Il-bieraħ attendejt għal laqgħa tar-residenti ta’ Ħaż-Żebbuġ li issejħet biex ir-residenti jiddiskutu l-impatti tat-Torri tat-Toyota li dwaru saret applikazzjoni ta’ żvilupp (outline) riċentement.
Ir-residenti huma inkwetati u bir-raġun, għax dan it-torri mhux postu hemm.
Tajjeb li ngħid mill-ewwel li imkien fil-policies tal-Awtorità tal-Ippjanar ma hemm indikat li jista’ jinbena dan it-tip ta’ bini ġo Ħaż-Żebbuġ.
L-impatti fuq in-nies huma bosta.
L-iktar waħda ovvja hi li ser ikerraħ l-iskyline ta’ Ħaż-Żebbuġ. Imma ser jiġġenera iktar traffiku f’post li għax hu żviluppat kważi kollu għar-residenzi ma jiflaħ dan it-traffiku kollu.
Ser jiġġenera iktar dellijiet fuqil-propjetajiet tal-viċin, li, fejn għandhom il-pannelli fotovoltajċi jew solar water heaters, naħseb li jistgħu jaħsbu biex jarmuhom!
Issa jidher li waslet id-daqqa ta’ Ħaż-Żebbuġ. Ir-residenti għandhom bżonn l-għajnuna u l-appoġġ. Ngħinuhom u nappoġġawhom kif appoġġajna lil kull min kellu bżonn l-għajnuna fil-ġlieda kontinwa kontra l-iżvilupp bla rażan, li ma jirrispetta lil ħadd.
Blog ta' Carmel Cacopardo 