Naf li qed noħlom meta ngħid li George Pullicino għandu jirreżenja. Imma naf ukoll li l-politika hi t-twettiq tal-ħolm.
Pullicino għandu jirreżenja għax arroganti u inkompetenti. Dwar l-arroganza tiegħu inkiteb ħafna matul il-perjodu li kien responsabbli għall-MEPA. L-agħar perjodu għal ħafna snin għall-ambjent f’pajjiżna.
Nhar is-7 t’Awissu 2012 il-Kummissjoni Ewropea ippubblikat rapport analitiku dwar kif qed titħaddem fis-27 pajjiż membru l-politika dwar l-immaniġjar tal-iskart. Dan ir-rapport hu intitolat Screening of Waste Management Performance of EU Member States.
F’dan ir-rapport Malta ġiet ikklassifikata fost dawk il-pajjiżi li għandhom deficit fi prattikament l-oqsma kollha tal-implimentazzjoni tal-politika tal-immaniġjar tal-iskart. Ir-rapport hu iktar iebes minn hekk, juża l-kliem implementation gap. Jiġifieri ghad baqa’ ħafna ħafna xi jsir biex il-paroli u l-fatti ma jibqgħux jikkuntrastaw!
Il-Greċja u l-Bulgarija biss ġew ikklassifikati agħar minn pajjiżna. Il-Greċja qegħda f’tarf ta’ kollass ekonomiku u l-Bulgarija mifnija bil-korruzzjoni! Il-Litwanja kklassifikati daqsna!
Dak ċertifikat!
Għal dawn l-aħħar tmien snin ir-responsabbilta’ politika għall-politika dwar l-iskart kienet ta’ George Pullicino.
Kienet responsabbilta li għaddhielu Lawrence Gonzi fl-ewwel Kabinett tiegħu. Responsabbilta’ li ħadha mingħand Ninu Zammit u għaddiha lil Pullicino f’Marzu 2004.
F’dawn it-tmien snin Pullicino iktar kien moħħu fil-konfront politiku bħal dak li infexx fih f’Marsaskala dwar l-Impjant ta’ Sant Antnin milli li jiżviluppa politika dwar l-iskart li taħdem għax hi aċċettata. Bl-arroganza tipika tiegħu rnexxielu jkisser il-possibilita ta’ kunsens mal-komunitajiet u tefa lura ħafna l-iżvilupp ta’ sens komunitarju fil-politika tal-immaniġjar tal-iskart. Ir-riperkussjonijiet għadhom qed jinħassu anke’ illum.
Hu veru li r-rapport tal-Kummissjoni Ewropea janalizza l-qagħda kif kienet sentejn ilu u dan għax jaħdem fuq statistika u rapporti li ilhom ftit ippubblikati. Imma dan ma jgħoddx biss għal pajjiżna. Jgħodd ukoll għal pajjiżi bħall-Awstrija, l-Olanda, id-Danimarka u l-Ġermanja li kienu fuq quddiem nett fil-klassifika u komplew jissaħħew!
Anke’ jekk imxejna ftit il-quddiem, ftit iktar milli jindika r-rapport, xorta għadna lura ħafna. Għal dan jaħti biss George Pullicino.
Ir-rapport juri falliment fil-parti l-kbira mill-kriterji addottati biex jitkejjel il-performance tal-pajjiżi membri tal-Unjoni Ewropea.
Dan hu ċertifikat ta’ falliment li għalih għandu jassumi responsabbilta politika l-Ministru George Pullicino. Jiġifieri għandu jkun raġel u jgħid “fallejt” u jirreżenja. Jagħmel il-wisa’ għal min jista’ jagħti kontribut pożittiv għall-implimentazzjoni tal-politika dwar l-iskart.
Blog ta' Carmel Cacopardo 
Veru li baqghalna hafna x’naqdfu, imma to be fair irridu niftakru wkoll minn x’hiex tlaqqna. Minn dejjem qisna l-immaniggjar tal-iskart bhala “litter control”, u dil-mentalita’ ghada mghana. Ara hafna kunsilli lokali kif ghadhom jahsbuha!
Jien ukoll jidhirli li George Pullicino naqas serjament f’din il-materja hekk importanti!
Hu mohhu jdur fuq il-fish farms li sa fejn naf jien dejjem iddefenda, avolja jaf li dawn qed iniggzu l-hahar serjament. l-aqwa li xi whud igawdu finanzajarjament akkost li jbati l-ambjent komuni.
U xi nghidu ghall-Krizi serja ta’ l-ilma f’pajjizna? Boreholes kullimkien ikomplu jtellghu l-ilma tax-xorb sabiex igawdu l-bazuzli.
La Pullicino u l-anqas lawrence Gonzi ma kienu etikament korretti meta hallew din il-kwistjoni sejra ghall-lura…..
Pullicino lanqas lahaq ix-xewqa tieghu li jara lill-Maltin jorganizzaw ”picnics” fil-Maghtab. Imbaghad jipprova jimpressjona lit-tfal ta’ l-iskola u jbellaghhielhom li Malta qed tiehu hsieb l-ambjent kif suppost.
Pullicino jahti…pero jahti aktar minnu dak ta’ fuqu. Li dejjem ibbakkja Ministri inefficenti ghaliex ghalih il-Partit jigi qabel l-interess nazzjonali. Hasra!