Marlene Farrugia u l-mozzjoni Parlamentari numru 326

Huwa tajjeb li Marlene Farrugia qed tinsisti fuq il-mozzjoni ta’ sfiduċja f’Konrad Mizzi li hi ppreżentat lill-Ispeaker tal-Parlament nhar it-18 t’April 2016.

Kif rappurtata fit-Times illum tagħti raġunijiet validi ħafna biex tiġġustifika dan.

Kien għalhekk, daqstant ieħor għaqli li, fuq parir tal-President tar-Repubblika bidlet id-deċiżjoni u mhux ser  tattendi għad-dimostrazzjoni tal-1 ta’ Mejju organizzata fil-Belt għada mill-Partit Laburista.

Għax kif tista’ tifforma parti minn dimostrazzjoni immexxija minn persuni li (ta’ l-inqas illum) ma jħaddnux il-valuri li hi tħaddan?

Hemm bżonn iktar ħsieb qabel ma jittieħdu d-deċiżjonijiet. L-impulsività tista’ tkun ta’ ħsara kbira għax kawża tagħha, mingħajr biżżejjed ħsieb, jittieħdu deċiżjonijiet żbaljati li mhux dejjem ikun possibli illi jissewwew.

Wara 60 jum jaħsibha, ddeċieda …………. li ma jiddeċiedi xejn

 

Mela Joseph Muscat iddeċieda wara 60 jum jaħsibha.

Iddeċieda li jħalli kollox kif inhu.

Keith il-Kasco Schembri għadu hemm!

Konrad Mizzi ma baqax Ministru għall-Enerġija u s-Saħħa. Sar Ministru bla portafoll ibbażat f’Kastilja. Huwa jwettaq il-proġetti li jassenjalu l-Prim Ministru. L-ewwel proġett : il-power station. X’inbidel? Mhux dak li kien qed jagħmel?

Joseph iddeċieda li ma jiddeċiedi xejn. Imma iddeċieda!

Joseph Muscat jirriċikla lil Konrad Mizzi u lil Manwel Mallia

 

Bir-reshuffle tal-Kabinett imħabbra illum Joseph Muscat qed jirriċikla lil Manwel Mallia u lil Konrad Mizzi.

Konrad Mizzi taparsi ittieħidlu d-dikasteru u baqa’ Ministru bla portafoll fl-uffiċċju tal-Prim Ministr fejn ser jibqa’ respnsabbli mill-proġetti tal-Enerġija.

Manwel Mallia li qatt ma kellu l-kuraġġ li jirriżenja u jerfa’ r-responsabbiltà politika reġa’ daħal fil-Kabinett bħala Minsitru tal-Kompetittività. Fil-fatt Mallia kien tkeċċa minn Ministru għax minkejja li ngħata ċans baqa’ jirrifjuta li jirreżenja.

Il-Kasco jibqa’ hemm.

Dak li għamel Joseph mhux biżżejjed. Konrad Mizzi u Keith Schembri għandhom jirreżenjaw.

 

Il-problema ta’ Ira Losco

 

L-Independent tal-bieraħ irrappurtat illi wara li qamet il-kontroversja dwar il-billboards hawn min jidher li ħareġ b’ideja oħra li tista’ toħloq polemika mill-kbar : billboards fuq il-baħar.

Jidher, skond l-Independent dejjem, illi diġa bdew jirreklamaw dawn il-billboard permezz ta’ newsletter li qedf tiċċirkula għand “mijiet ta’kumpaniji” .

Transport Malta meta ikkuntattjata mill-Independent qalu li identifikaw 45 sit fil-bajjiet fejn jistgħu jitqegħdu dawn il-billboards.

Problema kbira għal Ira Losco din li hi u timxi fuq l-ilma trid toqgħod attenta li ma taħbatx riġlejha ma xi wieħed minn dawn il-billboards.

Fir-Raħal Ġdid : il-kwalità tal-ħajja tar-residenti

Tħabbar dak li ilu ftit magħruf ( 1 u 2). Ċjoe li s-sit tal-Marsa Shipbuilding ser ikun żviluppat f’ċentru għas-servizzi lill-oil rigs li qed jirreferu għalih bħala l-Mediterranean Maritime Hub.

Qed jingħad li dan ser ifisser investiment ta’ €55 miljun u li ser joħloq 150 impieg ta’ kwalità fil-qasam tal-industrija taż-żejt u tal-gass.

Ħadd ma hu ser jargumenta kontra l-ħolqien tal-ġid, imma tajjeb li anke f’dan l-istadju nemfasizza li s-sit magħżul hu viċin ħafna ta’ żona residenzjali – il-parti t’isfel tar-Raħal Ġdid. L-impatt fuq ir-residenti għandu jkun indirizzat minn issa meta d-dettalji tal-proġett għadhom fl-istadju ta’ ippjanar.

Dan ser jinkludi  prinċipalment storbju u tniġġiż tal-arja imma ukoll dwar kif ser ikun immaniġjat l-iskart tossiku li bla dubju ser joriġina mix-xogħolijiet ippjanati.

Għax il-kwalità tal-ħajja tar-residenti tar-Raħal Ġdid hi importanti daqs il-ħolqien tal-impiegi. Għandna diġa esperjenza qarsa fl-Isla u Birżebbuġa. Nittama li minn din l-esperjenza tgħallimna bħala pajjiż biex l-affarijiet isiru aħjar.

Chernobyl : x’tgħallimna wara 30 sena?

Tletin sena ilu bħal għada s-26 t’April 1986 kien sploda r-reattur nuklejari ta’ Chernobyl. X’tgħallimna?

L-isplużjoni ikkontaminat 40% tat-teritorju Ewropew. Mhux bl-istess mod.

Fi Sqallija, per eżempju, hekk kif sar magħruf x’kien ġara [għax ma kienx magħruf mill-ewwel] in-nies kienu ngħataw il-parir biex jaħslu sewwa l-ħxejjex u l-frott. Dan minħabba li bl-effett tar-rih kien hemm il-biża’ li materjal radjuattiv seta jiddepożita ruħu fuq il-ħxejjex u l–frott.

F’Malta ma niftakarx li kien hawn xi twissija ta’ dik ix-xorta. Kien qiesu ma ġara xejn.

Illum wara tletin sena nistaqsu jekk il-pajjiż huwiex mgħammar biex jinduna jekk inċident nuklejari li jkun seħħ, il-bogħod jew fil-viċin huwiex ta’ theddida għal saħħitna. X’miżuri ittieħdu? Tgħallimna xi ħaġa wara tletin sena?

Fis-snin li ġejjin ser ikollna diversi impjanti nuklejari viċin tagħna: fit-Tunisia, fl-Alġerija u fl-Eġittu b’mod partikolari. Possibilment ukoll fil-Marokk. Jidher li ħlisna mill-periklu wara l-bieb għax il-ftehim bejn il-Libja u Franza dwar impjant nuklejari biex jikkonverti l-ilma baħar f’ilma tajjeb għax-xorb ma laħaqx implimentat. Konna iffurtunati dwar dan kieku ma nafx x’seta inqala’ waqt il-gwerra ċivili li issa ilha ftit għaddejja fil-Libja.

Dwar il-ħtieġa li l-Gvern Malti jqajjem il-kwistjoni mal-Gvern Libjan kienet Alternattiva Demokratika biss li kienet tkellmet għax kemm il-Partit Nazzjonalista kif ukoll il-Partit Laburista kienu waqgħu fil-muta.

Kellna biss gazzetta Taljana (Il Sole 24 Ore: artiklu ta’ Federico Rendina intitolat Il Governo rilancia sull’atomo) li kienet qalet li l-Prim Ministru Taljan Silvio Berlusconi kien iddiskuta l-kostruzzjoni ta’ impjant nuklejari f’Malta mal-Prim Ministru Gonzi. Il-Gvern Malti kien ċaħad li qatt saret id-diskussjoni.

Nittama li wara tletin sena tgħallimna xi ħaga. Tgħid?

Il-bidla fil-klima hi magħna

Nhar il-Ġimgħa li għaddiet rappreżentanti ta’ iktar minn 170 pajjiż, Malta inkluża, inġabru fil-kwartieri ġenerali tal-Ġnus Magħquda fi New York biex jiffirmaw il-ftehim dwar il-klima li intlaħaq fi tmiem is-sena ġewwa Pariġi. Dan il-ftehim għandu jfisser li hemm qbil li kull pajjiż ser jikkontribwixxi lejn soluzzjoni ta’ din il-problema.

Hemm qbil biex jittieħdu l-passi kollha meħtieġa ħalli t-temperatura globali ma togħliex iktar minn bejn 1.5^oC  u 2^oC fuq it-temperatura globali, kif din kienet fil-bidu tal-perjodu industrijali. Biex dan isir jeħtieġ li jonqsu l-emissjonijiet li qed joriġinaw mill-attivitajiet tal-bniedem u li qed jinġabru fl-atmosfera u jsaħħnu d-dinja. Ewlieni fost dawn il-gassijiet hemm id-diossidju tal-karbonju (CO₂) li prinċipalment joriġina mill-ħruq ta’ żjut fossili li nużaw biex niġġeneraw l-elettriku kif ukoll mill-petrol u mid-diesel li jintużaw fil-karozzi u inġenji oħra.

Anke Malta ser tfittex li tnaqqas l-impatti tagħha fuq il-klima u dan billi jkollha politika sostenibbli dwar it-trasport, l-enerġija u l-agrikoltura, fost oħrajn. Irridu nindirizzaw l-impatti tal-klima fuq il-bijodiversità, fuq is-saħħa, fuq it-turiżmu, fuq l-ilma, fuq l-agrikoltura kif ukoll fuq l-infrastruttura marittima.

Kemm is-sena li għaddiet kif ukoll l-ewwel tlett xhur ta’ din is-sena kienu fost l-iktar sħan fl-istorja. It-temp qed jitħawwad. L-istaġuni qed jiġġebbdu u jinbidlu. L-istaġuni tax-xita inbidlu għal kollox b’mod li qed issir ħsara kbira lill-agrikultura kif ukoll lill-ħażna tal-ilma li hi tant essenzjali għal kull forma ta’ ħajja. It-temperatura li qed togħla qed iddewweb is-silġ fil-poli u fuq il-muntanji f’diversi partijiet tad-dinja bil-konsegwenza li l-livell tal-baħar qed jogħla u ser jogħla iktar jekk ma’ jittieħdux miżuri biex inrazznu l-għoli tat-temperatura.

Irridu innaqqsu l-impatti tagħna fuq il-klima bħala pajjiż: irridu innaqqsu l-emissjonijiet kif ukoll il-ħela ta’ riżorsi bħall-ilma u l-elettriku. Jeħtieġilna ukoll li narmu inqas skart kif ukoll li nirriċiklaw iktar. Jekk nagħmlu iktar użu mit-trasport pubbliku ukoll nistgħu inkunu ta’ għajnuna kbira biex Malta tnaqqas il-kontribut tagħha għall-bidla fil-klima.

Irridu nifhmu li l-bidla fil-klima qed tħarbat il-ħajja ta’ kulħadd. Qed tipperikola r-riżorsi li s’issa tipprovdilna b’xejn in-natura. Dan ifisser li filwaqt li kulħadd jintlaqat, l-iktar li jintlaqtu huma l-fqar f’kull rokna tad-dinja. Għax it-tibdil fil-klima iżid il-faqar kullimkien. Dan diġa beda jseħħ.

Il-klima hi parti mill-ġid komuni, hi ta’ kulħadd u hi għal kulħadd. Hu għalhekk ukoll li għandna l-obbligu li kull wieħed minna jagħti sehmu biex l-impatti ta’ pajjiżna jonqsu. Il-ftit impatti tagħna huma importanti daqs il-ħafna impatti ta’ ħaddieħor. Mela niftħu ftit għajnejna għall-ħsara kbira li diġa saret u nagħtu sehemna biex din tonqos. Ma baqax żmien x’jintilef għax il-bidla fil-klima diġa qegħda magħna.

Din is-sena bħala riżultat tal-bidla fil-klima ftit li xejn kellna xita f’Malta. L-effett fuqna ser jinħass l-iktar fuq l-agrikultura u l-ħażniet tal-ilma. Pajjiżi oħra sofrew l-għargħar li kaxkar kull ma sab.

Dawn huma l-effetti li qed jidhru u li diġa huma magħna. Nagħmlu l-parti tagħna biex flimkien ma dak li jirnexxielhom jagħmlu pajjiżi oħra innaqqsu dawn l-impatti u b’hekk titjieb il-qagħda ta’ kulħadd. Għax il-klima hi ġid komuni tal-umanità kollha: hi ta’ kulħadd u hi għal kulħadd.

Mario de Marco : bejn mistoqsija u tweġiba

Ftit iktar minn xahar ilu Mario de Marco, f’artiklu ippubblikat fuq l-Indipendent , qal li kuljum jistaqsi lilu nnifsu l-mistoqsija “għalfejn qiegħed fil-politika?” It-tweġiba li jagħti fl-istess artiklu kienet (u bla dubju għadha) is-sens ta’ dover li jħoss lejn dawk kollha li jiltaqa’ magħhom fil-ħajja ta’ kuljum. Hi tweġiba li tpoġġi s-servizz lejn il-komunità u mhux il-gwadann personali bħala l-mira tal-involviment fil-ħajja politika.

Ġimgħa ilu l-Malta Today ippubblikat artiklu ffirmat minn Salvu Balzan li fih qalet li Mario de Marco kellu kuntrattur [Redmap Construction Limited ta’ Pierre Sladden] li kien qed jagħmel xogħol ta’ alterazzjonijiet fi propjetà li hu għandu fin-Naxxar. Dan ix-xogħol, qalet il-Malta Today, ilu sejjer mill-2011 meta Mario de Marco kien Ministru responsabbli (fost affarijiet oħra) għall-MEPA.

Imma, qalet il-Malta Today, kien biss wara li faqqa’ l-iskandlu dwar Adrian Hillman [Managing Director tal-kumpaniji li jippubblikaw il-gazzetti The Times u The Sunday Tmes] li Mario de Marco talab il-kont tax-xogħol mingħand il-kuntrattur.

L-artiklu tal-Malta Today, ippubblikat lejliet id-diskussjoni fuq il-mozzjoni ta’ sfiduċja fil-Gvern jimplika li dan ix-xogħol kien meqjus bħala rigal. Kien artiklu li qanqal dubju serju sakemm Mario de Marco ta’ l-ispjegazzjoni tiegħu [fil-media u fil-Parlament] fis-sens li hu kien ilu jitlob kont tax-xogħol u li l-kuntrattur kien qed iwieġeb illi l-kont jinħareġ hekk kif jitlesta x-xogħol.

Xi ftit dubju ser jibqa’ dejjem, imma l-kredibilità ta’ Mario de Marco, fil-fehma tiegħi ixxaqleb il-miżien favur tiegħu.

Dan il-każ juri kemm huwa żbaljat il-Parlament li jħalli fuq l-ixkaffa l-abbozz ta’ liġi dwar l-Istandards fil-Ħajja Pubblika, abbozz li ilu li ġie ippreżentat u approvat fl-ewwel qari sa mill-14 ta’ Mejju 2014. Meta l-Parlament japprova din il-liġi jkollu l-għodda biex ikunu investigati immedjatament dawn it-tip ta’ stejjer.

Għax filwaqt li tajjeb li tkun ippubblikata l-istorja fil-gazzetti, huwa daqstant ieħor importanti illi jingħataw spjegazzjonijiet minn dawk involuti. Il-mistoqsija trid issir imma għandna dritt ukoll għal risposta ċara. Għax min hu maħmuġ għandu jkun espost, imma min m’huwiex m’għandux ikun imħammeġ għal gwadann politiku tal-mument.

Evarist Bartolo u l-politika tal-iskalora

Bħalissa qed naqraw fil-gazzetti l-argumenti li qed iġib Evarist Bartolo dwar il-posizzjoni taċ-Chairman tal-Awtorità dwar is-Servizzi Finanzjarji (MFSA)  l-Professur Joe Bannister. Varist qed isostni li l-involviment ta’ Bannister f’hedge fund fil-gżejjer Cayman hu konflitt ta’ interess li minħabba fih Bannister ma messux qiegħed jokkupa l-posizzjoni  sensittiva ta’ Chairman tal-MFSA.

Il-Professur Bannister isostni li diġa ta l-ispjegazzjonijiet tiegħu ħames snin ilu, li ġew aċċettati minn Lawrence Gonzi u Joseph Muscat.

L-attakk ta’ Varist Bartolo f’dan il-mument, fl-opinjoni tiegħi, mhux daqstant attakk fuq il-Professur Bannister. Bannister huwa fil-mument l-aħjar medium għal Varist biex jiffoka fuq ir-responsabbiltà kollettiva tal-Kabinett bl-użu ta’ lingwaġġ li bih ma jkunx imdarras il-Laburist.

L-attakk reali hu kontra r-resistenza ta’ sħabu fil-Kabinett biex jiftħu għajnejhom dwar Konrad Mizzi u Keith Schembri. Resistenza li minħabba fiha m’humiex jirrealizzaw il-gravità tas-sitwazzjoni li timmerita rizenja immedjata ta’ Konrad Mizzi u Keith Schembri l-Kasco, inkella t-tkeċċija tagħhom.

It-Times tal-lum fil-fatt tirrapporta lil Varist jgħid “One sees someone defending somebody else, mentioning seriousness and principles, and then one finds that there are personal obligations and that the two are doing very well together.”

Dan Varist jgħidu fil-kuntest tal-kritika tiegħu indirizzata lejn il-Professur Joe Bannister. Il-mira reali iżda, fil-fehma tiegħi, hi Joseph Muscat u d-difiża li Muscat qed jagħmel lil Konrad Mizzi u Keith Schembri l-Kasco.

Din hi l-politika tal-iskalora li biha l-Gvern ta’ Joseph Muscat filwaqt li jiddefendi lil min mexa ħażin qiegħed, fl-istess ħin, kontinwament, ikanta favur is-serjetà fit-tmexxija imma mhux jirrealizza li qiegħed kontinwament jegħreq, imdawwar bl-iskalora. U kif qallu l-professur l-ieħor, Simon Busuttil, fl-iskalora diffiċli jsalva mill-għarqa.

Fejn sejra l-Air Malta ?

L-istorja tat-Times illum dwar il-bejgħ ta’ parti sostanzjali mill-Air Malta lil Etihad Airways tal-Emirati Għarab Magħquda ilha ġejja.

Wara l-privatizzazzjoni parzjali tal-Enemalta issa jmiss il-privatizzazzjoni parzjali tal-Air Malta. It-tnejn minn partit politiku li meta kien fl-Opposizzjoni dejjem tkellem kontra l-privatizzazzjoni imma meta jkun fil-Gvern jinsa’ kollox. Għamilha fl-Enemalta u issa jmiss lill-Air Malta.

Matul il-ġimgħat li ġejjin jibdew ħerġin l-ewwel dettalji tat-tibdil li jridu jwettqu l-Etihad Airways fil-mod kif topera l-linja tal-ajru, u l-impatt ta’ dan it-tibdil fuq il-ħaddiema tal-Air Malta. Il-komunikazzjoni tal-proposti ser ikun eserċizzju interessanti. Imma iktar minn hekk ser tkun interessanti r-reazzjoni tal-Unions rikonoxxuti.

Ovvjament il-Unions ser jirreaġixxu skond il-proposti li jippreżentawlhom. Imma frankament mhux qed nimmaġina proposti ta’ żieda fil-pagi u fl-allowances u l-anqas titjib fil-kundizzjonijiet tax-xogħol.

Ser ikunu żminijiet interessanti fejn ser inkunu nistgħu naraw il-konsistenza (jew in-nuqqas tagħha) tal-protagonisti.