Il-festa tal-Milied hi okkażjoni ta’ kuntrasti u konflitt bejn valuri differenti.
Fuq naħa s-solidarjetà, fuq in-naħa l-oħra l-ħela u l-kunsum esaġerat.
L-appelli għas-solidarjetà f’dawn il-ġranet tal-Milied mill-mexxejja tal-pajjiż (kemm dawk ċivili kif ukoll dawk reliġjużi) bħal donnu jwassal il-messaġġ li s-solidarjetà hi attività ristretta għal dawn iż-żminijiet. Mhiex l-intenzjoni tal-mexxejja li jwasslu messaġġ ta’ din ix-xorta, imma sena wara l-oħra dan hu l-messaġġ li sfortunatament qiegħed jasal.
Avolja f’dawn il-ġranet nitkellmu dwar dawk li huma inqas ixxurtjati, ftit nirriflettu fuq il-fatt li m’hemm l-ebda xorti assoċjat mal-faqar. Għax il-faqar hu maħluq mill-bniedem matul il-ġranet l-oħra tas-sena. Il-ħolqien tal-faqar jieħu break qasir fil-ġranet tal-Milied! Is-solidarjetà hi attivita li għandna neżerċitaw f’kull waħda mill-ġranet tas-sena. M’għandniex nagħtu l-impressjoni li din għandha tkun limitata għall-ġranet tal-Milied.
Huwa f’dan is-sens li għandna nħarsu lejn l-istrateġija kontra l-faqar, strateġija li nieda l-Gvern f’dawn il-ġranet. Dan ukoll huwa l-iskop tal-Oġġettiv numru wieħed minn 17 li l-Ġnus Magħquda preżentment qed tikkunsidra fil-proposta dwar Sustainable Development Goals, diskussjoni utli li qed issir fuq skala internazzjonali.
Dawn humal-konflitti li tpoġġilna quddiemna s-soċjeta tal-lum f’dawn il-ġranet tal-Milied. Il-Milied it-tajjeb, tul is-sena kollha.
Blog ta' Carmel Cacopardo 