Il-ħatra ta’ Wenzu Mintoff bħala Imħallef inevitabilment terġa’ tiftah il-polemika jekk min kien fil-politika għandux ikun ikkunsidrat għal ħatra fil-ġudikatura.
L-argument fil-fehma tiegħi m’għandux ikun l-impenn politiku, passat jew riċenti, imma jekk il-persuna nominat għandiex il-kompetenza biex taqdi d-doveri ta’ ġudikant.
Kellna diversi ġudikanti Maltin li ġew maħtura fuq il-bank tal-ġudikatura anke direttament mid-dinja politika.
Kellna l-każ tat-tieni Prim Ministru ta’ Malta. Francesco Buhagiar fis-sena 1924 kien ħatar lilu innifsu Imħallef u wara irriżenja minn Prim Ministru. Iċ-ċajta fis-snin għoxrin kienet li dan ħares fil-mera u lix-xbieha ta’ quddiemu qalila “minn għada, int Imħallef” ! Buhagiar kien mill-Unione Politica Maltese, wieħed miż-żewġ partiti li eventwalment ingħaqdu w iffurmaw il-Partit Nazzjonalista fl-1927.
Kien hemm ukoll il-każ ta’ Luigi Camilleri, ukoll fis-snin għoxrin. Kien elett fil-Parlament biex jirrappreżenta lil Għawdex f’isem il-Partit Demokratiku Nazzjonalista immexxi min-Nerik Mizzi. Sussegwentement inħatar Maġistrat ta’ eta żgħira, eventwalment Imħallef u fis-snin 50 temm il-karriera tiegħu bħala Prim Imħallef.
Waqt il-gwerra kien hemm il-każ ta’ George Borg mill-Partit Kostituzzjonali ta’ Gerald Strickland li fl-1941 inħatar Prim Imħallef meta l-Ingliżi warrbu lil Sir Arturo Mercieca minn Prim Imħallef.
Fis-snin 50 kien hemm żewġ Ministri tal-Edukazzjoni fil-Gvernijiet immexxija minn George Borg Olivier, Carmelo Schembri u Fortunato Mizzi li t-tnejn inħatru fil-ġudikatura. Schembri fis-snin 80 kien ukoll Prim Imħallef. It-tnejn kienu eletti f’isem il-PN fil-Parlament.
Fis-snin 50 kellna lil Ġuże’ Flores, wieħed mill-ahjar avukati fil-kriminal li qatt ipproduċa dan il-pajjiż. Flores kien Speaker nominat mill-Partit Laburista fl-1955 meta nħatar Imħallef. Irtira fil-bidu tas-snin 70 bħala Viċi President tal-Qorti Kostituzzjonali.
Iktar riċenti kellna lill-Imħallef Joseph Filletti u lill-Imħallef Lino Agius, irtirati dan l-aħħar li t-tnejn kienu kandidati mal-Partit Laburista fl-elezzjoni tal-1971. Kellna ukoll lill-Imħallef Philip Sciberras li fis-sena 1977 kien Membru Parlamentari elett flok Ġuże’ Abela f’isem il-Partit Laburista, u lil Peppinu Cassar li kien Segretarju Parlamentari għad-Djar f’isem il-PN li nħatar Maġistrat fl-1998, jew lil Lorraine Schembri Orland li ikkontestat l-elezzjoni ġenerali tal-1987 mal-PN u inħatret Imħallef ricentement.
Il-lista hi twila u ma nafx jekk ħallejtx lil xi ħadd barra.
L-argument m’għandux ikun li persuna għax kienet involuta fil-politika tiskwalifika ruħha. Għandna nfittxu jekk il-persuna nominata għall-ġudikatura hiex kapaċi kif ukoll jekk hiex persuna ta’ integrita.
L-istorja għandha tieqaf hemm u dan għal kull ħatra li issir.
Inkun prużuntuż jekk ngħid iktar.
Ippubblikat ukoll fuq iNews : il-Ħamis 17 ta’ Lulju 2014
Blog ta' Carmel Cacopardo 
Is this the same Wenzu Mintoff who was one of the founders of AD? Gee Carmel I thought you might have mentioned that..in the meantime most Maltese gave a political leaning and Wenzu is no different. Let’s hope he makes a good judge..
Naħseb punt ieħor importanti li ma ssemmiex hu illi ġudikant għandu jkun midħla sew tad-dinja tal-qorti. Meta fil-passat m’hux daqshekk ‘il bogħod inħatru ġudikanti illi kienu sajmin mill-prattika tal-qorti, batew ferm u m’hux dejjem ingranaw, anke wara snin fl-awla. Dan ta’ detriment għall-proċess ġudizzjarju u għall-individwi illi jfittxu ġustizzja. U dan jgħodd ferm u ferm aktar għall-imħallfin fejn il-kwistjonijiet jistgħu jkunu ferm aktar intrikati.
Dak li qed jgħid Joe Ellis hu ta’ importanza kbira. Ġa kellna każ ieħor xi snin ilu fejn persuna li l-Gvern innomina biex tkun imħallef eventwalment ma saritx u dan minħabba li ma kelliex esperjenza l-Qorti.
Dan huwa wieħed minn diversi affarijiet li jridu jkunu jiġu eżaminati biex ikun stability jekk il-persuna li ser tinħatar hiex kompetenti jew le.
Ara ukoll: http://www.timesofmalta.com/articles/view/20021108/local/andr-eacute-camilleri-turns-down-post-of-judge.163259
Hemm ukoll Albert Borg Olivier de Puget, neputi ta’ George Borg Olivier u Membru Parlamentari tal-PN għal ħafna snin li nħatar Maġistrat fil-bidu tas-snin 80 mill-Gvern immexxi mill-Perit Mintoff. Fl-1987 il-Gvern Nazzjonalista ħatru Ambaxxatur Pariġi.
kien hemm anke’ Joe Cassar
Iva. Fil-fatt imsemmi: Peppinu Cassar!