Ir-referendum u l-partiti politiċi (2)

Joseph Muscat qal li hu kien ser jivvota IVA. Qal ukoll li l-Partit Laburista ma kienx ser jinvolvi ruħu fil-kampanja referendarja.

L-istrateġija politika tal-Partit Laburista kienet waħda ċara ħafna. Kienet illi jipprova jagħti palata lill-kaċċaturi mingħajr ma jiġġieled mal-ambjentalisti.  Għalhekk dak li qal Joseph Muscat.

Meta, iżda, beda jidher illi parti mdaqqsa tal-votanti Laburisti kienu fehmu dan il-messaġġ bħal li setgħu jivvutaw kif xtaqu u fil-polls (kemm dawk pubblikati kif ukoll dawk li nżammu kunfidenzjali) beda jidher vantaġġ għal-LE, anke b’voti minn żoni tradizzjonalment laburisti, bdiet tiżdied id-doża tal- involviment tal-Partit Laburista fil-kampanja referendarja.

Il-kandidati Laburisti għall-Kunsilli Lokali (f’ħafna lokalitajiet) huma u jduru d-djar bdew jikkampanjaw favur l-IVA. Bdew ukoll it-telefonati, prinċipalment fl-aħħar ġimgħa.  Anke fid-djar ta’ attivisti tal-Birdlife u tal- ADZ (AD Żgħażagħ) ċemplu jikkampanjaw favur l-IVA. Araw ftit dak li kiteb Steve Borg, ambjentalist rispettat u ex-kandidat tal-Partit Laburista għall-Parlament Ewropew.

Jiena m’inix sorpriż b’dan kollu minħabba li l-Partit Laburista kellu commitment politiku fuq il-materja. Kien baħnan min emmen jew ittama li l-Partit Laburista ser jibqa’ barra mill-kampanja u b’ħalqu magħluq. Il-kritika tiegħi lill-Partit Laburista mhux li ikkampanja favur l-IVA, iżda li ma kellux il-kuraġġ li dan jikkonfermaħ fil-pubbliku. Ipprova jistaħba wara subgħajh.

Ir-referendum u l-partiti politiċi (1)

 

It-tlett partiti politiċi f’Malta ħadu posizzjonijiet kompletament differenti fir-referendum abrogattiv dwar il-kaċċa fir-rebbiegħa.

Alternattiva Demokratika ġiebet flimkien l-għaqdiet ambjentali kollha u flimkien magħhom organizzat il-ġbir tal-firem li kienu meħtieġa biex ir-referendum ikun jista’ jsir.  Sad-data tad-deċiżjoni tal-Qorti Kostituzzjonali  Alternattiva Demokratika kellha rwol ċentrali fil-kampanja referendarja. Wara dik id-data dan ir-rwol ċentrali kif inhu xieraq għadda għand il-Birdlife. Alternattiva Demokratika baqgħet tinvolvi ruħa fil-preparamenti kollha meħtieġa.

Alternattiva Demokratika kien l-uniku partit politiku f’Malta li ikkampanja favur il-LE. Alternattiva Demokratika hi ukoll l-uniku partit politiku f’Malta li fil-programm elettorali għandu imniżżel ċar u tond li l-kaċċa fir-rebbiegħa trid tispiċċa.