Il-President George Vella u l-ittra ta’ riżenja ta’ Joseph Muscat

The Shift News qed jirrappurtaw li talbu r-rilaxx tal-ittra ta’ riżenja li Joseph Muscat, dakinnhar Prim Ministru, għadda lill-President tar-Repubblika. It-talba saret taħt il-Freedom of Information Act.

Il-President tar-Repubblika ċaħad it-talba u spjega għaliex kien qed jagħmel hekk. It-tweġiba tiegħu hi inkwetanti iktar miċ-ċaħda innifisha.

The Shift News qed jgħidu li t-tweġiba li waslet għandhom mingħand il-President tar-Repubblika kienet tgħid li mhux ġustifikat il-pubblikazzjoni tal-ittra ta’ riżenja għax kieku dan kellu jsir il-ħsara li issir tiżboq bil-bosta il-benefiċċju tal-pubblikazzjoni tal-informazzjoni.

Issa jiena naħseb li ħadd, għajr min kitibha u min irċieviha, ma jaf x’fiha l-ittra. Imma t-tweġiba tal-President tar-Repubblika tagħti lil wieħed x’jifhem li l-ittra fiha spjegazzjoni dettaljata dwar x’wassal għar-riżenja li tmur lil hinn minn dak li nafu diġa.

Jiena għandi kull rispett lejn il-President tar-Repubblika imma naħseb li hu żbaljat. Hu fl-interess pubbliku li l-ittra tkun ippubblikata bla dewmien. Mhux kompitu tal-President tar-Repubblika li jiċċensura informazzjoni ta’ importanza politika.

Estradizzjoni għal Konrad Mizzi?

L-istejjer dwar Konrad Mizzi huma bla limitu: sa mill-ewwel mument li daħal fil-Parliament u l-Kabinett. It-twaqqif tat-trust fi New Zealand u r-registrazzjoni ta’ kumpanija fil-Panama komplew jitfgħu ftit dawl fuq kif jaħdem dan il-bniedem.

Bil-pubblikazzjoni tal-Panama Papers għajnejn ħafna tbexxqu u bdew jistaqsu. Id-dubji għad mhumiex imwieġba anzi inħolqu dubji ġodda bi stejjer ġodda.

Hu fatt li Konrad Mizzi mhux Malta. Ilu nieqes minn Marzu u l-anqas Parlament ma mar. Iċ-ċertifikati mediċi f’dawn iċ-ċirkustanzi ftit li xejn jitwemmnu.

Jason Azzopardi qed jagħmel allegazzjonijiet serji ħafna. Qed jgħid li Mizzi hu maħrub għax jibża’ li jkun investigat mill-kummissarju l-ġdid. Din hi possibiltà realistika u tweġiba, fiċ-ċirkustanzi, ftit hemm min jista’ jagħtiha ħlief Konrad Mizzi nnifsu u possibilment Robert Abela.

Meta Konrad Mizzi tneħħa mill-Kabinett għax ġie mġiegħel jirriżenja kien pass tajjeb. Li ma ntagħżilx bħala Ministru minn Robert Abela meta dan għażel il-Kabinett ġdid tiegħu kien pass ieħor il-quddiem. Issa jonqos pass ieħor: li jwieġeb għal għemilu meta, possibilment, flimkien ma oħrajn jkun imsejjaħ jagħmel hekk.

Sakemm jibqa’ maħrub fir-Renju Unit dan mhux possibli li jsir. Ovvjament jekk il-Kummissarju l-ġdid jirriżultalu li hemm il-provi dejjem hemm il-possibilità ta’ talba ta’ estradizzjoni. Mir-Renju Unit s’intendi għax mill-Montenegro ma naħsibx li jkun possibli!