Alan Deidun għoġbu jwieġeb l-artikli tiegħi tal-Ħadd li għadda fuq l-Independent on Sunday u fuq l-Illum. Wieħed minnhom , dak fuq l-Independent on Sunday huwa riprodott fuq dan il-blog. L-artiklu tiegħu hu intitolat ‘C’ is for Cacopardo, not for collegiality ………
Fl-artikli tiegħi jiena ġbidt l-attenzjoni li l-Professur Alan Deidun għandu konflitt ta’ interess meta filwaqt li huwa membru tal-Bord tal-ERA, r-regolatur ambjentali, fl-istess ħin kien involut fit-tfassil ta’ wieħed mir-rapporti tekniċi li jiffurmaw l-EIA dwar il-propost inċineratur fil-Magħtab.
It-tweġiba tiegħu dehret illum fl-Independent on Sunday u ser inwieġbu fl-qosor illum. Imma għandu jisma’ iktar dettalji dwar l-EIA tal-inċineratur matul il-ġimgħa u dan billi nhar l-Erbgħa li ġej 21 t’Ottubru jagħlaq il-perjodu ta’ konsultazzjoni pubblika dwar l-EIA fuq il-proposta ta’ żvilupp ta’ inċineratur. Sadakinnhar ser nippreżenta bil-miktub lill-ERA, bħala parti minn dan il-proċess ta’ konsultazzjoni pubblika numru ta’ osservazzjonijiet dwar l-istess EIA, inkluż dwar l-istess Professur Alan Deidun.
Ser nillimita ruħi għall-argumenti u għalissa ser ninjora l-insulti u l-paroli vojt tal-Professur.
Deidun mhux l-uniku wieħed li waqt li jifforma parti minn awtorità regolatorja jissottometti studji għall-konsiderazzjoni tal-awtorità li jifforma parti minnha. Qablu kellna oħrajn. Din hi prattika li mhix aċċettabbli u għandha bżonn tieqaf. Ilha tiġi ikkritikata u hemm bżonn tieqaf malajr kemm jista’ jkun.
Immaterjalment minn kemm jagħmel rapporti: jekk hux wieħed jew mija ma tagħmilx differenza. Deidun u oħrajn għandhom bżonn li jifhmu illi meta taċċetta ħatra fuq awtorità regolatorja din l-aċċettazzjoni inevitabilment teffettwa l-ħidma professjonali tiegħek. L-impatt, in parti jiddependi mill-integrità tiegħek.
Tajjeb li nżommu quddiem għajnejna li fil-każ ta’ Manoel Island riċentement, f’Ġunju 2020, ġie annullat permess ta’ żvilupp minħabba li wieħed minn dawk involuti fit-tfassil tal-EIA kellu konflitt ta’ interess.
Fit-tweġiba tiegħu Deidun ħass li kellu jagħmel referenza għal xogħol professjonali tiegħi ma diversi Kunsilli Lokali. Konvenjentement Deidun nesa’ li jiena ma niffurma parti minn l-ebda korp regolatorju u għaldaqstant il-ħidma professjonali tiegħi mhiex limitata bħal tiegħu.
Fl-aħħarnett Deidun jgħid li ma jmissnix ikkritikajtu għax hu ambjentalist bħali. Jibqa’ l-fatt li Deidun mexa fuq il-passi ta’ dawk li mxew ħażin. Mingħajr ma nnaqqaslu l-mertu dwar fejn ħadem tajjeb, daqstant ieħor jixraqlu l-kritika iebsa, limitata fuq dan il-kaz.
Sfortunatament l-attitudni tal-Professur Deidun, u ta’ oħrajn li aġixxew bħalu, tagħmel ħsara kbira lill-istituzzjonijiet regolatorji. Jekk iwarrab jew jitwarrab minn fuq il-Bord tal-ERA, aħjar għal kulħadd.
Blog ta' Carmel Cacopardo 
Kemm hu konvenjenti Carmel li tapplika r-riga li hi komda għalik biss……tgħorkok għajnejk għax xi ħadd għandu post f’enti regolatorju, imma mhux li mexxi partit politiku…..x’ipokrezija manja! Bħal dak li qallu l-politiku jista jagħmel konsulenza privata…..xi travu għandek f’għajnejk u li qiegħed tagħzel li tinjora! Barra minn hekk, qiegħed turi li m’għandekx fiduċja fil-professjonalita’ tan-nies, l-istess nies li taspira għal vot tagħhom…insomma, kontradizzjoni waħda wara l-oħra…..mhux ser nkompli naħli ħin miegħek għax donnok għandek ħafna minn dan x’taħli!
Qed nippubblika dak li qed jgħid Alan Deidun, minkejja li wara li qrajtha din tikkwalifika għal trattament wieħed “trash”.
Deidun qed jgħid hekk: “Bħal dak li qallu l-politiku jista jagħmel konsulenza privata…..xi travu għandek f’għajnejk u li qiegħed tagħzel li tinjora!”
Minn fejn ġiebha din?
L-anqas li kieku nitħallas talli immexxi partit politku ma jirriżulta dak li qed jgħid Alan Deidun, aħseb u ara meta tqis li xogħoli hu kollu volontarju!
Jiena qiegħed nagħmel ix-xogħol professjonali tiegħi meta nassisti persuni u Kunsilli Lokali f’materji li għandhom x’jaqsmu mal-ippjanar tal-użu tal-art jew tal-ambjent, inkluż li f’isimhom nagħmel sottomissjonijiet li jkunu meħtieġa. Jiena mhux membru tal-ebda awtorità regolatorja u għaldaqstant m’hemmx xi jżommni milli nagħmel dan.
Ma nafx minnfejn iġibhom dawn l-ideat il-professur!