L-amnestija imħabbra l-ġimgħa l-oħra mis-Segretarju Parlamentari Deborah Schembri u l-Awtorità tal-Ippjanar hu insult goff lill-poplu Malti. Għax bl-amnestija ser ikun possibli li binjiet illegali jitnaddfu mill-illegalità tagħhom u jingħataw permess ta’ żvilupp.
Din l-amnestija mhiex limitata għal irregolaritajiet żgħar fil-bini. Li kienet hekk wieħed kien jifhem. Hi amnestija miftuħa għal kull irregolarità sakemm din l-irregolarità tkun fiż-żona tal-iżvilupp kif ukoll sakemm din ma tkunx ta’ ħsara lil terzi jew lil madwar (imsejħa injury to amenity). Ir-regolamenti ppubblikati ma jeskludux irregolaritajiet fiż-żona ta’ konservazzjoni urbana jew irregolaritajiet li jkunu saru f’bini skedat. Jiġifieri anke dwar dawn l-irregolaritajiet jista’ jinħareġ permess ta’ żvilupp!
Hemm ukoll element ta’ segretezza konness mal-applikazzjonijiet għal amnestija. Dan ser jagħmel l-iskrutinju pubbliku iktar diffiċli. L-anqas ma jissemma d-dritt tal-oggezzjoni li (skond il-liġi) jista’ jsir minn terzi.
Din l-amnestija hi insult lil min għażel li jimxi sewwa u josserva l-liġi u jimxi mal-kundizzjonijiet tal-permess ta’ żvilupp. Din mhiex l-ewwel amnestija li ngħatat u minkejja dak kollu li qed jingħad l-anqas ma hi ser tkun l-aħħar waħda.
L-amnestija qed tingħata minħabba l-kwantità ta’ irregolaritajiet fil-bini fil-pajjiż kif rifless fin-numru kbir ta’ ordnijiet ta’ infurzar li baqgħu pendenti tul is-snin. Numru li kompla jikber, sena wara l-oħra, għax l-awtoritajiet ma kienux kapaċi li jinfurzaw il-liġi quddiem min kien lest li jisfida. Mela issa min sfida u għamel ta’ rasu qed jgħidulu: issa ħallas multa u qiesu qatt ma kien xejn!
L-amnestija qed tippremja lil min abbuża u fl-istess ħin qed tikkastiga lil min mexa sewwa. Hi fuq kollox dikjarazzjoni ta’ falliment fl-amministrazzjoni pubblika.
Ir-Regolamenti dwar ir-Regolarizzazzjoni ta’ Żvilupp Eżistenti li permezz tagħhom qed tiddaħħal l-amnestija fihom ħafna difetti, fil-fehma tiegħi probabbilment intenzjonati. Difetti li jikkontrastaw ma dak li tipprovdi l-liġi prinċipali. Minħabba dawn id-difetti, l-validità legali ta’ dawn ir-regolamenti tista’ tkun attakkata fil-Qrati. Dawn id-difetti ser joħolqu inġustizzji u l-possibiltà ta’ abbuż. Għandhom ikunu ta’ mistħija għal kull min kellu x’jaqsam magħhom.
Blog ta' Carmel Cacopardo 