Fl-2015, l-ambjent taħt assedju. Fl-2016 l-assedju ikompli.

 

Is-sena 2015 kienet waħda li fiha l-ambjent kien taħt assedju. Assedju li bla dubju ser jintensifika ruħu matul is-sena d-dieħla. Għax ma hemm l-ebda dubju li l-aġenda tal-Labour hi waħda kontra l-ambjent.

Bla dubju mument importanti fl-2015 kien ir-referendum abrogattiv dwar il-kaċċa fir-rebbiegħa. Referendum li intilef bi sbrixx imma li xorta wassal messaġġ qawwi, prinċipalment minħabba li huwa riżultat li nkiseb minkejja li kemm il-PN kif ukoll il-PL dejjem appoġġaw il-kaċċa fir-rebbiegħa.

Wara spikka il-każ taż-Żonqor li wassal għal dimostrazzjoni kbira ġol-Belt. Iktar tard il-Gvern ipprova jagħti l-impressjoni li kien qed jagħti kaz u dan billi ċċaqlaq ftit.

Il-qagħda tat-trasport pubbliku matul l-2015 tjibiet ftit imma għadha lura ħafna minn dak li jixraqlu u għandu bżonn dan il-pajjiż. Hi l-unika tama li tista’ tnaqqas il-pressjoni taż-żieda tal-karozzi fit-toroq. Hi l-unika tama għal titjib fil-kwalità tal-arja. Inutli jwaħħlu fil-ħinijiet tal-ftuħ tal-iskejjel.

Matul l-2015 l-ilma tax-xita flok ma jinġabar fi bjar li qatt ma saru, baqa’ jintefa’ fit-toroq. Issa li x-xogħol fuq il-mini taħt l-art ġie konkluż il-periklu fit-toroq ser jonqos għax il-parti l-kbira tal-ilma ser jispiċċa l-baħar. Il-flus li intefqgħu fuq dawn il-mini kienu fil-parti l-kbira tagħhom flus moħlija. Kien ikun iktar għaqli kieku intefqgħu biex l-ilma jinġabar flok biex jintrema.

F’nofs dawn l-aħbarijiet negattivi kollha ġiet ippubblikata l-enċiklika ambjentali tal-Papa Franġisku. Fiha tinħass sewwa t-togħma Latino-Amerikana ta’ Leonardo Boff li tenfasizza r-rabta bejn il-faqar u t-tħassir ambjentali. Hemm tama li din l-enċiklika tista’ tkun ta’ siwi biex iktar nies jiftħu għajnejhom.

F’Ġunju l-Kap tal-Opposizzjoni qalilna li l-PN fil-Gvern għamel diversi żbalji ambjentali u li jixtieq li jibda paġna ġdida. Din id-dikjarazzjoni ta’ Busuttil tikkuntrasta ma dak li ntqal fir-rapport tal-PN dwar it-telfa fejn ġie emfasizzat li l-PN kien vittma ta’ sabutaġġ minn dawk maħtura biex imexxu (inkluż ovvjament mill-MEPA).

Il-battalja tat-torrijiet għadha magħna. Preżentement hemm pendenti żewġ applikazzjonijiet f’tas-Sliema, waħda f’Townsquare (38 sular) u oħra f’Fort Cambridge (40 sular). Ir-residenti, li bħal dejjem jispiċċaw iġorru l-konsegwenzi ta’ dawn id-deċiżjonijiet, huma injorati.

Kellna t-tniġġiż fil-baħar. Diversi inċidenti fil-Port ta’ Marsaxlokk li bihom ġie ikkonfermat, jekk qatt kien hemm ħtieġa ta’ dan, li l-Bajja s-Sabiħa m’għandhiex iktar sabiħa. Dan minħabba li issa l-port sar definittivament wieħed industrijali. L-unika ħaġa li jonqos huwa t-tanker sorġut b’mod permanenti fil-port biex fih jinħażen il-gass.

Nhar is-Sibt jorħos il-prezz tal-petrol u d-diesel. Għal uħud imissu ilu li raħas. Forsi kien ikun aħjar li ma raħas xejn. Hemm bżonn kull mezz possibli biex jonqsu l-karozzi mit-toroq. Il-prezz tal-fuel hu wieħed minn diversi miżuri li jekk użati bil-għaqal jistgħu jagħtu frott. Il-problema imma, sfortunatament hi li ma hemmx volontà politika.

IL-MEPA ser tinqasam. L-ippjanar għalih u l-ambjent għalih. Mhux ser isir wisq ġid b’din il-miżura għax is-saħħa amministrattiva li għandu pajjiż żgħir ġejja miċ-ċokon tiegħu. Meta taqsam l-awtorita f’biċċiet tkun ferm inqas effettiv. Hekk ser jiġri. Il-MEPA ma kienitx qed taħdem sewwa għax ma ħallewiex taħdem sewwa. Għax kienet imxekkla minn bordijiet li jew ma jifhmux inkella b’aġenda moħbija.

Dan hu l-wirt li s-sena 2015 ser tħalli lis-sena 2016. L-unika ħaġa pożittiva hi li bil-mod qed tiżviluppa kuxjenza ambjentali fost il-ġenerazzjonijiet li tielgħin.

Is-sena t-tajba? Forsi.

F’Birżebbuġa, issa l-pass li jmiss.

 

Nigel Mifsud, il-bieraħ, fuq TVM, spjega f’rapport konċiż u informattiv, kif issa, hemm il-provi li l-kontributur ewlieni għat-tniġġiż mill-ħsejjes f’Birżebbuġa hu l-Port Ħieles.

Biex inkun preċiż ir-rapport dwar l-impatti tal-ħsejjes mill-Port Ħieles fuq Birżebbuġa għadu mhux lest għal kollox. L-istudju lest u l-ewwel abbozz tar-rapport ġie diskuss. Jonqos issa li jsiru l-aħħar irtokki biex ikun konkluż ir-rapport finali.

Li sar l-istudju huwa importanti ħafna. Għax issa hemm il-provi li dak li ilhom jgħidu r-residenti hu minnu. Huwa ukoll ikkwantifikat.

Imma tajjeb li nifhmu li biex l-istudju sar kien hemm ħtieġa ta’ ħafna ħidma. Minnu innifsu kien ukoll proċess edukattiv li fih imxew flimkien il-MEPA, l-Port Ħieles u l-Kunsill Lokali ta’ Birżebbuġa.

Kienet triq twila, għax għal bidu mhux kulħadd kien konvint li dik kienet it-triq. Anke matul it-triq kien hemm min ġieli qata’ qalbu. Imma fl-aħħar wasalna. U biex wasalna għandhom mertu diversi persuni.

Dan hu awgurju tajjeb fi tmiem din is-sena. Li bil-paċenzja hu possibli li tasal.

Issa irridu bl-istess ħeġġa nagħmlu l-passi li jmiss: li jittieħdu l-miżuri neċessarji biex il-ħoss jonqos.

Għax, kif dejjem ngħid: hu tajjeb li l-Port Ħieles jagħti kontribut għall-ekonomija tal-pajjiz. Dan il-kontribut, iżda, m’għandux inaqqas il-kwalità tal-ħajja tar-residenti ta’ Birżebbuġa.

Hi rebħa kbira, mhux biss għal Birżebbuġa, li wasalna sa hawn. Inħarsu l-quddiem b’kuraġġ. I

ppubblikat ukoll fuq iNews : l-Erbgħa 30 ta’ Diċembru 2015

 

Qegħdin sew : jabbuża wieħed, iħallsu kollha

F’dawn l-aħħar xhur il-ħabsin kienu qed jingħataw l-opportunità ta’ xogħol fil-komunità. Is-soċjetà kienet qed tagħtihom il-messaġġ li lesta tagħtihom ċans ieħor. Lesta li tgħinhom biex jerġgħu jirrintegraw ruħhom.

Wieħed minnhom abbuża u ħarab. Qabduh ftit wara.

Flok ma ħa kastig min abbuża qed iħallas kulħadd: għax waqqfu lil kulħadd.

Il-messaġġ żbaljat li l-awtoritajiet qed jagħtu hu li kollu ta’ xejn li tipprova tibdel triqatet għax mal-ħażin dejjem jeħel it-tajjeb.

Hemm min jgħid li riedu jagħtu lezzjoni. Forsi. Imma l-unika lezzjoni li qed jagħtu hi waħda : li m’għandhomx idea x’inhuma jagħmlu.

TVam : bejn PL u PN

Il-bieraħ ipprotesta l-PN għax id-diskussjoni fuq TVam kienet żbilanċjata kontra tiegħu billi fiha ħadu sehem Janice Bartolo, ġurnalista ta’ ONE kif ukoll Jes Saliba mill-RTK.

Illum kien imiss lill-PL li jilmenta mill-iżbilanċ għax din id-darba fid-diskussjoni ħadu sehem Dione Borg mill-media tal-PN u Karl Wright mill-RTK.

Tad-daħq jew tal-biki meta dawn għandhom kemm it-TV kif ukoll ir-radio?

Għal Alternattiva Demokratika biss ma jsibux ħin u spazju.

 

Oħtna n-natura tieħu ħsiebna

 

L-enċiklika Laudato Sì tal-Papa Franġisku tpoġġi quddiemna numru ta’ riflessjonijiet dwar il-ħarsien tal-ambjent liema riflessjonijiet huma apprezzati minn kulħadd, inkluż minn min ma jemminx.

Riflessjoni ewlenija hi dwar kif Franġisku l-ieħor, Franġisku ta’ Assisi, tmien mitt sena ilu, kien iqies lin-natura bħal parti mill-familja. Bla dubju ġejna mfakkra  fil-kliem immortalizzat minn Franco Zeffirelli fil-film Fratello Sole, Sorella Luna dwar ħuna x-xemx u oħtna l-qamar.

Din hi stedina biex aħna ukoll inqiesu lin-natura bħala parti integrali mill-familja tagħna. Dan nistgħu nagħmluh jekk napprezzaw iktar ir-rwol importanti li n-natura għandha f’kull waqt ta’ ħajjitna.

Din mhix biss parti mill-filosofija franġiskana. Insibuha ukoll fil-kultura indiġena ta’ diversi popli. Per eżempju, fit-tribujiet Indjani fl-Istati Uniti tal-Amerika kif ukoll fit-tribujiet fid-diversi partijiet tal-Amerika Latina. Hi attitutdni magħġuna ukoll fil-biedja tradizzjonali li żviluppat f’rispett  u sintonija sħiħa man-natura.

Aħna parti mill-istess familja għax niffurmaw parti minn eko-sistema waħda. Kull azzjoni tagħna għanda impatt fuq dak kollu li jseħħ madwarna, bl-istess mod li dak li jseħħ madwarna għandu impatt fuqna. Jekk inniġġsu l-arja qed inniġġsuha għal kulħadd. Dan iwassal mhux biss għal mard respiratorju imma ukoll għall-iżbilanċ fil-klima, tant li l-istaġuni bdew jitħawwdu. La taf iktar meta jispiċċa s-sajf u l-anqas meta tibda ix-xitwa jew ir-rebbiegħa. Dan qed  jeffettwa kemm lill-uċuħ tar-raba’ kif ukoll lis-siġar li donnhom bdew jitgħażżnu. Qed jeffettwa is-sistemi naturali kollha li fuqhom tiddependi l-ħajja.

In-natura taħdem bħall-katina : kull ħolqa marbuta ma’ u msaħħa (jew imdgħajfa) mill-ħolqa ta’ ħdejha.

Ftit iktar minn ħamsin sena ilu, ż-żooloġista Amerikana Rachel Carson ippubblikat il-ktieb tagħha bl-isem Silent Spring (Ir-Rebbiegħa Siekta). Tosserva kif l-użu bikri tal-pestiċidi ma kienx qed jeffettwa biss l-insetti li kienu qed inaqqru l-uċuħ tar-raba’. Imma kien qed ikollu effett drastiku fuq ħlejjaq oħra, bħall-għasafar, insetti u pjanti li huma ta’ għajnuna kbira għalina. Għax l-għasafar li kienu jfittxu lil dawn l-istess insetti kienu qed jiġu b’mod indirett avvelenati minn l-istess pestiċdi. B’dan il-mod kien hemm nuqqas notevoli ta’ għasafar u bħala konsegwenza n-nuqqas tagħhom kien qed jinħass f’rebbiegħa li kienet qed isir dejjem iżjed siekta. Għalhekk Silent Spring. Carson kienet qed temfasizza li l-pestiċidi kien qed ikollhom effetti li jmorru lil hinn minn dak intenzjonat: kienu qed jagħmlu ħsara konsiderevoli lill-eko-sistema.

Ħamsin sena ilu, Rachel Carson kebbset l-ewwel xrara għal attiviżmu ambjentali fl-Istati Uniti tal-Amerika, li wara infirex mal-erbat irjieh tad-dinja. Għax bħala riżultat tal-osservazzjonijiet xjentifiċi tagħha,  iżjed nies indunaw kemm in-natura hi katina waħda : aħna l-bnedmin niddependu ukoll mid-dudu tal-art jew mill-insetti. Din hi l-katina tal-eko-sistema li torbot flimkien lill-bniedem mal-ħamrija u mal-ajru, mal-ilma tax-xita u mal-klima, mal-insetti u mal-annimali li jħokku żaqqhom mal-art.

Għandna ħafna x’nitgħallmu min-natura.

Ħarsu ħarsa madwarkom. Ħarsu lejn is-sigar meta dawn jinżgħu mill-weraq tagħhom. Osservaw kif anke dak il-weraq midbiel, li għalina jidher li ma’ għandu l-ebda użu jew valur, jitmermru w jgħinu lill-ħamrija li terġa’ titma’ lill-istess siġar. In-natura hi bieżla u ma taħlix.

Dawn il-lezzjonijiet sempliċi nsibuhom kontinwament madwarna kieku aħna kapaċi li b’umiltà nħarsu u nosservaw biżżejjed. Għax fi ħsieb Franġisku l-ieħor, in-natura hi bħal oħtna l-kbira li dejjem tieħu ħsiebna.  Anke għalhekk jixirqilha r-rispett. Għax dinja waħda għandna u hi d-dar tagħna lkoll.

kummentarju imxandar fuq RTK : it-Tnejn 28 ta’ Diċembru 2015

The airport and its neighbours

 

Earlier this week, the management of Malta’s International Airport announced a €78 million investment programme, aimed at enlarging the terminal buildings, improving and upgrading existing facilities for the handling of passengers and  further developing a business hub.

The airport terminal at Gudja is Malta’s only such facility and so, to a certain extent, the further development of the existing capacity to handle the arrival and departure of passengers is essential. And yet, due to the limitations of size, the proximity of Gudja’s airport to the surrounding villages of Luqa, Gudja, Kirkop and Safi has to be borne in mind. Size limitations signify that even essential works will have an impact on the surrounding communities and thus have to be thought out carefully.

Its been over five years since MEPA has received a planning application for the consideration of an updated master-plan for Malta International Airport. PA5548/10 was submitted in November 2010. A previous version of the master-plan was approved in 1997 (PA5681/96) while another version, submitted in 2003 (PA5306/03), was withdrawn.

The latest proposed master-plan currently under consideration by MEPA includes provision for the enlargement of the terminal building to include additional facilities to handle passenger traffic as well as the construction of five new buildings for a range of commercial and leisure activities.

The proposed masterplan and the environmental planning statement (EPS) published late in 2014 for public consultation focus on the proposed business hub and emphasise that the well-established trend for international airports is to expand to “include ancillary business and retail facilities.”

The masterplan was fed by two studies commissioned by the Malta International Airport. The first – carried out by Locum Consulting – studied the office market in Malta and apparently concluded that the “high quality office stock supply” is limited in comparison to the existing demand.  An audit of the proposed masterplan was also carried out by Eriksson + Partner GmbH.

The EPS contains selective quotes from these two reports, but the reports themselves have not been made public. Both MEPA and MIA have resisted requests to publish these reports as they consider that they are commercial reports and do not contain information on environmental impact.

Malta’s only airport has its requirements. In particular, it needs to cater for the increasing number of passengers it handles. This year, the number of passengers handled has recently surpassed the 4.5 million mark. It will undoubtedly continue to rise and it stands to reason that the passenger-handling facilties, currently bursting at the seams, need to be upgraded.

What number of passengers is being planned for? What are the forecasts ? This information is not available as part of the documentation which has been published to date.

The inevitable increase in the number of passengers to be handled by MIA will have an impact on the surrounding area. The traffic generated, and the  emissions associated with this, will further deteriorate the air quality in the main roads leading to Gudja. There will also be an increase in noise pollution.

The Environment Planning Statement identified the Ħal-Farruġ Road/Qormi Road roundabout at Luqa as requiring upgrading  as a result of long-term traffic projections made. It did not, however, identify any other major traffic impact on the villages surrounding the airport. In particular, the EPS did not consider it relevant to consider that already, at this point in time, the residential area of Gudja – less than 50 metres away from the boundary of the airport carpark –  is being used by airport employees and passengers as an additional carpark, thereby creating an unnecessary burden on Gudja itself.

The current burden for the airport’s core functions, and the first phase of the Skyparks project, are primarily being borne by the communities of Luqa, Gudja, Kirkop and Safi.

Additional impact due to an increase in the airport’s core functions is unavoidable. But making matters worse through further development of the airport as a business hub is verging on sadistic. Gudja’s airport should not be compared to major airports when determining long-term functions, but rather to regional airports.

Given Malta’s size, practically all facilities are available within a 15-minute drive from the airport. It would hence make sense for the airport’s management to realise that the airport’s corporate social responsibility should not be limited to funding some restoration projects. It is about time that it focused on the fact that human beings reside in the surrounding villages. The airport’s contribution to Malta’s economic performance is welcome but this should not be at the expense of the quality of life of the surrounding communities.

published in The Malta Independent on Sunday, 27 December 2015

Il-Milied it-tajjeb

Nawgura l-Milied it-tajjeb lil kulħadd. Milied li jġib is-sliem. Sliem dejjiemi.

Festa tas-solidarjetà, mhux festa ta’ kummerċ.

Hi ħasra li l-messaġġ reali tal-Milied, ingeżwer kif inhu fit-tlellix, jintilef wara ftit siegħat biex jerga’ jitfaċċa sena oħra. Hemm bżonn li l-valuri tal-Milied, s-sliem u s-solidarjetà, jkunu ċċelebrati kuljum, 366 darba matul is-sena 2016.  Il-Milied it-tajjeb lil kulħadd: kemm lil dawk ta’ rieda tajba kif ukoll li dawk ta’ mingħajr rieda tajba.

 

 

L-operetti fl-Armata ma’ Michelle Muscat

 

Il-Perit Mintoff kien ġieli ddeskriva l-armata bħala waħda tal-operetti. Jiġifieri li tajba għaċ-ċerimonji u għal xejn iktar.

L-aħbar riċenti tal-interventi tas-Sinjura Michelle Muscat biex timmedja bejn Gunner Catania u t-tmexxija tal-armata tindika li l-affarijiet fl-armata reġgħu qabdu n-niżla.

It-Times tal-lum tikkummenta li ċ-Chain of command tal-armata hi dysfunctional. It-tmexxija tal-armata mhux qed tiffunzjona.

Il-Gunner Catania ħass li kellu jmur il-Qorti minħabba li ma sabx ħajt ta’kenn fil-Kmandant.

Dan jagħti sinifikat ikbar lil ħidma tal-Ombudsman biex jinvestiga l-ilmenti ta’ numru ta’ fizzjali dwar il-mod kif ingħataw il-promozzjonijiet. Bil-Kmandant innifsu jagħmel il-high jump u jieħu numru ta’ promozzjonijiet f’4 ġimgħat.

X’inhu ġej fl-ajruport tal-Gudja fl-2016?

Il-bieraħ tħabbar “investiment” fl-ajruport tal-Gudja. Qed jintqal li ser isir investiment ta’ €78 miljun fil-ħames snin li ġejjin biex jitkabbar it-terminal, jinbena blokk ieħor ta’ uffiċini għall-kiri (Skyparks2), lukanda kif ukoll żieda fiż-żona ta’ parkeġġ.

Is-sena l-oħra kellna l-Masterplan tal-airport fl-aħbarijiet li fih kien hemm proposti iktar estensivi. Il-proposti dakinnhar kienu jinkludu ukoll supermarket. Dan is-supermarket ma ssemmiex il-bieraħ imma fir-ritratti ippubblikati xorta jidher!

Ħadd ma jiddubita li t-terminal tal-ajruport qed isir żgħir. Issa ilu użat 24 sena u bil-kwantità ta’ nies li ġejjin u sejrin minn Malta jidher li wasal iż-żmien li jikber.

Imma tajjeb li jkun hemm iktar informazzjoni dwar dak li hu ippjanat għat-terminal: x’inhuma l-miri dwar il-kapaċità tiegħu? X’effett ser ikollu dan fuq iż-żoni residenzjali tal-madwar, b’mod partikolari fuq it-toroq?

Huwa ippjanat li l-airport jintuża ukoll bil-lejl? Kif hu mistenni li dan kollu jeffettwa lil dawk iż-żoni residenzjali li minn fuqhom jitilgħu jew jinżlu l-ajruplani?

Intqal li hu mistenni li jkun hemm deċiżjoni dwar l-applikazzjonijiet neċessarji matul l-2016, u allura dawn jidhru li ser ikunu uħud mill-issues prinċipali quddiem l-Awtorità tal-Ippjanar il-ġdida, s-sena d-dieħla.

ara ukoll fuq dan il-blog:  L-irħula madwar l-ajruport ta’ Malta.

Il-ġenerazzjonijiet ta’ warajna jitolbu kont ta’ għemilna

 

L-iżvilupp sostenibbli hu l-ħolqa li tgħaqqad flimkien lill-ġenerazzjonijiet tal-lum ma dawk ta’ għada, il-ġenerazzjonijiet futuri. Għax l-iżvilupp ikun sostenibbli meta l-għażliet li nagħmlu llum ma jkunux ta’ xkiel għall-ġenerazzjonijiet ta’ għada, meta huma jiġu biex jagħmlu l-għażliet tagħhom.

Il-ġenerazzjonijiet futuri m’għandhomx vuċi fil-preżent. M’għandhomx is-saħħa li jisfidawna meta illum nieħdu deċiżjonijiet li jorbtulhom idejhom. Ħafna drabi hu faċli li ma nagħtux każ tagħhom għax la għandhom vuċi, la għandhom saħħa finanzjarja u l-anqas ma għandhom vot. U fis-soċjetà tagħna, min hu bla vuċi, bla saħħa finanzjarja u iktar u iktar bla vot ftit għandu ċans li jinstema. Kultant, bil-kemm bil-kemm jingħata każ ta’ dawk li għandhom vot, aħseb u ara ta’ dawk li m’għandhomx!

Il-futur ħadd minna ma rah, imma, nistgħu nagħtuh sura bid-deċiżjonijiet li nieħdu illum.

Sfortunatament m’aħniex nagħtu futur tajjeb lill-ġenerazzjonijiet li ġejjin warajna għax qed inħarbtu kull ma jiġi għal idejna.

33% tal-art f’Malta hi mibnija, u ħafna minna inbniet f’dawn l-aħħar tletin sena. Imma nibqgħu nibnu minkejja li għandna 71,080 propjetà residenzjali li hi vojta (skond iċ-ċensiment tal-2011: 41,232 propjetà residenzjali hi vojta s-sena kollha, u 29,848 propjetà oħra tintuża kultant). Nibqgħu nibnu meta l-kwantità ta’ propjetà vojta fiha 9 darbiet daqs il-parti l-mibnija ta’ B’Kara, l-ikbar lokalità fil-gżejjer Maltin.

Kontra kull parir li ħallewlna missierietna, l-parti l-kbira tal-bini l-ġdid tul dawn l-aħħar snin ma fihx bir biex jiġbor l-ilma tax-xita. Flok fil-bir (li ma jeżistix) l-ilma jintefa fit-triqat jew fid-drenaġġ u fl-aħħar, wara li jgħerreq lit-toroq tagħna, jispiċċa l-baħar.

Mhux biss ma nieħdux ħsieb li naħżnu l-ilma tax-xita, talli dorna għall-ilma li taħżen in-natura nnifisha. Dorna għall-ilma tal-pjan, u ħarbatnieh. Użajna dan l-ilma bla limitu tant li naqas sewwa. Il-ftit li baqa’ huwa kontaminat bil-pestiċidi u kimiċi oħra mill-għelieqi tagħna.

In-natura tieħu ż-żmien biex issewwi din il-ħsara kbira. Snin kbar. X’ser inħallu lil ta’ warajna?

Ma jidhirx li hemm rieda li nieqfu mit-tħarbit. Għax issa jidher li ser nibdew kompetizzjoni tal-bini tat-torrijiet f’tas-Sliema. X’għandna bżonn dal-bini kollu meta għandna tant bini vojt?

L-ilma tax-xita ser jispiċċa l-baħar għax il-mini imħaffra taħt l-art issa lesti.

Il-ġenerazzjonijiet ta’ warajna jitolbu kont ta’ egħmilna. Għax qed nisirqulhom ir-riżorsi tagħhom. M’għandhomx vot biex jipprotestaw bih, forsi għalhekk ħadd ma jrid jismagħhom u jagħti kazhom.

kummentarju mxandar fuq l-RTK illum 21 ta’ Diċembru 2015