Li tipprova titgħallem dejjem tajjeb. Opportunitá tajba għat-tagħlim, għaldaqstant m’għandna nitilfuha qatt.
Ġie imħabbar f’dawn il-ġranet li l-assoċjazzjoni tal-iżviluppaturi Maltin (MDA) iffirmat ftehim ta’ kooperazzjoni mal-ANCE ta’ Ragusa. L-ittri ANCE jfissru Associazione Nazionale Costruttori Edili – l-Assoċjazzjoni Nazzjonali ta’ dawk li jibnu l-bini residenzjali.
Dan il-ftehim ta’ kooperazzjoni, qalulna, kien meħtieġ għax hemm ħafna x’nitgħallmu mingħand xulxin: bejn żviluppaturi Maltin u Sqallin, jiġifieri. Bla dubju hemm ħafna nies tas-sengħa fi Sqallija, inkluż fis-snajja tal-bini. Il-presenza tiżdied tagħhom f’Malta tista’ tgħin lill-Maltin (fl-istess snajja) biex itejbu x-xogħol tagħhom. Imma tajjeb li nifhmu ukoll li anke f’Malta għandna ħafna mustaċċuni fis-snajja konnessi mal-bini.
Ikun interessanti liema huma dawk is-snajja u kapaċitajiet li ser issir emfasi dwarhom.
Bla dubju wieħed mill-oqsma li jista’ jkun hemm min jitħajjar jitgħallem ftit ieħor huwa dwar l-appalti pubbliċi (dwar it-tenders pubbliċi jiġifieri). Nifhem li jistgħu jitħajru jiġu xi professuri minn Sqallija, minn dawk li għandhom esperjenza kbira. Ma nafx jekk jiġux minn Ragusa inkella minn xi parti oħra ta’ Sqallija. Dan hu qasam li minkejja l-“iżviluppi” kbar f’Malta, għadna apprentisti ħdejn l-iSqallin! Imma, ovvjament, il-possibilta tat-tagħlim m’għandhiex tkun skartata.
Ikun interessanti x’sehem ser ikollhom l-uffiċjali pubbliċi u l-politiċi li ħadu sehem fil-laqgħat bejn l-iżviluppaturi Maltin u dawk Sqallin. Probabbilment li l-għatx tagħhom għat-tagħlim hu kbir wisq.
Blog ta' Carmel Cacopardo 