L-interess nazzjonali

 

Qed jgħidulna li min jitkellem b’mod kritiku dwar dak li jkun qed jiġri f’Malta barra l-pajjiż ikun qed jaġixxi kontra l-interess nazzjonali.

Jekk taqra dak li qed jingħad qiesu hemm xi obbligu li f’fora internazzjonali kull Malti għandu l-obbligu li jfaħħar u jappoġġa dak li jagħmel il-Gvern. Bħala eżempju ġieli jgħidulna li d-delegazzjoni Laburista fil-Parlament Ewropew appoġġat il-kandidatura ta’ Tonio Borg għal Kummissarju Ewropew. Qiesu jridu jgħidulna li għamlu hekk minkejja li kienu jafu li dik ma kienitx għażla tajba, iżda huma xorta taw l-appoġġ tagħhom, ovvjament fl-interess nazzjonali!

Fil-fatt meta d-delegazzjoni Laburista appoġġat il-kandidatura ta’ Tonio Borg (minkejja li kienet taf li dik kien proposta żbaljata tal-Gvern immexxi minn Lawrence Gonzi) imxiet kontra l-interess nazzjonali, għax l-interess ta’ Malta kien li jkollna Kummissarju differenti.  Tonio Borg minkejja l-kwalitajiet tajba tiegħu ma kienx għażla tajba għall-kariga ta’ Kummissarju Ewropew.

Bħalma l-Labour dakinnhar żbaljaw, illum jippretendu li l-iżball tagħhom jimitah kulhadd. Jippretendu appoġġ għami għal dak li jagħmel il-Gvern. Taqbel u ma taqbilx. Fl-interess nazzjonali, ovvjament.

Ma hemm l-ebda obbligu li nagħtu appoġġ lill-Gvern meta dan jiżbalja. La f’Malta u l-anqas barra minn Malta.  Hu kontra l-interess nazzjonali li tappoġġa proposti żbaljati biex tidher taparsi patrijott.

X’tagħmel il-GWU dwar il-proposta tal-Gvern dwar il-bejgħ taċ-ċittadinanza hi għażla tagħha. Il-GWU għandha kull dritt (u obbligu) li tasal għall-konklużjonjiet tagħha dwar dak li jkun għaddej. Kif jagħmel ħaddieħor. Pero’ l-President tal-GWU ma għandu l-ebda dritt jippretendi u jinsisti li d-diskussjoni ma tmurx lil hinn minn xtutna. Dak li qed jipproponi l-Gvern dwar iċ-ċittadinanza għandu, implikazzjonijiet serji lil hinn minn xtutna u għalhekk hu floku li l-Parlament Ewropew jiddiskuti l-materja f’nofs Jannar 2014.

Dak kollu li jiġri Malta qatt ma kien ta’ interess għalina biss. Iktar u iktar illum li niffurmaw parti mill-Unjoni Ewropeja. Dak kollu li jiġri f’Malta jinteressa lil kulħadd. Bl-istess mod jinteressa lilna dak li jiġri f’pajjiżi oħra ukoll, kemm dawk li pajjiżi li huma qrib tagħna kif ukoll dawk li huma iktar il-bogħod.

Per eżempju kien hemm żmien meta l-Libja, fi żmien Muammar Gaddafi, ftehmet ma Sarkozy (dakinnhar President ta’ Franza) dwar ix-xiri ta’ impjant nuklejari biex dan ikun istallat mal-kosta Libjana ħalli jipproduċi ilma tajjeb għax-xorb mill-ilma baħar. Dan l-impjant, jekk il-kostruzzjoni tiegħu jseħħ, jista’ jkollu impatt negattiv fuq Malta, iżda minkejja dan ħadd ma fetaħ ħalqu dwaru ħlief Alternattiva Demokratika. L-anqas meta l-Italja taħt Silvio Berlusconi ipprovat tibni impjant nuklejari 94 kilometru l-bogħod minn Għawdex (f’Palma di Montechiaro mal-kosta t’isfel ta’ Sqallija) ukoll ħadd ma fetaħ ħalqu f’Malta ħlief Alternattiva Demokratika. Dan minkejja l-potenzjal ta’ impatt diżastruż ta’ dan l-impjant fuq il-gżejjer Maltin.

L-interess nazzjonali dakinnhar kien jitlob li l-Gvern u l-Opposizzjoni jiftħu ħalqhom. Iżda kemm il-PN kif ukoll il-Labour dakinnhar baqgħu siekta t-tnejn. Bħala riżultat ta’ dak is-skiet dakinnhar irrenjaw l-interessi ta’ Franza, tal-Libja u tal-Italja, mhux l-interess nazzjonali ta’ Malta.

Fi ftit kliem is-skiet biss huwa kontra l-interess nazzjonali. Għandna l-obbligu li niftħu ħalqna dejjem. Nitkellmu b’mod responsabbli iva, imma mhux li nżommu ħalqna magħluq.

Hu fl-interess nazzjonali li min hu tal-fehma li l-iskema tal-bejgħ taċ-ċittadinanza proposta mill-Gvern ta’ Malta hi żbaljata jesprimi ruħu pubblikament, dejjem sakemm dan isir b’mod responsabbli. Ikun qed jimxi kontra l-interess nazzjonali min, minkejja dan, jibqa’ ħalqu magħluq. Hu biss is-skiet li jagħmel il-ħsara.

ippubblikat fuq iNews, it-Tlieta 31 ta’ Diċembru 2013

Għawdex presepju?

L-aċċess liberu u immedjat bejn Malta u Għawdex mhux xi ħaġa li bdejna nargumentaw dwarha issa. L-argument ilu għaddej is-snin. Niftakar, meta kont għadni żgħir nisma’ l-argumenti sħan dwar il-possibilita’ ta’ pont bejn Malta u Għawdex fis-snin 60. Riċentement l-argument issoffistika ftit ruħu u hemm min hu mħajjar mill-ħolqien ta’ mina taħt il-baħar bejn Malta u Għawdex.

Qabel iżda ma wieħed iqies jekk proġett bħal dan jistax isir, kif ukoll kemm jiswa’ u minn fejn ser jitħallas, ikun għaqli li nifhmu ftit xi skop irridu li jintlaħaq bi proġett bħal dan, u dan qabel ma nibdew biss nidħlu fid-dettall biex nikkunsidraw l-impatti ambjentali.

Bla dubju l-iskop ta’ min imexxi l-quddiem l-idea ta’ għaqda fiżika permezz ta’ pont jew mina  hu li din l-għaqda fiżika tnaqqas il-ħin biex persuna residenti Għawdex tasal għax-xogħol jew għal-istudju l-Universita’ f’Malta. Tiffaċilita’ ukoll il-ħidma tal-industrija li jonqsulha d-diffikultajiet biex twassal il-prodotti tagħha lejn is-swieq, kemm dawk lokali kif ukoll dawk barranin. Fi ftit kliem min imexxi l-quddiem l-idea ta’ pont jew mina jara dawn l-aspetti posittivi li jirriżultaw mill-fatt li Għawdex ikun parti integrali minn Malta. Pero’ sfortunatament jinsa’ l-bqija. Ma tistax u m’għandex, biex tmexxi l-quddiem l-idea tiegħek tarmi l-ideat ta’ ħaddieħor.

Ma nafx jekk qatt ġiex ikkunsidrat l-impatt fuq it-turiżmu tal-proposta ta’ mina jew pont. Għax b’mina jew pont, lit-turist ftit jibqa’ xi jħajjru biex jibbaża ruħu f’Għawdex waqt il-mawra tiegħu f’dawn il-gżejjer. B’pont jew mina, l-attrazzjoni ta’ Għawdex għat-turist tkun kważi identika bħal dik ta’ reġjuni oħra fil-gżejjer Maltin. Filwaqt li dan għalija hu ovvju, tajjeb li jsir eżerċizzju biex dan ikun ikkwantifikat biex meta jittieħdu d-deċiżjonijiet kulħadd ikun jaf x’inhu jagħmel, fejn qiegħed u x’inhuma l-konsegwenzi ta’ dak li nippjanaw u nagħmlu.

Għax fl-aħħar irridu bħala pajjiż niddeċiedu mhux jekk Għawdex ikunx magħqud ma’ Malta b’pont jew mina, imma dwar x’direzzjoni ekonomika għandha tieħu l-gżira Għawdxija. It-turiżmu f’Għawdex żgur li għandu potenzjal li jikber . Mhux qed nirreferi għat-turiżmu tradizzjonali iżda dak magħruf bħala eko-turiżmu.

L-eko-turiżmu għandu potenzjal kbir f’Għawdex. Jista’ faċilment jaħdem id f’id ma l-agrikultura u mal-ħarsien tal-ambjent. Inħarsu l-ambjent u nkattru x-xogħol permezz ta’ turiżmu li jirrispetta n-natura.

Bħalissa qed nitkellmu ħafna dwar l-agri-turiżmu fil-kuntest ta’ tibdil tal-politika tal-ippjanar dwar l-użu tal-art f’żoni agrikoli. Ma ġewx ippubblikati studji li jiġġustifikaw dak li ġie propost. Hemm ħafna potenzjal.

Per eżempju minn studji diversi li saru nafu li n-natura għandha effett terrapewtiku. Meta l-bniedem jirristabilixxi l-kuntatt dirett tiegħu man-natura iserraħ il-menti tiegħu u jikkalma. Il-kuntatt dirett man-natura tnaqqas l-istress.  Hemm branka ta’ xjenza magħrufa bħala eko-terapija li tistudja kif in-natura tista’ tkun utilizzata iktar fil-qasam tas-saħħa mentali. NGO Ingliża fil-qasam tas-saħħa mentali meta xi snin ilu ippubblikat ir-rapport tagħha intitolat Eco-therapy : A Green Agenda for Mental Health emfasizzat li n-natura għandha l-potenzjal li tkun għodda utli ħafna għall-futur tas-saħħa mentali tagħna lkoll. Dan jista’ jsir b’diversi modi: b’mixjiet fil-kampanja, tours ċiklistiċi, żjarat fir-rżiezet inkluż li ngħixu għall-perjodu ta’ żmien fost komunitajiet ta’ bdiewa jew sajjieda ………… u bosta ħidmiet oħra. Din hi ħidma li tfittex li tistabilixxi mill-ġdid ir-rabta bejn il-bniedem u n-natura. Din hi attivita’ li tnaqqas l-istress, ir-rabja, l-ansjeta’, l-għejja mentali u problemi diversi oħra ta’ saħħa mentali. (ara ukoll fuq l-istess suġġett il-blogpost tiegħi  Reconnecting to Our Roots)

Dan kollu hu fost il-potenzjal li għandu Għawdex. Potenzjal li joħloq ix-xogħol imma fil-ħolqien tiegħu jirrispetta l-ambjent. It-turiżmu flimkien mal-ambjent joffri futur interessanti għal Għawdex, ferm iktar milli jkun presepju.

Ibbazat fuq il-kummenti ippubblikati f’Illum : il- Ħadd 29 ta’ Dicembru 2013

Xi jridu l-kaċċaturi ……………

Il-kaċċaturi qed jiġbru l-firem biex permezz ta’ petizzjoni jitolbu lill-Parlament sabiex dan jemenda l-liġi tar-referendum. Qed jitolbu li fejn ikunu ser jintlaqtu interessi ta’ xi minoranza ma jkunx jista’ jsir referendum abrogattiv.

Issa tajjeb li nifhmu li kull fejn hemm polemika taħraq – u l-kaċċa fir-rebbiegħa hi polemika taħraq li ilha magħna għal diversi snin – ser ikun hemm min jaqbel u min ma jaqbilx. Dan iwassal biex ikun hemm maġġoranza li jkollha opinjoni u minoranza li jkollha opinjoni differenti!

Dan hu minn awl id-dinja. Dwar kull ħaġa taħt il-kappa tax-xemx.

Fuq ħafna affarijiet jieħu d-deċiżjoni l-Parlament jew il-Gvern u minkejja li jkun hemm kemm min jaqbel kif ukoll min ma jaqbilx l-affarijiet jieqfu hemm.

Imma hemm affarijiet li minkejja li l-Parlament u/jew il-Gvern jieħu deċiżjoni dwarhom l-opinjoni pubblika tibqa’ tbaqbaq kontra dak li jkun ġie deċiż. Għal dawn iċ-ċirkustanzi qiegħed il-proċess ta’ referendum abrogattiv: referendum li permezz tiegħu 10% tal-votanti jsejħu lill-bqija biex flimkien jieħdu id-deċiżjoni huma. Deċizjoni li torbot li kulħadd.

Fi ftit kliem allura, meta l-kaċcaturi u dawk li jaqblu magħhom qed jitolbu li tkun emendata l-liġi tar-referendum qed jgħidu li ma jridux illi d-deċiżjoni dwar il-kaċċa fir-rebbiegħa jeħduha l-votanti direttament. Iridu li jibqgħu jeħduha l-Gvern u l-Parlament.

Issa meta nafu li l-Parlament u l-Gvern huma illum (u kienu hekk ukoll il-bieraħ) ostaġġi tal-interessi tal-kaċċaturi dan ifisser biss li mhux biss jibqa’ kollox kif inhu talli d-deċiżjonijiet jibqgħu jittieħdu kontra x-xewqat tal-opinjoni pubblika.

Il-kaċċaturi permezz tal-petizzjoni taghħom qed imexxu l-quddiem proposta li hi essenzjalment anti-demokratika.

Il-liġijiet ta’ Malta sal-lum jipprovdu l-għodda demokratika tar-referendum abrigattiv. Din l-għodda kif rajna tul is-snin mhux faċli biex tagħmel użu minna tant li kemm ilha teżisti ħadd ma għamel użu minnha.

Issa fl-aħħar inqalgħu ċirkustanzi li fihom l-għodda demokratika tar-referendum abrogattiv tista’ tkun is-soluzzjoni.

Bis-serjeta’ nemmnu fid-demokrazija? Lesti li nħalluha taħdem?

Matul il-ġimgħat li ġejjin insiru nafu t-tweġiba tal-Gvern għal dawn il-mistoqsijiet.

Sadanittant nafu x’iridu l-kaċcaturi. Iridu li jiġu mnaqqsa d-drittijiet demokratiċi tiegħek u tiegħi.

Grazzi Sur President

Niżilli għasel id-diskors tal-bieraħ, lejliet il-Milied, tal-President tar-Repubblika, fejn tkellem dwar il-ħtieġa li nifhmu iktar l-impenn tagħna l-Maltin favur is-solidarjeta.

Il-President Abela, kif inhu xieraq, kien meqjus fi kliemu. Uża l-opportunita biex min għandu sens li jifhem jifhem. Dawk kollha li huma fil-ħajja pubblika għandna l-obbligu li iffaċċjati bil-kriżi tal-immigrazzjoni mill-baħar ma nirrikorrux għall-populiżmu.

Din kienet sena fejn kellna min rewwaħ il-mibgħeda razzjali. Kellna min ipprova jirkeb il-kultura tal-indifferenza li qed tittrasforma liċ-ċentru tal-Mediterran f’ċimiterju.

Kliem il-President Abela hu f’waqtu.  Tajjeb li nippriedkaw is-solidarjeta, iżda meta jiġi l-waqt għandna l-obbligu li nipprattikawha ukoll. U l-ewwel pass hu li ħadd ma jrewwaħ għas-sentimenti ta’ mibgħeda razzjali.

Grazzi, Sur President. Il-Milied it-tajjeb.

Solidarjeta’ u Sliem

 

Dawn il-ġranet huma jiem ta’ solidarjeta’ u sliem.  Mhux xieraq li nuża l-ispazju għal argumenti u polemiċi. Avolja anke is-solidarjeta u s-sliem huma sors ta’ polemika.

Is-solidarjeta’ u s-sliem huma l-unika sinifikat veru ta’ dawn il-jiem li tul is-snin ġew ikkapparrati minn sens qawwi ta’ konsumiżmu u xalar li jmorru lil hinn minn dak li hu aċċettabbli.

Il-Milied it-Tajjeb lil kullħadd.

oriġinalment ippubblikat fuq iNews it-Tnejn 23 ta’ Diċembru 2013

Żmien il-bużullotti għadu magħna

Fil-qasam tat-transport pubbliku, minkejja l-paroli w it-tejatrin, żmien il-bużullotti għadu magħna. Jekk hux ser idum jew le għad irridu naraw.

Wasalna sa hawn għax il-Gvern ta’ Gonzi kellu fiduċja f’esperti li ma jifhmux u f’Ministru li jeċċella fil-bluff.

It-Trasport Pubbliku falla diversi snin ilu u r-riforma tiegħu kienet teħtieġ attenzjoni u sensittivita. It-tnejn li huma kienu nieqsa mir-riforma li wikkewlna. Għax filwaqt li kien hemm titjib fil-kwalita’ tal-karozzi tal-linja użati din ma kienitx riflessa ukoll fil-kwalita’ tas-servizz.

Il-puntwalita’, li f’diversi lokalitajiet kienet l-unika ħaġa tajba fis-servizz l-antika tat-trasport pubbliku, kienet l-iktar ħaġa li spikkat. Issa l-puntwalita’ hi l-iktar ħaġa bażika fis-servizz pubbliku. Flimkien mal-firxa tas-servizz hi l-iżjed fattur essenzjali li a bażi tagħha n-nies tagħżel li titlaq il-karozza privata d-dar.

Il-kejl tas-suċċess tat-trasport pubbliku m’huwiex biss li dan ikun ta’ kwalita’ iżda fuq kemm jirnexxilu jħajjar lin-nies jagħmlu użu minnu. It-tnaqqis tat-traffiku mit-toroq, għaldaqstant hu wieħed mill-modi kif nistgħu inkejlu s-suċċess jew le tat-trasport pubbliku. Jekk dan iseħħ inkunu nistgħu ngħidu li qed noqorbu lejn soluzzjoni. Jekk le, żmien il-bużullotti jibqa’ magħna.

Daqqa ta’ ħarta oħra

L-aġir tal-Maġistrat Carol Peralta nhar il-Ħamis hu daqqa ta’ ħarta oħra għall-Qrati. Huwa ta’ sfortuna kbira li l-ħidma ġenwina ta’ ħafna biex il-Qrati jiksbu kura l-fiduċja tan-nies issib persuna bħal Peralta li għal darba oħra jwaqqa’ l-Qrati għaż-żuffjett.

Mhux l-unika wieħed tul is-snin li bl-imġeba tiegħu kisser ix-xogħol tajjeb li għamlu bosta.

Imma bħal dejjem il-party ta’ Peralta li ser jibqgħu jiftakru in-nies.

Il-ġurnalist tat-Times Ivan Martin li mar jinvestiga u għamel xogħolu għamel sewwa. Imma l-Maġistrat sfortunatament jidhirlu li mhux biss hu il-fuq mill-Liġi imma li m’għandux ikun soġġett għall-iskrutinju pubbliku.

Ġaladraba l-Magistrat Peralta jidhirlu li mexa sewwa u bl-iktar mod arroganti ser jibqa’ għaddej ma nafx x’inhu jistenna l-Prim Ministru biex iressaq mozzjoni fil-Parlament ħalli Peralta jitneħħa minn Maġistrat immedjatament.

Il-Qrati  tagħna jixirqilhom aħjar.

Għaliex Referendum Abrogattiv dwar il-kaċċa fir-Rebbiegħa

Referendum abrogattiv isir fuq inizzjattiva popolari. Mhux għax iridu l-Gvern.  L-inizjattiva u l-proċeduri meħtieġa ma jiddependux mill-Gvern tal-ġurnata. Ir-rwol tal-Gvern hu biss ta’ spettatur: iħares u josserva x’inhu jiġri.

Dan it-tip ta’ referendum ifisser li l-pubbliku permezz tas-soċjeta’ ċivili jorganizza ruħu biex titħassar miżura legali: liġi jew regolamenti jew parti minnhom. Isir minħabba li l-forzi politiċi fil-Parlament ikunu naqsu li jaġixxu skond kif tixtieq l-opinjoni pubblika.

Fis-soċjeta’ tagħna mhiex xi ħaġa ta’ kuljum li differenza ta’ opinjoni bejn il-pubbliku u l-Parlament twassal biex is-soċjeta ċivili tieħu l-passi u taġixxi hi. Fil-fatt minkejja li d-dritt ta’ referendum abrogattiv ilu jeżisti sa mill-1998 qatt s’issa ma ġie użat.

Differenzi ta’ opinjoni fil-pajjiż ikun hemm kontinwament, imma biex dawn id-differenzi jwasslu għal referendum abrogattiv teħtieġ li jkunu dwar materji ta’ serjeta’ kbira li dwarhom ikun hemm sensittivita’ fis-setturi differenti tas-soċjeta.

Huwa dan li wassal għall-formazzjoni tal-Koalizzjoni għall-Abolizzjoni tal-Kaċċa fir-Rebbiegħa li permezz tagħha tlettax-il għaqda ambjentali  flimkien ma’ Alternattiva Demokratika poġġew l-isforzi tagħhom flimkien għal dan l-għan komuni. Sal-lum kien rari ħafna li twaqqfu dawn it-tip  ta’ koalizzjoni. Fil-passat kellna l-Front kontra l-Golf Course u l-Front kontra l-Hilton.

Il-qagħda bħalissa hi li l-partiti politiċi fil-Parlament iddeċidew tul is-snin li l-veduti tal-lobby tal-kaċċa kienu iktar importanti minn dawk tal-lobby ambjentali. Iddeċidew li jipproteġu l-kaċċa fir-rebbiegħa minkejja li jafu li l-maġġoranza kbira tal-poplu Malti ma taqbilx ma dan. Dan għamluh minħabba konsiderazzjonijiet elettorali, għax il-lobby tal-kaċċa kien iktar organizzat jinsisti b’qawwa dwar it-talbiet tiegħu. L-insistenza tal-lobby ambjentali kien wieħed iktar paċifiku u allura għal snin twal kien “taken for granted” .

Li l-poplu Malti huwa kontra l-kaċca fir-rebbiegħa mhux biss jafha kulħadd imma ġiet ukoll imkejla mill-poll li sar mill-Malta Today iktar kmieni din is-sena fejn ġie identifikat li ftit inqas minn 60% tal-votanti ma jaqblux mal-kaċċa fir-rebbiegħa.

Il-lobby tal-kaċċa qed tgħid li l-kaċċa hi dritt. Qed jgħidu li għandhom id-dritt li joqtlu l-gamiem u s-summien fil-ħarifa meta dawn huma fl-iktar perjodu debboli u jeħtieġu protezzjoni. Għax żmien ir-rebbiegħa u ż-żmien meta l-għasafar ibejtu. Jpassu minn fuq Malta fi triqithom biex ibejtu.

Ir-Referendum propost jagħti lura lill-għasafar il-protezzjoni meħtieġa. Għax anke l-Għasafar huma  tagħna lkoll.

FKNK & the European Year of Citizens

Vilnius has just hosted the concluding conference of the European Year of Citizens.

Entitled “How to make every year a year of citizens” it focused on the promotion of citizenship as a key element of EU democracy.

The Lithuanian Prime Minister Algirdas Butkevičius addressing this concluding conference stated “Openness to the world, promotion of democratic values – this is what makes the EU model unique and attractive”.

Yet back home in Malta we have the Federation of Hunters and Trappers (FKNK) proposing the curtailment of referendum rights which are being utilised for the first time by civil society in Malta to promote an abrogative referendum to put an end to spring hunting.

It is clear that the promotion of democratic values is an alien value to FKNK. Certainly not a fitting end to the European Year of Citizens.

Meta taqbeż iċ-ċinga

Qrajt l-istqarrija oriġinali li l-uffiċjali tal-FKNK qraw waqt il-konferenza stampa li kellhom il-bieraħ. Hemm differenza sostanzjali bejn dak li qalu huma u dak li irrappurtaw il-media.

Il-media kienet prudenti  u ħalliet barra l-attakki vojta u bla sens li l-FKNK għamlet kontra l-Birdlife, il-Fondazzjoni Gaia, Arnold Cassola Chairman ta’ Alternattiva Demokratika u David Camilleri Tal-Bediq kandidat Għawdxi ta’ Alternattiva Demorkatika.

Lill-uffiċjali tal-FKNK  Lino Farrugia u Joe Perici Calascione m’għandi xejn xi ngħid kontra tagħhom personalment. Ilni snin twal nafhom it-tnejn li huma. Il-kritika tiegħi hi kontra l-idejat li qed imexxu l-quddiem. Għandhom kull dritt imexxu l-quddiem l-ideat u l-ideali tal-membri tal-FKNK.  Naf li m’għandhomx bżonn lili biex jgħidilhom dan. Huwa dritt li jiena nirrispetta anke jekk diversi drabi, fil-fehma tiegħi, jesaġeraw kemm f’dak li jgħidu kif ukoll fil-mod kif jgħiduħ.

L-FKNK allura, issa bdiet ħidma fuq l-inizzjattiva tagħha. Triq li l-liġi dwar ir-referendum tkun emendata b’mod li jkunu rispettati dak li huma qed isejħu d-drittijiet tal-minoranzi.  Issa l-liġi dwar ir-referendum diġa tipproteġi dawn id-drittijiet. Fil-fatt id-drittijiet bażiċi tal-bniedem fil-Kostituzzjoni kif ukoll fil-Liġi dwar il-Konvenzjoni Ewropeja dwar id-Drittijiet tal-Bniedem ma jistgħu jintmissu minn l-ebda referendum.  Dwar il-minoranzi, kontra dak li qed jgħidu tal-FKNK, jeżistu konvenzjonijiet u trattati li jiddefinuhom. Fosthom fil-Ġnus Magħquda. Fil-qasam tal-ħarsien tad-drittijiet tal-minoranzi normalment nifhmu minoranzi reliġjużi, minoranzi kulturali jew assoċjati ma’ lingwa minoritarja kif ukoll minoranzi etniċi. Hemm ukoll obbligi li jirriżultaw minn liġijiet lokali u trattati internazzjonali li permezz tagħhom hi imħarsa d-diversita’ : dik dwar orjentazzjoni sesswali, kulur tal-ġilda jew razza.

Il-kaċċa fir-rebbiegħa ma taqa’ taħt l-ebda waħda minn dawn il-kategoriji.

Il-proposta tal-FKNK li biha qed jitolbu lill-Parlament jibdel il-Liġi tar-Referendum biex referendum kontra l-kaċċa fir-rebbiegħa ma jkunx jista’ jsir jirrifletti l-egħruq fondi tal-valuri demokratiċi li jħaddnu l-istess FKNK.  Jidher ċar li qabżitilhom iċ-ċinga. Għax tilfu kull tama li jikkonvinċu jridu jattakkaw il-proċess demokratiku tar-referendum.