Fuq il-passi ta’ Eva Peron

Il-logħob bil-kliem, tal-Gvern u tal-Prim Ministru Joseph Muscat, dwar diversi issues legali u kostituzzjonali jixħtu dell fuq il-kredenzjali demokratiċi tal-Partit Laburista. Inbidlu diversi liġijiet biex ikun possibli li Membri Parlamentari jinħatru fuq diversi bordijiet, inkluż dawk ta’ xi awtoritajiet. Din l-azzjoni imminat il-proċess demokratiku għax biha l-Membru Parlamentari flok ma jaqdi dmiru biex jgħarbel il-ħidma tal-Gvern sar parti minn din l-istess ħidma. Dak mhux ix-xogħol tal-Membru tal-Parlament.

Il-Membri Parlamentari li nħatru fuq dawn il-Bordijiet qegħdin f’posizzjoni li ma jistgħux jaqdu d-dmirijiet tagħhom fil-Parlament b’mod adegwat. Kien ikun aktar għaqli li l-Parlament ħoloq l-għodda neċessarja biex ikun jista’ jissorvelja aħjar il-ħidma tal-Gvern.

F’dan is-sens Joseph Muscat qed jimxi fuq l-eżempju ta’ Lawrence Gonzi meta dan, fil-legislatura l-oħra (2008-13), ħoloq il-kariga ta’ Assistenti Parlamentari u ipprova jaħtar lil kull Membru Parlamentari fil-backbench f’xi kariga. Dan għamlu għal raġuni waħda: biex ikollhom x’jagħmlu u b’hekk ikun inqas possibli li jikkonfoffaw jew ilabalbu kontra l-Gvern.

Il-Prim Ministru qiegħed ukoll jilgħab bil-kliem dwar it-talba għal referendum abrogattiv liema talba diga ġiet ippreżentata. Filli jgħid li r-referendum abrogattiv isir jekk hemm il-firem rikjesti mill-liġi u filli jagħti x’jifhem li lest li jikkunsidra talba għal tnaqqis fl-applikabilita tal-provedimenti tal-liġi dwar ir-referendum abrogattiv. Dan il-logħob bil-kliem da parti tal-Prim Ministru hu ta’ ħsara ghall-proċess demokratiku.

Il-Prim Ministru ddeċieda ukoll minn jeddu li jaqbad u jgħaddi responsabbiltajiet fil-qasam soċjali lill-uffiċċju tal-President tar-Repubblika. Dan qed jagħmlu meta l-Kostituzzjoni hi siekta dwar dan, kif ukoll mingħajr ma kien hemm il-possibilita li jesprimi ruħu l-Parlament dwar il-materja.

Hu opportun li nagħtu każ ukoll li mart il-Prim Ministru qed tingħata ukoll rwol politiku fid-delegazzjonijiet governattivi Maltin barra minn Malta. Huwa biss f’pajjiżi fejn m’hemmx demokrazija jew inkella fejn id-demokrazija hi dgħajfa li l-Prim Ministru jagixxi b’dan il-mod. F’demokrazija mart il-Prim Ministru m’għandha l-ebda rwol għax meta l-Prim Ministru jkun għal xi raġuni indispost hemm id-Deputat Prim Ministru jew xi membru ieħor tal-Kabinett li għandu  jaġixxi minn floku. Hekk ikun xieraq għax il-Ministri jirrappreżentaw lill-poplu li eleġġihom. Iżda mart il-Prim Ministru ma tirrappreżenta lil ħadd.  Juan Domingo Peron kien jagħmel hekk: kien jibgħat lil Eva biex tirrappreżentah!

Advertisements

Simon ma jiftakarx

busuttil_with_gonzi

Il-Kap tal-Partit Nazzjonalista Simon Busuttil illum tkellem dwar id-diversi ħatriet ta’ Membri Parlamentari mill-Gvern tal-Labour. Qalilna li dawn il-ħatriet huma ipokrezija politika.

It-Times online illum tirrapporta hekk :

“ This government, Dr Busuttil said, had  an element of immorality in how it behaved, buying people’s silence at taxpayers’ expense.”

Taf x’ma qalx Simon?  Li Joseph tgħallem sewwa minn dak li ipprova jagħmel Lawrence Gonzi. Forsi Simon ma jiftakarx, għax ma kienx Malta, meta inħolqot il-kariga ta’ Assistent Parlamentari u fiha Gonzi ħatar il-backbenchers kollha (inkluż lil Franco Debono) . Wara Dr Gonzi kien għadda biex ħatar lil dawk li kien baqa’ mill-backbench f’ħatriet oħra : JPO (Kunsill tax-Xjenza u Teknoloġija), Ċensu Galea (Chairman tal-BICC). Dawn il-ħatriet minn Dr Gonzi kienu saru specifikament biex jagħlaq ħalq il-backbenchers. Dejjem s’intendi bil-kaxxa ta’ Malta tħallas.

Kien hemm wieħed biss li irrifjuta l-ħatra t-Tabib Jean-Pierre Farrugia.

Imma fejn irid Simon ma jiftakarx.

Gonzi fir-rokna

Lawrence Gonzi qiegħed fir-rokna. Ilu jilgħab logħba perikoluża. Imma issa qiegħed joqrob lejn l-aħħar.

It-tmexxija tiegħu tal-Partit Nazzjonalista u tal-Gvern imxiet mill-ħażin għall-agħar.

L-ewwel linja ta’ difiża tiegħu kienet li m’hux hu kien responsabbli. Imma t-team li wiret. Għalhekk RCC u Joe Saliba ħarġu bil-brand ta’ gonzipn.

Gonzipn fissret il-konvinzjoni ta’ Gonzi u dawk ta’ madwaru (RCC, Joe Saliba u Austin Gatt) li l-Grupp Parlamentari u l-Kabinett ma jiswew għalxejn. Hu kollox. Qabel l-elezzjoni fil-fatt lil Molly Bordonaro Ambaxxatriċi tal-Istati Uniti qalila li ma kellux minfejn jagħżel Kabinett sura. Għalhekk wara l-elezzjoni lil uħud infurmhom b’SMS li s-servizzi tagħhom ma kellux aktar ħtieġa tagħhom.

Dak li qed jiġri llum fil-Parlament hu l-konsegwenza ta’ dak li Gonzi u Saliba ħawlu snin ilu. Fil-fatt li tiżra’ taħsad.

Fil-Parlament smajna lil diversi jkunu kritiċi ta’ dak li kien qed jagħmel kif ukoll ta’ dak li ma kienx qed jagħmel il-Gvern: gonzipn. U ġaladarba l-istrateġisti għoġobhom jidentifikaw il-Gvern ma persuna waħda (l-brand Gonzi) jridu joqgħodu għall-konsegwenzi : li l-istess persuna terfa’ r-responsabbilta ta’ kull ma ġara.

Ma hemm xejn ħażin li diversi membri parlamentari ħasssew il-ħtieġa li jitkellmu fil-pubbliku dwar dak li kien miexi ħażin. Dan hu rifless ta’ l-integrita’ tagħhom li quddiem triq li qed twassal għal diżastru u kollass komplet tal-PN huma għażlu t-triq tal-irġulija. Bil-bibien magħluqin setgħu faċilment imxew mal-kurrent. Bi grupp parlamentari li jippreferixxi l-inċens, bi tmexxija li tippreferi lil min jilgħaq hu pożittiv li diversi fetħu ħalqhom u qalu lil Gonzi u lir-reqdin ta’ madwaru li dak li qalu ma kienx jikkorrispondi ma dak li għamlu.

Gonzi ipprova jixtri lill-kritiċi. Ħoloq u ħatar numru ta’ Assistenti Parlamentari. Kariga immudellata fuq il-Parliamentary Private Secretary fil-House of Commons bid-differenza li fil-House of Commons hu unur li tinħatar. F’Malta titħallas biex forsi tinxtara u tagħlaq ħalqek.

Il-kritiċi parlamentari nazzjonalisti ta’ Gonzi għamlu żball wieħed. Ma kkordinawx il-ħidma bejniethom. Li għamlu hekk kienu jkunu effettivament qed iwaqqfu kurrent b’mod formali u kienu jġibu lil Gonzi f’postu żmien twil ilu.  Kienu jġibuh għarkuptejh u possibilment kienu jiffrankaw lill-pajjiż numru ta’ deċiżjonijiet żbaljati.

Iktar ma jgħaddi żmien imma Gonzi qed jitfixkel f’saqajh. Flok ma joqgħod attent għal dak li jagħmel (hu u ta’ madwaru) qiegħed ta’ kuljum iwassal messaġġ li l-arroganza hi element essenzjali tal-għodda ta’ tmexxija li hu għażel.

Mhux l-ewwel wieħed mill-mexxejja politiċi ta’ dan il-pajjiż li sab ruħu f’din il-posizzjoni. Hu dak li tagħmel meta tkun fir-rokna.

Dom Mintoff fuq in-Net TV

Diġa kelli l-opportunita’ nitkellem dwar l-avvenimenti reċenti fil-Parlament.

Tajjeb li naraw l-istampa kollha u mhux nintilfu fid-dettall.

Ġara dak li jiġri dejjem. L-Opposizzjoni tfittex l-iktar punt debboli tal-Gvern u wara tattakkah fejn iweġġa’ l-iktar. Tagħmel dan biex iddgħajfu tant sakemm, kif ngħidu bil-Malti, ma jkunx jiflaħ iqum għal oħra.

Il-Labour taħt Joseph Muscat hekk qed jagħmel bla rispett lejn xejn u lejn  ħadd.

Hekk ukoll għamel il-PN (b’mod ferm iktar fin!) fil-konfront tal-Gvern ta’ Alfred Sant fil-perjodu 1996-98. Dak inhar il-punt debboli ta’ Alfred Sant kien Dom Mintoff, u Fenech Adami tah il-ħabel. Tah airtime kemm ried fuq in-NET TV. (Tiftakruh lil Pierre Portelli jiġri bil-microphone wara Mintoff?)  Tah ħin minn tiegħu fil-Parlament. U l-Gvern ta’ Sant ftit ftit ikkollassa.

Illum qed jiġri l-istess.

Lawrence Gonzi hu l-punt debboli tal-PN. Wera li mhux kapaċi jmexxi għal darba tnejn.  Minflok imexxi  jipprova jixtri l-kritiċi tiegħu fil-Grupp Parlamentari bil-ħolqien tal-ħatriet ta’ Assistent Parlamentari.

Żewġ Membri Parlamentari tal-PN ma aċċettawx dawn il-ħatriet. Taw ir-raġunijiet għar-rifjut tagħhom. Qalulu li ma riedux jaċċettaw ħatriet li bħala riżultat tagħhom kien ikollhom jaqgħu fil-muta u minflok ma jagħmlu xogħolhom ta’ Membri Parlamentari jkollhom joħorġu biċ-ċensier.

Dan kollu jfisser li hemm nuqqas ta’ dibattitu intern fil-PN li inevitabilment wassal biex il-kritika l-ħarxa toħroġ fil-beraħ. Fuq ġewwa ma hemm ħadd li lest biex jisma’ u jagħti każ. Dan m’hu tort ta’ ħadd għajr ta’ min suppost li qed imexxi u biċ-ċar wera  li ma kienx kapaċi jikseb il-fiduċja reali tal-Partit. Għax il-fiduċja ma tiksibiex meta tirbaħ vot ta’ fiduċja fil-Parlament jew fil-Partit. Tirbaħ il-fiduċja meta ta’ madwarek, in partikolari dawk li tippretendi li tmexxi, jaċċettaw il-ġudizzju tiegħek. Ikunu lesti li jiddiskutu miegħek, u l-opinjoni tiegħek jagħtuha piz kbir mhux biss għax inti l-mexxej iżda fuq kollox għax jirrispettawk.

Lawrence Gonzi m’għandux dawn il-kwalitajiet. Imexxi minn hemm fuq,  m’għandux idea ta’ x’jaħsbu l-egħruq tal-Partit. Minkejja t-teatrin qatt ma kien viċin l-egħruq tal-Partit. Qatt ma kien attiv fl-istrutturi tal-Partit. Ġie fil-Partit minn imkien. U qatt ma kellu x-xewqa li jaħdem viċin l-egħruq tal-PN. Per eżempju, wara l-elezzjoni tal-1987 meta ma telax sparixxa mill-ewwel mill-Partit sakemm EFA offrielu l-post ta’ Speaker! Imma dik storja oħra.

Quddiem dan il-punt debboli, n-nuqqas ta’ mexxej li kapaċi jmexxi,  l-isfidi ma jonqsux. Jidher ċar li l-backbenchers ftit kellhom l-opportunita’ li jsemmgħu leħinhom biex iwasslu l-kritika għall-mod kif inhu immexxi l-pajjiz u l-partit.

Altru milli kapitlu magħluq. Il-kapitlu għadu miftugħ beraħ u probabilment ma jingħalaqx ħlief meta Lawrence Gonzi jwarrab jew jitwarrab mit-tmexxija tal-PN.

Imbagħad il-PN ikun irid jagħmel snin twal fl-Opposizzjoni biex jinbena mill-ġdid. Biex dak li tkisser taħt it-tmexxija ta’ Lawrence Gonzi u dawk ta’ madwaru,  bil-paċenzja jerġa’ jieħu sura.

Sadanittant forsi ma tafx kif Lawrence Gonzi jerġa’ jmur iqatta’ ftit ħin bħala President tal-Azzjoni Kattolika.

Lenti fuq ir-rewwixta : 1) Il-karrotti

Ir-rewwixta li għaddejja bħalissa fil-Parlament fil-fehma tiegħi taf il-bidu tagħha  lir-rwol sekondarju li għandu l-backbench fuq in-naħa tal-Gvern.

Kellna diversi membri parlamentari li kienu kritiċi tal-Gvern tul din il-leġislatura, b’kull wieħed minnhom iżid id-doża. Jesmond Mugliette, Jean Pierre Farrugia, Robert Arrigo, Jeffrey Pullicino Orlando u dan l-aħħar xhur Franco Debono. Ftit li xejn kien hemm komuni bejniethom. Ilkoll ġejjin minn distretti differenti. Kuntrarjament għal li jiġri fil-Parlament ta’ diversi pajjiżi Ewropej jidher li ma kien hemm l-ebda koordinazzjoni bejniethom. Kulħadd ħadem għal rasu. Li ħadmu flimkien ir-riżultati kienu jkunu differenti u iżjed posittivi.

L-ewwel riflessjoni hi dwar ir-rwol tal-backbench.  Tradizzjonalment dan kien meqjus bħala il-qaddej fidil tal-front bench, iħejji ruħu sa ma jingħoġob biżżejjed biex jieħu promozzjoni ħalli jkun jista’ jservi lit-tmexxija.

Il-ħolqien tal-grad ta’ Assistent Parlamentari, l-ekwivalenti tal-Parliamentary Private Secretary fil-House of Commons, jiena nqiesu f’din id-direzzjoni.  Karrotta u sarima fl-istess ħin tant li kien hemm min ma aċċettax il-ħatra ta’ Assistent Parlamentari.

Karrotti oħra li tqassmu kienu postijiet eżekuttivi bħalma huma c-Chairmanship ta’ Kunsill tax-Xjenza u t-Teknoloġija u c-Chairmanship tal-Kumitat Konsultattiv dwar l-Industrija tal-Bini.

Dan kollu huwa aljenazzjoni mill-funzjoni vera tal-membri parlamentari li hi li jissorveljaw il-ħidma tal-Gvern billi kontinwament jitolbuh jagħti kont ta’ egħmilu.

Dak li għamlu Mugliette, Farrugia, Arrigo, Pullicino Orlando u Debono. Setgħu għamluh aħjar, imma jekk iħarsu lejn il-ħidma ta’ dawk li ġew qabilhom ftit li xejn isibu x’jispirhom.

Ir-rewwixta qegħdet il-pedament għal backbench attiv li jirrifjuta li joqgħod kwiet, bil-karrotti jew mingħajrhom.

(darba oħra : 2. Il-lealta’)

Wara Austin : Franco taħt il-lenti

L-argumenti li ġieb Franco Debono fil-Parlament dwar ir-riforma tas-sistema tat-trasport pubbliku kienu jwasslu lejn konklużjoni waħda u ċara. Li l-Ministru responsabbli mit-Trasport kellu responsabbita’ politika xi jġorr. Il-loġika ta’ Franco kienet twassal għal konklużjoni waħda : li jekk il-Ministru m’huwiex lest li jirreżenja għandu jkun sfurzat li jagħmel dan bl-approvazzjoni ta’ mozzjoni ta’ sfiduċja.

Meta Franco Debono għażel illi jastjeni kien qed jgħid li għalkemm kien konvint li Austin Gatt kellu jwarrab, ma kellux il-kuraġġ li jagħti d-daqqa finali biex jivvota favur il-mozzjoni ta’ sfiduċja. Veru dak li qal Franco fuq Dissett il-bieraħ li hu mar oltre dak li għamel ħaddieħor. Imma dak li għamel (jiġifieri li astjena) ma jikkorrispondix mal-kliem iebes li qal – ħafna minnu (pero’ mhux kollu) ġustifikat.

Punt żgħir fuq dak li qal : li x-Xandir illum hu agħar mit-tmeninijiet. Għalkemm naħseb li l-PBS hu l-bogħod milli jkun aċettabbli, li tqabblu mat-tmeninijiet ifisser li m’għandekx idea ta’ x’kien hawn fis-snin 80.

L-aħħar punt tiegħi hu dwar li l-inġieba ta’ Franco tmur kontra dak mistenni minnu fil-kariga tiegħu ta’ Assistent Parlamentari.  

Franco ġustament irrefera għar-rewwixta ta’ membri Parlamentari Konservattivi reċentement fil-House of Commons fi tmiem dibattitu dwar l-Unjoni Ewropeja. Li ma qalx Franco kien li bħala riżultat ta’ dik ir-rewwixta żewg Parliamentary Private Secretaries (l-ekwivalenti tal-Assistent Parlamenari fil-Parlament Malti) spiċċaw mill-ħatra. Wieħed irreżenja u l-ieħor tkeċċa mill-Prim Ministru Ingliż David Cameron. Jekk irid jinforma ruħu jista’ jaqra l-gazzetti Ingliżi fosthom l-artiklu fil-Guardian tal-25 t’Ottubru 2011 intitolat : David Cameron rocked by record ribellion as Europe splits Tories again.

L-irġulija u l-konsistenza Franco m’għandux jitlobhom biss mingħand Austin Gatt – li naqas – iżda għandu jkun hu l-ewwel li jipprattikhom.