Kif jinbidlu l-ideat!

Huwa ta’ sodisfazzjon li l-ideat tal-politiċi fil-Parlament dwar l-immigranti inbidlu tul is-snin.

Niftakru sewwa meta l-PN fil-Gvern kien jappoġġa lill-Gvern Taljan. Dakinnhar il-Gvern Taljan b’Berlusconi Prim Ministru u l-Legista Roberto Maroni Ministru tal-Intern kien qed imexxi l-quddiem politika ta’push-back: jiġifieri li jimbotta lill-immigranti lura lejn il-Libja. Inkella jekk isalvhom jeħodhom lura fil-Libja.

Ankè Joseph Muscat bħala Prim Ministru bl-appoġġ ta’ Manwel Mallia Ministru tal-Intern mexxa l-quddiem politika ta’ push-backs. Niftakru meta ordnaw ajruplani tal-AirMalta, biex jieħdu lill-immigranti lura lejn il-Libja fis-sajf tal-2013. Dakkinhar il-Gvern immexxi minn Muscat kien inżamm mill-Qorti Ewropeja tad-Drittijiet tal-Bniedem fuq talba tal-għaqdiet Maltin li jaħdmu favur id-drittijiet tal-immigranti.

Dawk iż-żmienijiet fortunatament spiċċaw għax issa jidher li kkonvertew u m’għadhomx jitkellmu jew ikesksu favur il-push-backs.

Huwa ta’ sodisfazzjoni li anke fuq din ġew jaqblu ma Alternattva Demokratika li dejjem tkellmet kontra l-push-backs u favur is-solidarjetà.

Huwa tajjeb li issa lkoll leħen wieħed kontra push-backs u favur is-solidarjeta. Hekk bħala pajjiż aħna ħafna iktar kredibbli meta ninsisitu li l-Unjoni Ewropeja għandha terfa’ parti mill-piż magħna l-Maltin.

Iż-żjara tal-President Ġermaniż f’dan is-sens hi ukoll ċelebrazzjoni favur id-dinjità tal-immigrant. Tajjeb ħafna. Imma għad baqa’ ħafna x’isir għax għadna fil-bidu.

 

Il-Majestà Tiegħu ddejjaq bl-ispanjulett milqut

 

Il-Majestà Tiegħu, l-Prim Ministru, iddejjaq li l-ispanjulett milqut waqa’ fl-iskola St Edward’s College fil-Birgu. Dehrlu li dan kien iżżejjed u li kien meħtieġ messaġġ ċar. Minn fejn kien qiegħed ibati fl-Azerbajġan ħabbar fuq Twitter li kien ta’ l-ordni biex l-istaġun jieqaf, minnufih.

Żmien ir-rejjiet u l-irġejjen ilu li spiċċa, imma min jiddeletta bid-deċiżjonijiet arbitrarji, dan, donnu li għadu ma irrealizzahx. Il-Majestà Tiegħu imma hu tal-fehma li x-xewqa tiegħu hi l-liġi. Għalhekk kien ħabbar għal darba tnejn li ser jivvota IVA biex il-qaddejja fidili jagħmlu bħalu.

Għax għamlu bħalu uħud jidhrilhom li ankè huma akkwistaw is-setgħa li jagħmlu li jridu. Għax ankè huma jidhrilhom li għandhom ikunu l-fuq mill-liġi.

Dak li tiżra’ taħsad, Ġuż  …………..

 

L-aħħar ċans? Għandek ċans!

Mela l-Kaċċaturi San Umbertu qalu li l-każ tal-ispanjulett li ntlaqat minn żewġ tiri u li waqa’ fil-ground tal-Kulleġġ St Edward’s kien tort ta’żewġt itfal li kellhom senter misruq.

Issa sirna nafu li ser jittella’  l-Qorti persuna ta’ 25 sena li għandu liċenzja tal-kaċċa. Fil-fatt ittella’ żgħażugħ ta’ 21 sena skond kif tirrapporta it-Times online.

Ovvjament il-Kaċċaturi San Umbertu kienu qed jippruvaw jgħattu x-xemx bl-għarbiel. Għax jidher li ma kienu jafu xejn, imma fl-istess ħin riedu jgħidu li min spara ma kienx kaċċatur.

Issa ilna għaddejjin kważi ġimgħatejn b’numru ta’ każi ta’ illegalitajiet li nqabdu u oħrajn li ma nqabdux.

Fosthom insibu s-segwenti :

15 t’April:   Daqquqa maqtula fil-Manikata; kaċċatur min-Naxxar immultat €2,500. qal li ħasibha gamiema;

16 t’April:  Venewwa milqut f’Ħal-Far; kaċċatur jeħel tlett xhur ħabs;

22 t’April:  Daqquqa milquta misjuba fil-Miżieb;

24 t’April:  Żagħżugħ  milqut miċ-ċomb sparat minn kaċċatur f’Pembroke; il-kaċċatur jagħtieh daqqa ta’ ħatra; il-kaċċatur jittella l-Qorti;

25 t’April: il-CABS xhieda ta’ sparar fuq spanjulett ħdejn l-ajruport;

25 t’ April: il-CABS xhieda (b’filmat) ta’ kaċċatur jispara wara l-curfew;

25 t’April:  il-CABS isibu daqquqa feruta oħra moħbija fil-Miżieb;

26 t’April:  gawwi isfar b’feriti biċ-ċomb misjub f’Pembroke;

27 t’April: Spanjulett ferut jaqa’ fil-ground tal-Kulleġġ St Edwards School, il-Birgu;

B’żieda ma dan kien hemm total ta’ 63 każ ta’ użu ta’ tapes b’tisfir irrekordajat tal-għasafar (illegal bird callers) li ġew identifikati mill-CABS.

Dan kellu jkun l-aħħar cans.

Joseph irid idaħħaq

 

Wara l-każ tal-ispanjulett milqut darbtejn li waqa’ fil-ground tal-iskola St Edward’s College fil-Birgu Joseph Muscat għalaq l-istaġun tal-kaċċa fir-rebbiegħa għal din is-sena tlett ijiem qabel ma kien fil-fatt jagħlaq.

Kien ikun aħjar kieku Muscat spjega kif inhu possibli li jkun hemm min jispara lejn l-għasafar (protetti u mhux) fl-abitat u ħdejn skola.

X’kienu qed jagħmlu l-Pulizija biex f’dawn il-ġranet ma qabdu lil ħadd?

Possibli li ma qabdu lil ħadd fl-inħawi?  Possibli li ħadd ma ċempel jilmenta dwar il-kaċċa fl-inħawi fuq 119?

Joseph Muscat irid idaħħaq, bħas-soltu.

Il-ħarsien ta’ Villa Gwardamangia

Għandha raġun Astrid Vella f’isem FAA (Flimkien għal Ambjent Aħjar) li ffukat fuq Villa Gwardamangia fil-konferenza stampa ta’ nhar is-Sibt li għadda. Għax il-wirt storiku tagħna hemm l-obbligu li nieħdu ħsiebu dejjem, irrispettivament minn min hu s-sid tiegħu. Veru li l-istat Malti jgħin. Imma s’issa għin lil min seta jgħin ruħu. Fejn sidien ta’ propjetà ma kellhomx ir-riżorsi neċessarji s’issa ma sar xejn. Jew kważi xejn.

Kien għalhekk inkuraġġanti li fl-ewwel reazzjoni tiegħu l-Gvern qal li qed ifittex soluzzjoni għall-problema ta’ Villa Gwardamangia. Tajjeb. Issa huwa importanti li s-soluzzjoni mhux biss ifittxuha, imma li nsibuha ukoll!

X’għandu jsir?

L-ewwel nett irridu nifhmu li mhux kull sid ta’ propjetà għandu biżżejjed riżorsi biex jieħu ħsieb din it tip ta propjetà.

It-tieni, jekk il-wirt storiku tagħna m’aħniex ser nieħdu ħsiebu bħala nazzjon dan ser ikompli jitmermer u b’hekk, biċċa biċċa,  jintilef darba ghal dejjem.

It-tielet: l-istat għandu l-obbligu li ġaladarba jkun ikklassifika bini bħala protett għandu jassigura li dan il-bini jibqa’ f’kundizzjoni tajba. Ma jagħmilx sens li niċċaqalqu meta l-froġa tkun diġa saret.

Ir-raba’ huwa meta l-bini jingħata l-protezzjoni għall-ewwel darba li l-awtoritajiet għandhom jagħmlu l-verifiki jekk is-sidien tal-bini jistgħux jieħdu ħsiebu. Jekk f’dan l-istadju jistabilixxu li s-sidien ma jistgħux jieħdu ħsieb tal-bini allura l-awtoritajiet għandhom dak il-ħin jagħmlu l-arranġamenti alternattivi meħtieġa biex ikunu huma li jidħlu għal din ir-responsabbiltà. Il-Gvern għandu ħafna strumenti legali li jippermettulu jagħmel arranġamenti ta’ din ix-xorta.

Huwa biss b’dan il-mod li nistgħu nieħdu ħsieb sewwa tal-wirt storiku tagħna.

Fil-kaz ta’ Villa Gwardamangia din ġiet skedata fl-20 t’April 2001 (ara pjanta hawn taħt). L-iskedar ta’ propjeta’ fil-prattika jfisser li hemm limitazzjonijiet dwar xi żvilupp jista’ jsir fil-bini innifsu (inkluż alterazzjonijiet) u madwaru. Ikun tajjeb illi l-protezzjoni li l-MEPA tagħti lill-bini storiku jkun ifisser ukoll għarfien aħjar tal-obbligu li nżommu dan il-bini f’kundizzjoni tajba.

Il-mistoqsija loġika hi: matul dawn l-14-il sena x’sar mill-awtoritajiet biex jassiguraw ruħhom li Villa Gwardamangia tinżamm f’kundizzjoni tajba?

It-tweġiba ovvja hi : xejn. Għax li sar xi ħaga ma kienitx tkun fil-kundizzjoni li hi illum.

Ikun għaldaqstant xieraq li meta l-awtoritajiet Maltin jagħtu l-protezzjoni lill-bini storiku tagħna jieħdu ukoll passi biex jassiguraw ruħhom li dan ser jinżamm f’kundizzjoni tajba.

The Summit of Shame

 

Thursday’s EU Heads of Government Summit was a summit of shame. Through its conclusions, the European Council showed once more that, collectively, it lacks the moral spine to address the xenophobic fringes of European society.

The special summit ended up being just a collection of half-baked measures.  The EU heads of government have ignored the calls of the  political groups of the EU parliament which called for a more coherent EU migration policy, and for fixed quotas of asylum-seekers to be taken in by each and every EU member country.

Despite the available financial resources being increased, only a limited mandate has been given to the Triton operation for the saving of lives in the Mediterranean. No possibility of applying for humanitarian visas directly in the troubled countries in the African continent has been made possible and, with all its vaunted cry of responsibility-sharing, there is only the establishment of a voluntary pilot project on resettlement across the EU of people qualifying for protection.

These half-baked decisions will not solve the humanitarian crisis in the Mediterranean: they will only make it worse.

The number of immigrants waiting along the Libyan coast are said to be close to one million. They are there in the hope of building a new future. They know  they are risking their lives but, most probably, they will still try – they have been  at the wrong end of the stick for many years.

They are escaping from war, violence and endless poverty and they have a right to be helped and rescued. Triton is not fit for this purpose, not only because of its limited resources but also because it is primarily aimed at protecting borders and not at rescuing people.

The illusion that stopping Mare Nostrum would discourage these dangerous trips has been proved false: migrants and asylum-seekers have continued flocking to Europe at an increased rate and this situation will not change in the  coming weeks and months. The member states of the EU have to acknowledge that priority needs to be given to saving lives and giving refuge to people, not making ‘fortress Europe’ even more impenetrable, because this has been shown to be tragically impossible.

There is no way around it: all EU member states must accept a greater share of refugees and facilitate legal access to the EU. Instead of sealing borders, procedures and safe corridors must be set up to this effect and it is therefore urgent to establish a properly financed, European wide Mare Nostrum to enhance the search for and rescue of people drifting in the Mediterranean Sea.

The EU heads of government do not have the moral spine to stand up to Europe’s xenophobic fringes. They do not have the political will to implement a policy of solidarity across the EU.  I can therefore only conclude that this week’s  EU Summit can be considered a summit of shame, as it has prioritised the security of borders over  the safety of human beings.

published in The Malta Independent on Sunday: 26 April 2015

Spiċċa l-kafè

 

Lino Farrugia waqt il-kampanja referendarja kien qalilna li jekk kaċċatur fil-kampanja jiltaqa’ ma xi ħadd għaddej jimxi dan probabbilment joffrilu kafè.

Jidher li ż-żgħażugħ Olandiż li kien f’Pembroke kmieni dal-għodu kien ftit sfortunat. Probabbilment li l-kaċċatur viċin tiegħu kien spiċċalu l-kafè għax minflok ma ngħata tazza kafè spiċċa ntlaqat biċ-ċomb.

Skond il-gażżetti online dan iż-żgħażugħ Olandiz intlaqat f’siequ  u spiċċa l-isptar biex ikun imdewwi għal feriti ħfief.

Dejjem skond il-gazzetti online iż-żgħażugħ spiċċa ukoll insulentat u mhedded.

Jidher li spiċċa l- kafè!

 

Iċ-ċavetta li tista’ tiftaħ il-bibien magħluqa ………………

 

Mhux l-ewwel wieħed li ser nikkummenta li bir-riżultati elettorali ta’ tmiem il-ġimgħa kulħadd hu kuntent. Ovvjament din hi reazzjoni artifiċjali ħafna u għandha titqies biss bħala l-ewwel reazzjoni sakemm kulħadd ikollu ċ-ċans li jifli ftit ir-riżultati daqsxejn iktar fil-fond.

Iċ-ċifri uffiċjali, per eżempju jgħidu li Alternattiva Demokratika kisbet 1.10% tal-voti mitfugħa f’dan ir-rawnd ta’ elezzjonijiet lokali. Dawn iċ-ċifri huma korretti imma ma jagħtux l-istampa rejali. Dan minħabba li AD ikkontestat biss f’7 lokalitajiet minn 34. Il-lokalitajiet li fihom AD ikkontestat l-elezzjonijiet nhar il-11 t’April l-anqas ma huma għal kollox l-istess lokalitajiet li fihom AD ikkontestat fl-2012 u allura ftit li xejn tista’ tagħmel paraguni.

Fil-Qala, fin-Nadur u f’Ħal-Qormi AD kisbet numru żgħir ta’ voti li huma kumparabbli kemm ma dawk miksuba fl-elezzjoni ġenerali kif ukoll, fejn applikabbli, ma’ parteċipazzjoni f’elezzjonijiet oħra tal-Kunsilli Lokali fl-istess lokalitajiet. F’dawn il-lokalitajiet mela jkun ġust li wieħed jikkonkludi li AD baqgħet fl-istess ilma.

Imma mhux l-istess jista’ jingħad fil-lokalitajiet l-oħra. F’Ħ’Attard reġa’ ġie elett għal darba oħra s-Segretarju Ġenerali ta’ AD Ralph Cassar li fl-ewwel għadd kiseb 7.3% tal-voti mitfugħa.  Mhux biss reġa’ ġie elett imma kiseb ammont ta’ voti iktar mis-soltu, u, iktar importanti minn hekk, wiret biżżejjed voti mingħand kandidati oħra (PN, PL u Indipendenti) biex ġie elett f’lokalita fejn il-Partit Laburista naqqas il-presenza tiegħu billi tilef kunsillier. Issa dan il-fatt għandu l-importanza tiegħu prinċipalment għax ifisser li Alternattiva Demokratika qed tikkonsolida l-egħruq tagħha f’dik iż-żona ta’ Malta li hi iktar sensittiva minn żoni oħra għal materji ambjentali.

Argumenti simili jistgħu jingħadu għal-lokalita’ ta’ San Ġiljan fejn il-kandidat ġdid u żgħażugħ Gulio Caruana irdoppja l-voti (ġieb 5.4%) li kisbet il-kandidat ta’ AD fl-istess lokalita fl-2012. Żieda simili kellu Simon Galea fuq San Pawl il-Baħar fejn irid jingħad li kienu bil-voti tiegħu, meta ġie eliminat, li l-PN seta jirbaħ il-lokalità ta’ San Pawl il-Baħar. L-istess kif kien ġara fil-Mosta fl-2012 bil-voti li dakinnhar kienu inkisbu minngħand Robert Callus.

Min-naħa l-oħra kienet esperjenza ġdida l-kandidatura taż-żgħazugħa Monique Agius fuq Ħaż-Żebbuġ li kisbet 3.1% tal-voti l-ewwel darba li kkontestat.

Dan kollu jrid ukoll ikun ikkunsidrat fl-isfond tad-49.6% miksuba mill-LE fir-referendum kontra l-kaċċa fir-rebbiegħa. Dan ir-referendum kien riżultat ta’ petizzjoni li bdiet Alternattiva Demokratika flimkien ma’ 13-il għaqda ambjentali fil-pajjiż. Fil-parti l-kbira tagħhom dawk li ivvutaw LE m’humiex votanti li soltu jivvutaw Alternattva Demokratika. Huwa ovvju li fil-parti l-kbira tagħhom is-soltu jivvutaw lill-partiti oħra. Ta’ l-inqas fil-konfront ta’ uħud, dan mhux bil-fors jibqa’ l-każ u dan in vista tal-kummenti diversi minn dawk li ma qablux mal-posizzjoni li ħadu l-partiti l-kbar.

Din hi storja li għad trid tiżviluppa matul it-tlett snin li ġejjin. Jekk tiżviluppax jew le f’ċaqlieq ta’ votanti min-naħa għall-oħra tal-ispettru politiku huwa kmieni biex jingħad imma l-ingredjenti biex dan iseħħ qegħdin hemm. Għandek persentaġġ għoli ta’ votanti li ma mxewx mad-direzzjoni indikata mill-mexxejja tal-partiti l-kbar. Għal uħud mhux importanti li kellhom opinjoni differenti mill-mexxejja. Imma għal oħrajn li ivvutaw LE fuq prinċipju tal-ħarsien tal-bijodiversita fir-rebbiegħa il-mistoqsijiet mhux imwieġba huma interminabbli. Huwa l-ewwel darba li l-partiti l-kbar kellhom l-opportunità li jagħmlu għażla ċara. Għamluha u issa ħadd ma għandu l-iskuża li ma jafx fejn hu.

Għax bla ma trid bil-fors tirrifletti u tistaqsi lilek innifsek : kif tista’ tieħu posizzjoni favur l-ambjent fir-referendum u mbagħad ma tagħtix l-istess piz lill-ambjent f’elezzjonijiet oħra?  Għal uħud mill-votanti ma hemm xejn ħażin li l-ambjent jingħata prijorita sekondarja, imma għal numru dejjem ikbar jidher li dan mhux il-każ.

Kemm hu kbir dan in-numru għad irridu naraw. Kliem l-ambjentalista Alan Deidun fis-Sunday Times ta’ nhar il-Ħadd li għadda huwa ċar:

“Effectively, the spineless stance taken by both PL and PN MP’s effectively meant that over 124,000 Maltese citizens were not represented by their elected parliamentarians, bar one. This is the boldest of statements about our political class…..the aspirations of such a large minority have only been voiced by a party – AD – which is not even represented in Parliament…..yet another quirk of democracy.”

Din hi l-isfida li Alternattiva Demokratika għandha quddiema bħala riżultat tal-votazzjoni tal-11 t’April. Hi opportunità unika li mhux ser tirrepeti ruħha fil-futur qarib. Il-futur ta’ Alternattiva Demokratika jiddependi fuq kemm ser tkun kapaċi matul ix-xhur li ġejjin taddatta ruħha biex issarraf din l-opportunità.

Bħala konsegwenza tar-riżultat tal-11 t’April diversi qed jinteressaw ruħhom iktar fil-ħidma ta’ Alternattiva Demokratika. Dan jawgura tajjeb għall-futur għax jagħti l-possibilità lill-Alternattiva Demokratika li torganizza ruħha aħjar, biex twassal b’mod iktar effettiv il-messaġġ tagħha li l-ħarsien tal-ambjent jiddetermina l-kwalità tal-ħajja ta’ kull wieħed u waħda minna peró l-iktar ta’ dawk fil-periferija tas-soċjetà.

Ir-riżultat tal-votazzjonijiet tal-11 t’April fih iċ-ċavetta li biha jistgħu jinfetħu ħafna bibien li illum huma magħluqa.

Dejjem sakemm ma tilħaqx tinbidel is-serratura.

Fin-nofs, nisfidaw il-mewt

L-immigranti miġburin mat-tul tal-kosta tal-Libja jafu li ser jisfidaw il-mewt. Imma f’pajjiżhom m’għandhomx futur. Bejn is-sogru kbir għal ħajjithom, x’ħin ikunu bejn sema u ilma, u l-ħajja ta’ miżerja f’pajjiżhom lesti jissugraw. Il-miżerja f’pajjiżhom hi tant kbira li ma jaħsbuwiex darbtejn biex jiffaċċjaw l-isfruttament tan-negozjanti tal-mewt u l-qilla tal-baħar.

Qed jingħad li ħallsu $2,000-il ras għal-passaġġ bejn il-Libja u Sqallija fuq biċċa qoxra li għerqet. Għalihom aħjar il-mewt mill-ħajja li qed jiffaċċjaw.

X’għandu jsir? Żgur li ma baqax iktar ħin għall-paroli. L-imblokk tal-portijiet minnfejn jitilqu l-immigranti m’hu ser isolvi xejn. Dan diġà sar u bħala konsegwenza kien hemm iktar li issugraw ħajjithom.

Il-ġlieda kontra n-negozjanti tal-mewt li qed tipproponi l-Unjoni Ewropeja hi pass tajjeb. Imma l-iktar li hu meħtieġ hu li l-Libja jkollha Gvern demokratiku li jkun jista’ jgħaqqad lill-pajjiż u jmexxih b’awtorità. Gvern li jkun jista’ jikkontrolla l-kosta u l-fruntieri u jirrispetta lil niesu. Ankè dan il-pass, meta jseħħ, ikun pass kbir il-quddiem, imma mhux biżżejjed.

L-immigranti jieqfu ġejjin meta jkun jagħmel sens għalihom li jibqgħu f’pajjiżhom. Meta l-għajnuna internazzjonali li diġà qed tingħata lil pajjiżhom, tibda tħalli l-frott. Meta pajjiżhom ma jibqax iktar għarkuptejh.

Ħafna mill-immigranti ġejjin minn żoni ta’ gwerra ċivili. Inkella minn pajjiżi fejn in-nuqqas ta’ xita wasslet l-agrikultura f’kollass totali. Il-bidla fil-klima fil-fatt hi ukoll waħda mill-fatturi li qed timbotta lill-immigranti biex jitilqu minn pajjiżhom.

F’wieħed minn dawn il-pajjiżi, is-Somalja, l-amministrazzjoni pubblika tal-pajjiż iddiżintegrat u mhux faċli li tinbena mill-ġdid. Il-komunita internazzjonali – inkluża l-Unjoni Ewropeja – diga ħadmet ħafna f’dan is-sens, imma r-riżultati jiġu bil-mod.  Imma fl-aħħar din hi l-unika soluzzjoni.  Meta jkun possibli li l-immigranti irabbu l-fiduċja f’pajjiżhom mill-ġdid, imbagħad tinstab soluzzjoni dejjiema għall-mewġa tal-immigranti fil-Mediterran li kontinwament jisfidaw il-mewt.

Sadanittant kull min hu irrabjat għall-immigranti għandu jdur fuq dawk il-pajjiżi li jinnegozjaw l-armi u armaw liż-żewġ naħat fil-gwerer ċivili.  Inkella jista’ jdur fuq dawk il-pajjiżi li mhux jagħmlu biżżejjed biex jindirizzaw il-bidla fil-klima. L-immigranti huma l-vittmi f’dan kollu u għandhom ħtieġa kbira ta’ solidarjeta rejali.

Pajjiżna huwa prattikament l-ewwel fruntiera għal dawn in-nies. M’hiex għażla tagħna, l-anqas m’hi għażla tagħhom, iżda hi għażla tal-ġografija li poġġiet lil pajjiżna fuq ir-rotta tal-immigrazzjoni.

Ħlief għal xi mumenti qosra taħt kull wieħed minn l-aħħar żewġ Gvernijiet, meta kien hemm xi boloħ jitkellmu jew irewħu favur il-push-backs, pajjiżna dejjem kien fuq quddiem b’solidarjetà rejali.  Hekk għandu jibqa’ avolja l-piż hu kbir u ma nifilħux għalih waħedna. Għax li nagħmlu dak li hu sewwa m’għandu qatt jiddependi minn kemm ħaddieħor jagħmel jew ma jagħmilx dmiru. Ir-rispett lejn id-dinjità tal-bniedem huwa dak li għandu jmexxina l-quddiem. Hu tajjeb li dan issa jidher li hu aċċettat u li ġie imwarrab il-ħsieb li Malta tista’ xi darba tikser apposta l-obbligi internazzjonali tagħha.

Qegħdin hawn f’nofs il-Mediterran biex nisfidaw lill-mewt w inkunu għassiesa favur il-ħajja. Sadanittant kull għajnuna li nirċievu, merħba biha.

Traġedja umana madwarna

 

Madwarna qed tiżviluppa traġedja umana. Traġedja li qed tintiseġ minn dawk li qed jagħmlu l-kummerċ mill-ħajja umana.

Waqt li l-pajjiżi Ewropej iparlaw u jsejħu laqgħat ta’ emergenza fi Brussel, fil-Mediterran, fuq il-fruntiera tal-Unjoni Ewropeja Malta, l-Italja, Spanja, l-Greċja u Ċipru qed jissieltu biex isalvaw il-ħajjiet. Il-problema mhiex problema ta’ Malta, tal-Italja, ta’ Spanja, tal-Greċja jew ta’ Ċipru. Hi problema tal-Ewropa kollha.

Dak li qed jiġri illum mhux xi ħaga ġdida. Ilna s-snin, bis-sofferenza tkompli tiżdied bil-paroli li s’issa ma jwassal għall-ebda soluzzjoni.

Il-bieraħ it-Tnejn, fil-Lussimburgu, l-Unjoni Ewropeja  ġiebet flimkien lill-Ministri tal-Intern u tal-Affarijiet Barranin tal-Unjoni biex jiddiskutu azzjoni komuni fid-dawl ta’ din it-traġedja. Jidher li hemm kunsens dwar il-ħtieġa ta’ ġlieda ikkordinata kontra n-negozjanti tal-mewt.

Fil-waqt li hu ċar li ser isir sforz kollettiv biex isalvaw lil dawk kollha mitluqa għall-mewt, fittixt fil-gazzetti Maltin online dwar x’ser jiġri minn dawk li jkunu ġew salvati. Ir-risposta sibtha fir-rapport tal-Guardian li jgħid li fuq bażi volontarja l-pajjiżi membri ser jirrilokaw 5,000 ruħ, u dan bħala proġett pilota. Jiġifieri anke issa f’din il-kriżi ta’ proporzjonijiet li qatt ma rajna bħala il-pajjiżi membri tal-Unjoni Ewropeja għadhom ma jridux jaċċettaw li għandhom obbligu ta’ solidarjeta’.

Is-solidarjeta m’għandhiex  issir b’mod volontarju: għandu jkun rikonoxxut li hemm l-obbligu biex kull wieħed mit-28 pajjiż membru tal-Unjoni Ewropeja jerfa’ l-piż flimkien mal-pajjiżi membri l-oħra.

Bla dubju dan ser ikun l-argument ta’ Malta fis-summit tal-mexxejja tal-Unjoni Ewropeja nhar il-Ħamis li ġej.  Alternattiva Demokratika taqbel perfettament li Malta tinsisti li kull pajjiż jerfa’ parti mill-piż. Imma konxju li fl-Unjoni hemm mexxejja bħal Cameron li qed jiġġieled elezzjoni ġenerali li fiha qed iwiegħed li jnaqqas d-dħul ta’ immigranti fil-pajjiż, sfortunatmaent jiena ma tantx qed nara possibilita li dan iseħħ.