisti fuq il-mozzjoni ta’ sfiduċja f’Konrad Mizzi li hi ppreżentat lill-Ispeaker tal-Parlament nhar it-18 t’April 2016.

Kif rappurtata fit-Times illum tagħti raġunijiet validi ħafna biex tiġġustifika dan.

Kien għalhekk, daqstant ieħor għaqli li, fuq parir tal-President tar-Repubblika bidlet id-deċiżjoni u mhux ser  tattendi għad-dimostrazzjoni tal-1 ta’ Mejju organizzata fil-Belt għada mill-Partit Laburista.

Għax kif tista’ tifforma parti minn dimostrazzjoni immexxija minn persuni li (ta’ l-inqas illum) ma jħaddnux il-valuri li hi tħaddan?

Hemm bżonn iktar ħsieb qabel ma jittieħdu d-deċiżjonijiet. L-impulsività tista’ tkun ta’ ħsara kbira għax kawża tagħha, mingħajr biżżejjed ħsieb, jittieħdu deċiżjonijiet żbaljati li mhux dejjem ikun possibli illi jissewwew.

Quddiem il-ħmieġ ma tistax tiċċassa

 new parliament building Malta2

Kelliemi wieħed wara l-ieħor min-naħa tal-Membri Parlamentari Laburisti ħassew il-ħtieġa li jfakkruna li huma solidali mal-Prim Ministru fid-dibattitu tal-bieraħ fil-għaxija fil-Parlament, huma u jiddiskutu l-mozzjoni ta’ sfiduċja fil-Gvern.

Dawk li hu magħruf illi internament kienu kritiċi tal-mod kif aġixxa l-Gvern (u l-Partit Laburista) gidmu ilsienhom u minflok dak li qalu internament, daqqew diska oħra b’melodija iktar addattata. Favur il-Gvern, imma ukoll bi ftit inċens għas-serjetà.

Il-Membri Parlamentari tan-naħa tal-Gvern ħadu d-deċiżjoni politika li b’risposta għall-mozzjoni ta’ sfiduċja jsemmu lista twila ta’ affarijiet li għamel il-Gvern. F’numru min dawn il-każi, bla dubju, għandhom raġun. Imma d-diskussjoni ma’ kienitx dwar jekk il-Gvern għamilx tajjeb fid-diversi miżuri li ħa [hemm bosta tajjeb, bħalma hemm ukoll il-ħażin] imma dwar kemm għamel ħażin meta baqa’ tmien ġimgħat ċass fil-każ tal-kumpaniji li Konrad Mizzi u Keith Schembri l-Kasco rriżulta li għandhom fil-Panama.

Ħadd fil-Parlament ma iddefenda dak li għamlu Konrad Mizzi u Keith Schembri l-Kasco. Anzi, Evarist Bartolo qal li mhux biżżejjed li dak li jsir ma jkunx bi ksur tal-liġi imma jeħtieġ li jkun ukoll sewwa. It-tmexxija, żied Varist trid tkun ukoll permezz tal-eżempju. Kumment li irrefera għalih ukoll Joseph Muscat li żied jgħid li n-nies kienu jistennew aħjar. Imma ma tantx instema konvinċenti Joseph Muscat, għax ma tantx jidher li jemmen dak li kien qed jgħid.

Ma kien hemm l-ebda sorpriża la fil-mod kif tkellmu l-Membri Parlamentari u l-anqas fir-riżultat tal-votazzjoni. Fost id-diskorsi li kien fihom x’tomgħod, kien hemm dawk ta’ Marlene Farrugia, ta’ Louis Grech u ta’ Mario de Marco. Marlene tkellmet mill-qalb. Louis u Mario appellaw għas-sens komun u għar-rieda tajba. Imma sfortunatament ma hemmx rieda tajba.

Fl-ebda ħin ma ippretendejt lil dawk fost il-Membri Parlamentari fuq in-naħa tal-Gvern li ma jaqblux mal-imġieba ta’ Konrad Mizzi u Keith Schembri l-Kasco kienu ser ipoġġu ruħhom fuq l-artal tas-sagrifiċċju billi jivvutaw kontra l-Gvern. Il-kontribut tagħhom qed jagħtuh bil-għaqal mod ieħor. S’issa għadhom ma waslux imma għad jistgħu jaslu fil-futur.

L-istorja naturalment ma tieqafx hawn. Għax min hu serju ma jiċċassax quddiem il-ħmieġ. Imma hemm l-obbligu tattiku li jinstab l-iktar mument addattat, mument li ċertament għadu ma wasalx, għax in-numri għad m’humiex hemm! Hu mument li jista’ jasal meta jikber in-numru ta’ dawk li jirrealizzaw internament fil-Partit Laburista illi l-indeċizjoni biex jiffaċċjaw ir-realtà twassal għal konsegwenzi gravi kemm għall-pajjiż kif ukoll għall-partit.

Esperjenza li ta’ qabilhom diġà iffaċċjaw u wasslithom għal 25 sena fl-Opposizzjoni.  Matul dawn it-8 ġimgħat li għaddew il-Partit Laburista jidher li qabad l-istess triq. Diġà hu tard pero għad baqa’ ftit ċans li jibdel ir-rotta. Għalkemm diġà saret ħafna ħsara li mhux faċli li tissewwa.

Vit jew skorfina ?

vit jew skorfina

Jiena ma naqbilx ma min jgħid li l-partit ġdid li qed tippjana li twaqqaf Marlene Farrugia għandu kawlata ta’ ideat. L-iktar li tista’ tgħid f’dan l-istadju hu li l-ideat li dan il-partit ser imexxi l-quddiem għadhom m’humiex ċari. Dan minħabba li (bl-eċċezzjoni ta’ Marlene) il-parti l-kbir ta’ dawk li qed jitħajru qatt ma kienu involuti fil-politika. Bla dubju huma ideat li jkunu iktar ċari biż-żmien.

U ngħiduha kif inhi. Ħlief dan l-aħħar, l-anqas Marlene ma kienet involuta ħafna fid-dibattitu politiku. Qabel dan l-aħħar l-interventi politiċi tagħha kienu ftit sporadiċi.

Dan qed ngħidu għax diversi qed jistaqsuni dwar jekk Alternattiva Demokratika hiex ser tieħu sehem f’din l-inizjattiva ta’ Marlene.

Li nista’ ngħid f’dan l-istadju, b’rispett sħiħ lejn il-kunfidenzjalità li hi tant essenzjali f’dawn iċ-ċirkustanzi, hu li dan kollu diġa iddiskutejnieh internament f’AD. Iltqajna ukoll għal darba darbtejn ma Marlene u mal-kollaboraturi tagħha.

S’issa għad ma ħadna l-ebda deċiżjoni u dan billi qed infittxu tweġiba għal diversi mistoqsijiet. Tweġiba li s’issa m’għandniex.

Bħalissa kulħadd għaddej jagħtina l-pariri dwar x’għandha tagħmel l-Alternattiva Demokratika. Pariri li għalkemm mhux mitluba, nieħu pjaċir naqra.

Fil-mument opportun imma nieħdu deċiżjoni.

Ħtieġa ta’ front komuni

logotext1

 

Il-pajjiż ma jiftaħx għal żewġ partiti żgħar. Hu meħtieġ sforz biex Alternattiva Demokratika u l-forza politika ġdida immexxija minn Marlene Farrugia jippreżentaw front komuni.

Hemm ħafna in komuni. Jiena impenjat li nipprovaw nidentifikaw l-aħjar mod kif dan jista’ jsir.

S’issa nemmen li dan għadu possibli. Nibża’ li jekk dan ma jsirx nitkissru t-tnejn.

Huwa essenzjali li l-pajjiż ikollu t-tielet forza politika li tkun b’saħħitha. Dan hu l-uniku mod kif tissaħħah id-demokrazija u l-governanza tajba fil-pajjiż.

Minn 2 għal 3

Malta Parliament

Id-diskussjonijiet biex tinħoloq forza politika ġdida għaddejjin. Alternattiva Demokratika qed tipparteċpa fihom għax temmen li għandha rwol importanti biex l-entuzjażmu ta’ bosta li xebgħu mis-sistema ta’ żewġ partiti jingħata leħen effettiv.

Hemm diversi persuni minn kull qasam tal-ħajja li wrew interess f’dan il-proġett li nittama li jkun varat fi ftit tal-ġimgħat oħra.

Il-forma preċiża li din il-forza ser tieħu għadha mhiex ċara imma ser iġġib flimkien lill-Alternattiva Demokratika tal-lum mal-voluntiera li qed jinġabru madwar Marlene Farrugia.

Bla dubju dan ser jibni fuq il-pedamenti ta’ Alternattiva Demokratika, imma ser jilħaq iktar nies li sa ftit taż-żmien ilu kienu għadhom jittamaw li s’sistema ta’ żewġ partiti tista’ taħdem fl-interess tal-pajjiż. Issa qed jirrealizzaw li ħadu żball.

Dan il-pass ser ikun possibli minħabba li illum iktar nies qed jiftħu għajnejhom li hu fl-interess tal-pajjiż li jkun hemm leħen ieħor fil-Parlament.

Tul il-ġimgħat li ġejjin din il-forza ġdida fil-politika Maltija tieħu sura u mbagħad inkunu nistgħu nitkellmu aħjar.

 

L-għarbiel hu meħtieġ

 

MEPA_building

Id-dibattitu ambjentali fil-pajjiż qed irabbi l-għeruq. Iktar nies huma konxji ta’ dak li qiegħed  jiġri. Peró dan mhux rifless biżżejjed fil-mod kif in-nies iġġib ruħha. F’dan is-sens għadna ftit lura. Imma, wara kollox, dan huwa proċess li jieħu żmien mhux żgħir biex minn għarfien aħjar ngħaddu għall-impenn.

Waħda mid-diffikultajiet li rridu niffaċċjaw kuljum hi l-frammentazzjoni tas-settur pubbliku b’mod li r-riżorsi li għandu, l-pajjiż ma jagħmilx użu tajjeb biżżejjed tagħhom, għax dawn huma mifruxa żżejjed. Il-qasma tal-MEPA f’żewġ awtoritajiet jiena nħares lejha f’dan is-sens.

Il-MEPA ma kienitx qed taħdem tajjeb, imma li taqsamha f’żewġ biċċiet, qatt ma kienet soluzzjoni, għax kull waħda miż-żewġ biċċiet qatt mhu se tkun b’saħħitha biżżejjed, l-anqas fil-qasam tagħha.

Il-MEPA ma kienitx b’saħħitha biżżejjed minħabba li fil-ħidma tagħha tul is-snin, qatt ma poġġiet l-interess tal-komunità sħiħa fiċ-ċentru tal-ħidma tagħha. Dejjem iffukat fuq l-iżvilupp tal-art u assigurat li l-bqija ta’ ħidmieta ma jtellifx dan l-iskop primarju. Meta fl-2002 l-ambjent ingħaqad mal-iżvilupp tal-art f’awtorità waħda kien hemm opportunità tad-deheb, li sfortunatament ma ġietx użata sewwa.

F’pajjiż żgħir bħal tagħna, l-eżistenza ta’ awtorità waħda għall-ambjent u l-ippjanar għall-użu tal-art kienet opportunità unika biex il-ħidma ambjentali tkun iffukata u effettiva. (Il-ħidma ambjentali tinkludi l-ippjanar għall-użu ta’ l-art.) Minflok, din l-opportunità intużat ħażin. Kien hemm il-possibilità ta’ sinerġija, imma din ġiet skartata. Minflok, ġie assigurat li d-Direttorat tal-Ambjent jibqa’ bla riżorsi umani u tekniċi inkluż bla direttur għal diversi snin, kif għadu sal-lum li qed nikteb. Kif kien, bla snien u bla idejn, id-Direttorat tal-Ambjent ftit seta jkun effettiv.

Fil-bidu ta’ din il-ġimgħa ġiet konkluża d-diskussjoni fil-Parlament biex il-MEPA tinqasam mill-ġdid f’żewġ awtoritajiet: awtorità għall-ambjent u oħra għall-ippjanar għall-użu tal-art. Il-liġijiet li tressqu f’ħafna aspetti huma identiċi għal-liġi l-qadima, bid-difetti b’kollox.

Kull waħda miż-żewġ liġijiet ewlenin ippreżentati, fiha lista ta’ prinċipji li qegħdin hemm biex iservu ta’ gwida għall-Gvern, u anke għall-awtoritajiet il-ġodda infushom, dwar il-mod kif għandhom jaġixxu. Imma, sfortunatament dawn tħallew biss bħala prinċipji fuq il-karta għax mhuwiex possibli li ċittadin ordinarju inkella għaqda ambjentali tmur il-Qorti bl-insistenza li dak li l-Parlament approva fil-prinċipju jitwettaq. Din mhix xi ħaġa ġdida, għax dan id-difett fil-liġijiet ġie ikkupjat mil-liġi l-qadima li fis-sustanza tgħid l-istess affarijiet.

Bid-difetti kollha tal-liġijiet, dawn jitħaddmu, tajjeb jew ħażin, skond x’tip ta’ persuni jinħatru biex imexxuhom. Kellna, u għad għandna, kemm persuni kapaċi kif ukoll persuni li mhumiex kapaċi biex imexxu dawn it-tip ta’ awtoritiajiet. Kultant, xi persuni kapaċi ddakkru mill-bqija.

Qatt mhu tajjeb li l-Gvern jiddeċiedi waħdu dwar il-persuni li għandhom ikunu fdati bit-tmexxija ta’ dawn l-awtoritajiet. Il-prattika fl-Unjoni Ewropeja u anke fl-Istati Uniti tal-Amerika hi li l-persuni li jinħatru jkunu mgħarbla fil-pubbliku minn kumitati tal-Parlament. Il-proċess fl-Istati Uniti tal-Amerika huwa ħafna iktar rigoruż minn dak fl-Unjoni Ewropeja. Hemmhekk anke l-imħallfin prospettivi jgħarblu u mhux l-ewwel darba li kien hemm persuni nominati li ma kisbux l-approvazzjoni biex jinħatru.

Dan ifisser li wara li l-Gvern jinnomina lill-persuni li għandhom imexxu dawn jidhru quddiem kumitat parlamentari li jistaqsihom diversi mistoqsijiet, u jiddibatti magħhom il-fehmiet u l-esperjenzi tagħhom relatati mall-oqsma differenti ta’ ħidma tal-awtorità li jkunu ġew nominati biex imexxu. Dan isir biex ikun stabilit jekk humiex kompetenti biex imexxu.

Hi sistema li meta tkun addottata għandha isservi ta’ xprun fuq il-Gvern tal-ġurnata biex joqgħod iktar attent dwar il-persuni maħtura, għax id-difetti jew in-nuqqasijiet tagħhom b’dan il-mod hemm ċans tajjeb illi jiġu esposti immedjatament.

Din il-proposta saret kemm fil-manifest elettorali tal-Alternattiva Demokratika kif ukoll fil-manifest elettorali tal-Partit Laburista. Fil-Parlament f’dawn il-ġranet, ġew ippreżentati proposti f’dan is-sens kemm minn Marlene Farrugia f’isem Alternattiva Demokratika kif ukoll minn esponenti tal-Partit Nazzjonalista.

Minkejja li kien hemm l-opportunità ta’ kunsens dwar dawn il-proposti, il-Gvern sfortunatament għażel li jirreżisti dak li kien ikun ċertament pass kbir il-quddiem fil-kontabilità tat-tmexxija tal-awtoritajiet.

Kien biss nhar il-Ġimgħa 4 ta’ Diċembru, li waqt id-diskussjoni pubblika organizzata mill-Kummissjoni Ambjent tal-Knisja li l-Prim Ministru iddikjara illi l-Partit Laburista ma abbandunax l-idea imma li għadu qed jiżviluppa qafas li jkun japplika għal firxa wiesa’ ta’ awtoritajiet. Filwaqt li dan hu tajjeb jibqa’ l-fatt li intilfet opportunità unika fid-dibattitu parlamentari li tiġi introdotta s-sistema tal-għarbiel bi prova fil-qasam li hi l-iktar meħtieġa, dak ambjentali.

Għax wara koIlox huma dawk afdati bit-tmexxija li jistgħu jagħmlu d-differenza, anke jekk il-liġijiet jibqgħu difettużi. Għalhekk il-ħtieġa li ngħarblu aħjar il-ħatriet li jsiru, illum qabel għada. Hu b’hekk li l-għarfien aħjar tal-obbligi ambjentali tagħna nistgħu nittrasformawhom f’awtoritajiet impenjati bis-serjeta biex jagħmlu dmirhom.

ippubblikat fuq Illum: il- Ħadd 13 ta’ Diċembru 2015

Simon qed joħlom, jew ………

Simon Busuttil + Anglu Farrugia

 

Il-każ tad-diesel tal-Kap tal-Opposizzjoni tfaċċa f’daqqa. Il-pubbliku ma kien jaf xejn bil-każ qabel il-bieraħ. Jidher li l-amministrazzjoni tal-Parlament innutat dak li dehrilha li kienu diskrepanzi bejn id-diesel ikkunsmat u l-użu effettiv tal-karozza mħallsa minn fondi pubbliċi li jagħmel użu minnha l-Kap tal-Opposizzjoni. Milli qed jintqal intalbet spjegazzjoni imma mid-dehra din l-ispjegazzjoni ma kienitx ta’ sodisfazzjon. Għalhekk infetħet inkjesta bil-maġistrat.

Mingħajr ma tkun taf il-fatti sewwa diffiċli biex tgħid jekk kienx meħtieġ jew le li tinfetaħ inkjesta bil-maġistrat.

Il-Kap tal-Opposizzjoni qed jgħid li hu għadu ma fehemx x’inhu jiġi allegat għax safejn jaf hu ma hemm xejn irregolari. L-infieq massimu stabilit għad-diesel ma nqabiżx. Skond il-Kap tal-Opposizzjoni, il-konsum tad-diesel m’huwiex wieħed eċċessiv, anke meta dan tqabblu ma karozzi oħra.

Huwa inkwetanti ħafna imma dak li qal il-Kap tal-Opposizzjoni li l-inkjesta dwaru hi xi forma ta’ vendetta għal dak li ġara matul dawn l-aħħar ġranet fil-Parlament. Simon Busuttil hu rappurtat li qal li hi ko-inċidenza stramba li l-inkjesta dwar il-konsum tad-diesel tħabbret l-għada li l-opposizzjoni ppubblikat dokument dwar it-tmexxija tajba (good governance) u ġimgħa wara li huwa ikkontesta ruling tal-Ispeaker (fil-kaz Joe Debono Grech/Marlene Farrugia).

X’ġara eżattament għad irid ikun stabilit għax dan s’issa m’huwiex magħruf ħlief (forsi) minn dawk direttament involuti. Hemm żewġ affarijiet serji involuti li jeħtieġ li jkunu ċċarati malajr kemm jista’ jkun: il-frodi allegati u agħar minn hekk l-allegazzjoni ta’ tpattija.

Minn dak li ntqal, hu possibli, li, fl-aħħar, wara kollox tinstab spjegazzjoni li tiġġustifika l-konsum tad-diesel imma dwar l-allegazzjoni ta’ vendetta għandna għaliex inkunu inkwetati ħafna. Għax jew Simon Busuttil qed joħlom inkella hemm problema serja ħafna fit-tmexxija tal-Parlament.