Mill-Manifest Elettorali ta’ AD dwar bidliet fil-Kostituzzjoni: (2) Riforma Elettorali

(2)    Riforma Elettorali

Malta għandu jkollha sistema elettorali bbażata fuq rappreżentanza proporzjonali assoluta bejn siġġijiet u voti mitfugħa f’elezzjoni, ikkoreġġuti b’għatba ta’ 2.5%. Dan il-prinċipju jista’ jinkiseb bl-istess Sistema ta’ Vot Trasferibbli filwaqt li jitwessa’ l-mekkaniżmu Kostituzzjonali attwali li jiżgura proporzjonalità stretta bejn l-għadd ta’ voti u siġġijiet u li jimxi minn wieħed li japplika biss f’każijiet fejn żewġ partiti biss jiġu eletti fil-Parlament, għal wieħed li japplika għall-partiti kollha li jaqbżu l-għatba nazzjonali ta’ 2.5% tal-ewwel għadd tal-voti. Malta għalhekk għandha jkollha għatba doppja, bi kwota distrettwali ta’ 16.6% li tippermetti li individwu jiġi elett minn distrett, u kwota nazzjonali b’għatba ekwivalenti ghal żewġ kwoti biex partit politiku jiġi rrappreżentat fil-Parlament.

………………………….

Id-dritt li ċ-ċittadini jikkontestaw l-elezzjonijiet lokali, ġenerali u Ewropej għandu jkun inkorporat fil-Kostituzzjoni u mhux imħolli f’idejn il-konvenjenza tal-gvern tal-ġurnata.

(siltiet mill-Kapitlu Numru 6 tal-Programm Elettorali ta’ Alternattiva Demokratika)

Is-7 ta’ Ġunju : biex insarfu r-rieda popolari

Illum is-7 ta’ Ġunju infakkru ġrajja meta l-poplu Malti qam. Għolla rasu u l-irvell li irriżulta wassal għal l-ewwel Parlament Malti.

L-Ispeaker Michael Frendo din is-sena għamel diskors meqjus dwar il-ħtieġa li l-Parlament jiffunzjona dejjem aħjar.  Michael, kif ilni nafu għal iktar minn 50 sena, ħa bosta inizzjattivi kemm ilu Speaker. Bħala riżultat tagħhom il-Parlament mexa aħjar. Kien hemm xi okkazjonijiet fejn iffaċċa diffikultajiet bħal meta kien hemm min sema’ lil Justyn Caruana d-Deputata Għawdxija tivvota mod u mhux ieħor. Inċident li wassal biex ġie mwaqqaf il-proċess tal-Kumitat Magħżul tal-Kamra li kien qed jiddiskuti bosta materji ta’ importanza. Materji li ilhom jiġu diskussi imma jidher li qajla hemm rieda li jiċċaqalqu. Għalhekk, naħseb jien, ma l-iċken opportunita ikun hemm min iħoss l-utilita’ li jwaqqaf il-proċess.

Is-7 ta’ Ġunju 1919 wassal lil missierietna biex fl-1921 eleġġew l-ewwel Parlament Malti. Kien Parlament b’ħafna kuluri:  4  partiti fl-Assemblea Leġislattiva u 3 minnhom fis-Senat.

Iż-żminijiet inbidlu u l-Partiti tal-lum li qegħdin fil-Parlament għad għandhom ħeġġa kbira għar-rappresentanza  proporzjonali, imma din il-ħeġġa qegħda hemm biss sakemm teffettwa lilhom. Għalhekk bagħbsu l-Kostituzzjoni diversi drabi biex jassiguraw li bejniethom jaqsmu. Imma qagħdu attenti li jieqfu hemm.

Infakkar għal darba oħra li Alternattiva Demokratika ippreżentat proposta quddiem il-Kumitat Magħżul tal-Kamra biex dak li ġie mbagħbas fil-Kostituzzjoni mill-PN u l-PL flimkien, jissewwa’ . Biex ir-rappresentanza proporzjonali tkun tapplika għal kulħadd. Mhux għalihom biss.

F’Malta għandna sistema elettorali li f’Marzu 2008 ippremjat lill-PN b’siġġu parlamentari extra għall-1580 vot li l-PN kellu iktar mill-PL fl-aħħar elezzjoni ġenerali. Imma l-istess sistema elettorali tagħmilha possibli li t-3810 vot li ġiebet Alternattiva Demokratika ma jkunux rappreżentati.

Dan il-PN u l-PL ma jridux jibdluh.

Il-proporzjonalita’ m’għandhiex tibqa’ privileġġ tal-PN u l-PL iżda strument biex tissarraf ir-rieda popolari.

Fuq dan il-blog tista’ tara ukoll is-segwenti :

17/09/2008 : Electoral reform

21/06/2010 :  AD protests in Court on discriminatory electoral legislation

23/06/2010 : AD discusses electoral reform with Speaker Michael Frendo