Attendejt għal forum dwar it-titjib fil-kwalità tal-ħajja fin-nofsinnhar ta’ Malta li sar fi SmartCity nhar is-Sibt li għadda u li kien organizzat mill-NGO ambjentali Flimkien għal Ambjent Aħjar.
F’dawn l-okkazjonijiet, il-fus tad-diskussjoni, bħal dejjem, , idur fuq il-konflitt bejn il-ħarsien tal-ambjent u l-kilba għall-flus. Ser jirnexxilna nimxu il-quddiem biss meta jkun ċar li l-interess tan-nies jiġu qabel il-flus: meta l-iżvilupp propost ikun wieħed sostenibbli.
Sfortunatament dan mhux dejjem ċar. M’huwiex ċar minn kif jitkellmu uħud li jħawwdu f’dak li jissejjaħ żvilupp. L-anqas m’hu ċar minn uħud mid-deċiżjonijiet u policies li jiġġebbdu iktar mil-lastku.
L-awtoritajiet pubbliċi suppost li qegħdin hemm biex jiddefendu lill-komunità. Iżda, sfortunatament, bosta drabi iktar iwasslu l-messaġġ li qegħdin hemm biex iservu lill-flus u lill dawk li għax għandhom is-saħħa tal-flus iwieżnu kontinwament lill-poter.
Dan mhux atteġġjament li qed nosservawh illum għall-ewwel darba. Iżda hu mod ta’ imġieba li issa drajniha. Il-kokijiet donnhom li qegħin jinbidlu regolarment. Imma l-menú baqa’ l-istess. It-taħwida fil-borma għadha l-istess, avolja inbidlu l-idejn li qed iħawdu u jagħġnu.
Għax minn kokijiet li mhux imdorrijin jipproduċu ħlief frejjeġ u kawlata ma tistax tistenna żvilupp sostenibbli.
Jeħtieġ li jinbidel il-menú. In-nies trid spazji miftuħa u inqas konkos. Mhux biss spazji mhux mibnija imma fuq kollox aċċess ikbar għan-natura. Anke fin-nofsinnhar tal-pajjiż.
ippubblikat fuq iNews L-Erbgha l-1 t’April 2015
Blog ta' Carmel Cacopardo 