Is-switch ta’ Adrian Delia

L-editorjal tas-Sunday Times ta’ Malta tal-lum jitkellem dwar kif Adrian Delia, il-mexxej tal-lum tal-PN, qiegħed taħt investigazzjoni.

Jgħidilna l-editorjal, li l-FIAU, tmien xhur ilu, kkonkludiet rapport dwar il-klijenti ta’ Soho ta’ Adrian Delia l-avukat. Għax minn dak li ntqal madwar sena u nofs ilu minn DCG konna sirna nafu dwar il-klijenti kkuluriti li kellu Dottor Adrian Delia.

Il-Pulizija, jidher, dejjem skond is-Sunday Times, li fetħu investigazzjoni immedjatament hekk kif irċevew dan ir-rapport, għax xi ħaġa hekk il-Pulizija Maltija jidħlulha bir-ras. Kif jagħmlu dejjem, il-Pulizija Maltija mill-ewwel tinvestiga, ma tantx tagħti ċans.

Dwar din l-investigazzjoni jidher li hemm skiet sħiħ fil-PN.

Probabbilment li, kif qal Delia innifsu, fil-PN mill-ewwel fehmu li dak li għamel Adrian Delia meta ma kienx għadu tħajjar għall-ħajja fil-politika m’għandu x’jaqsam xejn ma kif għandna nezaminaw l-imġieba tiegħu illum, bħala Kap tal-Opposizzjoni. Għax dak li jirrikjedu klijenti bbażti f’Soho huwa ferm differenti minn dak li jeħtieġ il-Partit Nazzjonalista llum.

Għax ftit jafu li hekk kif Adrian Delia l-avukat sar Kap tal-Opposizzjoni intefa’ s-switch tal-imġieba tiegħu preċedenti!

Dawn huma l-valuri li l-PN tal-lum b’konvinzjoni kbira jħaddan.

Advertisements

Il-qtil ta’ Daphne: x’solviet il-Pulizija?

 

L-aħbar mogħtja mit-Times tal-lum li l-Pulizja kważi solviet il-qtil ta’ Daphne għax identifikat il-mandanti tal-qtil mhux aħbar tajba. Għax liema hu dak il-korp tal-Pulizija serju li jikxef idejh fl-iktar mument delikat ta’ investgazzjoni diffiċli? Jissogra li dak li qed jiġri warajh jaħrablu.

Jiena dejjem fhimt li l-investigazzjoni ma kienitx waħda faċli, imma hu għalija ovvju li dawn it-tip ta’ “aħbarijiet” ikomplu jżidu d-diffikultajiet tal-pulizija.

Bla dubju hemm min irid dejjem iktar informazzjoni dwar fejn waslu l-pulizija, imma kultant is-skiet hu l-aħjar risposta, anke fl-interess tal-konklużjoni tal-investigazzjoni innifisha!

Naħseb li kull min hu ta’ ried tajba jixtieq li l-kaz jissolva llum qabel għada, imma l-aħbarijiet bis-sulluzzu m’huma ser isolvu xejn.

Avukati, pulizija u l-kriminali ta’ wara l-iskrivanija

 

Naħseb li hu ċar għal kulħadd li xi avukati huma familjari ftit iżżejjed ma’ kriminali li hawn jiġru mas-saqajn. Dan kien wieħed mit-temi li Daphne Caruana Galizia analizzat fil-blog tagħha tul is-snin. L-imġieba tagħhom kienet taħt il-lenti tagħha: lenti li tifli b’reqqa.

Dak li qed jingħad bħalissa dwar Chris Cardona, avukat u Ministru, jagħmel ħafna sens f’dan il-kuntest. Nifhem li hu jiċħad b’qawwa l-konklużjonijiet loġiċi ta’ dak li qiegħed jingħad. L-istess bħalma ċaħad l-istejjer dwar żjara fil-burdell FKK Acapulco fil-lokal ta’ Verbert ħdejn Düsseldorf fil-Ġermanja. Hekk kif waslet is-siegħa tal-prova dwar fejn kien skond kif jirriżulta mill-informazzjoni li kien jittrasmetti l-mobile tiegħu, il-kawżi ta’ libell waqfu, u l-provi ma nstemgħux.

Ovvjament kulħadd għandu dritt jasal għall-konklużjonijiet tiegħu. Jiena bħal ħafna oħrajn ikkonkludejt li ċ-ċahdiet ta’ Chris Cardona ma tistax teħodhom bis-serjetá. Din hi materja gravi ħafna, għax Chris Cardona mhux biċċa avukat, imma Deputat Mexxej tal-Partit Laburista u Ministru. Bħala Maltin għandna d-dritt li l-Ministri u l-uffiċjali tal-partiti politiċi jkunu persuni serji u ta’ integritá, li ma twaqqawlniex wiċċna l-art.

Diversi qed jinsistu li hemm bżonn inkjesta speċjali dwar il-qtil ta’ Daphne Caruana Galizia. Il-Gvern ħa l-posizzjoni li dwar jekk hemmx din il-ħtieġa jiddeċiedi iktar tard wara l-konklużjoni tal-inkjesta maġisterjali. Joseph Muscat qed jgħid li jekk ma jsirx hekk l-inkjesta maġisterjali tista’ tkun preġudikata.

Ma naqbilx ma dak li qed jgħid Joseph Muscat għax l-iskop taż-żewġ inkjesti hu differenti. Kif kien ġara dwar l-inċident tax-xufier/pulizija li kellu Manwel Mallia, dakinnhar Ministru għall-Intern. Dakinnhar kien hemm żewġ inkjesti għaddejjin flimkien u safejn naf jien l-ebda waħda mill-inkjesti ma kienet ta’ xkiel għall-inkjesta l-oħra.

L-inkjesta speċjali hi meħtieġa dwar il-kollass tal-istituzzjonijiet nazzjonali u l-kontribut ta’ dan il-kollass biex żviluppat is-sitwazzjoni attwali. Hemm bżonn ukoll spjegazzjoni li tagħmel sens għaliex il-maġistrat li kien qiegħed jinvestiga l-qtil ta’ Daphne ingħata promozzjoni fl-iktar mument kritiku għall-inkjesta kif ukoll jekk hux veru li kellu jiffaċċja ostakli kbar fil-ħidma tiegħu.

Għax uħud mill-kriminali li hawn jiġru mas-saqajn jista’ jkun li huma liebsin il-ġlekk u l-ingravata u qegħdin wara l-iskrivanija.

Daphne: min ordna l-qtil tagħha?

Fi żmien ġimgħa oħra (nhar it-Tlieta 16 t’Ottubru) tkun għaddiet sena mill-qtil ta’ Daphne Caruana Galizia. S’issa l-Pulizija bdiet proċeduri kontra dawk li hu allegat li wettqu l-qtil. Iżda min ordna l-qtil  għadu mhux magħruf. Il-Pulizija għad ma skoprewx min hu, jew min hi jew min huma.

Il-ġimgħa l-oħra l-Qorti Kostituzzjonali iddeċidiet li d-Deputat Kummissarju tal-Pulizija Silvio Valletta, li hu miżżewweġ lill-Ministru Justyne Caruana, ma kellux ikun parti mill-investgazzjoni tal-Pulizija dwar il-qtil ta’ Daphne u dan minħabba li l-presenza tiegħu fl-investgazzjoni tnissel dubji serji f’moħħ in-nies dwar l-imparzjalitá tal-investigazzjoni.

La Republica, il-bierah, f’artiklu intitolat: “Omicidio Daphne Caruana Galizia, ci fu un altro incontro tra uno dei killer e il ministro maltese” bħala parti mill-inkjesta Daphne project titkellem dwar bachleor’s party li sar f’villa fil-Fawwara nhar id-29 ta’ Ġunju 2017, erba’ xhur qabel il-qtil ta’ Daphne Caruana Galizia. Fost dawk preżenti, jkompli jgħid ir-rapport, kien hemm il-Ministru Chris Cardona kif  ukoll Alfred Degiorgio (il-Fulu), wieħed mill-akkużati bil-qtil ta’ Daphne.

Ir-rapport ikompli jgħid li persuna (li isimha ma tissemmiex fir-rapport) wara li ċemplet lil Daphne fuq il-mobile biex tagħtiha informazzjoni dwar l-istorja tal-kuntrabandu taż-żejt, ċemplet lill-Ministru Cardona u immedjatament wara lil Alfred Degiorgio il-fulu.

Il-Ministru Cardona qed jiċħad dan kollu. Dan hu kollu attentat biex iħammġuh Chris Cardona qal lit-Times: hu insista b’qawwa li ma għandu l-ebda konnessjoni mal-persuna li tissemma u li hi akkużata bl-attentat tal-qtil (Il-Fulu, jiġifieri). Tajjeb ħafna!

Ir-rapport jgħid iktar. Jgħid li l-Maġistrat Anthony Vella, li mexxa l-inkjesta mill-bidu nett, kien talab għar-records telefoniċi ta’ dawk li kienu qed jissemmew għal dati ferm qabel ma seħħ il-qtil. Din l-informazzjoni damet ħafna ma waslet għand il-Maġistrat, jgħid ir-rapport, tant li sadanittant kien laħaq imħallef u allura ma kienx għadu inkarigat mill-inkjesta.

S’issa għad mhux magħruf x’ġara iktar minn din l-informazzjoni, jigifieri jekk kienx hemm min investiga jekk din hiex vera jew le. Iċ-ċaħda tal-Ministru Cardona hi importanti, imma ċertament mhiex biżżejjed.

Dan kollu jista’ jfisser ħafna. Imma jista’ ukoll ma jfisser xejn. Jista’ jkun stabilit jekk din hiex informazzjoni relevanti biss jekk ikun hemm il-possibilitá li din l-informazzjoni tkun eżaminata bir-reqqa. Jidher li dan kien qed jipprova jagħmel il-Maġistrat Anthony Vella sakemm, ingħata promotion, u allura ma setax jibqa’ jmexxi l-inkjesta.

Din gravi ħafna. Xi ħadd għandu l-obbligu li jispjega.

Sakemm ta’ La Republica m’humiex qed iħarrfu, jekk l-investigazzjoni issir bis-serjetá, din tista’ tkun il-bidu reali tat-tiftix tal-mandant tal-qtil ta’ Daphne Caruana Galizia.

Kif qal fil-Qorti Silvio Valletta, Deputat Kummissarju tal-Pulizija, minn din l-inkjesta ħadd ma hu eskluż!

Bomba għal Marlene u Godfrey

 

Permezz ta’ ittra anonima qalulhom li jekk ser jibqgħu jimminaw lil Delia qed jistiednu l-istess destin ta’ Daphne jiġifieri bomba li ttemmilhom ħajjithom.

Dan it-theddid hu dejjem kundannabbli. Għalkemm hu tajjeb li Godfrey mar għand il-Pulizija bl-ittra, però kemm hu għaqli li jingħata pubbliċitá lil min qed jhedded?

Il-PN u l-governanza tajba

Bħalissa fil-PN kulħadd qiegħed jgħid tiegħu dwar l-għażliet politiċi li għamel il-PN meta kien immexxi minn Simon Busuttil. Busuttil issa ilu ftit li telaq it-tmexxija, meta warrab biex refa’ r-responsabbiltá politika għat-telfa elettorali massiċċa ta’ Ġunju 2017.

Ir-riżultat tal-inkjesta maġisterjali dwar Egrant, li ma sabet l-ebda prova tal-involviment tal-familja Muscat f’din il-kumpanija, hi parti minn dan ix-xenarju. Għax ma tistax titkellem dwar il-korruzzjoni mingħajr ma jkollok f’idejk il-minimu ta’ provi.

Niftakru ftit dwar it-tlett kumpaniji li kienu nħolqu fil-Panama. Tnejn minnhom kienu identifikati ta’ min kienu: ta’ Keith Schembri u Konrad Mizzi. Dwar it-tielet waħda kien hawn ħafna għidut sakemm f’April tal-2017 fuq il-blog ta’ Daphne Caruana Galizia kienet ħarġet l-allegazzjoni miktuba għall-ewwel darba li tassoċja lil Michelle Muscat mat-tielet kumpanija, l-Egrant.

Il-PN kien għamilha fatta – mhux biss Simon Busuttil – u kważi b’vuċi waħda kien hemm ripetizzjoni ta’ din l-allegazzjoni daqs li kieku kienet skoperta tagħhom. Dakinnhar ma smajt lil ħadd mill-PN jgħid fil-pubbliku kliem differenti. Fi ftit kliem ir-responsabbiltá politika kienet waħda kollettiva.

Kienet Alternattiva Demokratika biss li applikat il-brejkijiet. Fil-fatt f’artiklu ippubblikat f’Illum nhar l-24 t’April 2017, intitolat Pilatu fid-dawl tax-xemx jiena għidt hekk : “li tkun moralment konvint li l-istorja hi korretta mhux biżżejjed. Din l-istorja teħtieġ il-konferma li tiġi mill-provi tad-dokumenti u mhux mid-dimostrazzjonijiet. Għax fuq id-dokumenti hi mibnija. Allura hemm obbligu li dawn id-dokumenti tant bażiċi jaraw id-dawl tax-xemx.

Id-dokumenti qatt ma rajnihom sakemm sabu ruħhom għand il-Maġistrat li ikkonkluda li huma foloz.

Ovvjament hemm ħafna spjegazzjonijiet li jeħtieġ li jsiru. Fosthom hemm bżonn ikun magħruf is-sors tad-dokumenti foloz. Minn fejn ġew. Imma probabbilment qatt ma nkunu nafu għax is-sors tal-ġurnaliżmu hu protett. Dejjem sakemm Pierre Portelli ma tmissux il-kuxjenza u jikxef lil min daħħlu fi sqaq.

Il-ġlieda tal-PN favur il-governanza tajba dejjem kienet waħda difettuża.

Niftakar ċar qiesu l-bieraħ waqt l-unika laqgħa li Alternattiva Demokratika kellha mat-tmexxija tal-PN dwar il-possibilitá ta’ alleanza pre-elettorali konna iddiskutejna l-kredibilitá tal-PN dwar dan. Min-naħa ta’ Alternattiva Demokratika konna tlabna spjegazzjoni mill-PN għal numru ta’ issues li kienu jitfgħu dell sostanzjali fuq dak kollu li l-Partit Nazzjonalista kien qed jgħid dwar il-ħtieġa ta’ governanza tajba.

Tlabna spjegazzjoni dwar ħames każi li dwarhom diġa ktibt diversi drabi u ċjoe : Beppe Fenech Adami u r-rwol tiegħu fuq kumpanija Capital One Investment Group/Baltimore Fiduciary Services, Claudio Grech u l-iskandlu taż-żejt u l-fatt li ma kienx jiftakar jekk qatt iltaqax ma George Farrugia, il-każ tal-invoices foloz bejn il-Grupp dB u l-PN, il-kunflitt ta’ interess ta’ Mario de Marco bejn l-obbligi parlamentari tiegħu u l-fatt li kien konsulent legali ewlieni tal-grupp dB, u l-applikazzjoni ta’ Toni Bezzina għal villa ODZ għalih meta l-PN kien qed imexxi l-quddiem politika ambjentali differenti.

L-ispjegazzjoni li tlabna ma ingħatax għax weħilna fuq affarijiet oħra. Imma dan hu it-track record tal-PN dwar il-governanza tajba. Li l-Partit Laburista hu agħar minn hekk ma hi tal-ebda konsolazzjoni!

Il-proġett Daphne: istituzzjonijiet dgħajfa

Is-sitwazzjoni hi waħda gravi.

Il-qtil ta’ ġurnalista minnu innifsu hu tebgħa fuq il-pajjiż kollu.

Il-ħasil tal-flus, probabbilment ġejjin mill-korruzzjoni ta’ kobor li qatt ma rajna bħala, dejjem iktar jidher bħala l-possibli motiv f’dan kollu.

Il-kollass tal-istituzzjonijiet jgħaqqad kollox.

Il-ġurnalisti barranin investigaw huma ukoll. Għamlu ir-riflessjonijiet tagħhom fuq dak li semgħu, fuq dak li raw u fuq it-tweġibiet li ngħataw għall-mistoqsijiet tagħhom.

Għaliex, qed jistaqsu, ma ġie investigat l-ebda politiku Malti? Għaliex dawk li kitbet fuqhom DCG, l-ebda wieħed minnhom ma kien tal-inqas mistieden jieħu kafè mal-Kummissarju biex jgħin ftit lill-Pulizija fl-investigazzjoni tagħhom?

Qed jingħad li dawk li eventwalment ġew akkużati bil-qtil kienu avżati li l-Pulizija kienu ser jagħmlu raid fit-tinda tal-patata. Min qalilhom?

Dawn huma kollha affarijiet li jixħtu dellijiet kbar fuq il-proċess tal-ġustizzja fil-pajjiż.

L-istituzzjonijiet huma dgħajfa ħafna u m’għandna l-ebda kenn fihom.

Jum 92 : lil hinn mill-bukketti tal-fjuri

 

Tlett xhur ilu nqatlet Daphne Caruana Galizia.

Wara li għaddew 92 ġurnata, inġabru, u bdew għaddejjin proċeduri kriminali dawk akkużati li qatluha, iżda min bagħthom għadu jiġri mas-saqajn.

Ħadd ma jaf x’qed jagħmlu bħalissa l-Pulizija, għax il-pulizija mhux ser toqgħod ixxandar mal-erbat irjieħ dak li tkun qed tagħmel. Tagħmel sewwa jekk għada qed tinvestiga fis-skiet u bla daqq tat-trombi. Kulħadd jifhem li investigazzjoni serja tieħu ż-żmien u ma hemm l-ebda garanzija li din tista’ tasal għall-konklużjoni li lkoll bla dubju nixtiequ.

Diġa tħabbru ħafna dettalji dwar il-każ, fosthom li kien ilu jiġi ppjanat ta’ l-inqas xahrejn, kif ukoll l-iżbalji li saru u li kienu strumentali biex il-Pulizija Maltija, mgħejjuna minn investigaturi barranin, waslu għall-ewwel konklużjonijiet.

Iktar ma jgħaddi żmien iktar jikbru d-diffikultajiet biex il-kaz jissolva kompletament. Mhux biss għadu mhux magħruf min ordna l-qtil, imma l-anqas għadu m’hu magħruf il-motiv wara l-qtil, l-għaliex il-qtil ġie kkummissjonat.

Illum jitqegħdu bosta bukketti ta’ fjuri li jiżdiedu mal-bosta kliem ta’ tifħir li ntqal u għadu qed jingħad. Ħafna minna illum jieqfu ftit mumenti u jagħmlu riflessjonijiet dwar l-għaliex pajjiżna wasal sa hawn.

It-tweġiba inevitabbli tinstab fi frażi waħda: l-egħruq fondi tal-intolleranza.

Open a bottle of wine baby!

The developments over the past week in the investigation into the assassination of Daphne Caruana Galizia in Bidnija have been substantial.

At this point in time, it appears that, as a result of the Malta Police having been assisted by more experienced investigators, they have possibly started mastering the technological divide which, until fairly recently seemed unbridgeable. Searches, arrests and arraignments have followed in quick succession. Other hitherto unsolved crimes involving bombs in the past few months may now possibly be on the verge of being solved too.

The systematic and detailed leaks to both local and foreign news outlets are apparently a celebration of this new technological mastery, although those master-minding the leaks may also be sending messages to those who can still spill the beans as to who commissioned the assassination.

“Open a bottle of wine, baby!” Feeding the press with titbits as to the celebratory bottle of wine requested by the same fingers which triggered the bomb through an SMS may send shivers down our spines as to the carefully planned assassination and the ruthlessness of the perpetrators. This precise detail was then followed by the information that the mobile phone used to trigger the bomb had exceeded its credit limit which led to a hitch, as a result of which an essential €5 mobile phone credit top-up served to unmistakeably identify the fingers operating the deadly phone.

A detailed examination of the conversations and messages exchanged through the deadly mobile phone has, most probably, revealed much more information which -rightly- has not been yet released. Even this information may be ultra-sensitive, at this point in time, in the exercise to identify those who may have commissioned this murder.

Undoubtedly, police investigators will have identified a multitude of possibilities, some realistic, others far-fetched, as to who could have had an interest in commissioning the assassination. Some of those arrested during the large-scale police operation in Marsa, Ħaż-Żebbuġ and St.Paul’s Bay earlier this week, are, in fact, indicative of this investigative line of action, even though seven of those arrested were eventually released on police bail.

Among the leaked information is the fact that the assassination has been planned for two months, meaning that the police have detailed information of electronic messages and phone conversations spanning this long. This undoubtedly will be the source of much more information that has so far been withheld. It could point towards other leads of crucial importance to understanding the still unknown elements of the plot.

The leaks are undoubtedly sourced at the nerve centre of the investigation. They reveal  uneasiness on the part of the police with regard to the local media, opting to leak substantial information to the foreign press. The local media also demands information, even though at times to make this available would clearly be counterproductive. The police would do well to invest substantially in some professional training on how to deal with the press. The top brass of the police force (starting with Commissioner Cutajar) clearly need it.

Notwithstanding these developments, basic misgivings about the investigation itself remain. The bad move on the part of Magistrate Consuelo Scerri-Herrera, who rushed head-on into the investigation when it was ethical to have stayed miles away from it, as well as the involvement of Deputy Commissioner Silvio Valletta, are serious mistakes that should have been avoided. The results obtained so far in the investigation do not cancel out these basic mistakes.

The arraignments made so far are a step forward. The case will, however, only be solved when those commissioning the assassination, as well as their motives, are known. It is only then that Daphne will rest in peace.

published in The Malta Independent on Sunday – 10 December 2017

Iftaħli flixkun inbid, qalbi!

L-iżviluppi matul il-ġimgħa li għaddiet fl-investigazzjoni dwar il-qtil ta’ Daphne Caruana Galizia fil-Bidnija kienu sostanzjali. Jidher li l-Pulizija Maltija, bħala riżultat tal-għajnuna li rċieviet minn forzi tal-ordni ta’ pajjiżi oħra b’esperjenza vasta f’dawn it-tip ta’ investigazzjonijiet bdew jitgħallmu jużaw it-teknoloġija biex isolvu l-investigazzjonijiet. Bħala riżultat ta’ dan segwew tfittxijiet u arresti, u tlieta ttellgħu l-Qorti akkużati bil-qtil. Jidher ukoll li każijiet oħra ta’ qtil b’bombi li seħħew fl-aħħar xhur hu possibli ħafna li jissolvew.

L-informazzjoni li ħarġet u għada ħierġa kemm lill-medja lokali kif ukoll lil dik barranija jidher li hi ċelebrazzjoni ta’ dan l-għarfien ġdid: li t-teknoloġija tista’ wara kollox tkun għodda tajba u utli ħafna fl-investigazzjonijiet. Imma jista’ jkun ukoll li l-informazzjoni li ħarġet hi ukoll messaġġ li issa, wara kollox, ftit baqa’ mistur u li min għandu jikxef il-ftit li baqa’ jaqbillu jiċċaqlaq: min ordna l-qtil ta’ Daphne Caruana Galizia?

“Iftaħli flixkun inbid, qalbi!” Li nkunu nafu dwar t-talba għal-flixkun inbid biex jiċċelebra, liema talba saret minn l-istess swaba’ li splodew il-bomba permezz ta’ SMS li ntbagħtet hi aħbar li għandha tqabbadna l-bard għax tikxef il-preparazzjoni u l-kefrija ta’ dawk li ħejjew għal u wettqu dan il-qtil. Dan id-dettal hu segwit minn informazzjoni li t-telefon ċellulari li ntuża biex tkun sploduta l-bomba kien wasal fil-limitu, għax ma kienx baqa’ flus u li kien meħtieġ top-up ta’ €5. Kien bħala riżultat ta’ dan it-top-up li ġew identifikati l-identità tas-swaba’ qerrieda.

Bla dubju, eżami dettaljat tal-messaġġi u l-konverzazzjonijiet li seħħew bil-mobile qerriedi żvelaw ħafna iktar minn hekk. B’mod għaqli dan s’issa għadu mhux magħruf mill-pubbliku. Għax jista’ jkun li din l-informazzjoni għad tista’ twassal f’ras il-għajn: min ordna l-qtil. Dawk li qed imexxu l-investigazzjoni mingħajr dubju jkunu identifikaw il-parti l-kbira tal-possibilitajiet dwar x’seta ġara: uħud rejalistiċi, oħrajn xi ftit jew wisq inġebbda: possibilitajiet dwar min seta’ kellu interess li jordna dan il-qtil. Uħud minn dawk arrestati bħala riżultat tal-operazzjoni tal-Pulizija li seħħet iktar kmieni din il-ġimgħa fil-Marsa, Ħaż-Żebbuġ u San Pawl il-Baħar jindikaw x’qed jaħsbu l-investgaturi dwar dawn il-possibilitajiet.

Fost l-informazzjoni li ħarġet hemm li l-qtil kien ilu jkun ippjanat għal madwar xahrejn. Dan ifisser li fl-investigazzjoni tagħhom il-pulizija eżaminaw tal-inqas informazzjoni elettronika li tmur lura tal-inqas xahrejn. Dan ifisser ukoll li hemm ħafna iktar informazzjoni li s’issa għad ma ħarġitx għax probabbilment m’huwiex għaqli li din toħroġ minħabba li titfa dawl fuq dak li s’issa għadu mhux magħruf: min ordna l-qtil?

L-informazzjoni bla ebda dubju ħarġet minn ras il-għajn. Imma turi Pulizija li m’hiex kunfidenti mal-istampa lokali u li għaldaqstant għażlet dik barranija biex tiżvela dak li riedet. Anke l-istampa lokali għandha dritt li tkun infurmata avolja kulltant din l-informazzjoni tista’ tkun kontro-produċenti. Jidher ċar li l-Pulizija għandha bżonn tinvesti f’taħriġ professjonali fuq l-imġieba tagħha mal-istampa. Taħrig li għandu jingħata lill-fizzjali kollha: jistgħu jibdew mill-Kummissarju Cutajar.

Minkejja dak kollu li seħħ matul din il-ġimgħa, l-kritika inizzjali dwar l-investigazzjoni tibqa’ waħda valida. Il-pass żbaljat tal-Maġistrat Consuelo Scerri-Herrera li telqet tiġri lejn il-Bidnija biex tibda l-investigazzjoni meta kien ovvju li għal raġunijiet etiċi kellha tibqa’ l-bogħod kemm jista’ jkun jibqa’ żball li jeħtieġ li jkun indirizzat biex ma jkunx hemm ripetizzjoni tiegħu. Anke l-involviment tad-Deputat Kummissarju Silvio Valletta kien żball oħxon li ma jitħassax bir-riżultati miksuba s’issa.

Il-konkluzjonijiet s’issa tal-investigazzjoni huma pass il-quddiem. Il-kaz imma ikun riżolt biss meta jkun magħruf min ordna l-qtil kif ukoll il-motivi tiegħu jew tagħha. Huwa biss f’dak il-ħin li Daphne tkun tista’ tistrieħ fis-sliem.

 

Ippubblikat f’Illum – 10 ta’ Diċembru 2017